ཚེ་དབང་ལྷ་མོ་
ན་གཞོན་གཞས་མ་ཚེ་དབང་ལྷ་མོའི་ལོ་རྒྱུས།[རྩོམ་སྒྲིག]
2012 ཟླ་བ་ 04 ཚེས 24 བོད་ཀྱི་བང་ཆེན།
རིགས་རུས་གདོང་དམར་བོད་ཀྱི་དུམ་བུ་ལས་ཆད་ཅིང་ལྟེ་ཁྲག་ཁམས་བྲག་མགོའི་མཛེས་ལྗོངས་ནས་འཐོར་བའི་ན་གཞོན་གླུ་མ་ཚེ་དབང་ལྷ་མོ་ནི། གཞན་དང་མི་མཚུངས་གང་དང་མི་མཉམ་པའི་ཕྲ་ལ་གསེང་མཐོ་ཞིང་སྙན་ལ་ཡིད་འགུག་པའི་གླུ་སྐད་དེ་དང་། བལྟས་ན་ཚིམ་པ་མེད་ཅིང་བཅར་ན་ངོ་གནོང་དགོས་པའི་སྐྱེས་གཟུགས་དེ་ཡིས་བསྒྲགས་པ་མིན་རུང་དོན་གྱིས་གྲགས་ཤིང་།
སྦར་བ་མིན་རུང་ངང་གིས་འབར་ཏེ་དེང་རབས་བོད་ཀྱི་ན་གཞོན་ཁག་གི་ཁྲོད་རིམ་པར་གྲགས་སྙན་གྱི་མེ་ལྕེ་བར་མེད་དུ་མཆེད་བཞིན་ཡོད། ཡིན་ནའང་ཁོ་མོའི་ལོ་རྒྱུས་གཙང་མ་ཞིག་ཕ་ཡིག་ཕ་སྐད་ཀྱི་ལམ་ནས་ད་བར་ཅི་ཡང་འགོད་མ་ཐུབ་པས། དོན་གཉེར་བ་ལ་ལས་བལྟ་འདོད་ཀྱི་མིག་རྡོ་རིག་རིག་བྱས་ཤིང་ཤེས་འདོད་ཀྱི་འགྲམ་ཆུ་ལྷོག་ལྷོག་ལྡང་གིན་ཡོད་པ་རེད། མོ་ལོ་དྲུག་ལ་བུད་དུས་རང་ཡུལ་གྱི་སློབ་ཆུང་གི་སྒོ་ཐེམ་འགྲིམས་ཤིང་། ཤེས་རིག་ཡོན་ཏན་སོགས་འཛམ་གླིང་ཧྲིལ་བོར་བལྟ་བའི་མིག་མདུན་གྱི་ཡོལ་རས་ཐོག་མ་ཡང་དེ་ནས་ཕྱེས། སྙན་ལ་འགྱུར་ཁུག་ཚང་ཞིང་སྦོམ་ལ་ལྷོད་ཆ་དོད་པའི་གླུ་སྐད་ཅིག་སྟེ། ནམ་རྒྱུན་ཟུར་དང་གཞོགས་ནས་དབྱངས་རྟ་ངེས་པ་མེད་པའི་ཕུ་བོ་“པད་མའི་”གླུ་སྒྲ་དེ་ནི་མོའི་འཚོ་བའི་གདམ་གསེས་ལ་ལམ་སྟོན་ཞིག་གམ། གླུ་གར་རིག་གནས་ལ་སེམས་ཁ་ཕྱོགས་པའི་བག་ཆགས་འཐུག་པོ་འདིང་བྱེད་ཡིན་ཞེས་བཤད་ཀྱང་ཆོག རེད་དེ་ད་དུང་ལུས་འདུག་པ་ནི་བགྲང་ན་ཡན་ལག་བརྒྱད་ལྡན་ཡིན་ཞིང། མྱོང་ན་ཞིམ་མངར་རོ་བྲོ་ལྡན་པའི་གངས་ཆབ་བསིལ་མ་དང་། མར་རྩམ་ཐུད་ཆུར་སོགས་གདོང་དམར་བོད་ཀྱི་ཁྱད་ལྡན་ཟས་རིགས་རྣམས་ནི། ཚངས་སྲས་བུ་མོའི་མགྲིན་ལ་འཕྱ་ཞེས་རྒན་པས་བསྟོད་ན་རུང་ཞིང་སྨྱུག་མ་གླིང་བུའི་གདངས་ལ་འགྲན་ཞེས་གཞོན་པས་བསྔགས་ན་རན་པའི་བུ་མོ་འདིའི་གླུ་སྐད་སྙན་མོ་གྲུབ་པའི་ཆ་རྐྱེན་གལ་ཆེན་ཞིག་ལོས་ཡིན། རིམ་པར་གླུ་གར་རིག་གནས་ཀྱི་ཐེམ་རྐས་བརྒྱུད་དེ2007ལོར“ལྷ་སའི་རི་བོ་ཐང་ལྷའི་”གླུ་གར་ཁང་དུ་། གླུ་གར་སྒྱུ་རྩལ་ལ་བྱང་ཆ་དང་གོམས་འདྲིས་ཡོད་པའི་དགེ་རྒན་འགའ་བསྟེན་ཏེ་ཉེ་རབས་དང་། དེང་རབས་ཀྱི་གླུ་གར་སྒྱུ་རྩལ་དང་ཟློས་གར་རིག་གནས་རྣམས་ལ་ཅི་ནུས་གང་ལྕོགས་ཀྱིས་འབད་འབུངས་བགྱིས། གཞུང་དྲང་གི་གཤིས་རྒྱུད་འཇམ་པོ་དེ་དང་འགྲན་བྲལ་གྱི་མཛེས་མའི་གཟུགས་རིས། ད་དུང་སྙན་འཇེབས་ཀྱི་ངག་གི་འགྱུར་ཁུགས་དག་ལ། གླུ་ཁང་དེའི་ཕྱོགས་ཡོངས་ཀྱི་སྐུ་མགྲོན་ཚོའི་དགའ་བསུ་དང་བསྟོད་ར་མངོན་དང་ཤུགས་ནས་ཐོབ་པ་དེ་དག་ནི། བུ་མོ་ཁོ་ལ་མཚོན་ན་མི་ཚེའི་གདམ་གསེས་ཀྱི་མདུན་ལམ་ཡངས་པོར་ཕྱེ་བའི་གྲུབ་ཆ་གཙོ་བོ་ཞིག་ཀྱང་གྱུར་ཡོད། ཡིན་ནའང་དཀའ་སྡུག་གི་རིམ་པ་གཏན་ནས་མ་བརྒྱུད་པར་ཁད་ཀྱིས་བདེ་མོ་གོ་གནས་དེ་རུ་བུད་སོང་བ་ཞིག་ནི་ག་ལ་ཡིན་ཏེ། དེའི་བར་དུ་འཚོ་བ་དང་གནས་མལ་སོགས་ཕྱོགས་མང་པོ་ཞིག་ནས་དཀའ་ཁག་གི་ཁུར་བོ་ཐོད་ཀྱིས་བསུས་ཤིང་། སྐྱོ་གདུང་གི་འགག་འཕྲང་རྐང་པས་བསྒྲོད་དེ་འབད་བརྩོན་གྱི་ལམ་བུ་ཨུ་ཚུགས་ཀྱིས་བསྙེགས་ཡོང་ནས་དེ་རིང་གི་ལམ་ཁ་འདིར་ཐོན་འདུགཉིན་མཚན་གྱི་རེས་མོ་ཡུན་གྱིས་བཞུད་ནས2008ལོར་ཐོན་དུས་“རྒྱ་ནག་ཁྲུང་ཆེན་ལྷོ་ནུབ་སློབ་གྲྭ་ཆེན་མོའི་རོལ་དབྱངས་སྡེ་ཁག་”ཏུ་ཞུགས་ནས། བཙན་གྱིས་བསྒྲིགས་ཤིང་ཧོབ་ཀྱིས་བཀུག་པའི་གླུ་དང་དབྱངས་རྟ་རྣམས་རྒྱབ་ཏུ་བཞག་ཅིང་གཡས་སུ་འཕངས་ཏེ་གོ་རིམ་ཅན་གྱི་གླུ་དབྱངས་རིག་གནས་ལ་ཕྱོགས་མགོ་བརྩམས། དེའི་སྐབས་སུ་“ཁྲུང་ཆེན་ན་གཞོན་གླུ་གར་སྒྱུ་རྩལ་འགྲན་ཚོགས་”སུ་ཞུགས་ཤིང་། ངོ་བསྟོད་ལྐོག་རྫོངས་མི་ཕོག་ཅིང་རང་གི་གཉུག་གཤིས་ཀྱི་ཁྱད་ནུས་ལས་ཨང་རིམ་གྱི་རྟགས་ཐམ་ཐོབ་པའི་སྟེགས་བུ་མཚར་དུ་སྡུག་པ་དེ་ནས་ཨང་གཉིས་པའི་བྱ་དགའ་ཐོབ། ཞིབ་མོར་བསམས་ན་ནོར་གནག་དང་ནས་གྲོའི་གྲིབ་མར་འགྲོགས་ནས་ལག་ཆགས་པའི་བོད་མོ་གཤའ་མ་ཞིག་མི་རིགས་དང་གོམ་གཤིས་མི་གཅིག་པའི་ཡུལ་ཁག་གང་ཞིག་ཏུ། ན་གཞོན་སྟོང་ཕྲག་མང་པོའི་འཚུབ་ཁའི་བར་ནས། མིག་རྡོ་འབུམ་ཁྲག་འཕེན་སའི་གཤིབ་སྡུར་དཀྱིལ་ནས། གོ་ལ་ཧྲིལ་བོའི་འཕྲིན་ལམ་ཡངས་པོར། ཨང་རིམ་གཉིས་པའི་བྱ་དགའ་ཞིག་བླངས་སོང་བ་འདི་སུ་ཚང་གི་གཟི་བརྗིད་ཅིག་དང་གང་ཚང་གི་ང་རྒྱལ་ཞིག་ཀྱང་བརྩི་ལོས་ཆོག་སྙམ་བྱུང་། གཞན་ད་དུང་ལོ་དེ་ལ་ལྷ་སར་བསྡུས་པའི་བུན་ཁྲོན་ས་འགུལ་རོགས་སྐྱོར་གླུ་དབྱངས་དགོང་ཚོགས་དང2009ལོའི་མཚོ་སྔོན་ཇོ་མོ་གླང་མའི་གཟི་འོད་དང་ལོ་སར་དགུང་ཚོགས། 2010ལོའི་སི་ཁྲོན་ཁྲིན་ཏུར་བསྡུས་པའི་ཡུལ་ཤུལ་ས་འགུལ་རོགས་སྐྱོར་གླུ་དབྱངས་ཚོགས་པ་སོགས་སུ་ཞུགས་ནས། སྙན་ལ་མཐོ་བའི་གླུ་ངག་གིས་སྐྱོ་བའི་མགོ་མནན་ཞིང་ཕྲ་ལ་འཇེབས་ཀྱི་འགྱུར་ཁུགས་ཀྱིས་སྡུག་གི་སེམས་གསོས་པ་སོགས་ལྟོས་བཅས་ཀྱིས་བཤད་ན་ཡོད་དང་ཡོད་ངེས་པ་རེད། “ནག་ཆུ་སྐོར་བྲོ་”ཞེས་པའི་ཟེར་སྡེར་དེ་ནི་ཁོ་མོས་མི་ཡུལ་ལ་བཞག་པའི་ཆེས་ཐོག་མའི་ལེགས་སྐྱེས་ཡིན་གཤིས་ཁོ་མོར་མཚོན་ན་མིའི་གྲལ་ནས་མགོ་བོ་བཀྱགས་བྱེད་ཀྱི་ནམ་ལངས་སྐར་མ་དེ་རེད་ཅེས་བརྗོད་ཆོག དེའི་འཕྲོས་ནས་“གནས་མཆོག་ལྷ་ས། སྐལ་བཟང་མེ་ཏོག དྲན་གླུ་”སོགས་ཆེད་བསྒྲིགས་གླུ་སྡེར་འགའ་དང་། བོད་ཁུལ་གྱི་གླུ་ཡི་ཟེར་སྡེར་མང་པོར་གླུ་ངག་གི་འགྱུར་ཁུགས་མངོན་མྱོང་ཞིང་། མགྲིན་སྒྲ་ཡི་གདངས་དབྱངས་སྤེལ་མྱོང་བས་ཁ་མིན་དོན་གྱི་གྲགས་པ་ཁད་ཀྱིས་རྒྱས་དང་རྒྱས་བཞིན་པའི་སྒང་ཡིན། དེང་སྐབས་ཕ་སྐད་གཙང་མའི་གླུ་དབྱངས་ཆེད་སྒྲིག་བརྙན་འཁོར་གསར་བ་ཞིག་གྲ་སྒྲིག་བྱས་ཤིང། ད་ལོའི་ཟླ་བཞི་པར་ཚོང་རར་འགྲེམ་སྤེལ་བྱེད་རྩིས་ཡོད་པས་ལྷག་ཏུ་ན་གཞོན་གྱི་སྡེ་ནས་དགའ་བསུ་དང་བརྡབ་བསིག་གིས་བཞག་པའི་ཁེ་ཕན་འཐོབ་རྒྱུར་ཡིད་ཆེས་ཡོད། ཤེས་གསལ་ལྟར་ན། གླུ་ངག་གི་རིན་ཐང་ལས་བོད་ཁ་བ་ཅན་གྱི་རི་ཆུ་ནགས་གསུམ་དང་། ཁྱད་ཐོན་བླ་རུ་འཕགས་པ་རྣམས་སྒྲ་ཡིས་བཀུག་ཅིང་དབྱངས་ཀྱིས་བླངས་ཏེ་ཅི་ནུས་གང་ལྕོགས་ཀྱིས་ཞབས་འདེགས་སྒྲུབ་བཞིན་གླུ་རུ་ལེན་འདོད་པར་མ་ཟད། ཕ་ཡུལ་ཞིང་འབྲོག་དམངས་ཚོགས་ཀྱི་སྐྱ་ཆད་སྔོ་སྡུག་གི་གནས་བབ་དེ་ལ་སང་ཉིན་གྱི་གཟི་བྱིན་འབར་བའི་ཉི་མ་ཞིག་ཏུ་རེ་ནས། བྱིས་པ་སློབ་གྲྭར་ཞུགས་མ་ནུས་པ་དག་ལ་རྒྱབ་སྐྱོར་གང་ལྕོགས་སྒྲུབ་རྒྱུའི་འདུན་མ་དུང་དུང་བ་ཞིག་ཡོད་འདུག ཁོ་མོས“རང་ལ་མི་ལུས་ཀྱི་རྟེན་བཟང་བྱིན་པའི་དྲིན་ཕ་མ་གཉིས་ཀྱི་གཙོས་མི་ཚེ་འདིའི་མགོ་མཇུག་བར་གསུམ་ཀུན་ཏུ་རྒྱབ་སྐྱོར་དང་ཐུགས་ཁུར་གནང་བ་དག་ལ་སྙིང་ཁུང་རུས་པའི་གཏིང་ནས་བཀའ་དྲིན་ཆེ་ཞུས་པ་ཡིན”ཞེས་བཤད་པ་རེད། ངོ་སྤྲོད་ཡོང་ཁུངས། མཚོ་སྔོན་པོ་དྲ་བ།