ཚོགས་གླུ་

ཚོགས་གླུ ། ལས་སྨོན་རྟེན་འབྲེལ་དཔག་བསམ་ལྗོན་ཤིང་གི་སྟེང་དུ། ། རྒྱ་གར་ཤར་གྱི་རྨ་བྱ་གཞོན་ནུ་ཡང་ཕེབས་བྱུང་། ། རྨ་བྱའི་གདུགས་སྐོར་དམ་པའི་ཆོས་ཕྱོགས་ལ་བསྒྱུར་དང་། ། གཞོན་པ་ང་ཚོས་ཐར་པའི་ལམ་སྣ་ཞིག་ཟིན་ཡོང་། ། བསོད་ནམས་དཔྱིད་ཀྱི་རྒྱལ་མོའི་ཤིང་རྟ་ལ་ཕེབས་པའི། ། ལྷོ་མོན་ཤིང་ལོའི་ཚལ་གྱི་ཁུ་བྱུག་གི་གསུང་སྙན། ། ཡ་གི་དྲི་ཟའི་བུ་མོའི་གླིང་བུ་ལས་སྙན་པ། ། དབྱར་གསུམ་ནམ་ཟླ་བསྲོ་བའི་རྟེན་འབྲེལ་ལ་ཡག་བྱུང་། ། འདིར་འདུས་ལས་སྨོན་མཐུན་པའི་རྡོ་རྗེ་ཡི་སྤུན་གྲོགས། ། ང་ཚོའི་བླ་མ་བཞུགས་པའི་ཆོས་ར་ལ་ཕེབས་དང་། ། སྨིན་གྲོལ་བདུད་རྩི་འཐུང་པའི་དགའ་སྟོན་གྱི་ངང་ནས། ། ཉམས་དགའ་གླུ་རུ་ལེན་པའི་ཁྱད་ཆོས་ཞིག་ཡོད་དོ། ། བདེ་ཆེན་འཕོ་འགྱུར་མེད་པའི་བཞུགས་གྲལ་གྱི་དབུས་ནས། ། ལྷ་དང་བླ་མའི་ཞལ་རས་མ་བསྒོམ་ཀྱང་མཐོང་བྱུང་། ། མ་དང་མཁའ་འགྲོའི་སྙིང་ཐིག་འོད་གསལ་གྱི་ཐེག་པས། ། འཇའ་ལུས་ཆོས་སྐུར་འགྲུབ་པའི་དངོས་གྲུབ་ཅིག་ཞུའོ།། །། ༼དབྱར་གསུམ་ནམ་ཟླ་སྤྲོ་བ་མིན། དབྱར་གསུམ་ནམ་ཟླ་བསྲོ་བ།ཞེས་འབྱུང་། དྲོ་བ་ཞེས་པའི་དོན་ཏོ།།༽ ༼ཨ་དུམ་རྣམ་ཐར་ཡོངས་སྙེའི་ལྡེབ་བརྒྱ་སོ་དགུའི་སྟེང་བཞུགས།༽