ཚོང་འདུས་མགུར་མོ་
དེ་སྔོན་དུས་རབས་བཅུ་པའི་དཀྱིལ་དུ་དབུས་གཙང་གི་མཁས་པ་མི་བཅུས་མདོ་སྨད་དུ་ཕེབས་ནས་བླ་ཆེན་དགོངས་པ་རབ་གསལ་གྱི་སློབ་མ་གྲུམ་ཡེ་ཤེས་རྒྱལ་མཚན་གྱི་དྲུང་དུ་དགེ་སློང་གི་སྡོམ་པ་ཞུས་རྗེས་ལོ་ཤས་ནས་བོད་དུ་ཕེབས། དེའི་ནང་ནས་ལོ་སྟོན་རྡོ་རྗེ་དབང་ཕྱུག་གི་འཁྲུངས་ཡུལ་གཙང་མགུར་མོ་རབ་ཁ་ནས་ཡིན་པས་ཁོང་གིས་མཆེད་གྲོགས་གཞན་རྣམས་། ཁྱེད་རྣམས་གནས་སྐབས་བོད་དབུས་གཙང་དུ་ལོག་མ་ཕེབས་པར་མདོ་ཁམས་འདིར་བཞུགས། ངས་སྔོན་ལ་དབུས་གཙང་དུ་འགྲོ་བའི་ཚོང་པ་དང་མཉམ་དུ་སོང་ནས་ཆོས་དར་ནུས་པ་འདུག་ན་ངས་ལོག་མ་ཡོང་བར་་་་་་་་་་དབུས་གཙང་དུ་བསྡད་ཀྱིས། དེ་ཙ་ན་ཁྱེད་རྣམས་ཡར་ཕེབས་ན་འཐུས། གལ་ཏེ་དབུས་གཙང་དུ་ཆོས་དར་བར་བྱེད་མ་ནུས་ན་ང་ཡང་ཚོང་པ་དང་མཉམ་པོར་མདོ་སྨད་དུ་ལོག་ཡོང་རྒྱུ་ཡིན་གསུངས་ནས་ཚོང་པ་དང་མཉམ་དུ་བོད་ལ་ཕེབས། ཁོང་རྣམས་སུམ་འཕྲང་དུ་སླེབས་མཚམས་ཚོང་པ་རྣམས་དེ་གར་ཚོང་བྱས་ཏེ་མདོ་སྨད་དུ་ལོག་རྩིས་ཡོད་སྐབས་ལོ་སྟོན་གྱིས་ཁྱེད་རྣམས་འདི་ནས་མ་ལྡོག་པར་གཙང་ལ་སོང་ནས་མགུར་མོ་རབ་ཁར་སླེབས་ཚེ་ངའི་ཕ་ལོ་ནད་གཙུག་ན་ཟེར་བ་ཞིག་ཡོད་པ་དེ་ལ་ང་དབུས་ན་འདུག་ཅེས་ལན་སྐྱོལ་ཞེས་མངགས་ཏེ་གཙང་དུ་བཏང། ཚོང་པ་རྣམས་ཀྱིས་ཀྱང་ཁོང་གིས་གསུངས་པ་ལྟར་བྱས་པས་ཚོང་ལེགས་པོ་བྱུང། དེ་ནས་བཟུང་གཙང་གི་མགུར་མོ་རབ་ཁར་ཚོང་འདུས་ཆགས་པའི་མིང་དུ་ཚོང་འདུས་མགུར་མོ་ཟེར། （དེང་སང་བོད་རང་སྐྱོང་ལྗོངས་སྙེ་མོ་རྫོང་ཁོངས་མར་རྐྱང་ཆུས་སུ་ཡོད）དེ་སྔོན་བོད་ཀྱི་གསེར་དངུལ་གྱི་ལྗིད་ཚད་ཐང་གཞི་ཡང་ཚོང་འདུས་མགུར་མོའི་ཁྲོམ་རའི་རིན་ཐང་གི་ཚད་གཞིར་བཟུང་ནས་ཆོས་་་་་་ཁྲིམས་དང་སྲིད་གཞུང་གི་ཁྲིམས་ཡིག་ནང་བརྐུས་པ་འཇལ་གྱི་ཁྲིམས་ཡིག་སྐོར་བཤད་སྐབས་ཚོང་འདུས་མགུར་མོའི་་་གསེར་དངུལ་དང་འབྲུ་རིགས་ཀྱི་རིན་ཐང་གཞིར་བཟུང་བར་བཤད། ཞིབ་པར་སྔ་རབས་བོད་ཀྱི་མཁས་པ་ཚོས་མཛད་པའི་《འདུལ་བའི་འགྲེལ་པ》ཁག་དང། 《གཙང་པ་རྒྱལ་པོའི་ཁྲིམས་ཡིག》 སྡེ་སྲིད་སངས་རྒྱས་རྒྱ་མཚོས་མཛད་པའི《ཁྲིམས་ཡིག་ཞལ་ལྕེ་བཅུ་གསུམ》ནང་དུ་གསལ་ཞིང། གོང་གསལ་ཚོང་འདུས་མགུར་མོའི་ལོ་རྒྱུས་ནི《ཆོས་འབྱུང་མཁས་པའི་དགའ་སྟོན》ལེ་ཚན[ཉ]པའི་ཤོག་གྲངས་༥ནས༦བར་གསལ་པ་ནས་གནད་བསྡུས་བྱས།