འབེན་རྫ་དགོན

ངར་སྨད་ནས་སྤྱི་ལེ་༥ཙམ་སོང་ན་འབེན་རྫ་གྲོང་གི་རི་ཁུག་ཏུ་དགོན་དེ་མཇལ་རྒྱུ་ཡོད། དགོན་དེ་ནི་དགེ་བཤེས་འབེན་ཀུན་མཁྱེན་གྱིས་ཕྱག་འདེབས་གནང་མཛད། འབྲས་སྤུངས་བདེ་ཡངས་གྲྭ་ཚང་གི་ཁོངས་ཡིན། སྔོན་ཚོགས་ཁང་ཀ་བ་བཅུ་དྲུག་ནང་རྟེན་གཙོ་ཐུབ་དབང་གི་སྐུ་བརྙན་སོགས་མཇལ་རྒྱུ་ཡོད། ད་ལྟ་སྔོན་གྱི་འདུ་ཁང་གི་གྱང་གོག་སྟེང་ཉམས་གསོ་གནང་བའི་ནང་སྟོན་པའི་སྐུ་བརྙན་དང་། མགོན་པོ་དམར་ནག་གི་འཁོར་བཤན་པ་རང་འཁོར་མ་ར་གཉེན་སྟག་དང་མ་ཧཱ་ཏྲི་ཏ་བཅས་གསར་བཞེངས་གནང་བ་མཇལ་རྒྱུ་ཡོད། དགེ་བཤེས་འབེན་ནི་ཐོག་མར་ཇག་པ་ཡིན་པ་ལ་ཉིན་གཅིག་རྒད་མོ་ཞིག་ཐུག་པས་རྒས་མོས་འབེན་ཇག་པ་ཐུག་ན་ཅུ་བྱེད་ཅེས་རྒད་མོ་ས་ལ་འགྱེལ་བས་དེ་ནས་བཟུང་ངེས་འབྱུང་སྐྱེས་ཏེ་ཆོས་གནང་ཞེས་ཟེར། ཡང་རོང་པོ་སྒང་ཞེས་པའི་གྲོང་གི་ཆུ་བོའི་ཕ་རིར་བཀའ་གདམས་བཀའ་དབང་དགོན་ཞེས་པ་དེ་ལྷོ་ངོས་རི་ལྡེབས་སུ་མཇལ་རྒྱུ་ཡོད། ཡང་དབུ་སྣའི་གྲོང་ཞེས་པའི་རྒྱབ་རིར་མངའ་རིས་པ་བསོད་ནམས་རིན་ཆེན་གྱིས་ཕྱག་བཏབ་གནང་བའི་སྤེན་ཀ་དགོན་ཞེས་ཤིང་སྤེན་མའི་ཀ་བ་ཅན་གྱི་དགོན་དེ་མཇལ་རྒྱུ་ཡོད།།