མདོ་སྨད་དུ་འཁྲུངས་པའི་མི་སྣ་གལ་ཆེན་ཁག་ཅིག་

སྟོང་གསུམ་འཛིན་མའི་དགེ་ལེགས་ཀུན་གྱི་གཞི།། སྐྱེས་མཆོག་པདྨ་དཀར་པོའི་འཛུམ་བརྒྱ་བ།། མདོ་སྨད་ས་ལའི་ལྗོངས་སུ་བཞད་པ་གང་།། དད་གསུམ་སྙིང་གི་དབུས་སུ་དྲན་དུ་བརྐོས།།

བླ་ཆེན་དགོངས་པ་རབ་གསལ།

བླ་ཆེན་དགོངས་པ་རབ་གསལ། དུང་དཀར་བློ་བཟང་འཕྲིན་ལས། འདི་བསྒྲིགས་པ་པོ། སུ་རུ་མེ་ཏོག རྗེ་འདི་ཉིད་ འཁྲུངས་ལོར་བཞེད་ཚུལ་མི་འདྲ་བ་རེ་ཡོད་དེ། གངས་ཅན་མཁས་གྲུབ་རིམ་བྱོན་མིང་མཛོདདུ་ཁོང་ནི་རབ་བྱུང་མ་ཚུགས་གོང་གི་མེ་མཁའ་ རྒྱ་མཚོའི་ལོ་སུམ་བརྒྱ་ཉེར་དགུ་བར་བབས་པ་ཆུ་ཕོ་བྱི་ལོ་སྟེ་སྤྱི་ ལོ་(༩༥༣)ལོར་མཚོ་སྔོན་ཞིང་ཆེན་ཧྭ་ལུང་རྫོང་གི་མངའ་ཁོངས་རི་བོ་དན་ཏིག་དང་ཁད་ ཤིན་ཏུ་ཉེ་བའི་རྨ་འགྲམ་དུ་ཆགས་པའི་རྒྱ་ཞུར་གྲོང་ཚོར་སྐུ་འཁྲུངས། རབ་བྱུང་དང་པོའི་བགྲང་བྱ་དགུ་བ་ཤིང་མོ་ཕག་ལོ་སྟེ་སྤྱི་ལོ་(༡༠༣༥)ལོར་སྐུ་མྱ་ ངན་ལས་འདས་སོ། དུང་དཀར་ཚིག་མཛོད་དུ་རྗེ་འདི་ཉིད་བོད་ཆུ་བྱི་(༨༩༢)ལོར་ཙོང་ཁ་བདེ་ཁམས་སམ་ འཕན་ཡུལ་ཞོགས་པར་སྐུ་འཁྲུངས། འདི་ཉིད་སྐྱ་བོའི་སྐབས་མཚན་ཀ་ར་འཕན་དང་། བོན་བསླབས་པས་བོན་མིང་མུ་གཟུ་གསལ། རབ་ཏུ་བྱུང་སྐབས་མཁན་སློབ་ཀྱི་མཚན་ལས་དྲངས་པས་དགེ་བ་རབ་གསལ་དང་ཕྱིས་ཐུགས་ རབ་ཆེ་བས་དགོངས་པ་རབ་གསལ། བསྟན་པའི་མེ་རོ་བླངས་པས་བླ་ཆེན་དུ་གྲགས་པ་བཅས་མཚན་གྱི་རྣམ་གྲངས་མང་། སྐུ་ནར་སོན་རྗེས་ཞིང་དབོན་སར་ནོན་འཇམ་དཔལ་ལ་བཟླས་ལུང་ཞུས། ཁང་རིན་ཆེན་རྡོ་རྗེ་ཞེས་བྱ་བ་ལ་བྱང་ཆུབ་མཆོག་ཏུ་སེམས་བསྐྱེད། སྐྱི་རྒྱལ་བའི་གཙུག་ཏོར་ལས་དབུ་ཚད་ཀྱི་བསྟན་བཅོས་གསན། ནམ་དགའ་ལྡན་བྱང་ཆུབ་ལས་ཡོ་ག་གསན། དེ་རྗེས་དམར་གཡོ་གཙང་གསུམ་དང་མཇལ་ཏེ་རབ་བྱུང་བསྙེན་རྫོགས་ཚིག་རྫོགས་གནང་ སྐབས་དགུང་ལོ་ཞེ་དགུ་པའམ་ཉེར་གཉིས་ལ་ཕེབས་སོགས་གསུང་ཚུལ་མང་། བུ་སྟོན་གྱི་བཞེད་པ་ལྟར་ན་ལྕགས་མོ་བྱ་ལ་བསྟན་པ་ནུབ་ནས་བདུན་ཅུ་རྩ་གསུམ་པ་ ཆུ་མོ་བྱ་ལ་བླ་ཆེན་དགོངས་པ་རབ་གསལ་གྱིས་བསྙེན་རྫོགས་ཀྱི་སྡོམ་པ་བཞེས་པ་དེ་ ནས་བསྟན་པ་ཕྱི་དར་འགོ་ཚུགས་པར་གསུངས། དེ་ནས་བྱང་ཕྱོགས་སུ་ཕེབས་ཏེ་ཅང་ཨིན་རྩེ་མཁར་མི་ཉག་གྷའི་ཡུལ་དུ་བྱོན་ནས་གོ་ རོང་སེང་གེ་གྲགས་ལས་འདུལ་བ་གསན་པས་འདུལ་བ་ལུང་སྡེ་བཞི་བསྟན་བཅོས་དང་བཅས་པ་ བླ་ཆེན་པོ་ལ་གནང་ནས། བུ་ཁྱོད་ཀྱིས་དེ་བཞིན་གཤེགས་པའི་བསྟན་པ་ཚུལ་བཞིན་དུ་གསལ་བར་གྱིས་ཤིག ཁོ་བོ་ནི་རྒས་པས་ཡུན་རིང་མི་འཚོའོ་གསུངས་སྐད། ཀྭ་འོད་མཆོག་གྲགས་པའི་ས་ནས་ཤེས་རབ་ཀྱི་ཕ་རོལ་ཏུ་ཕྱིན་པའི་འབུམ་ཊིཀ་ལ་སོགས་ པ་དང་། བྱང་ཆུབ་སེམས་དཔའི་ས་ལ་སོགས་པ་མངོན་པའི་ཐེག་པ་ཆེན་པོ་ལོ་བཅུ་གཉིས་ཀྱི་བར་ གསན། དེ་སྐབས་ཅིག་ཆར་འཇུག་པའི་རྣལ་འབྱོར་པ་ཞེས་བྱ་བ་དགེ་བའི་ཕྱོགས་ཅི་ཡང་མི་ བྱེད་པའི་ལོག་རྟོག་ཅན་མང་བས་དེ་དག་གི་ལྟ་བ་བསུན་འབྱིན་པའི་ཆེད་ལྷ་ཁང་དང་ བཟོ་ལ་སོགས་པ་ཡང་རང་མེད་པ་བཞེངས་ཏེ་ཚོན་དང་བཟོ་ལ་སོགས་པ་ཡང་རང་གིས་མཛད་དེ་ འདུས་བྱས་ཀྱི་དགེ་བའི་རྩ་བར་བརྩོན་པར་མཛད། དམ་པ་སྤྱོད་པ་འདི་ལྟ་བུས་དད་པ་སྐྱེས་ནས་སྤ་གོར་ཡེ་ཤེས་གཡུང་དྲུང་ཞེས་བྱ་བ་ དེ་འཁོར་མང་པོ་དང་བཅས་དན་ཏིག་ཏུ་བྱོན་པ་དང་། བླ་ཆེན་པོའི་དྲུང་ནས་དམ་ཆོས་འདུལ་བ་ལས་གསུངས་པའི་བསླབ་པའི་གཞི་རྣམས་གསན་པས་ རང་ཉིད་ཀྱི་སྤྱོད་ལམ་འདི་ལྟ་བུར་གནོད་ཞིང་འགྱོད་ནས་ཚུལ་བཞིན་དུ་རབ་ཏུ་ བྱུང་། བླ་ཆེན་པོ་དགུང་ལོ་ང་བཞི་པའམ་ཉེར་བདུན་པར་དབུས་གཙང་མི་བཅུའི་རབ་བྱུང་བསྙེན་ རྫོགས་ཀྱི་མཁན་པོ་མཛད་པ་དེ་ནས་བཟུང་དབུས་གཙང་དུ་འདུལ་བའི་བསྟན་པ་དར་རྩ་ལག་ ཆེན་པོར་གྱུར། འབྲོམ་སྟོན་པས་བདུན་ཅུ་རྩ་བརྒྱད་པ་ས་ཕོ་སྟག་ལ་དབུས་གཙང་མི་བཅུས་བླ་ཆེན་གྱི་ སྐུ་མདུན་ནས་སྡོམ་པ་བླངས་པ་དེ་ནས་བསྟན་པ་ཕྱི་དར་དབུ་བརྙེས་པར་བཞེད། མཐར་བླ་ཆེན་པོ་དགུང་ལོ་བརྒྱད་ཅུ་གྱ་བཞི་པ་ཤིང་ཕག་ལོར་སྐུ་གཤེགས། བླ་ཆེན་པོའི་སློབ་མ་མཆོག་དྲུག་ནི། སྤ་གོར་ཡེ་ཤེས་གཡུང་དྲུང་དང་བར་གནས་བརྟན་གྲགས་པ་གཉིས་ལ་སྤ་བར་གཉིས་དང་། ཇ་བ་གྲགས་པ་དང་བཙུན་ཆེན་ཤེས་རབ་འབྱུང་གནས་གཉིས་ལ་ཇ་ཅོག་གཉིས། འལ་པ་རྡོ་རྗེ་དབང་ཕྱུག་དང་བསྣུབས་གཉིས་བཅས་དང་། དེ་བཞིན་བཞད་སྲགས་གཉིས། ཟོང་འཚུར་གཉིས། དབུས་གཙང་མི་བཅུ་ལ་སོགས་པ་སློབ་མ་མང་དུ་བྱུང་ངོ་། །

འ་ཞའི་སྨན་པ།

 འ་ཞའི་སྨན་པ།

བྱམས་པ་འཕྲིན་ལས། 

          འ་ཞའི་སྨན་པ་ནི། བོད་ཀྱི་རྒྱལ་པོ་སྟག་རི་གཉན་གཟིགས་དུས་སུ་བྱུང་། 《གསོ་རིག་ཁོག་འབུགས་དྲང་སྲོང་དགྱེས་པའི་དགའ་སྟོན།》《ཤོག་གྲངས་༧༧ ན་༦》དེ་ནས་རྒྱལ་རབས་གསུམ་པ་འབྲོང་སྙན་ལྡེའུ་ས་གདོན་གྱིས་ཟིན་པ་རྒྱལ་བརྒྱུད་ཕྱི་མ་རྣམས་ལ་དེ་ལྟར་མི་འབྱུང་བའི་ཕྱིར་གསོན་པོར་དུར་དུ་ཞུགས་ཁར། སྲས་དམུས་ལོང་དཀོན་པ་བཀྲར་ཞལ་ཆེམས་སུ། བསམ་པ་བཟང་པོ་གསེར་དང་འདྲ་བ་སྟེ། །བཟང་པོའི་གྲོས་ནི་བདུད་རྩི་ཡིན་ཞེས་ཉོན། །ངན་པ་རྣམས་ཀྱང་མེ་དང་འདྲ་བས་གསོས། །མི་ཆོས་རྟོག་པ་ཡིན་གྱི་རྣམ་རྟོག་སྐྱུངས། །ཞེས་གཉན་པོ་(1)གསང་བ་ལ་མཆོད་པ་བྱ་བ་དང་།  འ་ཞའི་ཡུལ་(2)ནས་སྨན་པ་བོས་ལ་མིག་ཕྱེ་སྟེ་རྒྱལ་ཐབས་ཀྱི་བྱ་བ་བྱེད་ཚུལ་གསུངས་པ་ལྟར། རྒྱལ་ཕྲན་འ་ཞ་རྗེ་བྱ་བ་སྨན་པ་མཁས་པ་ཞིག་སྤྱན་དྲངས། རྒྱལ་བུའི་མིག་གསེར་གྱི་ཐུར་མས་ཕྱེ། སྐྱིད་ཤོད་སྟག་མོ་རི་ལ་གཉན་འདུག་པ་གཟིགས་པས་སྟག་རི་གཉན་གཟིགས་སུ་གྲགས། ཞེས་གསུངས་པ་དང་།  《རྒྱལ་རབས་གསལ་བའི་མེ་ལོང་》ནང་འ་ཅིའི་ཡུལ་ནས་སྨན་པ་བོས་ལ་མིག་ཕྱེ་ནས་རྒྱལ་སྲིད་ཟུངས་ཤིག་ཅེས་པ་དང་།  ལྔ་པ་ཆེན་པོའི་《དཔྱིད་ཀྱི་རྒྱལ་མོའི་གླུ་དབྱངས་》སུ་ཁྱེད་ཡབ་མེས་ཀྱི་གཉན་པོ་གསང་བར་མཆོད་པ་གྱིས། འ་ཞའི་ཡུལ་ནས་སྨན་པ་བོས་ལ་མིག་ཕྱེ། མིག་མ་བྱུང་ན་སུམ་པའི་ཡུལ་ན་བོན་པོ་ཞིག་གི་ཆུང་མ་རྒྱ་མོ་རྒྱ་ལྕམ་བྱ་བ་ལ་ནུབ་གཅིག་འགྲོགས་པའི་ཤག་མོ་ཙམ་པ་ལ་སྐྱེས་པའི་སུམ་རི་རིང་མོ་བྱ་བ་ཡོད་པས་དེ་བོས་ལ་གཅེན་ཆོལ་རྒྱལ་སར་ཆུག་གསུངས་ནས་བང་སོ་ཞང་མདར་བརྩིགས་པར་ཡབ་ཡུམ་གསོན་པོར་བཞུགས་སྐད་དོ། །དེ་ནས་སྲས་ཀྱིས་ཡབ་ཀྱི་གསུང་བཞིན་བྱས་པས་མིག་ཕྱེ་སྟེ། སྐྱིད་ཤོད་སྟག་མོ་རི་ལ་གཉན་འདུག་པ་གཟིགས་པས་སྟག་རི་གཉན་གཟིགས་སུ་གྲགས། ཞེས་གསུངས། 

          དཔའ་བོ་གཙུག་ལག་ཕྲེང་བས་མཛད་པའི་《ཆོས་འབྱུང་མཁས་པའི་དགའ་སྟོན་》ནང་།  ལྷ་སྲས་དམུས་ལོང་དཀོན་པ་བཀྲ་དེ་ཡིས། གཉན་པོ་གསང་བ་མཆོད་པའི་བྱིན་རླབས་དང་།  །འ་ཞའི་ཡུལ་གྱི་སྨན་པས་སྤྱན་ཕྱེ་སྟེ། །སྟག་མོའི་རི་ལ་རི་དྭགས་གཉན་གཟིགས་པས། །མཚན་ཡང་སྟག་རི་གཉན་གཟིགས་བཙན་དུ་ཐོགས། །ཞེས་དང་།  ཡང་དེ་ཉིད་ལས། རྒྱལ་ཕྲན་འ་ཞ་རྗེ་བྱ་བ་སྨན་པ་མཁས་པ་ཞིག་བོས་པས་སྤྱན་ཕྱེ་རྒྱལ་བུའི་ཕྱག་སྒོ་ཀླད་དུ་བཏགས་པའི་འོག་ཏུ་འ་ཞ་རྗེ་འཛུལ། ལོག་ནས་མས་གཏམ་དྲིས་པས། བོད་ཀྱི་རྒྱལ་པོ་ནི་མ་མཐོང་།  སྒོ་གོང་ན་གཡུའི་ལྷམ་ཆུང་ཞིག་བཏགས་འདུག་པའི་འོག་ལ་ཕྱིན་པས་བྱིས་པ་དམུས་ལོང་ཞིག་འདུག་པས་མིག་ཕྱེ་ནས་ལོག་གོ་སྨྲས་པས། མ་ན་རེ། གཏམ་ཆེས་སོ་ད་ནི་བོད་ཀྱི་ཆབ་འོག་ཏུ་ཚུད་པས་ཐབས་ཅི་ཡང་མེད་དོ་ཟེར། རྒྱལ་ཕྲན་རྣམས་ཀྱི་སུམ་གཉིས་མངའ་འོག་ཏུ་འདུས། བན་པོ་རྗེ། འ་ཞ་རྗེ། དྲང་གར་རྗེ། ཟིན་པོ་རྗི། ཞང་ཞུང་རྗེ་རྣམས་བཏུལ། ཉང་སྦས་གནོན་གསུམ་འབངས་སུ་ཚུད་སྐད། ཅེས་གསལ་བ་དང་། 

          ཡང་བོན་གྱི་ལོ་རྒྱུས་སྨན་རིའི་སློབ་ཟུར་བསྟན་འཛིན་རྣམ་དག་གིས་བརྩམས་པའི་《སྔ་རབས་བོད་ཀྱི་བྱུང་བ་བརྗོད་པའི་འབེལ་གཏམ་ལུང་གི་སྙིང་པོ་》ལས། འབྲོང་ཟ་དར་མ་གཡང་བཞེར་གྱི་སྲས་འབྲོང་སྙན་ལྡེའུ་ཁུའི་བོན་པོ་མང་རྗེ་ལོད་པོས་སྐུ་བསྲུང་།  འབྲོང་སྙན་དང་།  མཆིམ་ཟ་ཀླུ་རྒྱལ་ངན་ན་ཆེ་ལ་སྲས་དམུས་ལོང་ཞིག་བྱུང་བ་ལ། ལུ་བོན་མང་རྗེ་ལོད་པོས་སྤྱན་བསྒྲུབས་པས། ཕ་རི་ལ་གཉན་འདུག་པ་གཟིགས་པས། མཚན་སྟག་རི་གཉན་གཟིགས་སུ་བཏགས། འབྲོང་གཉན་ལྡེའུ་མཛེ་ནད་བྱུང་ནས་གསོན་པོར་བཞུགས་པ་མ་དགྱེས་ཏེ། རྒྱལ་པོ་དང་བཙུན་མོ་གཉིས་ལྷན་དུ་བང་སོའི་ནང་དུ་ཞུགས་ནས་སྦས་སོ། སྦ་ཁར་སྲས་ལ་ཞལ་ཆེམས་སུ། ཡབ་མེས་ཀྱི་ཐུགས་དམ་གཉན་པོ་གསང་བ་ལ་མཆོད་པ་བྱ་བ་དང་།  འ་ཞའི་ཡུལ་ནས་སྨན་པ་བོས་ལ་སྤྱན་ཕྱེས། རྒྱལ་སྲིད་ཟུངས་ཤིག་གསུངས། བང་སོ་ཞང་མདར་བརྩིགས་ནས་དེའི་མིང་ལ་གསོན་ཆས་ཟླུམ་པོར་གྲགས་སོ།། ཞེས་《དར་རྒྱས་གསལ་སྒྲོན་》ནང་ཡོད་ཚུལ་གསུངས་སོ།། 

          དེ་བཞིན་《བཀའ་ཐང་སྡེ་ལྔ་》ལས། ཏ་ཟིག་འ་ཞའི་བོན་པོ་གདན་དྲངས་ནས། །རྡོ་ནག་ཐོམ་དོ་ལྷུ་དང་སྡུམ་དུ་འབྲེལ། །ཤི་ལྤགས་སྐྱ་མོའི་བླ་གཞི་འབྲེང་དུ་དྲ། །གསོན་གྱི་ལྷ་མཆོད་གཤིན་གྱི་འདྲེ་འདུལ་བྱུང་།  །ཞེས་པ་ལྟར་ཆེས་སྔ་བའི་དུས་ནས་ཏ་ཟིག་དང་འ་ཞར་བོན་ཆོས་དར་རྒྱས་སུ་ཡོད་པར་མ་ཟད། སྨན་དཔྱད་འཕེལ་རྒྱས་ཀྱང་ཡོད་པར་བརྟེན་རྒྱལ་ཕྲན་འ་ཞའི་སྨན་པས་རྒྱལ་བུའི་སྤྱན་གསེར་གྱི་ཐུར་མས་ཕྱེ་ཞེས་གསལ་བ་ལྟར། བོད་ཀྱི་གསོ་རིག་རྒྱུད་བཞིའི་ནང་ཚན་《མན་རྒྱུད་》ལེའུ་ཉེར་དགུ་པ་མིག་ནད་བཅོས་སྐབས། ཐུར་མའི་རྒྱུ་ནི་གསེར་དངུལ་ར་གན་གསུམ།། ཞེས་མིག་འབྱེད་ཐུར་མ་གསེར་ལས་བཟོས་པ། ཟངས་ལས་གྲུབ་པ། ར་གན་གསུམ་པོ་གང་ཡང་རུང་བའི་སྐོར་དང་།  དེ་བཞིན་《བཤད་རྒྱུད་》ལེའུ་ཉེར་གཉིས་པ་ཆ་བྱད་སྐབས། ཟངས་ཐུར་བྲ་བོ་འདྲ་བས་མིག་སྤྲིན་དབུག །ཅེས་ཐུར་མའི་དབྱིབས་ཀྱང་ཡོད་པ་སོགས་ཀྱིས་ལོ་རབས་བརྒྱ་ཕྲག་བདུན་པར་བྱུང་བའི་བོད་ཀྱི་གསོ་རིག་《རྒྱུད་བཞི་》ཡི་ནང་དུ་མིག་འབྱེད་ལག་ལེན་ཞིབ་ཕྲ་འཁོད་ཡོད་པ་ལྟར། དེང་གི་དུས་སུའང་ལག་རྒྱུན་ཇི་ལྟ་བ་མ་ཉམས་པར་བརྒྱུད་འཛིན་བྱས་ཏེ་གནས་ཡོད་དོ།། 

མཆན་བུ།

          (1) ལྷ་ཐོ་ཐོ་རི་སྙན་བཙན་གྱི་དུས་སུ། ཕོ་བྲང་ཡུམ་བུ་གླ་སྒང་གི་ཡང་ཐོག་ཏུ་《སྤང་སྐོང་ཕྱག་བརྒྱ་པ་》དང་།  《མདོ་སྡེ་ཟ་མ་ཏོག》 《ཙིནྟ་མཎི》 《གསེར་གྱི་མཆོད་རྟེན》 བཅས་ནམ་མཁའ་ལས་བབས་ཏེ་གདུང་རབས་ལྔ་ནས་འདིའི་དོན་ཤེས་པ་འབྱུང་བའི་ལུང་བསྟན་གྱི་སྒྲ་ནམ་མཁའ་ལས་གྲགས་པས། རྟེན་དེ་རྣམས་ངོ་མཚར་ཆེ་བར་དགོངས་ཀྱང་དོན་གང་ཡིན་མ་རྟོགས་པས་རྒྱལ་པོས་ཕོ་བྲང་གི་དཀོར་ཁང་དུ་མིང་གཉན་པོ་གསང་བར་བཏགས་ཏེ་གསེར་སྐྱེམས་གཡུ་སྔོན་གྱིས་མཆོད་པའི་མཐུས་རྒྱལ་པོ་དགུང་ལོ་བརྒྱད་ཅུ་སོན་པ་སླར་ན་ཚོད་དར་ལ་བབས་པའི་ལང་ཚོ་ལྟར་ཡ་མཚན་དུ་གྱུར་ཅིང་།  སྐུ་ལུས་གཅིག་ལ་སྐུ་ཚེ་གཉིས་ཐུབ་ཅེས་དགུང་ལོ་བརྒྱ་དང་ཉི་ཤུ་བར་བཞུགས་པར་གྲགས་སོ།། 

            (2) འ་ཞའི་ཡུལ། ྋརྒྱལ་དབང་ལྔ་པས་མཛད་པའི་གནས་གསར་འོག་མགོན་པོ་བསོད་ནམས་མཆོག་ལྡན་གྱི་རྣམ་ཐར་ནང་།  མཚོ་སྔོན་པོའི་ཁོངས་སུ་ཡོད་ཅེས་གསལ། ཡང་ཕྱི་རྒྱལ་བ་འགའ་རེས། ལོ་བརྒྱ་ཕྲག་བཞི་པའི་སྟོད་དུ་གྲུ་གུ་ཧུན་ནམ་ཐུ་གུ་ཧུན་ལ་བོད་པས་འ་ཞ་ཞེས་ཟེར། འ་ཞ་དང་གྲུ་གུ་གཅིག་ཏུ་བརྩིས་འདུག མཁས་དབང་ཚེ་ཏན་ཞབས་དྲུང་གིས་མཛད་པའི་བོད་ཀྱི་ལོ་རྒྱུས་ནང་།  འ་ཞའི་ཡུལ་ནི་ཕྱིས་སུ་བོད་ཀྱི་མངའ་ཁོངས་ལ་ཚུད་པ་ལོ་རྒྱུས་རྣམས་སུ་བཤད་དེ། ད་ལྟའི་མངའ་རིས་བསྐོར་གསུམ་གྱི་ཕྱོགས་སུ་གཏོགས་པ་ཡིན་ནམ་སྙམ། ཞེས་གསུངས་པ་བཅས་ཀྱིས་འ་ཞ་ནི་བོད་ཀྱི་བྱང་ཕྱོགས་སུ་གནས་པའི་གྲུ་གུའམ། ཡང་ན་སྟོད་མངའ་རིས་སྐོར་གསུམ་ཇི་ལྟར་ཡང་།  པུར་རྒྱལ་བོད་ཀྱི་ཁོངས་སུ་གཏོགས་པར་བསྙོན་མེད་ཡིན་ཚུལ་ཡིག་ཚང་རྣམས་ལས་ཤིན་ཏུ་གསལ་བར་གསུངས་སོ།། 

འདི་ནི་མཁས་དབང་བྱམས་པ་འཕྲིན་ལས་ཀྱིས་བརྩམས་པའི་དཔེ་དེབ་《གངས་ལྗོངས་གསོ་རིག་བསྟན་པའི་ཉིན་བྱེད་རིམ་བྱོན་གྱི་རྣམ་ཐར་ཕྱོགས་བསྒྲིགས་》ནས་ཟུར་བཏོན་བྱས་པ་ཞིག་ཡིན།

ཆོས་རྗེ་དོན་གྲུབ་རིན་ཆེན།

ཆོས་རྗེ་རིན་ཆེན་དོན་གྲུབ་ཀྱི་རྣམ་ཐར་མདོར་བསྡུས།

[རྩོམ་པ་པོ། ཚེ་ཏན་ཞབས་དྲུང་།] 
        ཆོས་རྗེ་དོན་གྲུབ་རིན་ཆེན་ནི་བྱ་ཁྱུང་དགོན་པ་གསར་འདེབས་གནང་མཁན་དང་། རྗེ་ཙོང་ཁ་བའི་སློབ་དཔོན་ཡིན། ཁོང་གི་འཁྲུངས་ཡུལ་ལ་མཁས་གྲུབ་རྗེས་མདོ་ཁམས་སྨད་ཡིན་པར་གསུངས་པ་ཙམ་ལས་གསལ་པོ་ཞིག་ལོ་རྒྱུས་སྔ་མ་རྣམས་སུ་མི་གསལ་ལ། ཆུ་བཟང་ངག་དབང་ཐུབ་བསྟན་དབང་ཕྱུག་གིས། འཁྲུངས་ཡུལ་དང་རིགས་རུས་ནི་ས་སྐྱ་ཡིན་ཞེས་པ་དང་། ས་སྐྱ་ནས་ཆད་པའི་རེབ་གོང་གི་ཡུལ་ཡིན་ཟེར་པའི་བཤད་ཡམས་མཆན་བུར་བཀོད་ནས་རང་ལུགས་ལ་རྨ་ཆུའི་ལྷོ་ངོས་རེབ་གོང་གི་ཆར་འཁྲུངས་པར་གསུངས། ཇུ་ནང་ངག་དབང་སྙན་གྲགས་ཀྱི་གདན་རབས་སུ། རྐ་ཕུག་རིན་པོ་ཆེའི་ཕྱག་བྲིས་ཤིག་ཏུ་ཁྲི་ཀའི་མི་ཉག་རིན་པོ་ཆེས་སྣང་ར་ཡིན་ཞེས་གསུངས་པ་བཀོད་པར་བཤད། ངག་རྒྱུན་ལ་རེབ་གོང་ཤ་སྦྲང་དུ་འཁྲུངས་པར་ས་དེ་གའི་སྐྱེ་བོ་དམངས་ལ་ཡོངས་སུ་གྲགས་ཤིང་། ཤ་སྦྲང་གི་ཉེ་འཁོར་གྱི་ཉིན་ཕྱོགས་རི་ཁྲོད་ཅིག་ཏུ་སྒྲུབ་པ་མཛད་ནས་བཞུགས་པར་བརྟེན་དོན་གྲུབ་རིན་ཆེན་གྱི་མཚན་བསྡུས་པས་དོན་རིན་ཉིན་དང་། དེ་ཡང་ཟུར་ཆག་པས་དོར་ཉིན་དུ་འབོད་པ་ཡིན་ཟེར་རོ།།
    སྐུ་འཁྲུངས་པའི་དུས་ནི། འབྲས་ཀླུ་འབུམ་པའི་མཁན་རབས་སུ། ཇོ་བོ་རྗེ་འཁྲུངས་ནས་ལོ་སུམ་བརྒྱ་ཉེར་བརྒྱད་པ་རབ་བྱུང་ལྔ་པའི་ས་བྱ་ལ་﹙༡༣༠༩﹚འཁྲུངས་པར་བཤད། འོན་ཀྱང་མཁན་རབས་དེ་ཉིད་ཀྱི་དཔེ་རྙིང་འགར་ཇོ་བོ་འཁྲུངས་ནས་ལོ་སུམ་བརྒྱ་སོ་དྲུག་པ་རབ་བྱུང་ལྔ་པའི་ས་བྱ་ཞེས་པ་ནི་མ་དག་སྟེ། ཇོ་བོ་རབ་བྱུང་དང་པོའི་གོང་རོལ་དེ་མ་ཐག་གི་དྲུག་ཅུ་སྐོར་གྱི་བགྲང་བྱ་བཅུ་དྲུག་པ་ཆུ་རྟ་ལ་འཁྲུངས་པར་ཀུལ་ལ་རྩོད་པ་མེད་པས་སོ།།
    དེར་ཡབ་ཡུམ་ཕུན་སུམ་ཚོགས་པའི་རིགས་སུ་སྐུ་བལྟམས་པ་ནས་བཟུང་ཆོས་ཀྱི་བག་ཆགས་མངོན་པར་སད་དེ་རབ་ཏུ་བྱུང་ཞིང་དབུས་གཙང་དུ་བྱོན། སྙེ་ཐང་པ་བཀྲ་ཤིས་སེང་གེ་སོགས་ལ་ཕར་ཕྱིན་དང་། བྱམས་ཆོས་ཐམས་ཅད་མཁས་པར་བསླངས། གཙང་སྣར་ཐང་གི་ཆོས་གྲྭར་བྱོན་ནས་བཅོམ་ལྡན་རིགས་རལ་གྱི་བུ་ཆེན། བཅོམ་ལྡན་པ་རང་གི་གདན་ས་བ་ལྡོང་སྟོན་རིགས་པའི་སེང་གེ་ལ་ཚད་མ་རྣམ་ངེས་གསན། ཡི་གེ་གཞན་དུ་འདི་ལ་མདོག་སྟོད་པ་རིན་ཆེན་སེང་གེ་ཞེས་ཟེར། དེའི་ཚེ་རིག་པའི་གནས་ཀྱི་དགག་སྒྲུབ་ཅུང་ཟད་འཆད་དཀའ་བ་བྱུང་བ་ལ། ཞྭ་ལུར་བྱོན་ནས་ཐུགས་རྗེ་ཆེན་པོ་རང་བྱོན་གྱི་དྲུང་དུ་གསོལ་བ་དྲག་ཏུ་བཏབ་ཅིང་། ཞབས་ལ་ཁྲག་རྡོལ་གྱི་བར་ཉིན་མཚན་དུ་སྐོར་བ་མཛད་པས་བློ་གྲོས་ཀྱི་ནུས་པ་ཡ་ཚན་འཁྲུངས་ཏེ་རིག་པའི་གནས་ལ་ཐོགས་པ་མེད་པ་གྱུར་ནས། རྩོད་པ་བཟང་བའི་མཆོག་ཏུ་གྲགས་པ་བྱུང་། མཐུན་རྐྱེན་དཀོན་པོ་བྱུང་ཡང་སྣར་ཐང་བའི་སྐྱོ་ཚལ་ལ་བརྟེན་ནས་ལེགས་པར་སྦྱངས། དེ་རྗེས་ཞྭ་ལུར་གྲྭ་སྐོར་བྱོན་པ་ན་རིན་པོ་ཆེ་བུ་སྟོན་ཐམས་ཅད་མཁྱེན་པ་ཡང་གདན་སར་ཕེབས་ནས་འདུག་པ་ལ། ཚོགས་སུ་བགྲོ་གླེང་མཛད་པས་ལེགས་པར་ཟིན་ཏེ། ཤར་ཕྱོགས་པ་རིགས་པའི་དཔའ་བོ་ཞེས་སྙན་པའི་གྲགས་པ་ཆེས་ཆེར་རྒྱས། གསུང་རྒྱུན་གཅིག་ཏུ་ཚོགས་དབུས་སུ་བུ་སྟོན་རིན་པོ་ཆེ་དང་བགྲོ་གླེང་མཛད་པས་ཀུན་གྱིས་སྟོན་གྲགས་བཟང་ཞེས་བསྔགས་པར་བཤད། འོན་ཀྱང་བུ་སྟོན་ལས་དགུང་ལོ་ཉི་ཤུས་གཞོན་ནོ།  དེ་ནས་རོང་དུ་བྱོན་ཏེ་གསན་རྒྱ་དང་མཁྱེན་རྒྱ་བུ་སྟོན་དང་མཉམ་པར་གྲགས་པའི་རོང་གི་བླ་མ་ཡེ་ཤེས་དཔལ་བའི་དྲུང་ནས་གཤེད་སྐོར་སྤྱི་དང་། ཁྱད་པར་འཇིགས་བྱེད་ཀྱི་དབང་དང་། རྒྱུད་འགྲེལ་གྱི་བཤད་པ། མན་ངག་ཐམས་ཅད་ལེགས་པར་གསན་ནས་ཐུགས་སུ་ཆུད། ཨ་མདོར་ཕེབས་ཏེ་ཤིང་ཀུན་སྡེ་གསར་གྱི་མཁན་པོ་མཛད། དེར་མཁན་པོ་མཛད་ནས་འཆད་ཉན་ཤིན་ཏུ་འཕེལ་སྐབས་ཤིག་ལ། སྙེ་ཐང་བདེ་བ་ཅན་གྱི་གདན་ས་མཛད་པར་ཞུ་བའི་གདན་འདྲེན་པ་བྱུང་བས་དབུས་སུ་ཕེབས། འོན་ཀྱང་དེ་དུས་གདན་ས་བ་བསྐོས་ཚར་བས་གདན་སའི་སྟབས་མ་འཕྲོད་ཀྱང་། ཡོ་བྱད་མང་དུ་བསྣམས་བྱོན་པ་རྣམས་ཀྱིས་བདེ་བ་ཅན་དང་། སྣར་ཐང་སོགས་སུ་གཙུག་ལག་ཁང་དང་དགེ་འདུན་ལ་སྲི་ཞུ་རྒྱ་ཆེར་བསྒྲུབས། ཡབ་ཆོས་སྡིངས་འདེབས་མཁན་སྐྱེས་མཆོག་རྟོགས་ལྡན་པ་ཆོས་རྗེ་བསམ་གཏན་དཔལ་གྱི་དྲུང་དུ་སྒྲུབ་པ་ལ་བྱོན། ཕྱག་རྫས་གང་ཡོད་བླ་མ་ལ་ཕུལ། སྒྲུབ་པ་རྩེ་གཅིག་ཏུ་གཞོལ་བས་ཞི་གནས་ཀྱི་མྱོང་བ་ཁྱད་པར་ཅན་འཁྲུངས་། ཁྱད་པར་དུ་མཁས་གྲུབ་ཆེན་པོ་མཆིམས་བློ་བཟང་གྲགས་པའི་སྤྱན་སྔར་མདོ་སྔགས་ཀྱི་ཆོས་མང་དུ་གསན་པའི་སྐབས་ཤིག བླ་མའི་ཞལ་ནས། ཁྱོད་ཀྱི་གནས་དང་གདུལ་བྱ་མདོ་སྨད་དུ་ཡོད། ཁྱད་པར་ཤ་སྦྲང་དང་བྱ་ཁྱུང་ཟེར་བའི་གནས་གཉིས་སུ་དགོན་པ་ཐོབས་ལ་བཤད་སྒྲུབ་ཀྱི་བསྟན་པ་གང་འཕེལ་གྱིས། སྒོས་སུ་བྱ་ཁྱུང་དུ་སྒྲུབ་པ་གཙོ་བོར་མཛོད། དེ་དུས་ཁྱོད་ལ་སློབ་མ་མཁས་གྲུབ་གཉིས་འཛོམ་མང་པོ་འོང་བའི་ནང་ནས་འགྲན་ཟླ་དང་བྲལ་བ་གཅིག་འབྱུང་བས་དེ་རབ་ཏུ་བྱུང་དུས་བློ་བཟང་གྲགས་པ་ཞེས་མིང་འདི་ཐོགས་ཞེས་གསུངས། དེ་ནས་བླ་མས་ལུང་བསྟན་པ་བཞིན་སླར་ཨ་མདོར་བྱོན། ཐོག་མར་ཤ་སྦྲང་གི་གནས་བཙལ་ཏེ་དེར་དགོན་གནས་བཏབ། ཉི་མ་ཤར་མ་ཐག་པང་དུ་བླངས་འདྲ་བས་ན་ཤར་པང་སྟེ་ཟུར་ཉམས་པས་ཤ་སྦྲང་དུ་ཐོགས་ཟེར། དེར་ལོ་སྦྲེལ་གྱི་བར་དུ་ཕར་ཚད་ཀྱིས་ཐོག་དྲངས། བྱམས་ཆོས་རྣམས་དང་། བརྟག་གཉིས། སྤྱོད་འཇུག་སོགས་ཀྱི་བཤད་པ་མཛད་ཀྱང་ཐུགས་བཞེད་མ་ཁེངས་པས་ཐུགས་སྐྱོ་ནས་དབོན་པོ་ཤཱཀྱ་བཟང་པོ་གདན་སར་བསྐོས། རང་ཉིད་བྱ་ཁྱུང་གི་གནས་བཙལ་བར་བྱོན། དགུ་རོང་བརྒྱུད་བྲག་བྱ་ཁྱུང་མཐོང་བའི་གྲོང་སྣང་རར་བྱོན། ཨ་མེས་དོན་གྲུབ་སེང་གེ་ཞེས་པའི་རྩར་ཕེབས། དེར་དོན་གྲུབ་སེང་གེས་སྦྱིན་བདག་བྱས་ཏེ་སྣང་རའི་གསེང་ཁང་དུ་གྲགས་པ་འདི་བཞེངས། དེར་ཚོགས་པ་མང་བོར་ས་སྡེའི་བཤད་པ་ཡང་གནང་བར་གྲགས། དེའི་ཕྱིར་ཡབ་རྗེ་གསེར་ཁང་བས་ཀྱང་། སྣང་རའི་གསེར་ཁང་འདི་ཆོས་རྗེ་དོན་གྲུབ་རིན་ཆེན་པས་ས་སྡེའི་བཤད་པ་གནང་བའི་གནས་ཡིན་གསུངས། དེ་ནས་བྲག་བྱ་ཁྱུང་ལ་གཏད་དེ་ཕེབས། རྨ་ཆུ་ལ་དར་ཆགས་ཡོད་དམ་ལྟོས་ཞེས་ཉེ་གནས་ལ་ཡང་ཡང་གསུངས་པས། ཟླ་བ་དྲུག་པ་ལ་དར་ཇི་ལྟར་ཆགས་སྙམ་ནས་ཉེ་གནས་མ་རངས་ཏེ་དར་ཆགས་འདུག་ཅེས་ཞུས་པས། དེ་ལྟར་ན་བཟང་འདུག་མྱུར་དུ་འགྲོ་གསུངས་ནས་ཕེབས་ཚེ་རྨ་ཆུ་ལ་དར་རྣམ་དཀར་གྱི་ཟམ་འཕངས་པ་འདྲ་བ་ཞིག་ཆགས་དེར་བླ་མས་རྟིང་མནན་ནས་ཕེབས། ཕྱི་ན་འདུག་པའི་མི་རྣམས་ཀྱིས་བལྟས་ཚེ་ཆུའི་དར་ཟམ་དེ་བླ་མ་ཕེབས་པ་དང་ལྷན་ཅིག་དྲིལ་ནས་ཕར་ཐལ་སོང་ཟེར། དར་ཆགས་པའི་ཉེ་འགྲམ་གྱི་གྲོང་སྡེའི་མིང་ལ་རྨ་དར་གོང་བ་ཞེས་ཐོགས་ཤིང་ཟུར་ཆག་ནས་མན་རྡལ་གོང་བ་ཟེར། དེ་ནས་བཟུང་དགུན་ནམ་ཡང་དར་འཛིན་སྔ་ཞིང་འགྲོ་འཕྱི་བའི་དར་ལམ་ངེས་ཅན་དུ་འཛིན་པར་གྲགས་སོ།། དེར་ཕེབས་ནས་ཐོག་མར་ཁྱུང་ལྟག་ཏུ་བཞུགས། ཉིན་གཅིག་དོས་ཁལ་དང་བཅས་པའི་དྲེའུ་ཞིག་ཡོད་པ་བཙལ་བས་མ་རྙེད་པར་མཐར་མདུན་གྱི་རིའི་ངོས་སུ་ལྗོན་ཤིང་མང་པོ་ཡོད་པའི་སར་ཆུ་འཐུངས་ནས་ཉལ་འདུག་པ་ཐབས་ཅི་བྱས་ཀྱང་མ་སློང་ཚུལ་ཞུས་པས། ང་ཚོའི་འདུག་ས་ནོར་བ་ཡིན་འདུག དེར་འགྲོ་གསུངས་ནས་གནས་དེར་དགོན་པའི་གཞི་བཏིངས་﹙ས་གླང་ལོ་༡༣༤༩ལ་བཏབ﹚ཀླུ་རྒྱལ་གཙུག་ན་རིན་ཆེན་གྱི་ཕོ་བྲང་ཆུ་མིག་གཉན་པོ་ཡོད་པའི་ནེའུ་གསེང་གི་སྟེང་དུ་གཙུག་ལག་ཁང་བཞེངས་པ་ཕྱིས་སུ་མགོན་ཁང་དུ་གྲགས་ཏེ་ད་ལྟའི་འདུ་ཁང་གི་སྟེང་རྒྱབ་ན་ཡོད་པ་འདི་ཡིན། ད་ལྟའི་འདུ་ཁང་འདི་ཕྱིས་སུ་རིམ་གྱིས་རྒྱ་བསྐྱེད་པ་ཡིན། གནས་གཞི་བཏིངས་འཕྲལ་གྲྭ་ཚོགས་བརྒྱ་ཕྲག་བརྒལ་བ་ལ་ཕར་ཚད་ཀྱིས་ཐོག་དྲངས་བྱམས་ཆོས་རྣམས་དང་། བརྟག་གཉིས། སྤྱོད་འཇུག་སོགས་ཀྱི་བཤད་པ་རྒྱ་ཆེར་མཛད། མགོན་ཁང་དེར་རྡོ་རྗེ་འཇིགས་བྱེད་ཀྱི་སྐུ་ཞལ་ཕྱག་ཡོངས་རྫོགས་དང་། མགོན་པོ་ཕྱག་དྲུག་པ་སོགས་ཆོས་སྐྱོང་རྣམས་ཀྱི་སྐུ་བརྙན་མང་དུ་བཞེངས། བར་སྐབས་ཤིག་ཆོས་རྗེ་ཉིད་སྐུ་འབུམ་ཆུ་དཀར་རི་ཁྲོད་དུ་ཉམས་བཞེངས་མཛད་སྐབས་མཚན་ལམ་དུ་རྗེ་ཙོང་ཁ་བ་ཆེན་མོ་འཇིག་རྟེན་དུ་བྱོན་པའི་བརྡ་ཤར་ནས་ཉེ་གནས་ཚུལ་ཁྲིམས་དང་ལྡན་པ་ཞིག་ལ་ལེགས་སྐྱེས་དང་བཅས་རྟེན་འབྲེལ་དུ་བཏང་། ཕྱི་ཞིག་ན་ཡབ་ཡུམ་གྱིས་ཆོས་རྗེ་དོན་གྲུབ་རིན་ཆེན་པ་ཉིད་སྤྱན་དྲངས། བཀུར་སྟི་ཕུན་སུམ་ཚོགས་པ་མཛད། རྗེ་འདི་བས་ཀྱང་རྟ་ནོར་གོས་དར་སོགས་ཟང་ཟིང་གི་གནས་སྦྱིན་དཔག་ཏུ་མེད་པ་མཛད་ནས་ཁྱོད་ཀྱི་བུ་འདི་ང་ལ་ཕུལ་ཅིག། ཅེས་བཀའ་སྩལ་པ་བཞིན་ཡབ་ཡུམ་གྱིས་ཀྱང་དགའ་སྤྲོ་དང་བཅས་འབུལ་བར་ཁས་བླངས། ད་ལྟ་སྐུ་འབུམ་འཇམ་དབྱངས་ཀུན་གཟིགས་ཁང་དུ་བཞུགས་པའི་ཕ་བོང་སྟེང་རྗེ་དོན་རིན་པའི་ཞབས་རྗེས་དང་དབྱུག་པའི་རྗེས་གསལ་བར་བཏོད་ཡོད་པ་འདི་ཡང་དེ་དུས་བྱུང་བར་མངོན། དེ་ནས་རྗེ་ཀརྨ་རོལ་པའི་རྡོ་རྗེ་ཤ་རྫོང་རི་ཁྲོད་དུ་ཕེབས་ནས་བཞུགས་སྐབས་ཡབ་ཀྱིས་ཁྲིད་ནས་རབ་ཏུ་བྱུང་བར་ཞུས་ཀྱང་ད་དུང་གཞོན་ནུར་གྱུར་པས་རབ་ཏུ་བྱུང་མ་རན་གསུངས་ནས་དགེ་བསྙེན་དུ་བསྒྲུབས། མཚན་ལ་ཀུན་དགའ་སྙིང་པོར་གསོལ། དབུས་སུ་ཕེབས་ཤིག་ཅེས་པའི་ལུང་བསྟན་གནང་སྟེ། ཕྱིས་སུ་སངས་རྒྱས་གཉིས་པ་ལྟ་བུར་བྱོན་པ་འདིའོ་ཞེས་དཔའ་བོ་གཙུག་ལག་ཕྲེང་བའི་ཆོས་འབྱུང་ལས་བསྔགས། ལོ་རྒྱུས་འགར་རྗེ་དགུང་ལོ་བཞི་པར་བྱ་ཁྱུང་དུ་ཕེབས་ཟེར་བ་ལ་དཔགས་ན་རྗེ་དགུང་ལོ་རིལ་པོ་གསུམ་དང་ངོ་མཐོང་བཞིའི་སྟེང་ཤ་རྫོང་དུ་དགེ་བསྙེན་བསྒྲུབས་ཏེ། འཕྲལ་ལ་བྱ་ཁྱུང་དུ་ཕེབས་པར་སེམས། འབྲས་ཀླུ་འབུམ་པས། དགུང་ལོ་བདུན་བཞེས་ནས་བྱ་ཁྱུང་དུ་ཕེབས། དགུང་ལོ་བརྒྱད་བཞེས་ནས་རབ་བྱུང་མཛད་ཟེར།
   ཆོས་རྗེའི་དྲུང་དུ་ཕེབས་མ་ཐག་ནས་ཚེགས་མེད་པར་ཡིག་ཀློག་ལ་བྱང་བར་སྦྱངས། རབ་ཏུ་མ་བྱུང་བའི་སྔ་རོལ་དུ་དཔལ་རྡོ་རྗེ་འཇིགས་བྱེད་དང་། འཁོར་ལོ་བདེ་མཆོག་དྲིལ་བུ་ལུགས་དང་། ཀྱེེ་རྡོ་རྗེ་དང་། ཕྱག་ན་རྡོ་རྗེ་ལ་སོགས་པའི་དཀྱིལ་འཁོར་དུ་བཅུག་ཅིང་དབང་བསྐུར། གསང་མཚན་དུ་དོན་ཡོད་རྡོ་རྗེ་ཞེས་བཏགས་ཏེ་རྡོ་རྗེ་ཐེག་པའི་སྒོར་སྨིན་པར་མཛད། དབང་ཐོབ་པ་ནས་བཟུང་བདེ་མཆོག་དང་། ཀྱེེ་རྡོར། ཀུན་རིག  གཤིན་རྗེའི་གཤེད་ལ་སོགས་པའི་དཀྱིལ་ཆོག་མང་པོ་ཐུགས་ལ་བཟུང། བདེ་མཆོག་དྲིལ་བུ་བའི་བདག་འཇུག་ལན་མང་བཞེས། ལྷའི་རྣམ་འབྱོར་དང་བཟླས་པའི་རིམ་པ་སོགས་ལ་ཅིག་ཏུ་དཔལ་བཟང་པོས་མཁན་པོ་དང་། ཏཱ་དབོན་གཞོན་ནུ་སེང་གེའི་སློབ་མ་གཞོན་ནུ་བྱང་ཆུབ་འོད་ཀྱིས་སློབ་དཔོན་མཛད་དེ་རབ་ཏུ་བྱུང་ཞིང་ཚིགས་སྔ་མ་དགེ་ཚུལ་གྱི་སྡོམ་པ་བཞེས་ནས་མཚན་ལ་བློ་བཟང་གྲགས་པ་ཞེས་གསོལ། དེ་ལྟར་ན་རྗེས་རབ་བྱུང་མཛད་པའི་ཆུ་ཡོས་ལོ་དེ་ནས་ད་ལྟ་རབ་རྒྱལ་མེ་བྱ་ཡན་ལ་ལོ་ལྔ་བརྒྱ་དང་གོ་བཞི་འདས་པའང་ཤེས་པར་བྱའོ།  དེ་ནས་རྗེ་དགུང་ལོ་བཅུ་དྲུག་བཞེས་པའི་ཚེ་མཐུན་རྐྱེན་གྱ་ནོམ་པ་དང་བཅས་དབུས་གཙང་དུ་ཕེབས་པའི་སྐུལ་མ་དང་རྫོངས་པ་མཛད། ཕེབས་ཁར་བླ་མའི་ཞལ་ནས། ངས་ཁྱེད་ལ་ཆོས་ཤིག་འཆད་པ་ཡིན། ཅི་འདྲ་ཞིག་འདོད་ཅེས་པ་ལ། སེམས་ལ་ཕན་པའི་ཞལ་ཏ་ཞིག་ཐུགས་ལ་འདོགས་འཚལ་ཞུས་པས། དང་པོ་ཐོས་བསམ་བྱ་ཚུལ། དེ་ནས་དེ་དག་གི་དོན་ཉམས་སུ་བཞེས་ཚུལ། མཐར་བསྟན་འགྲོའི་བྱ་བ་མཛད་ཚུལ་རྣམས་འབྱུང་འགྱུར་ལུང་བསྟན་བསླབ་བྱའི་ཚུལ་དུ་ཚིགས་བཅད་ཀྱི་སྒོ་ནས་རྒྱ་ཆེར་འདོམས་པར་མཛད། དེ་ནས་དགེ་སློབ་དབར་ཕན་ཚུན་འབྲལ་མི་ཕོད་པ་ལྟ་བུའི་ངང་ནས་དབུས་གཙང་དུ་ཕྱག་བཏེགས། དེ་ནས་རིམ་གྱིས་དབུས་གཙང་དུ་ཕེབས་སོ།།
   སྐུ་ཚེའི་སྨད་དུ་ཡང་སྐུ་གསུང་ཐུགས་རྟེན་མང་དུ་བཞེངས་པ་ལས། ད་ལྟའི་ལྷ་ཁང་ཆེན་མོ་ཞེས་གྲགས་པ་འདི་དུས་ནམ་བཞེངས་པའི་ལོ་ཚིགས་གསལ་པོར་བཤད་པ་མི་སྣང་ཡང་། ཇུ་ནང་པའི་གདན་རབས་སུ་རབ་ཡིད་ས་ཡོས་ལོའི་བར་དུ་ལོ་བཞི་བརྒྱ་ལྔ་བཅུ་ལྷག་སོང་ཞེས་བཤད་པ་ལྟར་ན་རྗེ་ཙོང་ཁ་བ་དབུས་གཙང་དུ་མ་ཕེབས་པའི་གོང་རོལ་ཞིག་ཏུ་བཞེངས་པར་འགྱུར་དགོས་ཤིང་། གང་ལྟར་བྱིན་རླབས་དང་རབ་གནས་དངོས་ཀྱིས་མཛད་གྲགས། སློབ་མ་ཡང་མང་དུ་འདུས་པ་ལས། རེབ་གོང་གི་རོང་པོའི་གཞི་འཛིན་ལྷ་རྗེ་བྲག་སྣ་བའི་སྲས་རོང་ཆེན་མདོ་སྡེ་འབུམ་ལ་སྲས་དགུ་འཁྲུངས་པ་ལས། རོང་པོའི་གཞི་འདིང་མཁན་གཅེན་པོ་རོང་པོ་བསམ་གཏན་རིན་ཆེན་ཡང་ཆོས་རྗེ་འདི་ཉིད་ཀྱི་དྲུང་ནས་བརྙེན་རྫོགས་ཞུས་པ་ཡིན།
  གསུང་རྩོམ་ཡང་རྩ་བ་ཚང་གི་གདན་རབས་སུ། གསུང་གི་མཛད་པའི་མཆོག་རྒྱུད་བླ་མའི་ཊཱིཀྐ་ཞིག་ཀྱང་མཛད། ཅེས་འབྱུང་བ་ལྟར་མགོ་མཇུག་ནས་ཅུང་མ་ཚང་བར་སྟག་དཀར་བློ་བཟང་ཆོས་དབྱིངས་ཀྱིས་ཁ་བསབས་པ་ཕྱིས་སུ་བྱ་ཁྱུང་དུ་པར་དུ་བཀོད་ནས་ཀུན་གྱིས་མཇལ་དུ་ཡོད་པ་འདི་ཡིན་པར་གྲགས། རྗེ་ཐར་ཤུལ་དགེ་འདུན་ཆོས་སྐྱོང་རྒྱ་མཚོའི་རྣམ་ཐར་དུ། བླ་བྲང་རྗེ་ཤེས་རབ་རྒྱ་མཚོ་ལ་ཕྱག་དཔེ་དཀོན་པ་འགའ་བྲིས་ཏེ་ཕུལ་བའི་གྲས་སུ་རྒྱུད་བླའི་འགྲེལ་པ་འདི་ཡང་བགྲངས་འདུག་པ་དང་། བྱ་ཁྱུང་ནས་དཔར་དུ་འགོད་སྐབས་ཀྱི་མ་ཕྱི་ཡང་རྗེ་ཐར་ཤུལ་རིན་པོ་ཆེའི་ཕྱག་དཔེ་ལས་གདན་དྲངས་པར་གྲགས། འགྲེལ་བ་དེར་བཀའི་དགོངས་འགྲེལ་ཇི་ལྟར་བྱུང་ཚུལ་བཤད་སྐབས། བཀའ་སོ་སོའི་འགྲེལ་བ་ཇི་ལྟར་བྱུང་ཚུལ་ནི་ཁོ་བོས་བྱས་པའི་རིན་ཆེན་ཐེམ་སྐས་སུ་ཅུང་ཟད་བརྗོད་ཟིན་པས་དེར་བལྟ་བར་བྱའོ།། ཞེས་འབྱུང་བ་ལྟར་ན་བཀའ་རྩོམ་གྱི་རིགས་གཞན་ཡང་ཡོད་པར་མངོན་པས་དེང་སང་མཇལ་རྒྱུ་མེད་པ་ནི་ཤིན་ཏུ་ཕངས་པའི་གནས་སོ།།
  དེ་ནས་འབྲས་ཀླུ་འབུམ་པས་བཤད་པ་ལྟར་རབ་བྱུང་དྲུག་པའི་ཤིང་གླང﹙༡༣༨༥﹚ལོ་ཆོས་རྗེ་ཉིད་དགུང་ལོ་དོན་བདུན་བཞེས་ཐོག སྐུ་མྱ་ངན་ལས་འདས་སོ།། སྐུ་གདུང་རིལ་བུ་མ་ཉམས་པ་དྲི་བཟང་པོའི་ཤིང་གི་སྒྲོམ་དུ་བཞུགས་སུ་གསོལ་ཏེ་འབུམ་པ་བཞེངས། ཕྱིས་སུ་ཨ་གྲོ་ཆོས་རྗེ་ཤེས་རབ་རྒྱལ་མཚན་གྱིས་སོ་ཕག་གི་སྒྲོན་ཅིང་གྲང་གསེར་ལྕིབས་བྱུགས་དང་། རྒྱལ་བ་བསོད་ནམས་རྒྱ་མཚོའི་བཀའ་ཁྱབ་ལྟར་ཟངས་ཀྱིས་བཏུམས་པ་སོགས་སྲི་ཞུ་རྒྱ་ཆེར་མཛད་དོ།།

ཚ་ཁོ་ངག་དབང་གྲགས་པ།

༄༅། །ཚ་ཁོ་ངག་དབང་གྲགས་པའི་མཛད་རྣམ་མདོར་

བསྡུས་བཞུགས་སོ། །

  དེ་ཡང་དཔལ་རི་བོ་དགེ་ལྡན་པའི་བསྟན་པ་ཕྱོགས་མཐར་སྤེལ་བའི་དར་ཆེན་བརྒྱད་ཀྱི་ནང་ཚན།   མདོ་རོང་གི་མཁས་པ་མི་བཞིའི་ཡ་གྱལ་ངེས་དོན་མཁས་དང་གྲུབ་པའི་དབང་ཕྱུག་ཆེན་མོ་རྗེ་མཁན་ཆེན་ངག་དབང་གྲགས་པ་མཆོག་ནི་རྒྱལ་རོང་སོ་མང་རྒྱལ་བོའི་མངའ་ཁོངས་ཁུ་འཇོ་སྡེ་བར་རབ་བྱུང་དྲུག་པ་སྟེ་དུས་རབས་བཅུ་བཞི་བའི་ནང་འཁྲུངས་ཤིང་ཆུང་དུས་བོན་པོའི་ཆོས་ལའང་སློབ་གཉེར་མཛད་པར་གྲགས།  ཆུང་དུས་ནས་དྲིལ་བུ་དཀྲོལ་བ་སོགས་རྣམ་དཀར་ཡོན་ཏན་གྱི་ཕྱོགས་ལ་རིགས་སད་ཅིང་ཕྱིས་སུ་དབུས་གཙང་དག་པའི་ཞིང་ལ་ཕེབས་ཏེ་མཉམ་མེད་ཙོང་ཁ་པ་ཆེན་པོ་རྗེ་བློ་བཟང་གྲགས་པ་དང་མཇལ།  རྗེ་རིན་པོ་ཆེའི་དྲུང་དུ་རབ་ཏུ་བྱུང་ནས་ངག་དབང་གྲགས་པ་ཞེས་མཚན་གསོལ། རྒྱལ་བའི་གསུང་རབ་ཐམས་ཅད་ལ་སྦྱངས་པ་མཛད་དེ་ངེས་དོན་གྱི་མཁས་པ་ཆེན་པོར་གྱུར། 

  སྤྱི་ལོ་༡༣༨༣ལོར་རྗེ་བདག་ཉིད་ཆེན་པོ་འོད་ཀྱི་ལྷ་ཁང་ཀེ་རུར་བཞུགས་སྐབས།  ཚ་ཁོ་དཔོན་པོ་སོགས་སྡེ་སྣོད་འཛིན་པ་མང་བོ་ཞིག་ལ་ཕར་ཚད་དབུ་མ་སོགས་ཆོས་མང་དུ་གསུངས་པའི་ཚུལ་ནི།  རྗེའི་རྣམ་ཐར་དད་པའི་འཇུག་ངོགས་ལས། ཚ་ཁོ་དཔོན་པོ་མཁན་ཆེན་ངག་དབང་གྲགས་པ་ཕྱག་ཕྱི་ལ་ཁྲིད་ནས། ལྷ་སར་ཇོ་བོ་ཐུགས་རྗེ་ཆེན་པོ་རང་བྱོན་ལྔ་ལྡན་གྱི་དྲུང་ནས་སྨྱུང་གནས་མང་དུ་མཛད།    དེ་དུས་ནུབ་གཅིག་གི་ཚེ་དཔོན་སློབ་གཉིས་ཀྱིས་གསོལ་བ་དྲག་ཏུ་བཏབ་ནས་མནལ་ལམ་གྱི་ལྟས་བརྟགས་པས། ཚ་ཁོ་བ་ལ་དུང་དཀར་ཆེན་པོ་གཉིས་ནམ་མཁའ་ལས་བབས་ནས་ཁོང་གི་ཐུ་བར་ལྷུང་བྱུང་བ།     དེ་མ་ཐག་དེ་གཉིས་འདྲེས་ནས་གཅིག་ཏུ་སོང་འདུག  དེ་ལག་ཏུ་བླངས་ནས་བུས་པས་སྒྲ་ཆེན་པོ་དཔག་ཏུ་མེད་པ་བསྒྲགས་པ་ཞིག་རྨིས་འདུག་སྟེ།  ཕྱིས་ཁོང་གིས་རྒྱལ་མོ་རོང་གི་སྨད་དུ་སངས་རྒྱས་ཀྱི་བསྟན་པ་དར་ཞིང་རྒྱས་པར་མཛད་དེ་འཕྲིན་ལས་རྒྱ་ཆེན་པོ་བྱུང་འདུག་པ་དེའི་ལྟས་ཡིན་པ་འདྲ་ཞེས་གསུངས་སོ། །

དེ་ནས་རྗེ་རིན་པོ་ཆེས་བཀའ་སློབ་མང་དུ་གནང་ཞིང༌།  ཁྱད་པར་དུ་ས་གསུམ་གྱི་སྒྲོན་མེ་གཅིག་བུ་ལམ་གཙོ་རྣམ་གསུམ་མཛད་ནས།  ཁོང་ལ་བསྩལ་བ་བསྣམས་ནས་ཕྱིར་མདོ་སྨད་དུ་ཕེབས།  རྗེ་རིན་པོ་ཆེས་བྱང་ཆུབ་ལམ་གྱི་རིམ་པའི་ཁྲིད་དང་།  ལམ་གཙོ་རྣམ་གསུམ་ཡང་རྒྱལ་སྲས་འདིའི་དོན་དུ་ཡི་གེར་འགོད་པར་མཛད་ཅེས་གསུངས།  མདོ་སྨད་དུ་མ་ཕེབས་པའི་སྔོན་ལ་མཉམ་མེད་ཙོང་ཁ་བ་ཆེན་པོས།   བྱང་ཆུབ་སེམས་དཔའ་རྟག་ངུའི་རྟོགས་བརྗོད་མཛད་དུས་དྲུང་ཡིག་ཀྱང་རྗེ་འདིས་གནང་བ་ནི།  རྟོགས་བརྗོད་དེའི་མཛད་བྱང་ལས། བྱང་ཆུབ་སེམས་དཔའ་སེམས་དཔའ་ཆེན་པོ་རྟག་ཏུ་ངུའི་རྟོགས་པ་བརྗོད་པ་སྙན་དངགས་དཔག་བསམ་གྱི་ལྗོན་པ་ཞེས་བྱ་བ་འདི་ནི།  དལ་འབྱོར་གྱི་ལྷུན་པོ་བསླབ་གསུམ་ནོར་བུའི་ཡོན་ཏན་དུ་མས་བརྗིད་ཅིང་ལུང་དང་རིགས་པ་བསྟན་པ་རྒྱ་མཚོའི་དཔལ་ལས་འཁྲུངས་པ།  དགེ་བའི་བཤེས་གཉེན་བྱང་ཆུབ་བླ་མས་བསྐུལ་ནས།  མཐོ་རིས་ཀྱི་ཡོན་ཏན་དུ་མ་དང་ལྡནཞིང༌།  ཚུལ་ཁྲིམས་དང་ཐོས་པའི་རྒྱན་གྱིས་མཛེས་པ་དགེ་བའི་བཤེས་གཉེན་འཇམ་དཔལ་གྱིས་མཐུན་རྐྱེན་ཉེ་བར་སྦྱར་ཏེ།  མི་འཕྲོག་པའི་མཁྱེན་རབ་དང་ཐུགས་རྗེ་ཕུན་སུམ་ཚོགས་པའི་བདག་ཉིད་དོན་གྱི་སླད་དུ་མཚན་ནས་སྨོས་ཏེ།  ཆོས་ཀྱི་རྗེ་དོན་གྲུབ་རིན་ཆེན་གྱི་ཞབས་རྡུལ་སྤྱི་བོས་ལེན་ཞིང༌།   སྐད་གཉིས་སྨྲ་བའི་དབང་བོ་ནམ་མཁའ་བཟང་བོ་དང༌།  ཐམས་ཅད་མཁྱེན་པ་དཔལ་ལྡན་ས་སྐྱ་བ་གཞོན་ནུ་བློ་གྲོས་ཀྱི་དྲིན་ལས་སྙན་དངགས་དང་ཚིག་རྒྱན་གྱི་བསྟན་བཅོས་ལ་བློའི་སྣང་བ་ཐོབ་པ།  ཤར་ཙོང་ཁ་བ་བློ་བཟང་གྲགས་པའི་དཔལ་གྱིས་ཆོས་གྲྭ་ཆེན་པོ་བདེ་བ་ཅན་དུ་སྦྱར་བའི་ཡི་གེ་བ་ནི་བློ་གྲོས་ཀྱི་བང་མཛོད་སྔགས་དང་མཚན་ཉིད་དུ་མའི་ནོར་བུས་གཏམས་པའི་སྙན་ངག་མཁན་ཚ་ཁོ་བ་ངག་དབང་གྲགས་པའོ་ཞེས་གསུངས་སོ། །

གཞན་ཡང་རྗེ་འདིས་རོང་བོ་ལྗགས་ནག་པ་རབ་ཏུ་བྱུང་བའི་ལས་གྲྭ་མཛད་ཚུལ་ནི།  རོང་བོའི་རྣམ་ཐར་དཔག་བསམ་ཡོངས་འདུའི་ལྗོན་པར།  རབ་ཏུ་མ་བྱུང་བ་རྗེ་ཉིད་ལ་ཞུས་པས།  ཚ་ཁོ་དཔོན་པོ་ངག་དབང་གྲགས་པ་དང༌།   རྟོགས་ལྡན་འཇམ་དཔལ་རྒྱ་མཚོ།    འཇམ་དཀར་བ་དཔལ་ལྡན་བཟང་བོ།  གནས་བརྟན་རིན་ཆེན་རྒྱལ་མཚན་པ་སོགས་ཀྱི་སྤྱན་སྔར་རབ་ཏུ་བྱུང༌ཞེས་གསུངས།  

ལྗགས་ནག་པ་རབ་ཏུ་བྱུང་དུས་ཆུ་སྤྲེལ་སྤྱི་ལོ༡༣༩༢ལོ་ཡིན།   རོང་བོའི་རྣམ་ཐར་དཔག་བསམ་ཡོངས་འདུས་ལྗོན་པར།  དེ་ནས་ཚ་ཁོའི་དཔོན་ནི་སྟག་ལོའི་ལོ་འགོར་རང་ཡུལ་དུ་བྱོན།  རོང་བོ་ལྗགས་ནག་པ་ནི་ཡོས་ཀྱི་དབྱར་ཟླ་ར་བ་ལ་མར་ཕེབས་པ་ཡིན་ནོ། ། ཞེས་དང༌།  མདོ་སྨད་ཆོས་འབྱུང་དུའང་འདི་བ་ལྕགས་སྟག་སྤྱི་ལོ༡༤༡༠ལོའི་ལོ་མགོར་མདོ་སྨད་དུ་བྱོན།   ལྕགས་ཡོས་ཏེ་སྤྱི་ལོ༡༤༡༡ལོའི་དབྱར་ཟླ་ར་བ་ལ་ལྗགས་ནག་པ་ཡང་བྱོན།    ཞེས་པ་རྣམ་ཐར་ཡོངས་འདུས་ལྗོན་པར་བསྟུན་པ་ཡིན་གསུངས་མོད།  ལྕགས་སྟག་སྤྱི་ལོ༡༤༡༠ལོ་ནི་རྗེས་དགའ་ལྡན་བཏབ་པའི་ཕྱི་ལོ་ཡིན་ལ།   དེའི་སྔོན་ས་སྟག་སྤྱི་ལོ༡༣༩༨ལོར་རྗེས་རྟེན་འབྲེལ་བསྟོད་པ་བརྩམས།  དེ་ནས་སྟོན་འོལ་ཁའི་འགར་ཕུག་ཏུ་བྱོན།  འོལ་ཁའི་དགེ་འདུན་རྣམས་ལ་ཆོས་གསུངས། དེ་ནས་གཡེའི་ཏེའུ་རར་བྱོན།    དབྱར་བཞུགས་མཛད།    གཡེའི་དགེ་འདུན་རྣམས་ལ་ཆོས་མང་དུ་གསུངས།  རྗེ་གཡེའི་ཏེའུ་རར་བཞུགས་དུས་རྗེ་དགུང་ལོ་ཞེ་གསུམ་པ་ས་ཡོས་སྤྱི་ལོ༡༣༩༩ལོ་ཡིན་པར་གསལ།  ངག་དབང་གྲགས་པས་མདོ་སྨད་ཀྱི་ཡུལ་དུ་དགེ་ལྡན་རིང་ལུགས་དྲི་མ་མེད་པ་འཛིན་པའི་ཆོས་སྡེ་བརྒྱད་རྩ་བརྒྱད་བཏབ་པར་གྲགས་པ་རྣམས་འདིའི་སྔོན་ནས་བཏབ་པ་ཡིན་དགོས་ཏེ།  རྗེ་ཏེའུ་རར་བཞུགས་སྐབས་ངག་དབང་གྲགས་པས་རྒྱལ་མོ་ཚ་བ་རོང་ནས་དགོན་སྡེ་གྲངས་བཅད་ཅིག་འཛུགས་རྒྱུའི་དམ་བཅའ་ཕུལ་བ་ལྟར་གྲུབ་པའི་གནས་ཚུལ་ཞུ་ཡིག་ཕུལ་བའི་ལན་དུ།  འཕྲིན་ཡིག་གནང་བ་ལས།  

ཞེས་དང༌།ཨེའི་ས་ཕྱོགས་དབེན་གནས་ཏེའུ་ར་ནས་སྤྲིངས་པ་དགེ་ལེགས་སུ་གྱུར་ཅིག ། ཅེས་གསུངས་པ་ལྟར། དེ་དུས་ངག་དབང་གྲགས་པས་དགོན་པ་རྣམས་བཏབ་ཚར་བ་ཤིན་ཏུ་གསལ་ཏོ། །

དེའི་རྗེས་སུ་ཡང་མཉམ་མེད་ཙོང་ཁ་བ་ཆེན་པོས།  ཆུ་རྟ་སྤྱི་ལོ༡༤༠༢ལོར་ལམ་རིམ་ཆེན་མོ་མཛད། དེ་དུས་ངག་དབང་གྲགས་པ་མར་ཕེབས་ཟིན་པས་ལམ་རིམ་གྱི་དཔེ་ཆ་ཚ་ཁོ་བ་ལ་མར་གནང་བ་སྤྱི་བོར་སྨིན་པའི་ལན་དུ་འཕྲིན་ཡིག་དང༌།  གོས་དམར་སྨུག་དང༌།  མཆིལ་ལྷམ་ཟུང་བཅས་ཡར་ཚ་ཁོ་བའི་སྐུ་དྲིན་གྱིས་རབ་ཏུ་བྱུང་བ་འགའི་ཕྱག་ཏུ་ཕུལ་བའི་འཕྲིན་ལན་ཡང༌།   རྗེ་རངཉིད་ཀྱིས་གསུངས་པ་གསུང་ཐོར་བུར་བཞུགས་པ་ལྟར་རོ། །

ཚ་ཁོ་ངག་དབང་གྲགས་པའི་རྣམ་ཐར་ནི།   རྗེ་མཉམ་མེད་ཙོང་ཁ་བ་ཆེན་པོས་མཛད་པ་རྣམས་དང་གུང་བསྒྲིགས་ནས་ཤེས་དགོས་པ་ལས་ཁོང་གི་རྣམ་ཐར་གཞན་གསལ་བོ་ཞིག་ཤིན་ཏུ་དཀོན་པས་མ་མཐོང་ངོ༌།  །

རྗེ་ཚ་ཁོ་བ་མཁན་ཆེན་ངག་དབང་གྲགས་པ་ནི།  རྗེ་མཉམ་མེད་ཙོང་ཁ་བ་ཆེན་པོའི་སྲས་ཀྱི་ཐུ་བོ་ཡིན་ཡང༌། རྫིང་ཕྱིའི་ཇོ་བོ་བྱམས་པར་ཞིག་གསོས་མཛད་སྐབས་དང༌།   གཉལ་གྱི་ཕྱོགས་སུ་ཆོས་གསུངས་སྐབས།  ཆོ་འཕྲུལ་སྨོན་ལམ་ཆེན་མོ་ཚུགས་སྐབས།    གདན་ས་ཆེན་པོ་དགེ་ལྡན་རྣམ་པར་རྒྱལ་བའི་གླིང་ཕྱག་འདེབས་མཛད་སྐབས་སོགས་སུ་དབུས་གཙང་དུ་བཞུགས་ཡོད་པ་རྗེ་ཡབ་སྲས་ཀྱི་རྣམ་ཐར་གང་དུ་ཡང་མི་སྣང་ལ་ཐ་ན་གསུང་སྒྲོས་ཙམ་ཡང་མ་མཆིས་སོ།    ། 

བྱ་བྲལ་ལ་མ་ཐེགས་གོང་ཞེས་པའི་ཚིག་ཟུར་ལས་ཀྱང་ཆུ་སྤྲེལ་སྤྱི་ལོ༡༣༩༢ལོར་ཨ་མདོར་ཕེབས་པར་མངོན།  རྗེ་ཚ་ཁོ་ངག་དབང་གྲགས་པའི་འཁྲུངས་རབས་ཡོངས་འཛིན་ཡེ་ཤེས་རྒྱལ་མཚན་གྱིས་མཛད་པ་ཞིག་ཡོད་ལ།   མཁས་གྲུབ་ཐམས་ཅད་མཁྱེན་པས་ཀྱང༌།  མཐའ་ཡས་པའི་ཡོན་ཏན་རིན་པོ་ཆེ་དུ་མས་ཉེ་བར་མཛེས་པའི་མཁན་ཆེན་ཚ་ཁོ་བ་ངག་དབང་གྲགས་པ་ལ་བསྟོད་པའི་ཚིགས་སུ་བཅད་པ་འདི་ནི་དེ་ཉིད་ཀྱི་དཔོན་པོ་ལུང་དང་རྟོགས་པའི་རྒྱན་དང་ལྡན་པ།   བླ་མ་དཔལ་ལྡན་ཆོས་ཀྱིས་གྲགས་པའི་གསུང་གིས་བསྐུལ་ནས།   མང་དུ་ཐོས་པའི་བཙུན་པ་དགེ་ལེགས་དཔལ་བཟང་བོས་སྦྱར་བའོ།  །ཞེས་དང༌།

ཡང་གུང་ཐང་བསྟན་པའི་སྒྲོན་མེས་མཛད་པའི་བསྟོད་པའི་མཇུག་བྱང་ལས། ཞེས་མཐའ་འཁོབ་འདུལ་བའི་མཆོག་འཕགས་པ་ཀ་ཏ་ཡ་ན་དང་ཆོས་མཚུངས་པ་རྗེ་བླ་མའི་ནང་ཐུགས་ཀྱི་སྲས་པོ་མཁན་ཆེན་ངག་དབང་གྲགས་པ་ལ་བསྟོད་པའི་རབ་ཏུ་བྱེད་པ་འདི་ནི།   སྔར་དོན་གཉེར་ཅན་དུ་མས་རྣམ་ཐར་གསོལ་འདེབས་ཤིག་དགོས་ཞེས་བསྐུལ་ཡང༌།   ས་བོན་མེད་སྟབས་རིམ་འགྱངས་སུ་སོང་བ་ལས། ཉེ་ཆར་མཁན་ཆེན་སྐུ་གདུང་ལ་མཇལ་སྐབས་རང་རྒྱུད་དད་པས་ཉེ་བར་བསྐུལ་ཞིང༌།  རྣམ་ཐར་ཡང་ཞིབ་ཏུ་བརྟགས་ཚེ་རྗེ་བླ་མས་དགྱེས་པའི་ཞལ་བཞེས་དང༌།   ཐུན་མོང་བ་ལམ་གཙོ་རྣམ་གསུམ་ཐུན་མོང་མ་ཡིན་པ་འཇིགས་བྱེད་ཀྱི་རིམ་གཉིས་གདམས་པའི་ཡིག་ཆུང་དུ་མ་བཅས་བསྩལ་བ་རྣམས་གུང་བསྒྲིགས་ན།  དེང་དུས་བླ་མས་བཤད་ལོ་དང༌།    སློབ་མས་ཐོས་ལོའི་རྣམ་གྲངས་གང་ཁོམ་དུ་བྱས་པ་ལྟ་བུ་མ་ཡིན་པར།   རྒྱ་གར་གྲུབ་ཆེན་རྣམས་ལ་ལྷ་དང་བླ་མས་ཉམས་རྟོགས་ཀྱི་རིམ་པ་དང་བསྟུན་ནས་གདམས་ངག་འབོག་པའི་རིམ་པ་ཇི་ལྟ་བ་བཞིན་ཡིན་འདུག་པས་དེ་ཉིད་གཞིར་བྱས་ཏེ། བཙུན་པ་དཀོན་མཆོག་བསྟན་པའི་སྒྲོན་མེས་མཆོད་སྡོང་རིན་པོ་ཆེའི་མདུན་ནས་འཕྲལ་དུ་སུག་བྲིས་བགྱིས་པ་འདིས་ཀྱང་བསྟན་པ་དང་སེམས་ཅན་ལ་ཕན་པ་རྒྱ་ཆེན་པོ་འབྱུང་བར་གྱུར་ཅིགཅེས་གསུངས་པ་ལྟར།   རྗེ་ཚ་ཁོ་བ་མཁན་ཆེན་ངག་དབང་གྲགས་པའི་ཡོན་ཏན་དེ་ལྟར་ལ།   མཆོད་སྡོང་རིན་པོ་ཆེ་བཞུགས་ཡུལ་ནི་ད་ལྟ་རྔ་བ་ཁུལ་འབར་ཁམས་རྫོང་དུ་གཏོགས་ལ།   འབར་ཁམས་ནས་ཡར་ཅོག་ཙེ་རྒྱལ་སའི་བར་སྤྱི་ལེ་བརྒྱད་དང༌།   དེ་ནས་བཙན་ལྷ་རྫོང་ལ་འགྲོ་བའི་གཞུང་ལམ་བརྒྱུད་སྤྱི་ལེ་བཅུ་དྲུག་ཡས་མས་ནས་ཡར་ལ་བརྒྱབ་ན་ཚ་ཁོ་དགོན་དགའ་ལྡན་དར་རྒྱས་གླིང་དུ་གཡོན་ལ་རྗེ་ངག་དབང་གྲགས་པའི་སྐུ་གདུང་དང༌།  གཡས་སུ་ཁོང་གི་དཔོན་པོ་ཆོས་ཀྱི་གྲགས་པའི་སྐུ་གདུང་བཞུགས།དམར་དམག་རྒྱང་བསྐྱོད་སྐབས་མེ་རུ་བསྒྲོན།   དེའི་རྗེས་སུ་ཅོག་རྒྱལ་བསོད་ནམས་ཚེ་རིང་གིས་ཞིག་གསོས་བྱས་ཏེ་ས་རྡོའི་མཆོད་རྟེན་ལེགས་པ་ཞིག་བཞེངས་ནས་གདུང་རུས་རྣམས་ཤུག་པའི་ཟོ་བར་བླུགས་ཏེ་མཆོད་རྟེན་གྱི་བུམ་པར་བཞུགས་སུ་གསོལ།   དེའི་སྒོ་ཁྱིམ་དུ་རྗེ་སྐུ་བཅས་བཞུགས་པ་རིག་གནས་གསར་བརྗེའི་བར་གནས། མཆོད་རྟེན་ཅུང་ཟད་ཞིག་ཆུ་ཁྱི་སྤྱི་ལོ༡༩༨༢ལོའི་སྤྱི་ཟླ་༡༡པའི་ཚེས་༡༡ཉིན་སྣང་བ་མཐའ་ཡས་མི་ཡི་གར་རོལ་པཎ་ཆེན་རིན་པོ་ཆེ་སྐུ་ཕྲེང་བཅུ་བས་སྒོར་ལྔ་སྟོང་གནང༌། ཆུ་ཕག་སྤྱི་ལོ༡༩༨༣ལོར་ཡང་སྒོར་ལྔ་བརྒྱ་གནང་བ་བཅས་ཁྱོན་ལྔ་སྟོང་ལྔ་བརྒྱས་ལོ་དེར་ཁུལ་ནང་བསྟན་མཐུན་ཚོགས་ཀྱིས་མཆོད་རྟེན་ཞིག་གསོས་བྱས་གདུང་རུས་རྣམས་དཀར་ཡོལ་གྱི་ཟ་མ་ཏོག་ཏུ་བཞུགས་སུ་གསོལ།  དབུ་ཐོད་ཀྱི་དུམ་བུ་ཞིག་གི་དངོས་སུ་ཤིན་ཏུ་གསལ་བའི་ཨོཾ་ཡིག་དང༌།   གཞན་ཡང་ཡིག་འབྲུའི་རྣམ་པ་མང་བ་དང༌།  རབ་གནས་ཀྱི་དུས་འཇའ་འོད་སོགས་ངོ་མཚར་བའི་ལྟས་བཅས་འགྲོ་བ་དུ་མའི་མཐུན་སྣང་དུ་བྱུང༌།  དེའི་ལུང་བར་རྒྱ་མི་ནགས་གཅོད་མཁན་ཚོ་ཁག་ཅིག་ཡོད་པ་དེ་རྣམས་ཀྱིས།   གསེར་སྡོང་རིན་པོ་ཆེ་ཡོད་སར་འོད་སྣང་ཆེན་པོ་ཤར་ཟེར་ནས་རྒྱ་མི་རྣམས་མཇལ་མཁན་མང༌།  དེར་རྡོ་ལེབ་ཆེན་པོ་ཞིག་གི་ངོས་ལ།

ངག་དབང་གྲགས་པའི་ཞབས་ལ་གསོལ་བ་འདེབས། །ཞེས་སོགས་རྡོ་ལེབ་ངོས་གང་བོར་ཡི་གེ་ཡོད།  རྗེ་ཚ་ཁོ་བ་ངག་དབང་གྲགས་པའི་འཁྲུངས་རབས་ནི།  སྔོན་བྱང་ཆུབ་སེམས་དཔའ་དགའ་བའི་ཏོག་ཏུ་འཁྲུངས་ཏེ་ཀླུའི་རྒྱལ་བོ་ལས་བྱུང་བའི་ཡིད་བཞིན་གྱི་ནོར་བུ་སེམས་བསྐྱེད་པའི་རྫས་སུ་ཕུལ་ནས་ཐུགས་བསྐྱེད།   དེ་ནས་འཕགས་པ་མ་འགགས་པ།  དཔལ་འབྲས་རྡོ་རྗེ།  ཅོག་རོ་ཀླུའི་རྒྱལ་མཚན།   སློབ་དཔོན་དྷརྨ་པཱ་ལ།   སློབ་དཔོན་ཟླ་བ་གཞོན་ནུ།   བྱང་སེམས་ཟླ་བ་རྒྱལ་མཚན།  དཔལ་ལྡན་དགོན་པ་བ།   སྐྱེར་སྒང་བ།   ཀེའུ་ཡེ་ཤེས་འབྱུང་གནས།  མཁས་བཙུན་གཞོན་ནུ་དོན་གྲུབ།   ཚ་ཁོ་ངག་དབང་གྲགས་པ་སོགས་ཐུགས་རྒྱུད་གཅིག་ཅིང༌།  སྐུའི་སྐྱེ་བ་ཕྱི་མ་ལ་ཀུན་མཁྱེན་ལེགས་པ་དོན་གྲུབ་དང༌།   ཧོར་སྨིན་གྲོལ་ཆོས་ཀྱི་རྒྱལ་བོ་འཕྲིན་ལས་ལྷུན་གྲུབ་ཀྱི་སྐྱེ་བ་བཞེས་ནས་གདུལ་བྱ་མང་བོ་སྨིན་གྲོལ་ལ་བཀོད།   མདོར་ན་ཚ་ཁོ་དཔོན་པོ་རྗེ་མཁན་ཆེན་ངག་དབང་གྲགས་པ་དཔལ་བཟང་བོ་མཆོག་ནི།   ཀུན་མཁྱེན་འཇམ་དབྱངས་བཞད་པའི་འཇིགས་བྱེད་ཆོས་འབྱུང་ལས།   ཚ་ཁོ་དཔོན་པོ་ངག་དབང་གྲགས་པ།   མདོ་སྨད་པ་གྲགས་པ་བློ་གྲོས།ལྡོང་སྟོན་ཛྙཱ་ན་ཤྲཱི་དགེ་བཤེས་ཤ་སྟོན་ཏེ།    བྱ་བྲལ་ལ་མ་ཐེགས་གོང་གི་སྲས་སྔ་ཚར་བཞི།  ཞེས་དང་འཇམ་དབྱངས་ཆོས་རྗེ་བཀྲ་ཤིས་དཔལ་ལྡན།   མཚུངས་མེད་ཆོས་རྗེ་རྒྱལ་མཚན་བཟང་བོ།   རྗེ་བཙུན་ཤེས་རབ་སེང་གེ།   ཐམས་ཅད་མཁྱེན་པ་དགེ་འདུན་གྲུབ།   ཚ་ཁོ་དཔོན་པོ་ངག་དབང་གྲགས་པ།  སྟོད་ཤེར་སེང༌།   སྨད་ཤེར་སེང་དང་བདུན་ནི་འཕྲིན་ལས་ནམ་མཁའ་དངམཉམ་པའི་སྲས་ཆེན་བདུན།ཞེས་གསུངས་པ་ལྟར།   རྗེ་རིན་པོ་ཆེའི་སྲས་ལྔ་ཚར་བཞི་དང་འཕྲིན་ལས་ནམ་མཁའ་དང་མཉམ་པའི་སྲས་ཆེན་བདུན་གྱི་ཡ་གྱལ་ཡིན་ལ།   ཕྱིས་སུ་ཁོང་རང་གི་ཐུགས་བསྐྱེད་ཟབ་མོ་དང་རྗེ་རིན་པོ་ཆེའི་བཀའ་གསུང་གི་མེ་ཏོག་དུས་གཅིག་ཏུ་སྨིན་ཏེ་ཕྱིར་མདོ་སྨད་དུ་ཕེབས།   ཐོག་མར་རྔ་སྟོད་དུ་ཨ་འདུས་དགོན་ནམ་མཚོ་དགོན་གསང་ཆེན་བཀྲ་ཤིས་གླིང་ཞེས་པ་ཕྱག་འདེབས་མཛད།   དགོན་པ་བརྒྱ་རྩ་བརྒྱད་ཕྱག་འདེབས་མཛད་པའི་ཐོག་མར་དགོན་སྡེ་འདི་ཉིད་བཏབ་པས་ཡག་མགོ་དགོན་དུ་གྲགས།   དེ་རྗེས་རིམ་བཞིན་མཆོད་རྟེན་ལྕོགས་དང༌།   གདོང་རི་དགེ་ལྡན་དམ་ཆོས་གླིང༌།    ཟུང་ཆུའི་མཁར་ལུང་ཕྱོགས་སུ་མཁར་ཡག་རི་ཁྲོད་དང༌དམུ་དགེ་དགོན།   ཞང་དུར་ཕུ་ཏོའི་དགོན་དང༌།   རོང་ཆུ་ནག་ཏུ་ཙས་རུར་ས་དམར་དགོན།   ཁྲོ་ཆུའི་ཕྱོགས་སུ་ཀླུ་བཟོའི་དགོན།     སྔོན་ཚ་ཁོའི་ཁོག་གི་ཕྱོགས་སུ་ཁང་དམར་དགོན།   རྒྱལ་རོང་ཕྱོགས་སུ་སྐུ་གདུང་རིན་པོ་ཆེ་བཞུགས་ཡུལ་ཚ་ཁོ་དགོན་དགའ་ལྡན་དར་རྒྱས་གླིང༌།  བ་མགོ་དགོན།  ས་མགོ་དགོན།  ཏམ་མགོ་དགོན།  བཙན་ལྷར་སུམ་མདོ་དགོན།  རྗེས་སུ་འདིའི་མཚན་སྤོར་ནས་བསོད་ནམས་ཡག་དགོན་པ་ཡིན་པར་བཤད༌།  མིས་ཐོ་དགོན།   དམ་པ་དང་ཐག་ཉེ་སར་མཆོད་རྟེན་ས་དགོན་དང༌།   གྲུབ་མནོས་དགོན།  ཚོ་བདུན་དགོན་པའི་ཐག་ཉེ་སར་མཆོད་རྟེན་ཆེ་བ་ཞབས་ལྷ་ཁང་ཅན་དང༌།    དེ་སོགས་དགོན་སྡེ་བརྒྱ་རྩ་བརྒྱད་བཏབ་པའི་དམ་བཅའ་གྲུབ་པས་ད་ཚང་ལྷུན་གྲུབ་གླིང་ཕྱག་འདེབས་མཛད།  དེ་ལྟར་ཡུལ་ཕྱོགས་མང་བོར་ཕེབས་ནས་དགོན་སྡེ་བརྒྱ་རྩ་བརྒྱད་བཏབ་པར་གྲགས་སོ།ཆོས་སྡེ་འདི་ཕྱག་འདེབས་མཛད་པ་བོ་རྗེ་མཁན་ཆེན་ངག་དབང་གྲགས་པའི་མཛད་རྣམ་མདོར་བསྡུས་འདི་ནི་གཙོ་བོ་རས་ཆུང་བ་ཤེས་རབ་རྒྱ་མཚོས་མཛད་པའི་དམུ་དགེ་བཀྲ་ཤིས་འཁོར་ལོའི་དགོན་གྱི་བྱུང་བ་བཤེས་གཉེན་དམ་པའི་ཞལ་ལུང་གཞིར་བཞག་ཅིང་དེ་ལས་ཁོལ་བྱུང་བྱས་པ་ལགས་སོ། །

འདོན་སྤྲོད་པ། ཤེས་རབ་བློ་ལྡན།

རོང་སྟོན་ཤཱཀྱ་རྒྱལ་མཚན།

རྗེ་འདི་ཉིད་ཤར་རྒྱལ་མོ་རོང་དུ་ཡབ་བོན་པོ་གེ་གོད་རྒྱལ་པོ་དང་། ཡུམ་རྒྱ་གར་སྨན་ཞེས་བྱ་བའི་སྲས་སུ་རབ་བྱུང་དྲུག་པའི་མེ་ལུག(༡༣༦༧)ལོར་སྐུ་བལྟམས། ཐོག་མར་ཡབ་ཀྱི་དྲུང་དུ་བོན་ཆོས་ལ་སྦྱངས་ཤིང་ལུགས་དེ་ལ་བརྟེན་པའི་འཕྲིན་ལས་ཀྱང་དུ་མ་མཛད། དགུང་ལོ་བཅོ་བརྒྱད་པ་ལ་དབུས་གཙང་དུ་བྱོན་ཏེ་གསང་ཕུ་ནེའུ་ཐོགས་ཀྱི་ཆོས་གྲྭར་ཕེབས། གླིང་སྟོད་པ་རིན་ཆེན་རྣམ་རྒྱལ་ལ་བྱང་སེམས་ཀྱི་སྡོམ་པ་བཞེས། རྗེ་འདི་དང་ཀོང་སྟོན་བློ་གྲོས་དབང་ཕྱུག་གི་དྲུང་དུ་རྔོག་ལོ་ནས་བརྒྱུད་པའི་ཕར་ཚད་བསྡུས་གསུམ་དང་། དབུ་མ་རང་བརྒྱུད་པའི་བཤད་སྲོལ། སྐྱོར་མོ་ལུང་གི་མཁན་ཆེན་དཀའ་བཞི་པ་དང་། འཕན་ཡུལ་གྲོ་བའི་མཁས་པ་དམར་སྟོན་ལ་འདུལ་བ་སྨད་ལུགས་བྱ་འདུལ་དང་ཐོག་དཀའ་ཆེན་གྱི་བཤད་སྲོལ། མངོན་པ་མཛོད་མཆིམས་ལུགས་ཀྱི་བཤད་སྲོལ། ཐང་ཟག་པ་སྤྲུལ་སྐུ་གཞོན་ནུ་རྒྱལ་མཚན་ལ་དབུ་མ་ཐལ་འགྱུར་བ་ཚབ་ཀྱི་བཤད་སྲོལ། ལོ་པ་ཤཱཀྱ་རིན་ཆེན་གྱི་དྲུང་དུ་མངོན་པ་གོང་མ་སོགས་ལ་སྦྱངས། དགུང་ལོ་ཉེར་གཉིས་པ་ལ་གྲོ་ས་མཁན་ཆེན་ཀུན་དགའ་རྒྱལ་མཚན་དང་དམར་སྟོན་པའི་དྲུང་དུ་བསྙེན་པར་རྫོགས། མཚན་ཤཱཀྱ་རྒྱལ་མཚན་དཔལ་བཟང་པོར་གསོལ། རྣམ་ངེས་ཀྱི་ཊཱིཀ་བརྩམས་ཤིང་འཆད་པའི་འཁུར་བཟུང་། དགུང་ལོ་ཉེར་བདུན་པ་ལ་མཁན་ཆེན་གཡག་སྡེ་པ་དང་མཇལ་ཏེ་ས་ལུགས་ཀྱི་མདོའི་བཤད་སྲོལ་དང་། ཐེག་ཆེན་ཆོས་རྗེ་ལས་གསུང་ངག་སོགས་ཀྱི་ཟབ་དོན་བཞེས་ནས་ས་རྔོག་རྣམ་གཉིས་ཀྱི་བཤད་སྲོལ་རྒྱུན་བསྲིངས་ཏེ། ཕྱ་པ་ཆོས་སེང་དང་། བཅོམ་ལྡན་རིག་རལ། ཀུན་མཁྱེན་འདི་གསུམ་ལས་འཆད་པའི་རྒྱུན་དང་། དངོས་སློབ་བསྟན་འཛིན་གྱི་ཐོན་ཆེ་བ་མ་བྱུང་ཞེས་གྲགས། དགུང་ལོ་ལྔ་བཅུ་ཙམ་ལ་སྟོད་དིང་རི་དང་མུས་སོགས་སུ་སྔགས་ཀྱི་ཟབ་དོན་བཞེས་པ་དང་། མདོ་ཕྱོགས་ཀྱི་འཕྲིན་ལས་སྤེལ་བ་ཁོ་ན་མཛད། དགུང་ལོ་དྲུག་ཅུ་རེ་གཅིག་པ་ལ་སྡེ་དཔོན་སོ་སོའི་བསོད་ནམས་ཀྱི་མགྲོན་དང་། མདོ་སྔགས་ཀྱི་ཆོས་འཁོར་རྒྱ་ཆེ་བར་བསྐོར། དགུང་ལོ་རེ་དགུ་པ་ཤིང་ཡོས(༡༤༣༥)ལོར་འཕན་པོ་ནཱ་ལེནྡྲའི་ཆོས་གྲྭ་བཏབ་ནས་གཞན་དོན་མཛད། ཕར་ཕྱིན་བསྟན་པ་དང་། དབུ་མ་རང་བརྒྱུད་པའི་བསྟན་པ་ལ་ཀུན་མཁྱེན་འདི་བཀའ་དྲིན་ཆེ། དགུང་ལོ་ཉེར་གཉིས་པ་ལ་ཚད་མ་རྣམ་ངེས་འཆད་པ་ནས་བརྩམས་ཏེ་མྱ་ངན་ལས་འདས་པའི་བར་ཉིན་རེ་ལ་ཐ་ན་སློབ་མ་གཅིག་ཙམ་ལ་ཡང་གཙུག་ལག་གི་ཚིགས་སུ་བཅད་པ་གཅིག་ཡན་ཆད་ཀྱི་ཆོས་ཀྱི་སྦྱིན་པ་མཛད་པར་དམ་བཅས། གཞན་ལ་གནོད་པ་དང་། ཐོ་འཚམ་པ། ཕྲག་དོག་གི་རྣམ་པ་ཅུང་ཟད་ཀྱང་མི་མངའ། དགུང་ལོ་བརྒྱད་ཅུ་གྱ་གསུམ་བཞེས་པའི་ཚེ་ཡང་གཞུང་ཆེན་པོ་དག་ཀྱང་ཐུགས་ནས་ཐོགས་པ་མེད་པར་གསུང་ཐུབ། དབུས་གཙང་གི་གྲྭ་ས་ཆེན་པོ་རྣམས་སུ་གཞུང་པོ་ཏི་བཅུ་ལ་གྲྭ་སྐོར་མཛད་པས་རྩོད་པའི་ཁྱུ་མཆོག་ཏུ་གྲགས་ཤིང་། རོང་སྟོན་སྨྲ་བའི་སེངྒེ་ཞེས་པའ་མཚན་སྙན་གསོལ་། མཁན་ཆེན་སངས་རྒྱས་དཔལ་བའི་མཛད་སྲོལ་གཙོ་བོར་བཟུང་ནས་མངོན་པར་རྟོགས་པའི་རྒྱན་འགྲེལ་པ་དང་བཅས་པ་རྒྱུན་མི་ཆད་པར་གསུངས་ཤིང་། དེའི་མན་ངག་ཞི་བྱེད་བརྒྱུད་པ་ཕྱི་མ་ལ་གཙོ་བོར་མཛད། གསུང་རྩོམ་ལ《ཚད་མ་རྣམ་ངེས་ཀྱི་འགྲེལ་པ་རྟོག་གེའི་སྣང་བ》དང《འབུམ་གྱི་འགྲེལ་པ་རྒྱས་བསྡུས》གཉིས་ལ་སོགས་པ་གཞུང་ཆེན་བཞི་བཅུ་ཞེ་གཅིག་གི་རྣམ་བཤད་ཀྱིས་གཙོས་ཆོས་ཚན་སུམ་བརྒྱ་ལྔ་བཅུའི་གྲངས་སུ་བརྩམས་པར་མཛད། གསུང་ལས་སྐྱེས་པའི་སློབ་མའི་གཙོ་བོ་ནི། སྔ་ཚར་གི་བུ་ཆེན་བསྟན་པ་འདེགས་པའི་ཀ་ཆེན་བཞི། བར་ཚར་གྱི་བུ་ཆེན་གངས་ཅན་མཛེས་པའི་རྒྱན་བརྒྱད་དང་མཆོག་གཉིས། གསུང་ཐུགས་ཀྱི་མཛད་སྤྱོད་མཚུངས་པའི་བུ་ཆེན་གསུམ། ཕྱི་ཚར་གྱི་བུ་ཆེན་བསྟན་པའི་གསལ་བྱེད་བཅུ་དྲུག ཡང་ཚར་གྱི་བུ་ཆེན་གྲགས་པ་ཅན་བཞི་ལ་སོགས་པས་གཙོས་སྡེ་སྣོད་འཛིན་པ་སྟོང་ཕྲག་འགའ་བསྐྱངས། དགུང་ལོ་བརྒྱད་ཅུ་གྱ་གསུམ་ལ་ཕེབས་པ་རབ་བྱུང་བརྒྱད་པའི་ས་སྦྲུལ(༡༤༤༩)ལོར་ཞི་བར་གཤེགས་སོ། །དུང་དཀར་ཚིག་མཛོད་ཆེན་མོ་༽ལས་བཏུས།

གཙང་པཎྜི་ཏ་བློ་བཟང་བསྟན་པ་རྒྱ་མཚོ།

རྭ་རྒྱ་བློ་དབང་།

དམ་པ་འདི་རབ་བྱུང་བཅུ་གཉིས་པའི་མེ་སྦྲུལ་སྤྱི་ལོ་༡༧༣༧ ལོར་ཨ་རིག་སྨྲ་སྐམ་དུ་ཡབ་ཨ་མྱེས་ཆོས་སྐྱབས་དང་ཡུམ་སྐལ་རིས་གཉིས་ཀྱི་སྲས་སུ་སྐུ་བལྟམས། སྐུ་ན་ཆུང་དུས་སུ་རོང་བོ་དགོན་ཆེན་བདེ་ཆེན་ཆོས་འཁོར་གླིང་དུ་ཕེབས་ནས་མཁན་ཆེན་དགེ་འདུན་རྒྱ་མཚོའི་མདུན་བསྡུས་ཚན་རྣམ་འགྲེལ་ལ་ཞིབ་ཏུ་སྦྱངས། ཆོས་རྗེ་དེ་ཉིད་ཀྱིས་དགོས་པ་དུ་མར་གཟིགས་ནས་རྣམ་འགྲེལ་འཛིན་གྲྭར་ལན་གསུམ་འབབ་ཏུ་བཅུག ཐ་མའི་སྐབས་རྣམ་འགྲེལ་ལེའུ་དང་པོའི་ཐར་ལམ་གསལ་བྱེད་ཆ་ཚང་དང་མཐའ་དཔྱོད་ཆ་ཚང་བློ་རྒྱུགས་སུ་ཕུལ་ནས་དབུས་སུ་སློབ་གཉེར་ལ་འགྲོ་འདོད་ཡོད་ཚུལ་ཞུས་པས། ཐུགས་ཤིན་ཏུ་དགྱེས་ཏེ་གཞུང་འདི་རྣམས་བརྗེད་དུ་མ་འཇུག་དང་ཁྱེད་ལ་དགོས་པའི་དུས་ཤིག་ཡོད་གསུངས་ཏེ་བསླབ་བྱ་དང་བཅས་དབུས་སུ་རྫོངས་བརྡ་མཛད། དབུས་ནས་མཁས་གྲུབ་བྱེ་བའི་བསྟི་གནས་སེར་བྱེས་གྲྭ་ཚང་གི་ཨ་རིག་པ་རྣམས་ཀྱི་ཐོབ་ཁོངས་བྱ་བྲལ་ཁམས་ཚན་བཟུང་ནས་ཆོས་ཞུགས་གནང༌། སེར་བྱེས་སློབ་དཔོན་བྱམས་པ་སྨོན་ལམ་དང་བྲག་རི་ངག་དབང་དོན་གྲུབ་སོགས་བསྟེན་ཏེ་གཞུང་ཆེན་བཀའ་པོད་ལྔ་ལ་བརྩོན་པ་ལྷོད་མེད་གནང་བས་རྗེ་འདིའི་རྣམ་དཔྱོད་དང་གཞུང་ལུགས་ཀྱི་གོ་བབས་ལ་སྙན་པའི་གྲགས་པ་འབར། སྐབས་ཤིག་ྋཀུན་གཟིགས་པཎ་ཆེན་དཔལ་ལྡན་ཡེ་ཤེས་མཆོག་སེ་རར་ཕེབས་པར་མངའ་རིས་དགེ་བཤེས་ཐོགས་མེད་དང་ལྷན་དུ་ཚད་མ་རྣམ་འགྲེལ་གྱི་ཚོགས་གླེང་མཛད། སྐུ་ཟླ་དགེ་བཤེས་དེ་གཞུང་ལུགས་གང་ལའང་ཐོགས་པ་མེད་པས་མཚན་དེ་ལྟར་དུ་གྲགས་ཤིང་གྲྭ་ས་སེ་འབྲས་དགེ་གསུམ་གྱི་དགེ་བཤེས་རྣམས་ཀྱི་དཔེ་ཁྲིད་དོགས་གཅོད་ཞུ་ཡུལ་གྱི་དགེ་བཤེས་གྲགས་ཅན་ཞིག་ཡིན་མོད་རྗེ་འདིས་ལུང་རིགས་ཀྱིས་ཚར་བཅད་ནས་མི་སྨྲའི་བརྟུལ་ཞུགས་ལ་བཀོད་པས། པཎ་ཆེན་མཆོག་ཐུགས་དགྱེས་ནས་དེ་རིང་ཡིན་ན་ཨ་མདོའི་ཞབས་དྲུང་གིས་ཐོགས་མེད་ཐོགས་བཅས་བྱས་སོང་ཞེས་ཞལ་རྩེད་དང༌། དཔོན་སློབ་བྱམས་པ་སྨོན་ལམ་ལ་ཞབས་དྲུང་འདི་ལྷ་རམས་པ་སོང་ནས་ལོ་ག་ཚོད་སོང་ཞེས་གསུངས་པ་ལ། ཁོང་གསར་བུ་བ་ཡིན་ཞུས་པས། འདི་འདྲ་ཁ་དོག་དཀར་དམར་དུ་ཡོད་ཀྱང་ལྷ་རམས་པར་འོས་ཞེས་བསྔགས་པའི་མེ་ཏོག་ཡང་ཡང་འཐོར་བས་མཁས་པའི་གྲགས་པ་ལྷག་པར་འཕེལ། དེ་ལྟར་དབུ་ཕར་འདུལ་མཛོད་ཀྱི་ཐད་ཀའི་རྩ་འགྲེལ་གལ་ཆེན་ཕལ་ཆེར་ཐུགས་ལ་བཟུང་ནས་སྐྱོར་སྦྱངས་ཡུན་རིང་གནང་ཞིང་དཀའ་གནད་གང་ཡོད་ལ་རྒྱན་དྲུག་མཆོག་གཉིས་ལྟ་བུའི་མཁས་གྲུབ་དུ་མའི་མདུན་དུ་ཞིབ་སྦྱངས་དོགས་གཅོད་ཡུན་རིང་གནང་བ་སོགས་གུས་རྟག་བརྩོན་འགྲུས་ཀྱི་གཤོག་ཟུང་རབ་ཏུ་བརྐྱངས། ཀུན་གཟིགས་པཎ་ཆེན་རིན་པོ་ཆེ་དང༌། བྲག་རི་ངག་དབང་དོན་འགྲུབ། ཕུར་ལྕོག་ངག་དབང་བྱམས་པ། ཀུན་མཁྱེན་འཇིགས་མེད་དབང་པོ་སོགས་ཀྱི་མདུན་དུ་དབང་ལུང་མན་ངག་གི་བཀའ་ཆོས་གང་ཡོད་དང་ཐུན་མོང་རིག་གནས་ཐམས་ཅད་ཞིབ་པར་སྦྱངས་ཏེ་མཁས་པའི་རྒྱལ་ཐབས་ལ་བཞེངས།

གཞན་གསུང་རབ་འཆད་ཁྲིད་རྒྱ་ཆེན་གནང་ཞིང་ལྷག་པར་སོག་ཡུལ་གྱི་སློབ་མ་མཁས་གྲགས་ཅན་མང་དུ་བྱུང༌། ཕྱིས་སུ་ལྷ་ལྡན་སྨོན་ལམ་ཆེན་མོའི་གྲྭ་སྐོར་དམ་བཅའ་བཞག་སྟེ་མཁས་གྲགས་ཀྱི་སྙན་པ་ཕྱོགས་བཅུར་རྒྱས་ཤིང༌། བོད་གཞུང་ས་མཆོག་ནས་ལོ་དེའི་ལྷ་རམས་པ་ཨང་དང་པོའི་བཀའ་ཤོག་དང་བདག་རྐྱེན་རྒྱ་ཆེར་གནང༌། ལྷ་རམས་དགེ་བཤེས་དམ་འཇོག་མ་མཛད་པའི་སྔོན་ཙམ་ནས་མཚོ་སྔོན་ཇ་སག་ཆིང་ཝང་རྡོ་རྗེ་ཕ་ལམ་དཔོན་བློན་དང་ཡུལ་མི་བཅས་ཀྱིས་རང་ཡུལ་དུ་མྱུར་ཕེབས་དགོས་པའི་རེ་འདུན་ལྟར་དམ་བཅའ་གྲུབ་འཕྲལ་རང་ཡུལ་དུ་ཕེབས། ཕ་ཡུལ་ནས་ཨ་རིག་སེར་སྡེ་གཙོས་པས་མི་སྡེ་ཡོངས་ཀྱིས་དགོན་པ་ཞིག་འདེབས་དགོས་པས་སྙན་བསྐུལ་ཡང་ཡང་ཞུས་པས་རབ་བྱུང་བཅུ་གསུམ་པའི་ཤིང་བྱ་སྤྱི་ལོ་༡༧༦༥ ལོར་དགོན་པ་ཕྱག་འདེབས་གནང༌། དགོན་པའི་མཚན་ལ་ལྷ་དང་བླ་མའི་ལུང་བསྟན་ལྟར་གཙང་དགོན་དགའ་ལྡན་དོན་གྲུབ་རབ་བརྟན་གླིང་ཞེས་བཏགས། གཞི་གསུམ་གྱི་ཕྱག་ལེན་དང་མདོ་སྔགས་ཀྱི་འཆད་ཉན་ལེགས་པར་བཙུགས། མདོ་ཕྱོགས་སུ་རྗེ་བཙུན་ཆོས་ཀྱི་རྒྱལ་མཚན་གྱི་ཡིག་ཆའི་སྟེང་འཛིན་སྐྱོར་གྱིས་གཞུང་བཀའ་པོད་ལྔ་ལ་འཛིན་གྲྭ་བཅུ་གསུམ་དང༌། སྨད་རྒྱུད་གྲྭ་ཚང་གི་ཕྱག་སྲོལ་ཇི་བཞིན་གྱི་རྒྱུད་གྲྭ་བཙུགས་ནས་གསང་འདུས་འགྲེལ་བ་བཞི་སྦྲགས་སོགས་རྒྱུད་སྡེ་སོ་སོའི་འཆད་ཉན་དར་རྒྱས་སུ་བཏང༌། དེ་ལྟར་དགོན་པ་བཏབ་ནས་ལོ་བཅོ་ལྔའི་བར་དུ་སྐལ་བ་དང་ལྡན་པའི་སློབ་ཚོགས་གྲངས་ལས་འདས་པར་ལམ་རིམ་ཆེ་ཆུང་གི་བཤད་ལུང་དང༌། གཞུང་ཆེན་བཀའ་པོད་ལྔའི་འཆད་ཁྲིད། རྒྱུད་ཀྱི་རྒྱལ་བོ་གསང་འདུས་ཀྱི་རྩ་འགྲེལ་གཙོའི་སྔགས་ཀྱི་གཞུང་དུ་མས་བཤད་ལུང་ཁྲིད་རྒྱུན། ཐུན་མོང་རིག་གནས་སྒྲ་གསོ་རྩིས་སྐར་ནག་སུམ་རྟགས་སྙན་ངག་སྡེབས་སྦྱོར་སོགས་ཀྱི་ཟབ་ཁྲིད་རྒྱུན་སྐྱོང༌། བསྟན་པའི་གཞི་མ་དགེ་ཚུལ་སློང་གི་སྡོམ་པ་འབུལ་བ་སོགས་བསྟན་པ་རིན་པོ་ཆེ་བཤད་སྒྲུབ་གཉིས་ཀྱི་སྒོ་ནས་ཡར་རྒྱས་སུ་འགྲོ་བའི་ཐབས་འབའ་ཞིག་གིས་དུས་འདའ་བ་མཛད། སྤྱི་ལོ་༡༧༧༩ ལོར་པཎ་ཆེན་རིན་པོ་ཆེ་དཔལ་ལྡན་ཡེ་ཤེས་སྐུ་འབུམ་དུ་བཞུགས་སྐབས་མཇལ་དུ་ཕེབས་ཏེ་ཕན་ཚུན་ལ་ཆོས་ཀྱི་བཀའ་མཆིད་རྨད་དུ་བྱུང་བ་གནང་ཞིང༌། སྐབས་དེའི་ཐུན་མོང་མ་ཡིན་པའི་རྣམ་ཐར་ཀྱང་བརྗོད་ལས་འདས། མདོ་སྨད་ཕྱོགས་ཀྱི་མཁས་ཆེན་མང་པོས་མདོ་སྔགས་རིག་གནས་ཀྱི་གསར་རྩོམ་མང་པོ་པཎ་ཆེན་རིན་པོ་ཆེར་སྤྱན་འབེབ་གང་ཞུས་རྗེ་འདི་ཉིད་ལ་ཞུ་དག་གནང་བཅུག་པ་སོགས་རྗེས་བརྩེ་ཚད་མེད་བསྐྱངས་པ་དང་གནས་ལྔ་རིག་པའི་མ་ཧ་པཎྜི་ཏ་ཆེན་པོ་ཞེས་པའི་ཐམ་ཀ་དང་ཆོ་ལོ། གཞན་ཡང་མཁོ་རྫས་གྱ་ནོམ་པས་བདག་རྐྱེན་གནང༌། སྐབས་ཤིག་ཐུའུ་བཀྭན་རིན་པོ་ཆེ་ངྷ་རྨ་བཛྲ་ལས་མཁའ་སྤྱོད་མའི་ཆོས་སྐོར་ཡོངས་རྫོགས་ཞུས་ནས་མཚན་གཅིག་དེའི་འཕོ་ཁྲིད་གནང་བ་གསན་ནས་ཚུར་ཕེབས་དུས་གཟིམ་བརྡ་བཏང་བར་མཁའ་སྤྱོད་ཀྱི་བསུ་བ་ཡིན་གསུངས་ཏེ་ཡུན་རིང་མ་སོང་བར་རབ་བྱུང་བཅུ་གསུམ་པའི་ལྕགས་བྱ་སྤྱི་ལོ་༡༧༨༠ ལོར་གཟུགས་སྐུ་མྱ་ངན་ལས་འདས་པའི་ཚུལ་བསྟན། རྗེ་འདིའི་གསུང་རྩོམ་ལ། ཀུན་མཁྱེན་འཇིགས་མེད་དབང་པོས་རྩོམ་སྐུལ་གནང་བའི་རྣམ་འགྲེལ་མཐའ་དཔྱོད་ཆོས་གྲགས་དགོངས་རྒྱན་དང་། བསྡུས་གྲྭ་རིགས་པའི་སྒོ་འབྱེད། སྒྲའི་སྐོར་ལ་ལྔ་བསྡུས་འགྲེལ་བ། རྩིས་ཀྱི་བསྟན་བཅོས་གོ་ལའི་རྣམ་བཤདསོགས་པོད་གསུམ་ཙམ་ད་ལྟ་བཞུགས་ལ། དུས་འཇིག་གིས་ཁ་འཐོར་དུ་སོང་བ་དང༌། སློབ་མ་ཚོའི་ལག་ཏུ་གྱར་ཏེ་པར་དུ་འཁོད་མ་ཐུབ་པའང་མང་པོ་ཞིག་ཡོད་པར་གྲགས་སོ། །

གཙང་པཎྜི་ཏ་སྐུ་ཕྲེང་གསུམ་པ་དགེ་འདུན་ཐུབ་བསྟན་ཡར་འཕེལ།

དམ་པ་འདི་ནི་སྤྱི་ལོ་ ༡༧༨༡ ལོར་རོང་བོ་ཤ་བུ་ནར་སྡེ་བར་སྐུ་འཁྲུངས་ཤིང་དགུང་ལོ་ལྔའི་སྟེང་གཙང་པཎྜི་ཏ་སྐུ་ཕྲེང་གསུམ་པར་ངོས་འཛིན་མཛད། སྤྱི་ལོ ༡༧༩༠ ལོར་དབུས་སུ་ཕེབས་ཏེ་མཆོད་འབུལ་རྒྱ་ཆེན་དང་སེར་བྱེས་བྱ་བྲལ་ཁམས་ཚན་དུ་ཆོས་ཞུགས་མཛད། ཕྱིས་སུ་ལྷ་ལྡན་རབ་འབྱམས་པའི་གྲྭ་སྐོར་དམ་བཅའ་བཞག་སྟེ་མཁས་པའི་གྲགས་སྙན་རྒྱས་ཤིང་སྤྱི་ལོ་ ༡༨༠༦ ལོར་རང་ཡུལ་གྱི་སྡེ་དགོན་ཡོངས་ཀྱི་ཞུ་སྐུལ་ནན་ཆེར་བྱས་པར་བརྟེན་རང་ཡུལ་དུ་ཕེབས། སྤྱི་ལོ ༡༨༡༠ ལོར་དགོངས་པ་མྱ་ངན་ལས་འདས།

གཙང་དགོན་པའི་གཏན་རབས་ལས་བཏུས།

ཐུའུ་བཀྭན་བློ་བཟང་ཆོས་ཀྱི་ཉི་མ།

ཐུའུ་བཀྭན་བློ་བཟང་ཆོས་ཀྱི་ཉི་མ་ནི་མདོ་སྨད་ཕོ་རོད་འབྱང་གྲུའི་ཕྱོགས་ཕུན་ཚོགས་ལུང་བར་པྲ་སྟིའི་རིགས་ལས་ཡབ་དཔུང་སྐྱབས་རྒྱལ་དང་། ཡུམ་བ་རི་བཟའ་ཆོས་མཚོ་སྐྱིད་གཉིས་ཀྱི་སྲས་སུ་རབ་བྱུང་བཅུ་གཉིས་པའི་མེ་སྦྲུལ་ལོར﹙༡༧༣༧﹚སྐུ་བལྟམས། ཀུན་མཁྱེན་འཇིགས་མེད་དབང་པོ་དང་ཕུར་ལྕོག་བྱམས་པ་རིན་པོ་ཆེ། ལྕང་སྐྱ་རོལ་བའི་རྡོ་རྗེ་སོགས་དམ་པ་མང་པོ་ཚུལ་བཞིན་བསྟེན་ཏེ་མཁས་གྲུབ་ཆེན་པོའི་གོ་འཕང་བརྙེས། བསྟན་འཛིན་གྱི་བུ་སློབ་མང་དུ་བསྐྱངས།

མན་ཇུ་གོང་མའི་བཀའ་བཞིན་རྒྱ་ནག་ཏུ་ཐེངས་གཉིས་ཕེབས་ཏེ་དཔོན་འབངས་ལ་བཀའ་ཆོས་གནང་བ་སོགས་ལུགས་ཟུང་གི་འཕྲིན་ལས་ནམ་མཁའ་དང་མཉམ། གསུང་རྩོམ་ལ་ལྕང་སྐྱ་རོལ་བའི་རྡོ་རྗེའི་རྣམ་ཐར་དང་། གྲུབ་མཐའ་ཤེལ་གྱི་མེ་ལོང་སོགས་པོད་བཅོ་ལྔ་བཞུགས། དགུང་ལོ་རེ་དྲུག་པ་རབ་བྱུང་བཅུ་གསུམ་པའི་ཆུ་ཁྱི་ལོར﹙༡༨༠༢﹚གཟུགས་སྐུའི་བཀོད་པ་བསྡུས།

ཡོང་ཁུངས། བོད་ཀྱི་དུས་རབས་རིམ་བྱུང་གི་རྩོམ་ཡིག་གཅེས་བསྡུས་ཀྱི་མཛད་པ་པོ་ངོ་སྤྲོད་ལས་བཤུས།

བཀྲིས་དོན་གྲུབ།

==གནས་ལུགས་དོན་གྱིས་ཀུན་གྱི་རྩེ་སུ་སོན།། རྣམ་དཔྱོད་རྩལ་གྱིས་ཤེས་བྱའི་ཕ་མཐར་བརྒལ།། སྙིང་རྗེའི་སྟོབས་ཀྱིས་སྙིགས་དུས་འགྲོ་ཚོགས་ལ།། སྐྱེས་སུ་ཕུལ་བས་གླེག་བམ་རི་ལས་མཐོ།། ==

སྒོ་མེ་གྲགས་པ་རྒྱ་མཚོ།

མགོན་ཀྱྰ་སྒོ་མེ་གྲགས་པ་རྒྱ་མཚོ་སྐུ་ཕྲེང་གཉིས་པ། སྐུ་འབུམ་རྒྱུད་པའི་ཁྲི་རབས་བཅུ་གཉིས་པ་སྨྲ་བའི་ཁྱུ་མཆོག་སྒོ་མེ་གྲགས་པ་རྒྱ་མཚོ་ནི། ཁྲི་ཀའི་ཧོར་ཀྱཱར་འཁྲུངས། ཁོང་དབུས་སུ་ཕེབས་ནས་འབྲས་སྒོ་མངས་གྲྭ་ཚང་དུ་ཞུགས། བཀའ་པོད་ཀྱི་གཞུང་ལ་ཐུགས་གཉེར་རྡོ་རུས་ཐུག་པ་གནང་། དུས་ཐོག་དེར་ཁོང་སྒོ་མངས་དགེ་བཤེས་ཆེ་གྲས་ཡིན་པར་མ་ཟད། སྨྲ་ངན་ཚར་གཅོད་པ་ལ་རྣམ་དཔྱོད་མཆོག་ཏུ་ཡངས་པའི་གྲགས་པ་ཕྱོགས་སུ་རྒྱས། ༧རྒྱལ་དབང་མཆོག་གིས་ཕྱིས་བཀའ་ཤོག་དང་གདུགས་དར་སོགས་གནང་། ཕྱིས་མདོ་སྨད་དུ་ཕེབས་ཏེ་གྲུབ་ཆེན་སྐལ་ལྡན་རྒྱ་མཚོའི་ཞབས་ལ་གཏུགས་ནས་ཐོས་བསམ་སྒོམ་གསུམ་གྱི་ཉམས་ལེན་ལ་འབད། རབ་ཉི་མེ་གླང་སྤྱི་ལོ༡༦༩༧ལོར་སླར་ཡང་དབུས་སུ་ཕེབས་ནས་འཇམ་དབྱངས་བཞད་པའི་རྡོ་རྗེ་སོགས་བཤེས་གཉེན་དུ་མ་བསྟེན་ནས་ཆོས་བཀའ་མང་དུ་གསན། སླར་མདོ་སྨད་དུ་ཕེབས་ཏེ་སྐུ་འབུམ་རྒྱུད་པའི་བླ་མ་དབུ་མཛད་དང་རྒྱུད་པའི་ཁྲིར་བཞུགས་ནས་འགྲིག་ཀུན་སྤྱོད་སོགས་ལ་སྐྱོང་བཀུར་སྔར་ལས་ལྷག་པ་མཛད། ནེའུ་ལུང་ངག་དབང་ཚུལ་ཁྲིམས་རྒྱ་མཚོས་དགོན་རྙིང་བཀྲ་ཤིས་ཆོས་གླིང་བ་ཕྱིས་སྤྱི་ལོ༡༧༠༩ལོར་རྒྱལ་མོ་རིའི་ཞོལ་ད་ལྟའི་གནས་འདིར་སྤོར་ནས་འཆད་ཉན་ཡར་རྒྱས་སུ་བསྐྱངས། དེ་ལྟར་ཁོང་གི་བཞེད་པ་མཐའ་དག་ལྷུན་གྱིས་གྲུབ་ནས་མཐར་རབ་ཉི་ས་བྱ་སྤྱི་ལོ༡༧༢༩ལོར་སྐུའི་བཀོད་པ་བསྡུས་སོ། །

མཁན་ཆེན་པདྨ་བློ་གྲོས།

མཐོན་པོའི་དབྱིངས་ན་མཁས་བའི་ཁྱུ་མཆོག་ལྡིང་།། དམའ་མོའི་ས་ན་རྨད་བྱུང་གཏེར་གྱིས་ཁེངས།། རྒྱ་བྱིན་ལྷ་ཡང་འདྲན་ཆུ་ཤོར་བའི་ཡུལ།། མདོ་སྨད་ས་ལའི་སྗོངས་འདི་ཨེ་མ་མཚར།། འདིར་རྗེས་དྲན་གྱི་ཚུལ་དུ་སྤྱི་ལོ600ནས་1900པར་འཁྲུངས་བའི་མདོ་སྨད་ཀྱི་སྐྱེས་ཆེན་དམ་པ་རྣམས་ཀྱི་མཚན་གཞུང་ལས་མེད་མོད་ལོ་རྒྱུས་དང་འཁྲུངས་འདས་ཀྱི་ལོ་ཚིགས་སོགས་ཧོར་གཙང་འཇིགས་མེད་ལགས་ཀྱིས་བརྩམས་གནང་མཛད་པའི་མདོ་སྨད་ལོ་རྒྱུས་ཆེན་མོའི་ནང་གསལ། སྤྱི་ལོ་༡༩༠༠་ནས་ད་པར་བྱུང་བའི་མཁས་དབང་དང་སྒྱུ་རྩལ་པ་ལྷ་བྲིས་མཁས་བ་རྣམས་ཀྱི་ལོ་རྒྱུས་ཟུར་དུ་བཀོད་ཡོད།