ཚ་ཚ་

(སཱ་ཙྪ) ཚ་ཚ་ནི་འཇིམ་པ་ལས་བཟོས་པའི་རྟེན་སྐུ་ཆུང་ཆུང་ཞིག་སྟེ། ལེགས་སྦྱར་གྱི་སཱ་ཙྪ་ཟུར་ཆགས་པར། སྐྱོགས་སྟོན་ལོ་ཙཱ་བའི་དག་ཡིག་ལི་ཤིའི་གུར་ཁང་དུ་གསལ། སྤྱིར་བཏང་དུ་སཱ་ཙྪ་ཞེས་པ་དམ་པའི་སྐུ་ཞེས་པའི་དོན་ཡིན། ཇོ་བོ་རྗེ་དཔལ་ལྡན་ཨ་ཏི་ཤས་མཛད་པའི《ཕ་རོལ་དུ་ཕྱིན་པའི་ཐེག་པའི་ཚ་ཚ་གདབ་པའི་ཆོ་ག》ལས། ༄༅།། ཕ་རོལ་ཏུ་ཕྱིན་པའི་ཐེག་པ་ཚ་ཚ་གདབ་པའི་ཆོ་ག་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ།། ན་མོ་བྷ་ག་བ་ཏེ། བཻ་རོ་ཙ་ན་པྲ་བྷ་རཱ་ཛཱ་ཡ། ཏ་ཐཱ་ག་ཏ་ཡ། ཨཧ་ཏེ་ས་མྱཀྶཾ་བུདྡྷ་ཡ། ཏདྱ་ཐ། ཨོཾ་སུཀྵྨེ་ས་མེ་ས་མ་ཡེ་ས་མ་ཏེ་ས་མཱ་རོ་པོ་ཨ་ན་བར་ཎེ། ཏ་རཾ་བྷེ། ཡ་ཤོ། མ་ཧཱ་ཏེ། ཛེ་རིར་ཀུ་ལེ། ནིར་བ་ཎི། སརྦ་ཏ་ཐཱ་ག་ཏ། ཧྲིད་ཡ། ཨ་ཏི་ཥྛཱ་ན་ཨ་དྷི་ཥྛ་ཏེ་སྭཱཧཱ(སྔགས་འདི་ལ་ཞུ་དག་ངེས་པར་དགོས)འཇིམ་པའི་གོང་བུའམ་བྱེ་མའི་གོང་བུ་ལ་ལན་ཉི་ཤུ་རྩ་གཅིག་བཟླས་བ་ལ་མཆོད་རྟེན་བྱའོ།། མཆོད་རྟེན་དེ་ལ་རྡུལ་ཕྲ་རབ་ཀྱི་གྲངས་ཇི་སྙེད་ཡོད་པ་དེ་སྙེད་ཀྱིས་མཆོད་རྟེན་བྱེ་བ་བྱས་པར་འགྱུར་རོ།། རྡུལ་ཕྲ་རབ་ཀྱི་གྲངས་ཇི་སྙེད་ཡོད་པ་དེ་སྙེད་ཀྱིས་ལྷ་དང་མི་རྣམས་ཀྱི་སྐྱེ་བ་ཕུན་སུམ་ཚོགས་པ་ཐོབ་པར་འགྱུར་རོ།། གང་དང་གང་དུ་སྐྱེ་བ་ན་སྐྱེ་བ་དྲན་པར་འགྱུར་རོ།། མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ།། དང་པོར་འཇིམ་པ་བརྡུང་བ་བདག་གམ་གཞན་ཡང་རུང་བས་བྱམས་པ་དང་སྙིང་རྗེས་བྱང་ཆུབ་ཏུ་སེམས་བསྐྱེད་པར་བྱ་ཞིང་བརྡུང་ངོ་།། དེ་ནས་འབི་འབི(འཇིམ་པའི་གོང་བུ་ཆུང་ངུ)བྱིན་གྱིས་རླབས་པ། འོག་མིན་ནས་བཅོམ་ལྡན་འདས་རྣམ་པར་སྣང་མཛད་འོད་ཀྱི་རྒྱལ་བོ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བཞུགས་པ་ལ་ཕྱག་འཚལ་བར་བསམ་ཞིང་། སྔགས་ཀྱི་གྲངས་བརྗོད་དོ།། དེ་ནས་རྟེན་འབྲེལ་སྙིང་བོའི་སྔགས་བཟླས་ཤིང་གདབ་བོ།། དེ་ནས་འབྲུའམ་མེ་ཏོག་ལ་རྟེན་འབྲེལ་གྱི་སྔགས་ལན་གསུམ་མམ་བདུན་བཟླས་ལ་དབུལ་ལོ།། བསོད་ནམས་འདི་ཡིས་ཐམས་ཅད་གཟིགས་པ་ཉིད།། ཐོབ་ནས་ཉེས་བའི་དགྲ་རྣམས་ཕམ་བྱེད་དེ།། རྒ་ནད་འཆི་བའི་དབའ་ཀློང་འཁྲུགས་པ་ཡི།། སྲིད་པའི་མཚོ་ལས་འགྲོ་བ་འདོན་པར་ཤོག། ཅེས་སྨོན་ལམ་གདབ་བོ། ཕ་རོལ་དུ་ཕྱིན་པའི་ཐེག་པའི་སཱ་ཙྪ་གདབ་པའི་ཆོ་ག་སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།། འོན་ཀྱང་ས་པཎ་གྱིས་ཕར་ཕྱིན་ཐེག་པའི་ལུགས་ལ་ཚ་ཚ་གདབ་པའི་ཆོ་ག་མེད་པར་གསུངས་ཏེ། ས་པཎ་གྱི་སྡོམ་གསུམ་རབ་དབྱེ་ལས། གཞན་ཡང་སྦྱིན་སྲེག་རོ་སྲེག་དང་།། བདུན་ཚིགས་སཱ་ཙྪའི་ཆོ་ག་སོགས།། དེང་སང་གསང་སྔགས་ལུགས་བོར་ནས།། མདོ་མཆོད་ཙམ་ལ་བརྟེན་པ་ཡི།། ཆོ་གའི་རྣམ་གཞག་བྱེད་པ་ཡོད།། ཕ་རོལ་ཕྱིན་པའི་མདོ་སྡེ་དང་།། བསྟན་བཅོས་ཀུན་ལས་གསུངས་བ་མེད།། འདི་དག་ངན་སོང་སྦྱོང་རྒྱུད་ལ།། སོགས་པའི་རྒྱུད་སྡེ་འགའ་ཞིག་ལས།། གསུངས་བའི་རྗེས་སུ་འབྲང་བ་ཡི།། གསང་སྔགས་པ་ལ་གྲགས་པ་ཡིན།། ཞེས་གསུངས་སོ།།