མཚུར་ཕུའི་ཕུག་མོ་ཆེ་རི་ཁྲོད་
ཀརྨ་པ་དུས་གསུམ་མཁྱེན་པའི་སློབ་མ་ནམ་མཁའ་འོད་ཀྱི་སྒྲུབ་གནས་མཚུར་ཕུའི་ཕུག་མོ་ཆེའི་རི་ཁྲོད། མཚུར་ཕུའི་ཕུག་མོ་ཆེའི་རི་ཁྲོད་ནི་རྒྱལ་དབང་ཀརྨ་པ་དུས་གསུམ་མཁྱེན་པ་ལ་སློབ་མ་ཉེ་གནས་འོད་བཞི་ཡོད་པའི་ནང་ནས། ཉེ་གནས་ནམ་མཁའ་འོད་ཀྱིས་ཕྱག་བཏབ་པའི་མཚུར་ཕུའི་སྒྲུབ་གནས་གལ་ཆེན་ཞིག་ཡིན། གནས་འདིར་ཉེ་གནས་ནམ་མཁའ་འོད་ཀྱིས་མི་ལོ་བཅུ་བདུན་གྱི་རིང་སྒྲུབ་པ་མཛད། དེ་ལྟར་ཡང་། རྗེ་ཞྭ་དམར་པ་སྐུ་ཕྲེང་དང་པོ་གྲགས་སེང་གི་མགུར་ལས།"དེ་ནས་སྒོམ་ཆེན་ནམ་མཁའ་འོད། །ཕུག་མོ་ཆེ་ཡི་རི་ཁྲོད་དུ། །ལོ་ནི་བཅུ་བདུན་བར་དག་ཏུ། །རྩེ་གཅིག་ཡེངས་མེད་ཏིང་འཛིན་བསྐྱངས། །གཟུང་འཛིན་གྱི་མདུད་པ་གྲོལ་བར་གྱུར། །ཁོང་གནས་ལུགས་ཀྱི་སྟེང་དུ་ཕྱིན་པ་འདྲ། །"ཞེས་དང་། རི་ཁྲོད་པ་དར་མ་རྒྱལ་མཚན་གྱིས་མཛད་པའི་རྗེ་ཞྭ་དམར་པ་སྐུ་ཕྲེང་དང་པོ་གྲགས་པ་སེང་གེའི་རྣམ་ཐར་ནོར་བུའི་ཕྲེང་བར་རྗེ་ཞྭ་དམར་པའི་སྐུ་ཡི་སྐྱེ་བ་སྔོན་མ་གླེང་བའི་སྐབས་སུ་གསུངས་པ་འདི་ལྟར། "སྐུ་སྐྱེ་བ་དེའི་རྟིང་ལ་རྗེ་དུས་གསུམ་མཁྱེན་པའི་ཉེ་གནས་འོད་བཞི་ཡོད་པའི་ནང་ནས་སྟོད་ལུང་པ་ནམ་མཁའ་འོད་ཅེས་བྱ་བ་ཡིན་ཏེ། དུས་གསུམ་མཁྱེན་པ་ལ་ཆོས་དྲུག་བསྐྱེད་རྫོགས་གདམས་པ་ཞུས་ཏེ་བསྒོམས་པས། ཏིང་ངེ་འཛིན་ཕུན་སུམ་ཚོགས་པ་དང་། ཐུན་མོང་གི་གྲུབ་རྟགས་ནམ་མཁའ་ལ་རྫུ་འཕྲུལ་གྱི་སྟོབས་ཀྱིས་འཕུར་ནུས་པ་བྱུང་། མཚུར་ཕུའི་ཕུག་མོ་ཆེའི་རི་ཁྲོད་བཏབ་སྟེ་བཞུགས་པས་སློབ་མ་ཡང་བདུན་ཅུ་ཙམ་བྱུང་། སྒོམ་ཆེན་ཉམས་མྱོང་དང་ལྡན་པ་ཡང་ཁ་ཡར་བྱུང་། "ཞེས་གསུངས་གནང་འདུག །དེའི་རྗེས་སུ་རྗེ་ཞྭ་དམར་གྲགས་སེང་དང་མཁའ་སྤྱོད་དབང་པོས་རིམ་བཞིན་སྒྲུབ་པ་མཛད་པ་དང་སློབ་མའི་ཚོགས་བསྐྱངས་གནང་སའི་གནས་གལ་ཆེན་ཞིག་ཡིན་ཡང་དེང་གི་དུས་སུ་ངོས་ཟིན་དཀའ་བའི་གནས་སུ་ལྷུང་ཡོད། འོ་ན་ཡང་སྙིང་རི་ཁྲོད་དེ་མཚུར་ཕུ་ལུང་པའི་ཡུལ་བྱེ་བྲག་པ་གང་གི་ཕྱོགས་སུ་ཡོད་ཅེ་ན། སྟོད་ལུང་མཚུར་ཕུ་དགོན་གྱི་ཕུར་ཡོད་པ་ཏེ། གཡའ་བཟང་པ་བསོད་ནམ་བཟང་པོས་མཛད་པའི་རང་གི་བླ་མ་རྗེ་ཞྭ་དམར་པ་གྲགས་པ་སེང་གེའི་རྣམ་ཐར་ནང་དུ་"དེ་ནས་དབེན་པ་བརྟེན་པ་ལ་མཚུར་ཕུའི་ཕུ། ཕུག་མོ་ཆེའི་རི་ཁྲོད་དུ་བྱོན་ཏེ་"ཞེས་མཚུར་ཕུའི་ཕུར་ཡོད་ཚུལ་གསལ་པོར་གསུང་ཡོད་པས་སོ། ། དོན་དུ་མཚུར་ཕུ་དགོན་ནས་ནུབ་ངོས་སུ་སྐུང་གི་རི་ཁྲོད་ཀྱི་ཕྱོགས་སུ་ཆུ་ལུང་མ་ཞེས་པའི་གྲོང་གི་ཡར་ཙམ་གྱི་རི་གཤམ་དུ་(རྟེན་འབྲེལ་བག་ལོག་གམ་)དེ་གའི་ཡུལ་མིས་ཕ་བོང་ཁ་གཤག་ཟེར་བའི་ཕ་བོང་ཆེན་པོ་ཞིག་ལམ་བར་དུ་ཡོད། དེའི་བྱང་ཕྱོགས་མཚུར་ཕུའི་དབུས་རི་བྱམས་པ་ཆེན་པོའི་གྱེན་དུ་ཐད་ཀར་ཆུ་ཚོད་གཅིག་ཙམ་ཕྱིན་ན་རི་འགོ་ལ་མ་སླེབས་ཙམ་གྱི་བྲག་གསེབ་ཅིག་ཏུ་བྲག་གི་ཕུག་པ་ཆེན་པོ་ཞིག་ཡོད་ཅིང་། ཕུག་པ་དེ་ནི་མཚུར་ཕུའི་ཕུག་མོ་ཆེ་ཡིན། ཕུག་པའི་ནང་གི་བྲག་ངོས་སུ་ཞྭ་དམར་ཅོད་པན་འཛིན་པ་མཁྱེན་ནོ་ཞེས་པ་དང་བླ་མ་མཁྱེན་ནོ་སོགས་ཡི་གེ་དམར་པོ་བྲིས་ཡོད་པས། ཡིག་གཟུགས་ལ་དཔགས་ན་ལོ་ངོ་བཞི་བརྒྱ་ལྔ་བརྒྱའི་སྔོན་དུ་བྲིས་པ་འདྲ་ལ་ཕུག་མོ་ཆེར་སྔོན་དུས་ནམ་མཁའ་འོད་ཀྱི་སྐུ་ཡི་སྐྱེ་བ་ཕྱི་མ་ཞྭ་དམར་སྐུ་ཕྲེང་དང་པོ་དང་གཉིས་པ་གཉིས་ཡུན་རིང་དུ་སྒྲུབ་པ་སྐྱོན་མྱོང་བས་ན། འདི་གར་ཕྱིས་སུ་རྗེ་ཞྭ་དམར་པའི་སློབ་མ་འགས་རང་གི་བླ་མའི་མཚན་བྲག་ངོས་དེར་བྲིས་པ་མིན་ནམ་སྙམ། གཞན་ཡང་ཞྭ་དམར་སྐུ་ཕྲེང་དང་པོ་གྲགས་པ་སེང་གེ་ཕུག་མོ་ཆེར་བཞུགས་དུས་སུ་རང་གི་སྐྱེ་བ་སྔོན་མ་ནམ་མཁའ་འོད་སོགས་མངོན་ཤེས་ཀྱིས་གསལ་བར་དྲན་ནས་མགུར་གསུངས་པ་འདི་ལྟར། "སྤྱིལ་ཆུང་འདི་ཡི་ནང་དུ་ཡང་། །ཟླ་བ་གསུམ་དང་ཞག་བདུན་བསྒོམ། །སྒོ་ནི་ལྷོ་རུ་ལྟ་བ་ཡིན། །"ཞེས་གསུངས་པ་ནང་བཞིན་གྱི་ཉེ་གནས་ནམ་མཁའ་འོད་ཟླ་བ་གསུམ་དང་ཞག་མ་བདུན་བཞུགས་སའི་མཚམས་ཁང་སྒོ་ལྷོ་ལྟ་ཅན་གྱི་སྤྱིལ་ཆུང་ད་ལྟའང་མ་ཞིག་པར་གནས་འདུག །དེའི་སྟེང་འོག་དང་ཤར་ནུབ་ཀྱི་རིའི་ངོས་སུ་ཉེ་གནས་ནམ་མཁའ་འོད་དང་རྗེ་ཞྭ་དམར་པས་རིམ་བཞིན་བུ་སློབ་མང་པོ་བསྐྱངས་ཤུལ་རྡོ་གཡམ་གྱི་སྒྲུབ་ཁང་བརྒྱ་ཕྲག་ལ་ཉེ་བ་དང་། དགོན་ཤུལ་སོགས་ཀྱང་མཇལ་རྒྱུ་ཡོད། དེ་གར་ས་བབ་ཀྱི་མཐོ་ཚད་ནི་རྒྱ་མཚོའི་ངོས་ནས་རྨིས་༤༧༠༠ལྷག་ཙམ་རེད་འདུག །