ཚེར་གསེབ་དགོན

མཚན་རྒྱས་པར། ཚེར་གསེབ་དར་རྒྱས་དགོན་ཞེས་ཞུ། ཚེར་གསེབ་ཅེས་པ་བློ་ལྡན་ཤེས་རབ་གྱི་ཕྱག་དཔེ་རླུང་གིས་འཁྱེར་བ་ཚེར་མའི་གསེབ་ཏུ་བབས་པས་ཚེར་གསེབ་ཅེས་པ་དེ་ལྟར་བྱུང་ཞེས་ཟེར། ལ་མོ་མདའ་ནས་སྤྱི་ལེ་བཞི་ལྔ་ཙམ་སྤྱིར་བཏང་འཁོར་ལམ་བརྒྱུད་སོང་ན་དགོན་དེར་སླེབ། དགོན་དེ་ནི་ཐོག་མར་བློ་ལྡན་ཤེས་རབ་གྱིས་ཕྱག་བཏབ་གནང་མཛད། 《བེེ་སེར》དུ་ཀླུ་མེས་ཀྱི་བཏབ་པ་རྗེས་སུ་དགེ་བཤེས་པོ་ཏོ་བས་བསྐྱངས་ཞེས་གསུངས། སྔོན་དགེ་འདུན་ལྔ་བཅུ་སྐོར་གྱིས་རི་བོ་དགེ་ལུགས་ཕྱག་བཞེད་མཛད། བཙུན་མོ་ཚལ་དང་། མ་ལོ་ཚངས་པ་ལྕོག་གཉིས་དང་འདྲ་བར་གཙང་བཀྲས་ལྷུན་གྱི་ཁོངས་ཡིན། ལོ་ལྟར་བོད་ཟླ་༦ཚེས་༡༨.༡༩ལོ་སོར་ཡིད་དམ་རྟ་མགྲིན་དང་འཇིགས་བྱེད་ཀྱི་སྒོ་ནས་གར་འཆམ་གནང་སྲོལ་ཡོད། དགོན་དེའི་གཡོན་ངོས་རྒྱལ་པོ་ལྕོག་ནང་བསེ་ཁྲབ་པ་དང་། བླ་མ་བློ་ལྡན་ཤེས་རབ་ཀྱི་སྐུ་བརྙན་ཡོད། རི་ཟུར་དུ་རྒྱུད་སྨད་ཕྱག་འདེབས་པ་པོ་རྗེ་ཤེས་རབ་སེང་གེའི་གདུང་རྟེན་ཡོད། ད་ལྟ་རྒྱལ་པོ་ལྕོག་གི་རྩིག་གདན་སྟེང་གསར་བཞེངས་གནང་བའི་ནང་སྲུང་མའི་སྐུ་བརྙན་གསར་བཞེངས་གནང་བ་དང་། རྗེ་ཤེས་རབ་སེང་གེའི་གདུང་རྟེན་གསར་བཞེངས་གནང་བའི་ནང་རྗེའི་ཚེམས་བཞུགས་སུ་གསོལ་བ། སྔོན་གྱི་འདུ་ཁང་གི་གྱང་གོག་སོགས་མཇལ་རྒྱུ་ཡོད།