འདོད་ཡོན་

འདོད་ཡོན (ནང་བསྟན་གྱི་བརྡ་ཆད། ) གཟུགས་སྒྲ་དྲི་རོ་རེག་བྱའི་དཔལ་འཛིན་པའི།། ཕྱི་ནང་འདོད་ཡོན་ལྷ་མོས་ཕྱོགས་ཀུན་ཁྱབ།། ཅེས་པ་སྟེ། རང་གི་སྙིང་ག་ནས་གཟུགས་ཀྱི་ལྷ་མོ་ཕྱག་ན་མེ་ལོང་དམར་བོ་ངོས་གཉིས་པ་ཐོགས་པ། སྒྲའི་ལྷ་མོ་ཕྱག་ན་པི་ཝང་སྔོན་པོ་ཐོགས་པ། དྲིའི་ལྷ་མོ་ཕྱག་ན་དྲིའི་དུང་ཆོས་ཐོགས་པ། རོའི་ལྷ་མོ་ཕྱག་ན་བདུད་རྩིའི་ཞལ་ཟས་ཐོགས་པ། རེག་བྱའི་ལྷ་མོ་ཕྱག་ན་ན་བཟའ་ཐོགས་པ་དཔག་ཏུ་མེད་པ་སྤྲོས་ཏེ། བླ་མ་ལྷ་ཚོགས་རྣམས་ལ་འདོད་ཡོན་དེ་དང་དེ་དག་ཕུལ་ཏེ་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ནས་མཆོད་ལྷ་རྣམས་སྙིང་གར་བསྡུ། མཆོད་པའི་ལྷ་མོ་དེ་དག་ཐམས་ཅད་ཞལ་གཅིག་ཕྱག་གཉིས་མ་ཤིན་ཏུ་སྒེག་ཅིང་། བཞིན་འཛུམ་བག་དང་ལྡན་པ། ཟུར་གྱིས་བལྟ་བ་ལ་སོགས་པའི་རྣམ་འགྱུར་གྱིས་མཛེས་པ། ལང་ཚོ་དར་ལ་བབ་ཅིང་འདོད་ཡོན་ལྔའི་དགའ་བས་རོལ་བ། གཟུགས་ཡིད་དུ་འོང་བ། གླུ་དབྱངས་སྙན་པ། ལྷན་ཅིག་སྐྱེས་པའི་དྲི་བཟང་བྲོ་བ། ཤིན་ཏུ་མངར་བའི་རོ་མཆོག་དང་ལྡན་པ། རེག་བྱ་འཇམ་པ། བླ་མ་ལྷ་ཚོགས་རྣམས་ཀྱི་ཐུགས་རྒྱུད་ལ་ཟག་མེད་ཀྱི་བདེ་བ་ཁྱད་པར་ཅན་བསྐྱེད་ནུས་པ་ཤ་སྟག་ཏུ་བསམ་མོ།།