འབྲི་ལུང་དགོན

སྣ་མཁར་དགོན་ནས་ཤར་ངོས་སུ་སྤྱིར་བཏང་འཁོར་ལམ་བརྒྱུད་སྤྱི་ལེ་བརྒྱད་ཙམ་སོང་ན་བཙུན་དགོན་དེར་སླེབས་ཀྱི་རེད། འབྲི་ལུང་ཞེས་པ་ནི། སྒྲུབ་ཐོབ་དབུས་སྨྱོན་པ་གང་སར་གནས་སྐོར་དུ་ཕེབས་ནས་མཐར་འབྲི་ཞིག་གིས་ལུང་བསྟན་པ་ལྟར་གནས་དེར་བཞུགས་སྟབས་འབྲི་ལུང་པ་ཞེས་པ་དེ་ལྟར་བྱུང་གསུངས། ཐོག་མར་སྟག་ལུང་བཀའ་བརྒྱུད་ཕྱག་བཞེད་མཛད་པ་ལ་སྤྱི་ལོ་༡༩༣༥ཙམ་ལ་བྲག་རྒྱབ་རིན་པོ་ཆེ་གནས་དེར་བཞུགས་པ་ནས་བཟུང་བཙུན་མ་སུམ་ཅུ་སོ་གཉིས་སྐོར་གྱིས་དགེ་ལུགས་ཕྱག་བཞེད་མཛད་པས་དགའ་ལྡན་ཆོས་འཁོར་གླིང་གི་དགོན་ལག་ཏུ་འགྱུར།