ཞི་གནས་
ཞི་གནས་ཞེས་པ་ནི་ནང་པ་སངས་རྒྱས་པའི་ཆོས་ལུགས་ཀྱི་སྒོམ་གྱི་ཐབས་གཙོ་བོ་ཞིག་ཡིན། སེམས་རྩེ་གཅིག་ཏུ་གནས་པའི་ཏིང་ངེ་འཛིན་གྱི་མཚན་ཉིད་ཅན་ཞིག་ཡིན་ལ། བསམ་གཏན་གྱི་རྒྱུར་གྱུར་པ་དང་ལྷག་མཐོང་གི་རྟེན་དུ་འགྱུར་བའི་གསང་ཆེན་ཡིན།
སྒྲ་བཤད།
[རྩོམ་སྒྲིག]ཞི་གནས་ཞེས་པའི་སྒྲ་འདིར། ཞི་ཞེས་པ་ནི་སེམས་ཀྱི་རྣམ་གཡེང་དང་ཉོན་མོངས་པ་རྣམས་ཞི་ཞིང་ཉེར་ཞི་བ་ལ་གོ་བ་ཡིན། གནས་ཞེས་པ་ནི་སེམས་དམིགས་པ་ལ་རྩེ་གཅིག་ཏུ་མི་གཡོ་བར་གནས་པ་ལ་གོ་དགོས། མདོར་ན་ཞི་གནས་ནི་ལྷག་མཐོང་གི་རྟེན་དུ་གྱུར་པའི་སེམས་རྩེ་གཅིག་པའི་ཏིང་ངེ་འཛིན་ལ་ཟེར།
མཚན་ཉིད།
[རྩོམ་སྒྲིག]སེམས་རྩེ་གཅིག་ཏུ་གནས་པའི་ཏིང་ངེ་འཛིན་ཏེ། "ཞི་གནས་ནི་སེམས་རྩེ་གཅིག་པའི་མཚན་ཉིད་ཀྱི་ཏིང་ངེ་འཛིན་ཡིན་"[༡]ཞེས་གསུངས་པ་ལྟར། སེམས་ཀྱི་རྣམ་གཡེང་དང་བྲལ་ཞིང་དམིགས་པ་གཅིག་ལ་གནས་པ་ལ་གོ །
རང་བཞིན།
[རྩོམ་སྒྲིག]ལུས་སེམས་ལས་སུ་རུང་བར་བྱེད་པ་སྟེ། "ལུས་སེམས་ལས་སུ་རུང་ན་བྱང་ཆུབ་ཀྱི་སེམས་སོགས་གང་བསྒོམ་པ་ཐམས་ཅད་ལེགས་པར་འབྱོར་ཞིང་འོང་བར་འགྱུར་"[༢]ཞེས་གསུངས།
ལྷག་མཐོང་དང་འབྲེལ་བ།
[རྩོམ་སྒྲིག]ཞི་གནས་ནི་ལྷག་མཐོང་གི་གཞི་རྟེན་ཡིན་པ་སྟེ། "ཞི་གནས་སྔོན་དུ་མ་བསྒྲུབ་པར་ལྷག་མཐོང་སྐྱེ་མི་སྲིད་པའི་ཕྱིར་རོ། །"[༣]ཞེས་གསུངས་པ་ལྟར། ལྷག་མཐོང་སྐྱེ་བའི་རྒྱུར་གྱུར་པ་ཞིག་ཡིན།
ཞི་གནས་སྒྲུབ་ཐབས།
[རྩོམ་སྒྲིག]འཇིག་རྟེན་ལ་ཆགས་པ་སྤངས་ནས་མངོན་པར་དགའ་བས་འགྲུབ་པ་སྟེ། "ལྷག་མཐོང་གི་རྒྱུར་གྱུར་པའི་ཞི་གནས་ཀྱི་ཏིང་ངེ་འཛིན་དེ་ཡང་ནི་ཕྱི་ནང་གི་འཇིག་རྟེན་ལ་ཆགས་པ་མེད་ཅིང་བསམ་གཏན་སྒོམ་པ་ལ་མངོན་པར་དགའ་བས་འགྲུབ་"[༤]ཅེས་གསུངས།
ཞི་གནས་ཀྱི་ཕན་ཡོན།
[རྩོམ་སྒྲིག]ལུས་སེམས་ཤིན་ཏུ་སྦྱངས་པ་འཐོབ་པ་སྟེ། "ཞི་གནས་གྲུབ་པ་ནི་ལུས་སེམས་ཤིན་ཏུ་སྦྱངས་པ་འཐོབ་པར་འགྱུར་ཏེ་སྐྱིལ་མོ་ཀྲུང་གཅིག་གིས་ལོ་ཟླར་འདས་ཀྱང་ཟུག་རྔུ་མེད་ཅིང་ཁམ་གྱི་ཟས་ལ་མ་ལྟོས་པ་དང་སེམས་ལས་སུ་རུང་བས་ཤིན་ཏུ་ཐུལ་བ་གཉེན་པོའི་རང་དབང་ཅན་དུ་འགྱུར་བ་ཡིན་ནོ། །"[༥]ཞེས་གསུངས་ལུས་སེམས་གཉིས་ལ་བདེ་བ་དང་རང་དབང་ཐོབ་ཡོང་།
ཉོན་མོངས་པ་འཇོམས་པའི་གཉེན་པོར་འགྱུར་བ། "ཁམས་གསུམ་གྱི་ཉོན་མོངས་པ་ས་བོན་བག་ཆགས་དང་བཅས་པ་མཐའ་དག་རྣམ་པར་འཇོམས་པར་བྱེད་ནུས་"[༦]ཞེས་གསུངས་པ་ལྟར་ཉོན་མོངས་སྤོང་བའི་གཉེན་པོར་འགྱུར།
བསམ་གཏན་དང་འབྲེལ་བ།
[རྩོམ་སྒྲིག]འདི་གཉིས་ནི་མིང་མི་འདྲ་ཡང་རང་བཞིན་གཅིག་སྟེ། "ཞི་གནས་ནི་སེམས་ལ་སེམས་འཇོག་པ་རྩེ་གཅིག་པ་སྟེ་བསམ་གཏན་དངོས་ཡིན་ལ་"[༧]ཞེས་གསུངས་པ་ལྟར། ཞི་གནས་ནི་བསམ་གཏན་གྱི་དངོས་ཡིན་ལ། སེམས་རྩེ་གཅིག་ཏུ་འཇོག་པའི་ཐབས་སུ་གྱུར།
བསྡུས་དོན།
[རྩོམ་སྒྲིག]གོང་གསལ་ལྟར། ཞི་གནས་ཞེས་པ་ནི་སེམས་རྩེ་གཅིག་ཏུ་གནས་པའི་ཏིང་ངེ་འཛིན་གྱི་མཚན་ཉིད་ཅན་ཞིག་སྟེ། འཇིག་རྟེན་ལ་ཆགས་པ་སྤངས་ནས་སྒོམ་པ་ལ་མངོན་པར་དགའ་བའི་སྒོ་ནས་སྒྲུབ་པ་ཞིག་ལ་གོ །དེའི་ཕན་ཡོན་ནི་ལུས་སེམས་ལས་སུ་རུང་བར་བྱེད་ཅིང་། ཤིན་ཏུ་སྦྱངས་པ་འཐོབ་པ། ཉོན་མོངས་སྤོང་བའི་གཉེན་པོར་འགྱུར་བ། ལྷག་མཐོང་སྐྱེ་བའི་གཞི་རྟེན་དུ་འགྱུར་བ་བཅས་ཡིན། དེ་ལྟ་བུའི་ཞི་གནས་ནི་ནང་པའི་ལམ་རིམ་གྱི་ནང་གསེས་གལ་ཆེ་བའི་ཉམས་ལེན་ཞིག་ཡིན།
ལུང་ཁུངས།
[རྩོམ་སྒྲིག]- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས། ༢༢༠
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས། ༤༥༨
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས། ༡༨༥
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས། ༧༤༠
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས། ༢༤༦
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས། ༧༣༩
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས། ༢༣༢