མཚོ་སྨད་དགོན་

སྟོད་ལུང་བདེ་ཆེན་རྫོང་ཁོངས་མཚོ་སྨད་དགོན་པ་ནི་སྤྱི་ལོའི་དུས་རབས་བདུན་པའི་ནང་བཙན་པོ་སྲོང་བཙན་སྒམ་པོས་ལྷ་སའི་ཇོ་མོ་རྣམ་གཉིས་བཞུགས་ཡུལ་གཙུག་ལག་ཁང་གཉིས་བཞེངས་པར་མཛད་རྗེས་མཚོ་སྨད་དུ་རྣམ་སྣང་གཙོ་གྱུར་གྱི་རིགས་ལྔའི་ལྷ་ཁང་ཞིག་ཞལ་ཤར་དུ་གཟིགས་ནས་གསར་བཞེངས་མཛད། བསྟན་པ་ཕྱི་དར་གྱི་འགོར་དབུས་གཙང་མཁས་པ་མི་བཅུའི་ཡ་གྱལ་ཀླུ་མེས་ཚུལ་ཁྲིམས་ཤེས་རབ་ཀྱིས་དེར་དགེ་འདུན་གྱི་སྡེ་གསར་འཛུགས་གནང་། འདུ་ཁང་ནང་དུ་སྐུ་རྒྱུ་ལི་ལས་གྲུབ་པའི་ཇོ་བོ་ཐོག་ཚད་ཙམ་བྱིན་ཅན་སོགས་ཡོད་ལ་གསོ་རིག་མཁས་དབང་ཤཱཀྱ་དབང་ཕྱུག་གིས་མཁན་པོ་མཛད་སྐབས་དར་རྒྱས་ཆེ་ཞིང་མཚོ་སྨད་མཁན་ཆེན་ཞེས་མཚན་སྙན་ཆེ་བ་བྱུང་། རིགགནསགསར་བརྗེའི་སྐབས་ཉམས་ཆག་ཆེ་ཅམ་བྱུང་ཡང་དེང་སྐབས་དགོན་པར་ཉམས་གསོ་དང་འབྲེལ་ཆོས་ཀྱི་བྱེད་སྒོ་རྣམས་ཀྱང་སྐྱར་གསོ་བྱུང་འདུག།

མཚན་རྒྱས་པར་མཚོ་སྨད་ཕུན་ཚོགས་གླིང་ངམ་ནུབ་ཀྱི་རྣམ་སྣང་ལྷ་ཁང་ཞེས་ཞུ། སྙན་ནས་སྤྱི་ལེ་ལྔ་དྲུག་ཙམ་སྣུམ་ལམ་བརྒྱུད་སོང་ན་དམར་ལ་འབྱོར་ཞིང་དེ་ནས་ལྷོ་ངོས་སུ་དཔྱང་ཟམ་ཐོན་ནས་སྤྱི་ལེ་གསུམ་ཙམ་སྤྱིར་བཏང་འཁོར་ལམ་བརྒྱུད་སོང་ན་མཚོ་སྨད་གྲོང་དབུས་སུ་དགོན་དེ་མཇལ་རྒྱུ་ཡོད། མཚོ་སྨད་ཅེས་པ་ནི། ཡུལ་དེའི་ཕུ་ལ་བསྟན་མ་གཙོ་འཁོར་གསུམ་གྱི་བླ་མཚོ་ཡོད་པས་དེའི་སྨད་དུ་ཆགས་པས་ན་མཚོ་སྨད་ཅེས་པ་དེ་ནས་བྱུང་ཞེས་གསུངས། ཐོག་མར་སྤྱི་ལོའི་དུས་རབས་བདུན་པར་གནས་དེར་ཆོས་རྒྱལ་སྲོང་བཙན་གྱིས་ཇོ་ཤཱཀ་རྣམ་གཉིས་བཞེངས་བསྒྲུབས་རྗེས་ནུབ་ཀྱི་རྣམ་སྣང་དཀར་པོ་ཞལ་ཤར་ལ་ཕྱོགས་པ་ཞེས་པའི་ལྷ་ཁང་ཞིག་བཏབ་གནང་མཛད། བསྟན་པ་ཕྱི་དར་གྱི་འགོར་དབུས་གཙང་མཁས་པ་མི་བཅུའི་ཡ་གྱལ་ཀླུ་མེས་ཚུལ་ཁྲིམས་ཤེས་རབ་ཀྱིས་དགེ་འདུན་གྱི་སྡེ་གསར་དུ་བཙུགས། སྐ་བ་ཤཱཀྱ་དབང་ཕྱུག་གིས་དར་རྒྱས་མཛད་པའི་དགོན་ཞིག་ལ། བར་སྐབས་ས་ལུགས་སུ་འགྱུར་བའི་མཁན་པོ་རྡོ་རིན་པ། རྡོར་རྒྱལ་བ། བསོད་ནམས་དོན་གྲུབ། མཚོ་སྨད་མཁན་ཆེན་ཤཱཀྱ་དབང་ཕྱུག་སོགས་རིམ་པས་བསྐྱངས། ཕྱིས་ཚ་བ་ནམ་མཁའ་ཤེས་རབ་སོགས་ཀྱི་དུས་ནས་དགེ་ལྡན་ལུགས་ཕྱག་བཞེད་གནང་སྟེ་འབྲས་སྤུངས་སུ་མཚན་ཉིད་དང་། རྒྱུད་སྨད་དུ་སྔགས་ཀྱི་སློབ་གཉེར་གནང་སྲོལ་ཡོད། སྔོན་འདུ་ཁང་ཀ་བ་བཅུ་དྲུག་གི་གཙང་ཁང་སྦུག་མར་འཇིམ་གྱི་རྣམ་སྣང་མི་ཚད་མ་དང་། དེའི་ཞོགས་སུ་རྒྱལ་བ་རིགས་ལྔའི་ལྷ་ཁང་ནང་འཇིམ་གྱི་རྒྱལ་བ་རིགས་ལྔ་ཐོག་སོ་གཅིག་ལྷག་དང་། ལྷ་སའི་ཇོ་བོའི་ཉེ་སྲས་ཀྱི་དབྱིབས་འདྲ་བ་ཉེ་སྲས་དང་སྒོ་སྲུང་། འདུ་ཁང་ནང་རྟེན་གཙོ་འོ་བརྒྱལ་ཇོ་བོ་ཞེས་སྐུ་རྒྱུ་ལི་ལས་གྲུབ་པ་མི་ཚད་ལྷག་ཙམ་ཞིག་ཡོད་པ་དེ་ནི། སྔོན་ཇོ་བོ་ཡུལ་དེར་གདན་དྲངས་སྐབས་ཇོ་བོས་“འོ་བརྒྱལ་སོང་”ཞེས་གསུང་བྱོན་པས་ས་ཆ་དེའི་མིང་ལ་ད་ལྟའང་ལོ་བརྒྱལ་ཞེས་འབོད་པ་ཞིག་དང་དེའི་གཡས་གཡོན་དུ་ཀ་བ་ཤཱཀྱ་དབང་ཕྱུག་དང་ཀླུ་མེས་སོགས་ཀྱི་སྐུ་བརྙན། འདུ་ཁང་གི་གཡས་ངོས་སུ་འཇིམ་གྱི་སྤྱན་རས་གཟིགས་ཁ་པ་ཎི་དང་། གཡོན་ངོས་སུ་སྐུ་རྒྱུ་དེ་འདྲའི་ཚེ་དཔག་མེད་ཀྱི་སྐུ་བརྙན། རིན་ཆེན་ལས་བྲིས་པའི་བཀའ་འགྱུར་སོགས་དང་། ཡང་སྟེང་དུ་རྭ་ལོའི་ཕྱག་བཟོ་འཇིགས་བྱེད་ལྷ་བཅུ་གསུམ་བརྐྱང་ཁྲུ་གང་ལྷག རྩེ་ཐོག་གནས་བཅུ་ལྷ་ཁང་ནང་འཇིམ་གྱི་གནས་བརྟན་བཅུ་དྲུག ཤོད་ཀྱི་མགོན་ཁང་ནང་རྡོ་རྗེ་གཡུ་སྒྲོན་མ་གཙོ་འཁོར་སོགས་བཞུགས་སུ་གསོལ་ཡོད། ད་ལྟ་སྔོན་གྱི་འདུ་ཁང་ལ་ཉམས་གསོ་ཞུས་པའི་འདུ་ཁང་གི་གཙང་ཁང་སྦུག་མར་འཇིམ་གྱི་སངས་རྒྱས་རྣམ་པར་སྣང་མཛད་དང་། རྒྱལ་་བ་རིགས་ལྔའི་ལྷ་ཁང་ནང་རྒྱལ་བ་རིགས་ལྔ། ཤོད་ཀྱི་མགོན་ཁང་ནང་བསྟན་མ་གཙོ་འཁོར་སོགས་གསར་བཞེངས་གནང་བ་དང་། སྔོན་གྱི་རིན་ཆེན་སྣ་བརྒྱད་ལས་བྲིས་པའི་བརྒྱད་སྟོང་པ་དང་། འོ་བརྒྱལ་ཇོ་བོ། བསིལ་གཡངས་ཀྱི་ལྡེབས་རིས་རྙིང་མ། བཀའ་འགྱུར་གསར་བླུས་གནང་བ་སོགས་མཇལ་རྒྱུ་ཡོད།