བླ་བྲང་ལྷ་སྡེ་ཤོག་པ་བཞི་

ཡོང་ཁུངས་Wikipedia

ལྷ་སྡེ་ཤོག་པ་བཞི་ནི་བླ་བྲང་བཀྲ་ཤིས་འཁྱིལ་ཉེ་འཁོར་བསང་ཆུའི་ངོགས་གཉིས་སུ་གནས་ཤིང་ཤར་དུ་གནམ་ལྷ་གོང་མ། ལྷོར་ཙ་ཡུས། ནུབ་བསང་ཁོག བྱང་རྒན་གྱ་ཚོ་དྲུག་བཅས་དང་ས་མཚམས་འདྲེས། དེའི་ནང་ཚན་ཟ་ཡུས་ནང་དང་གླས་དྲུག་གཉིས་ནི་བླ་བྲང་དགོན་པ་བཏབ་མ་ཐག་ཇུ་ནང་རྒྱལ་པོའི་མངའ་འོག་ཏུ་གཏོགས་པའི་འབྲོག་ཁྱིམ་དྲུག་གི་ཤུལ་ཡིན་པ་དང་། ཕུག་སྡེ་དང་བསང་ཁོག་གི་ཚར་ཚ་སོགས་ཀྱང་ཡུལ་འདིར་གནས་པར་བཤད། དེར་མ་གཏོགས་པའི་ཤོག་པ་གཞན་རྣམས་ནི་བླ་བྲང་དགོན་པ་བཏབ་རྗེས་སུ་ཆགས་པའི་དམག་ཤོག་རྩ་འཛུགས་ཤིག་ཡིན།

ལྷ་སྡེ་གོང་མ།[རྩོམ་སྒྲིག]

དེར་ཐང་ནག་གོང་འོག སྔོན་ཆགས། གླས་དྲུག ཟ་ཡུས་ནང་། ལམ་ཤར་བཅས་སྡེ་ཚོ་དྲུག

ས་དཀར་ཤོག་པ།[རྩོམ་སྒྲིག]

དེར་ས་དཀར་དང་། རྒྱ་བོར། ཕུག་སྡེ་སོགས་ཡོད། ས་དཀར་སྡེ་བ་ནི་རབ་བྱུང་བཅུ་གསུམ་པའི་ས་རྟ་སྟེ་སྤྱི་ལོ1798ལོར་རེབ་གོང་གཉན་ཐོག་ནས་རྗེ་འཇམ་དབྱངས་བཞད་པ་སྐུ་ཕྲེང་གསུམ་པའི་ཞབས་ཕྱིར་འབྲངས་ཏེ་འདིར་སླེབས་པ་དང་། རི་ཁྲོད་གོང་མའི་ལུང་མདའི་ས་དཀར་སྟེང་དུ་གནས་གཞིས་ཆགས་པས་མིང་ལ་ས་དཀར་དུ་བཏགས་ཤིང་རྗེས་སུ་ལུང་མདོར་སྤོས།

མཐའ་བ་ཤོག་པ།[རྩོམ་སྒྲིག]

དེ་ནི་མཐའ་བ་གོང་ཞོལ། སྨད་དཀར། ས་སོ་མ་སོགས་ལས་གྲུབ། ངག་རྒྱུན་དུ། མཐའ་བ་གོང་ཞོལ་དང་། སྨད་དཀར་ནི་ཀུན་མཁྱེན་གཉིས་པ་འཇིགས་མེད་དབང་པོའི་སྐུ་རིང་ལ་ཆགས། སྐབས་དེར་བླ་བྲང་དགོན་པའི་གཞི་ཁྱོན་རྒྱ་བསྐྱེད་པ་དང་རབ་བྱུང་གི་དགེ་འདུན་པའི་སྡེའང་རྒྱ་ཆེར་མང་དུ་འཕེལ། དགེ་འདུན་པའི་བསོད་སྙོམས་མཐུན་རྐྱེན་སྦྱོར་བའི་ཕྱིར་རོང་ཁུལ་ནས་རོང་པ་འགའ་ཁྲིད་དེ་དགོན་སྡེའི་མཐའ་དང་ཐག་ཉེ་སར་ས་རྒོད་བསློགས་ཏེ་སོ་ནམ་བྱས། རོང་པ་ཁྱིམ་ཚང་དེ་དག་མཐའ་བ་ཞོལ་མ་དང་། སྨད་དཀར་དུ་གཞི་ཆགས། དེར་གཞི་འཛིན་གྱི་ཁྱིམ་དྲུག་ཟེར། དུས་མི་རིང་བ་ན་ཡང་ཞིང་པ་ཁྱིམ་ཚང་དྲུག་མཐའ་བ་གོང་མར་བསྡད་པས་རིམ་གྱིས་མཐའ་བ་ཤོག་པའི་སྡེ་ཚོ་གསུམ་ཆགས་སོ། །

ལྷ་སྡེ་ཞོལ་མ།[རྩོམ་སྒྲིག]

དེ་ནི་མགར་སྡེ་དང་། ལུང་དཀར་ཐང་། ཡིག་ཆུང་ཐང་། ཀླུ་རྒྱག རིག་གྲྭ་བཅས་པའི་སྡེ་ཚོ་དུ་མ་ལས་གྲུབ། ངག་རྒྱུན་དུ། མགར་སྡེ་ནི་བླ་བྲང་དགོན་པའི་གསེར་ཁང་ཆེན་པོ་བཞེངས་དུས་བྱམས་སྐུ་བཞེངས་པའི་ལྷ་བཟོ་རྣམས་ཡུལ་དེར་བསྡད་ཅིང་གཞིས་ཆགས་པ་ལས་བྱུང་ཟེར། ལྷ་སྡེ་ཚོ་བ་གཞན་ནི་ཧ་ལམ་ཆིང་གོང་མ་ཐུང་ཀྲི་རྒྱལ་པོའི་སྐུ་རིང་ལ་ཆགས། གོང་སྨྲས་ཤོག་པ་བཞི་ལ་ལྷ་སྡེ་བཅུ་གསུམ་ཀྱང་ཟེར་རོ། །