མར་མེའི་ངོ་སྤྲོད་

༄༅། །ཟབ་ཆོས་ཞི་ཁྲོ་དགོངས་པ་རང་གྲོལ་ལས། ངོ་སྤྲོད་མཐོང་བ་རང་གྲོལ་གྱི་མར་མེའི་ངོ་སྤྲོད་ཀྱི་ལྷན་ཐབས་བཞུགས་སོ། ། ཞི་ཁྲོ་སྐུ་གསུམ་ལྷ་ལ་ཕྱག་འཚལ་ལོ། །ཟབ་ཆོས་ཞི་ཁྲོ་དགོངས་པ་རང་གྲོལ་ལས།ངོ་སྤྲོད་མཐོང་བ་རང་གྲོལ་ནང་ནས་ནི། སྣང་གསལ་མར་མེ་གསལ་བའི་ངོ་སྤྲོད་ཀྱིས༔བར་དོ་རྟོག་མེད་གསལ་བའི་ངོ་སྤྲོད་བྱ༔ ཞེས་གསུངས་པས། དཀྱིལ་འཁོར་གྱི་མཐའ་ལ་མར་མེ་བརྒྱ་འམ། བཞི་བཅུ་རྩ་གཉིས་སམ་ཉེར་གཅིག་གམ་ཐ་ན་ལྔའམ། ལྷ་གྲངས་དང་མཉམ་པར་བཀོད་ལ། ཤེལ་མིག་ལ་སྦྱར་ཏེ་བལྟས་པས། གསུམ་ཐོག་བཞི་ཐོག་ཙམ་དུ་འཆར་རོ། །ཀྱཻ་རིགས་ཀྱི་བུ་རྣམས་འོག་ཏུ་ཞི་བའི་དཀྱིལ་འཁོར་ཡིན། སྟེང་མ་ཁྲོ་བོའི་དཀྱིལ་འཁོར་ཡིན། བརྡ་མིག་གིས་མཐོང་བ་ཡིན། རང་འཆི་བའི་དུས་སུ་ཆོས་ཉིད་བར་དོར་འོད་གསལ་གྱི་དཀྱིལ་འཁོར་འདི་འདྲ་བ་འཆར་རོ། །དེ་ཡང་ཆེ་བས་ནམ་མཁའ་ཁེངས་པ། འབྲིང་པོ་ནི་རི་བོ་མཆོག་རབ་ཙམ། ཆུང་བ་ལ་སྦ་ཕུབ་ཙམ་དུ་འཆར་བས། དེ་ཡང་རང་སྣང་དུ་ངོ་ཤེས་པར་གྱིས་ཤིག།།མདུན་གྱི་ནམ་མཁར་མར་མེ་ལྔ་བརྩེགས་དང་། སུམ་བརྩེགས་ལ་སོགས་ཟེར་དང་བཅས་པ་མཐོང་བ་ལྟར་ད་ལྟ་རང་གི་སྙིང་གར་ཞི་བའི་ལྷ་ཚོགས་བཞི་བཅུ་རྩ་གཉིས་གནས་ཤིང་།ཞི་བ་གནས་འགྱུར་གྱི་ཁྲོ་བོ་ཆེན་པོ་ཞེས་བྱ་བ། ཐོད་པའི་འོག ཀླད་པའི་སྟེང་། ཀླད་རྒྱའི་མཚམས་ན་འབར་བ་ཁྲག་འཐུང་ལྔ་བཅུ་རྩ་བརྒྱད་བཞུགས་པ། བར་དོའི་སྐབས་སུ་ཡེ་ཤེས་རྣམ་པ་ལྔའི་བདག་ཉིད་ཞི་ཁྲོ་ལྷ་ཚོགས་ཐམས་ཅད་འོད་དང་ཟེར་དུ་འཆར་བའི་དུས་སུ། རང་སྣང་ལས་བྱུང་བ་ཡིན་པས། ངོ་ཤེས་པར་གྱིས་ཤིག དེ་ཡང་ལུས་དང་སེམས་བྲལ་བའི་དུས་སུ། ཆོས་ཉིད་ཀྱི་བར་དོར་ཞི་ཁྲོའི་སྐུ་དང་འཇའ་དང་འོད་ཀྱི་རང་བཞིན་ནམ་མཁའ་ཁྱབ་པར་འཆར་རོ། །མར་མེ་འདི་དག་སྣང་ལ་རང་བཞིན་མེད་པ་བཞིན་དུ། ཞི་ཁྲོའི་སྐུ་དེ་དག་ཀྱང་། སྣང་ལ་རང་བཞིན་མེད་པར་ཤེས་པར་གྱིས་ཤིག མར་མེ་འདི་དག་འགུལ་ཞིང་འཕྲིགས་པ་བཞིན་ཏུ། ཞི་ཁྲོའི་སྐུ་དེ་དག་ཐམས་ཅད་ནམ་མཁའི་དབྱིངས་སུ་འགུལ་བ། འཕྲིགས་པ། ཡོམ་ཡོམ་པ་འཆར་བས༑ ཡི་དམ་གྱི་ལྷ་ཡིན་པར་ངོ་ཤེས་པར་གྱིས་ཤིག ཡང་མེ་ལོང་མཐོང་སྐོར་མ་སྟེང་ནས་མར་ཁ་སྦུབས་ནས་བལྟས་པས། འོད་ཀྱི་དཀྱིལ་འཁོར་ནམ་མཁར་འཆར་རོ༑ ༑ཡང་ལྷའི་བུས་ཕྱག་སོར་ལ་ངོ་སྤྲད་པ་ཞེས་བྱ་བ། ཕུག་རོན་གྱི་དོང་དུ་མར་མེ་ལ་གཏད་ནས་བལྟས་པས་འཇའ་འོད་སྣ་ལྔ་འགུལ་འཕྲིགས་སུ་འཆར་རོ། །དེ་དག་ཀྱང་བར་དོ་ཡེ་ཤེས་ཀྱི་སྣང་བ་ཡིན་པས་ངོ་ཤེས་པར་གྱིས་ཤིག གང་ཤར་ཐམས་ཅད་རང་སྣང་ལས་བྱུང་བ་ཡིན་པས་ངོ་ཤེས་པར་གྱིས་ཤིག མ་འཇིགས་ཤིག མ་སྐྲག་ཅིག མ་སྔངས་ཤིག རང་སྣང་ཆོས་ཉིད་ཀྱི་དཀྱིལ་འཁོར་དུ་ངོ་ཤེས་པར་གྱིས་ཤིག ཅེས་གང་ཤར་ཐམས་ཅད་རང་སྣང་དུ་ངོ་སྤྲད་དོ། །འོད་ཀྱི་ངོ་སྤྲད་རྒྱ་མཚོ་ཨར་གཏད་ནི། མིག་གཉིས་མཛུབ་མོས་མནན་པས། འོད་སྐོར་འོང་སྟེ། ད་ལྟ་སྙིང་གི་ནང་ན་ཞི་བའི་སྐུ་འཇའ་འོད་ཀྱི་རྣམ་པར་བཞུགས་ཤིང་།དེའི་རྩལ་ཀླད་པ་དུང་ཁང་གི་གཞལ་ཡས་སུ་ཁྲོ་བོའི་ལྷ་ཚོགས་བཞུགས་ནས་ཡོད་པའི་བརྡ་ཡིན་ནོ། །ངོ་ཤེས་པར་གྱིས་ཤིག རྒྱ་མཚོ་རྦ་རླབས་ཞེས་སམ་ཆོས་ཉིད་ཀྱི་རང་སྒྲ་གླང་པོ་ཆེའི་འུར་སྒྲ་ལ་ངོ་སྤྲོད་པ་ནི། རྣ་བ་གཉིས་མཛུབ་མོས་མནན་པས་གཏིང་ནས་འུར་ཏིང་གི་སྒྲ་འོང་སྟེ། ཆོས་ཉིད་བར་དོར་ཆོས་ཉིད་རང་སྒྲ་འབྲུག་སྟོང་ལྡིར་བ་ཙམ་འོང་བའི་བརྡ་ཡིན་ནོ། །གཞན་ནས་འབྱུང་བ་མ་ཡིན་ཞིང་། དེ་རང་སྣང་གི་སྒྲ་ཡིན་པས་ངོ་ཤེས་པར་གྱིས་ཤིག ཆོས་ཉིད་ཟེར་གྱི་ངོ་སྤྲོད་ནི། མིག་གཉིས་མཛུབ་མོས་ཡུན་རིང་དུ་མནན་པས་ཟེར་དང་ཐིག་ལེ་ལུག་གུ་རྒྱུད་རྒྱ་ཆེ་བ། འགུལ་འཕྲིགས་ཡོམ་ཞིང་འཕྲོ་སྟེ། ཆོས་ཉིད་བར་དོར་ཟེར་གྱི་སྣང་བ་འཆར་བའི་རྟགས་ཡིན་པས། ངོ་ཤེས་པར་གྱིས་ཤིག སྒྲ་ཐམས་ཅད་རང་སྒྲ། འོད་ཐམས་ཅད་རང་འོད།ཟེར་ཐམས་ཅད་རང་ཟེར། རང་སྣང་ཆོས་ཉིད་ཀྱི་དཀྱིལ་འཁོར་དུ་ངོ་ཤེས་པར་གྱིས་ཤིག ཅེས་བརྗོད་དོ། །དེ་ནས་མར་མེ་རྣམས་བསྡུ་ཞིང་སྨོན་ལམ་བྱའོ། །ས་མ་ཡཱ། ཟབ་ཆོས་ཞི་ཁྲོ་དགོངས་པ་རང་གྲོལ་ལས། ངོ་སྤྲོད་མཐོང་བ་རང་གྲོལ་གྱི་མར་མེ་ངོ་སྤྲོད་ལྷན་ཐབས་འདི་ནི།རང་འདྲ་བློ་དམན་རྣམས་ཀྱི་དོན་དུ། རྒྱ་བཙུན་ནམ་མཁའ་ཆོས་ཀྱི་རྒྱ་མཚོས་བྲིས་པས།སེམས་ཐམས་ཅད་རང་སྣང་ཆོས་ཉིད་ཀྱི་དཀྱིལ་འཁོར་དུ་ངོ་ཤེས་པར་གྱུར་ཅིག། །།མངྒ་ལམ། བྷ་ཝནྟུ།