མ་ཧཱ་ས་མ་ཡ་སཏྭ་ཨཿ

མ་ཧཱ་ས་མ་ཡ་སཏྭ་ཨཱཿ ཞེས་པ་ནི་རྡོ་རྗེ་སེམས་དཔའི་ཡི་གེ་བརྒྱ་པའི་སྔགས་ཀྱི་ཆ་ཤས་གལ་ཆེན་ཞིག་སྟེ། སངས་རྒྱས་ཀྱི་སྐད་སཾ་སྐྲྀ་ཏའི་ཐ་སྙད་འདི་བོད་སྐད་དུ་དམ་ཚིག་ཆེན་པོ་སེམས་དཔའ་གསུང་ཞེས་འགྱུར། འདི་ནི་རྡོ་རྗེ་སེམས་དཔའི་དམ་ཚིག་ཆེན་པོའི་ངོ་བོ་དང་གསུང་རྡོ་རྗེའི་རང་བཞིན་མཚོན་པའི་སྔགས་ཀྱི་ཚིག་ཅིག་ཡིན།

སྒྲ་བཤད་དང་གོ་དོན།

མ་ཧཱ་ས་མ་ཡ་སཏྭ་ཨཱཿ ཞེས་པའི་སྒྲ་འདི་ལ་ཆ་ཤས་ལྔ་ཡོད་དེ། མ་ཧཱ་ནི་ཆེན་པོ། ས་མ་ཡ་ནི་དམ་ཚིག སཏྭ་ནི་སེམས་དཔའ། ཨཱཿ ནི་གསུང་རྡོ་རྗེ་མཚོན་པའི་ཡིག་འབྲུའོ།

མཁན་པོ་དཔལ་ལྡན་ཤེས་རབ་ཀྱིས། "མ་ཧཱ་ནི་ཆེན་པོ། ས་མ་ཡ་ནི་དམ་ཚིག། སཏྭ་ནི་སེམས་དཔའ། ཨཱཿནི་གསུང་རྡོ་རྗེ་མཚོན་པའི་ཡིག་འབྲུའོ། དེ་བསྡོམས་ན། དམ་ཚིག་ཆེན་པོ་སེམས་དཔའ་གསུང་ཞེས་པ་སྟེ།" ཞེས་གསུངས།

སི་ཏུ་ཆོས་ཀྱི་འབྱུང་གནས་ཀྱིས། "མ་ཧཱ་ཞེས་པ་ཆེན་པོ། ས་མ་ཡ་དམ་ཚིག ས་ཏྭ་སེམས་དཔའ་སྟེ་བསྡོམས་པས། དམ་ཚིག་སེམས་དཔའ་ཆེན་པོ་སྟེ། །" ཞེས་གསུངས།

དམ་ཚིག་ཆེན་པོའི་ངོ་བོ།

དམ་ཚིག་ཆེན་པོ་ཞེས་པ་ནི་སྤང་བླང་དགག་སྒྲུབ་མཚན་འཛིན་ཐམས་ཅད་ཡེ་ནས་མ་སྤངས་རང་གྲོལ་ཆེན་པོའི་ལྟ་བ་རྟོགས་པའི་དོན་ཏེ། མཁན་པོ་དཔལ་ལྡན་ཤེས་རབ་ཀྱིས། "སྤྱིར་ཐེག་པ་ཆེན་པོ་མདོ་སྔགས་སྤྱིའི་ལྟ་བའི་སྲོག་ཤིང་ཐབས་སྙིང་རྗེ་ཆེན་པོ་དང་ཤེས་རབ་སྟོང་པ་ཉིད་ཆེན་པོ་ཟུང་དུ་འཇུག་ལྟ་བ་འདི་ཉིད་གཞིར་བཞག་པའི་སྟེང་ནས། འབྲས་བུ་སངས་རྒྱས་ཀྱི་གོ་འཕང་སྒྲུབ་པ་ལ་དགོངས་པའི་ཞེ་ཕུག་གཅིག་ཉིད་ཡིན་པ་ལ།" ཞེས་གསུངས།

སི་ཏུ་ཆོས་ཀྱི་འབྱུང་གནས་ཀྱིས། "དམ་ཚིག་སེམས་དཔའ་ཆེན་པོ་སྟེ། དུས་དང་བྲལ་བའི་དུས་ཆེན་པོ་ལས་ནམ་ཡང་མི་འདའ་བའི་སེམས་དཔའ་ཆེན་པོ་ཞེས་བྱའི་དོན་ཡིན་ཞིང་། མཐར་དེ་ལ་བོད་པའི་དོན་དུ་སི་བྱིན་པའོ།" ཞེས་གསུངས།

ཡེ་སངས་ཡེ་དག་གི་ལྟ་བ།

མཁན་པོ་དཔལ་ལྡན་ཤེས་རབ་ཀྱིས། "གསང་སྔགས་ལས་ཀྱང་གསང་ཆེན་ནང་རྒྱུད་སྡེ་གསུམ་གྱིས་ནི། སྣང་སྲིད་འཁོར་འདས་ཀྱི་ཆོས་རྣམས་ཡེ་ནས་གདོད་མ་ཉིད་ནས་དག་མཉམ་བདེན་པ་དབྱེར་མེད་ཀྱི་དཀྱིལ་འཁོར་གསུམ་གྱི་ངོ་བོ་རིག་སྟོང་ཟུང་འཇུག་ཐིག་ལེ་ཉག་གཅིག་གི་ཀློང་དུ་མ་བཙལ་ཡེ་རྫོགས་ཀྱི་ཚུལ་དུ་རྫོགས་པའི་ཕྱིར་ན། ཡེ་གྲོལ་སྤང་བླང་དགག་སྒྲུབ་སོགས་མཚན་འཛིན་ཐམས་ཅད་ཡེ་སངས་ཡེ་དག་ཆེན་པོ་ཡིན་ཏེ།" ཞེས་གསུངས།

"བཅོས་མའི་སྤང་བླང་དགག་སྒྲུབ་མཚན་འཛིན་ཐམས་ཅད་ཡེ་ནས་མ་སྤངས་རང་གྲོལ་ཆེན་པོའི་ལྟ་བ་དེ་ཉིད་རྟོགས་ན་དམ་ཚིག་ཆེན་པོའི་སེམས་དཔའ་འམ་དམ་ཚིག་ཆེན་པོ་འཛིན་པའི་སྙིང་སྟོབས་ཅན་ཡང་དེ་ཡིན་པར་བསྟན་པའོ།" ཞེས་གསུངས།

གསུང་རྡོ་རྗེའི་ཡིག་འབྲུ་ཨཱཿ

ཨཱཿ ཡིག་ནི་གསུང་རྡོ་རྗེའི་ངོ་བོ་སྟེ། མཁན་པོ་དཔལ་ལྡན་ཤེས་རབ་ཀྱིས། "ཨཱཿནི་གསུང་རྡོ་རྗེའི་ངོ་བོ་སྟེ། དེ་ཉིད་བརྗོད་མེད་བརྗོད་པ་ཀུན་གྱི་རྒྱུ་རུ་གྱུར་པའི་གཞོམ་མེད་ན་དཱའི་སྒྲ་དབྱངས་ཆེན་པོ་སངས་རྒྱས་ཐམས་ཅད་ཀྱི་གསུང་གསང་བ་བསམ་གྱིས་མི་ཁྱབ་པའི་གདུལ་བྱ་རྣམས་ལ་གསུང་རབ་ཆོས་ཀྱི་སྒོ་མོ་བརྒྱད་ཁྲི་བཞི་སྟོང་གི་ཞི་བསིལ་བདུད་རྩིའི་ཆར་ཆེན་འབེབས་པའི་གསུང་རྡོ་རྗེའི་ངོ་བོ་དེ་ཡིན་པར་སྟོན་པ་མཚོན་པའི་ཕྱིར་དང་།" ཞེས་གསུངས།

སི་ཏུ་ཆོས་ཀྱི་འབྱུང་གནས་ཀྱིས། "ཨཱཿ ཞེས་པ་དེ་བཞིན་གཤེགས་པ་ཐམས་ཅད་ཀྱི་གསུང་རྡོ་རྗེའི་བདག་ཉིད་གཞོམ་དུ་མེད་པའི་ཡི་གེ་སྟེ།" ཞེས་དང་།

ཨ་ཁུ་ཤེས་རབ་རྒྱ་མཚོས། "ཨཱཿགསུང་རྡོ་རྗེ་དང་སྟོང་ཉིད་རྟོགས་པའི་ཡེ་ཤེས།" ཞེས་གསུངས།

པཎ་ཆེན་བློ་བཟང་ཆོས་རྒྱན་གྱིས། "ཨཱཿནི་གསུང་རྡོ་རྗེའི་ས་བོན་ཡིན་ཞིང་ཆོས་ཐམས་ཅད་སྐྱེ་བ་མེད་པ་མཚོན།" ཞེས་གསུངས།

ཡི་གེ་བརྒྱ་པའི་ཆ་ཤས།

མ་ཧཱ་ས་མ་ཡ་སཏྭ་ཨཱཿ ཞེས་པ་འདི་ནི་རྡོ་རྗེ་སེམས་དཔའི་ཡི་གེ་བརྒྱ་པའི་སྔགས་ཀྱི་མཇུག་ཏུ་འབྱུང་བ་སྟེ། མཁན་པོ་དཔལ་ལྡན་ཤེས་རབ་ཀྱིས། "མ་ཟད་ཡི་གེ་བརྒྱ་པ་འདི་ནི་ཕྱོགས་བཅུ་དུས་བཞིའི་སངས་རྒྱས་ཐམས་ཅད་གསུང་རྡོ་རྗེ་སྔགས་ཀྱི་ཡིག་འབྲུའི་ཚུལ་དུ་སྤྲུལ་པ་ཡིན་པར་སྟོན་པའི་ཕྱིར་ན་ཐ་མར་གསུང་རྡོ་རྗེའི་རང་གཟུགས་ཡིག་འབྲུ་ཨཱཿཉིད་བསྟན་པ་ཡིན་ཏེ།" ཞེས་གསུངས།

ཕྲིན་ལས་ཀྱི་ཆེད་དུ།

མཁན་པོ་དཔལ་ལྡན་ཤེས་རབ་ཀྱིས། "གང་རྣམ་པ་ཐམས་ཅད་མཁྱེན་པའི་ཡེ་ཤེས་མངོན་དུ་གྱུར་ན། གདུལ་བྱ་རྣམས་འདུལ་བའི་ཕྲིན་ལས་ཆེན་པོ་ནི་གསུང་རྣམ་པ་ཐམས་ཅད་པ་ཆེན་པོ་གསུང་རྡོ་རྗེ་འདི་སངས་རྒྱས་དངོས་ཡིན་པ་དེ་ཉིད་སྟོན་པའི་ཆེད་དུ་ཐ་མར་གསུང་རྡོ་རྗེའི་ཡིག་འབྲུ་ཨཱཿསྨོས་པའོ།" ཞེས་གསུངས།

འབྲེལ་ཡོད་ཤོག་ངོས།

• བཛྲ་སཏྭ་
• དམ་ཚིག་
• ས་མ་ཡ་
• སེམས་དཔའ་
• གསུང་རྡོ་རྗེ་
• ཡི་གེ་བརྒྱ་པ་
• རྡོ་རྗེ་སེམས་དཔའ་
• ཨཱཿ
• སྤང་བླང་དགག་སྒྲུབ་
• ཡེ་སངས་ཡེ་དག་

དཔྱད་གཞིའི་ཡིག་ཆ།

• པཎ་ཆེན་བློ་བཟང་ཆོས་རྒྱན། པཎ་ཆེན་བློ་བཟང་ཆོས་རྒྱན་གྱི་ཡིག་བརྒྱའི་འགྲེལ་པ་བཞུགས།
• སི་ཏུ་ཆོས་ཀྱི་འབྱུང་གནས། ཡི་གེ་བརྒྱ་པའི་གོ་དོན་ཉུང་ངུ་བཞུགས།
• ཨ་ཁུ་ཤེས་རབ་རྒྱ་མཚོ། རྡོར་སེམས་བསྒོམ་བཟླས་ཀྱི་ཁྲིད་ལས་དྲངས་པའི་ཡིག་བརྒྱའི་འགྲེལ་པ།
• མཁན་པོ་དཔལ་ལྡན་ཤེས་རབ། ཡིག་བརྒྱ་པའི་རྡོ་རྗེའི་ཚིག་འགྲེལ།