མཐུན་པ་སྤུན་བཞི་
མཐུན་པ་སྤུན་བཞི་ནི་ Brothers of Harmony[རྩོམ་སྒྲིག]
མཐུན་པ་སྤུན་བཞི་ནི་སྲེག་པ་དང༌། རི་བོང༌། སྤྲེའུ། གླང་ཆེན་བཅས་སྲོག་ཆགས་བཞིས་གྲུབ་པའི་རི་མོ་ཞིག་རེད། རི་མོ་དེའི་མཚོན་དོན་ནི་ཕན་ཚུན་མཛའ་མཐུན། གཅིག་ཕན་གཅིག་གྲོགས། རྒན་པར་བརྩི་བཀུར། ཆུང་བར་བྱམས་སྐྱོང་བྱེད་དགོས་པའི་བསླབ་བྱ་སྟོན་པ་དེ་ཡིན།
ལོ་རྒྱུས།[རྩོམ་སྒྲིག]
གནའ་སྔ་མོ་དྲང་སྲོང་ལྷུང་བ་ཞེས་བྱ་བའི་གྲོང་ཁྱེར་ཆེན་པོ་ཞིག་ན། རྒྱལ་བོ་ཚངས་བྱིན་ཞེས་བྱ་བ་ཞིག་ཡོད། ལྗོངས་དེའི་ཤར་ལྷོའི་མཚམས་ན་ལྗོན་ཤིང་གཡུ་ལོ་ཐགས་སུ་བཀྲ་བའི་ཚང་ཚིང་། མེ་ཏོག་སྣ་ཚོགས་སྡུག་གུར་བཞད་པའི་གསེབ་ན། རྩྭ་སྤྱིལ་བུ་ཟླུམ་པོ་གདུགས་ལྟ་བུ་ཞིག་ཡོད། དེ་ན་རྣམ་པ་ཀུན་ཏུ་ལེགས་ཉེས་ལ་རྟོག་པའི་དྲང་སྲོང་ཞིག་གནས། ལྗོངས་འདིའི་དབུས་ན་ཤིང་ཕྱོ་གྲོ་དཱའི་ལྗོན་པ་ཚད་དུ་རྫོགས་པ་ཞིག་ཡོད། སྲོག་ཆགས་གོང་མ་སྲེད་དང་། རི་བོང་། སྤྲེའུ། གླང་ཆེན་བཅས་གནས་ཡོད། དེ་རྣམས་ཕན་ཚུན་ཡིད་གཅུགས་ཤིང་བདེ་སྐྱིད་ཀྱི་འཚོ་བ་ལ་ལོངས་སུ་སྤྱོད་པའི་སྐབས་དེར། སྲོག་ཆགས་བཞི་པོས་རང་ཅག་བདེ་ཞིང་སྐྱིད་པ་འདིའི་ཐོག་ང་ཚོས་རྒན་རབས་ལ་བཀུར་བ་དང་། གཅིག་ཕན་གཅིག་གྲོགས་འཇིག་རྟེན་གྱི་མིག་དཔེར་འོས་པ་ཞིག་ཡོང་ཐུབ་པ་ལ་འབད་རྒྱུའི་བཟང་པོའི་གྲོས་ལ་ཞུགས་ཏེ་མཐར་སུ་རྒན་པ་དང་།སུ་གཞོན་པའི་གནས་ཚུལ་བརྟག་དཔྱད་བྱ་རྒྱུར་མོས་མཐུན་བྱུང་། ཐོག་མར་བྱ་གོང་མ་སྲེག་གིས་ནེ་གྲོ་རྡའི་ཤིང་སྡོང་ཞིག་བསྟན་པར།གླང་ཆེན་གྱིས་བདག་དང་པོ་ལམ་འདི་བརྒྱུད་ནས་འགྲོ་སྐབས་ཤིང་འདི་བདག་གི་ལུས་ཚད་དང་མཉམ་པ་ཞིག་མཐོང་བྱུང་ཞེས་བཤད། དེ་ནས་སྤྲེའུས་བདག་གནས་འདིར་སླེབས་སྐབས་ཀྱང་ཤིང་འདིའི་རིང་ཚད་བདག་གི་ལུས་དང་མཉམ་པ་འདུག་ཅེས་བཤད། དེ་ནས་རི་བོང་གིས་བདག་འདིར་སླེབས་སྐབས་ཤིང་འདི་སྐྱེས་ནས་ལོ་མ་གཉིས་ཙམ་ཡོད་པའི་སྟེང་གི་ཟིལ་པ་བལྡགས་པ་ཡིན་ཞེས་སྨྲས། མཐར་བྱ་གོང་མ་སྲེག་གིས་བདག་གིས་འདིའི་ས་བོན་བཟས་ནས་སྟུག་པ་བཏང་བ་ལས་ཤིང་འདི་སྐྱེས་པ་རེད་ཅེས་བཤད།སྲོག་ཆགས་བཞི་པོས་རང་གནས་འདིར་ཐོག་མ་སླེབས་ཀྱི་གནས་ཚུལ་གསོང་པོར་སྨྲས་པས།དེ་རྣམས་ཀྱི་རྒན་གཞོན་གྱི་གོ་རིམ་བྱུང་བ་དེས་སྔར་བས་ཕན་ཚུན་མཛའ་གཅུགས་དང་ཞེ་སར་བཅས་པའི་རྒན་གཞོན་བཀུར་བསྟི་དང་། ཐ་ན་ཕར་ཚུར་འགྲོ་སྐབས་ཀྱང་གླང་པོ་ཆེ་ལ་སྤྲེའུ་དང་།དེ་ལ་རི་བོང་། རི་བོང་ལཞ་གོང་མ་སྲེག་བཞོན་ནས་འགྲོ་བས་ཡུལ་དེའི་མི་རྣམས་སྲོག་ཆགས་བཞི་པོ་དེའི་ལེགས་བྱས་ཀྱི་དཔལ་ལ་ཡི་རང་ཞིང་དེ་ལྟར་སྤྱོད་པས་ས་ཀུན་ཏུ་ཆར་ཆུ་དུས་སུ་འབེབ་པ་དང་། ལོ་ཕྱུགས་རྟག་ཏུ་ལེགས་པ་སོགས་བཀྲ་ཤིས་དགེ་མཚན་གྱིས་ཁྱབ་པ་བྱུང་། ལྷའི་དབང་པོ་བརྒྱ་བྱིན་ཡང་ཡིད་རབ་ཏུ་འཕྲོག་སྟེ། གུས་བཀུར་ཞེ་ས་དང་བཅས་པར། དཀའ་ཐུབ་ཚལ་ན་གནས་པ་ཡི། གོང་མ་སྲེག་གིས་ཚངས་སྤྱོད་དག འཇིག་རྟེན་སོ་སོར་རབ་ཏུ་བསྟན།
འབྲེལ་བའི་ལེགས་བཤད།[རྩོམ་སྒྲིག]
མཁས་པ་མང་དུ་འདུས་པ་ན། བློ་གྲོས་བསྡུར་བས་ལེགས་ལ་སྦྱོར། གླང་པོ་ལ་སོགས་སྲོག་ཆགས་བཞི། འཛོམས་ནས་བསླབ་ཁྲིམས་བཅས་ལ་ལྟོས།