བྲག་སྒོ་ཀཀྞི་

ཡོང་ཁུངས་Wikipedia
གནས་སྤོ། དཀར་ཆག, འཚོལ།

ལྕགས་པོ་རི་དང་དམར་པོ་རི་གཉིས་ཀྱི་བར་བྲག་སྒོ་ཀཀྞིའི་མཆོད་རྟེན་གསུམ་འབྲེལ་ནས་ཆགས་ཡོད། དེ་ལྷ་ས་གྲོང་ཁྱེར་གྱི་ནུབ་ཕྱོགས་རྒྱལ་སྒོ་ལྟ་བུ་ཤིན་ཏུ་བརྗིད་ཆགས་པ་ཞིག་ཡིན། བྲག་སྒོ་ཀཀྞི་ནི་ལོ་རྒྱུས་ཡུན་རིང་ལྡན་ཡོད། སྔར་ལྕགས་པོ་རི་དང་དམར་པོ་རི་གཉིས་འབྲེལ་ནས་གླང་པོ་ཆེ་དང་སེངྒེའི་མཇུག་མ་འབྲེལ་ནས་ཆགས་ཡོད་པས། རྒྱ་བཟའ་འུན་ཤིང་ཀོང་ཇོས་བསྣམས་པའི་ས་དཔྱད་དང་རྒྱ་གར་པཎྜི་ཏ་དུ་ཧར་ནག་པོའི་ས་དཔྱད་གཉིས་ལྟར་ན་རི་སྣ་གཉིས་འབྲེལ་ཡོད་པ་དེ་ཡུལ་དེའི་མི་རྒྱུད་ཤེས་ཡོན་འཛོམས་ཤིང་འཇོན་ཐང་ཆེ་བར་བཤད་ལ། རི་སྣ་ཕན་ཚུན་ཆད་ན་མི་ལེགས་པར་བཤད། དུས་རབས་བརྒྱད་པའི་ནང་རྒྱ་བཟའ་ཅིང་ཤིང་ཀོང་ཇོས་རང་གི་བུ་ཁྲི་སྲོང་ལྡེ་བཙན་བཙུན་མོ་ཆེ་བ་སྣ་ནམ་བཟས་འཕྲོག་པའི་ལན་དུ་བོད་ཀྱི་རི་དཔྱད་བཟང་པོ་ཁག་གཅིག་རི་སྣ་བཅད་པའི་ཁོངས་སུ་ཚུད་རྗེས་སུ་འགྱོད་པ་སྐྱེས་ནས་ཉམས་གསོ་བྱེད་ཆེད་དམར་པོ་རི་དང་ལྕགས་པོ་རི་གཉིས་ཀྱི་བར་མཆོད་རྟེན་བཞེངས་པར་གྲགས། མཆོད་རྟེན་དེར་ལོ་རྒྱུས་ཐོག་སྔ་རྗེས་ཉམས་གསོ་ཐེངས་ལྔ་ཙམ་གནང་འདུག སྤྱི་ལོ་༡༩༦༦ལོར་རིག་གནས་གསར་བརྗེ་ཟེར་བའི་ལས་འགུལ་ནང་གཏོར་བརླག་བཏང་། ཕྱིས་སུ་སྤྱི་ལོ་༡༩༩༥ལོར་སྲིད་གཞུང་ནས་སླར་གསར་སྐྲུན་མཛད། དེ་དང་འབྲེལ་བའི་ཕོ་བྲང་པོ་ཏ་ལའི་དམར་པོ་རི་དང་། ལྕགས་པོ་རི། བོང་བ་རི་བཅས་གསུམ་ནི་རིགས་གསུམ་མགོན་པོའི་བླ་རི་དང་། དེའི་དབྱིབས་ནི་ཕོ་བྲང་པོ་ཏ་ལ་གླང་ཆེན་བྲེས་ལ་བཏགས་པ་འདྲ་བ། ལྕགས་པོ་རི་ནི་སེངྒེ་གནམ་ལ་མཆོངས་པ་འདྲ་བ། བོང་བ་རི་སྟག་མོ་ཚང་ལ་འཛུལ་བ་ལྟ་བུ་ཡོད་ཅེས་བཤད་སྲོལ་ཡོད། ལྕགས་པོ་རི་དེ་ཕྱག་ན་རྡོ་རྗེའི་བླ་རི་དམར་ལྕགས་བོང་གསུམ་གྱི་ཡ་གྱལ་ཡིན། དེའི་དབྱིབས་ནི་སེངྒེ་གནམ་ལ་མཆོངས་པ་བཞིན་ཡོད་པ་དང་། རི་དེར་གསེར་དང་ལྕགས་ཀྱི་གཏེར་ཡོད་པར་འཁོད། བོད་རབ་བྱུང་བརྒྱད་པའི་སྤྱི་ལོ་༡༤༣༠ལོར་གྲུབ་པའི་དབང་ཕྱུག་ཐང་སྟོང་རྒྱལ་པོ་དགུང་གྲངས་བདུན་ཅུར་ཕེབས་སྐབས་གྲུབ་ཁང་ལྟ་ན་སྡུག་པ་དེ་ཉིད་ཕྱག་བཏབ་ནས་ཡུན་རིང་བར་བཞུགས་པ་མ་ཟད་རི་དེ་ཡི་སྟེང་དུ་ཁ་ནག་གཉན་ཆེན་དམ་ལ་བཏགས། ཏཱ་ལའི་བླ་མ་སྐུ་ཕྲེང་ལྔ་པའི་སྐབས་གསོ་རིག་སློབ་གྲྭ་མི་ཉུང་ཞིག་འཛུགས་གནང་མཛད་ཡོད་པ། དཔེར་ན་འབྲས་སྤུངས་སུ་དགའ་ལྡན་ཕོ་བྲང་ནུབ་མར་ཉི་ཐང་ཞབས་དྲུང་བློ་བཟང་རྒྱ་མཚོ་དང་། བྱང་ངོས་བསྟན་འཛིན་དར་རྒྱས་ཀྱིས་དོ་དམ་བྱེད་པའི་གསོ་རིག་འགྲོ་ཕན་གླིང་འཛུགས་གནང་བ་དང་། དེ་བཞིན་གཞིས་རྩེ་བསམ་གྲུབ་རྩེར་ཚ་རོང་པས་དོ་དམ་བྱེད་པའི་གསོ་རིག་དྲང་སྲོང་འདུས་པའི་གླིང་། རྩེ་ལྷ་དབང་ལྕོག་ཏུ་བྱང་ངོས་པ་དང་དར་མོ་སྨན་རམས་པ་བློ་བཟང་ཆོས་གྲགས་ཀྱིས་དོ་དམ་བྱེད་པའི་གསོ་རིག་སློབ་གྲྭ་བཙུགས་ཡོད་ཀྱང་ཐར་ཡུན་རིང་གནས་མ་ཐུབ། ཏཱ་ལའི་བླ་སྐུ་ཕྲེང་ལྔ་པ་དགོངས་པ་རྫོགས་རྗེས་བོད་རབ་བྱུང་བཅུ་གཉིས་པའི་མེ་བྱི་སྤྱི་ལོ་༡༦༩༦ལོར་སྨན་རྒྱལ་སྡེ་སྲིད་སངས་རྒྱས་རྒྱ་མཚོས་སྨན་པའི་སློབ་གྲྭ་ལྕགས་རི་བཻཌཱུརྱ་ལྟ་ན་ངོ་མཚར་འགྲོ་ཕན་རིག་བྱེད་གླིང་ཞེས་པ་ཕྱག་བཏབ། སློབ་གྲྭའི་སློབ་དཔོན་དུ་སྨན་པ་འབུམ་རམས་པ་བློ་བཟང་ཆོས་གྲགས་དང་འགྲམ་པ་དགེ་སློང་བློ་བཟང་ངག་དབང་གཉིས་བསྐོ་གཞག་བསྩལ། སྡེ་སྲིད་སངས་རྒྱས་རྒྱ་མཚོ་ཉིད་ནས་གསོ་རིག་སྐོར་རྒྱུད་བཞིའི་འགྲེལ་པ་བཻཌཱུརྱ་སྔོན་པོ་དང་། མན་ངག་ལྷན་ཐབས། དུས་མིན་འཆི་ཞགས་གཅོད་པའི་རལ་གྲི། གསོ་རིག་ཁོག་དབུབ་དྲང་སྲོང་དགྱེས་པའི་དགའ་སྟོན། རྩིས་གཞུང་བཻཌཱུརྱ་དཀར་པོ། བཻཌཱུརྱ་གཡའ་སེལ་སོགས་པ་གཞུང་ལུགས་ཆེན་པོ་བསམ་གྱིས་མི་ཁྱབ་པ་ལྗགས་རྩོམ་མཛད། དུས་རབ་བརྒྱད་པའི་ནང་གཡུ་ཐོག་རྙིང་མ་ཡོན་ཏན་མགོན་པོས་མཛད་པའི་རྒྱུད་བཞིའི་མ་ཕྱི་ནང་གསལ་མིའི་བྱང་ཁོག་ལུས་ཐོག་གི་རྩ་འགྲེལ་ལས་གོང་སྨན་མཁས་དབང་བྲང་ཏི་དཔལ་ལྡན་འཚོ་བྱེད་དང་། བྱང་ཟུར་རྣམ་གཉིས་སོགས་ཀྱིས་མཛད་པའི་དཔེ་རིས་ཐོན་པའི་སྨན་ཐང་རེ་ཟུང་ཡོད་པའི་རྨང་གཞིའི་ཐོག་སྨན་གཞུང་དང་ལག་བསྟར་དངོས་ཟུང་འབྲེལ་གནང་ནས་སྨན་ཐང་ཚོན་ཁྲ་ངོ་གྲངས་དོན་དགུ་དང་བླ་རྒྱུད་ཀྱི་ཐང་ག་གཅིག་བཅས་བརྒྱད་ཅུ་ཐམ་པ་གསར་བཞེངས་མཛད། མདོར་ན་སྨན་གྱི་སློབ་གྲྭ་དེ་ནས་ཕུལ་བྱུང་སྨན་རམས་པ་ཆེས་མང་པོ་ཐོན་ནས་བོད་ཀྱི་གསོ་བ་རིག་པ་དེ་སྔར་བས་དར་རྒྱས་ཕུན་སུམ་ཚོགས་སུ་ཕྱིན། དབུས་གཙང་ཙམ་མ་ཟད་མདོ་སྨད་ཁུལ་དང་ཕྱི་སོག་ལ་སོགས་པ་གང་སར་ཁྱབ་ཅིང་ལུས་ཅན་ཕན་བདེའི་གནས་ལ་ཆེས་སྨན་པ་སོགས་དགེ་མཚན་ཤིན་ཏུ་ཆེའོ། ལྕགས་པོ་རིའི་རི་གཤམ་གཡོན་ངོས་སུ་པཎ་ཆེན་སྐུ་ཕྲེང་བཅུ་པ་རྗེ་བཙུན་བློ་བཟང་འཕྲིན་ལས་ལྷུན་གྲུབ་ཆོས་ཀྱི་རྒྱལ་མཚན་མཆོག་གི་བཞུགས་གླིང་རྡོ་རྗེ་ཕོ་བྲང་ཡོད།