བྲག་རྒྱབ་དགོན

མཚན་རྒྱས་པར་བྲག་རྒྱབ་བྱང་ཆུབ་གླིང་ཞེས་ཞུ། པོ་ཏོ་དགོན་ནས་མར་ལམ་སྤྱི་ལེ་བཞི་ལྔ་ཙམ་གྱི་ས་ན་རི་ཁུག་ཤིང་ཚར་པའི་གསེབ་ཏུ་དགོན་དེ་མཇལ་རྒྱུ་ཡོད། དགོན་དེ་ནི་དགེ་བཤེས་པོ་ཏོ་བ་རིན་ཆེན་གསལ་གྱི་བཞུགས་གནས་དབྱར་ས་དགུན་ས་གཉིས་ཡོད་པ་ལ་གཡར་ས་པོ་ཏོ་དགོན་དང་། དགུན་ས་དགོན་དེར་ཡིན་ཞེས་གསུངས། སྐབས་ཤིག་རིང་ཉམས་རྒུད་དུ་སོང་ཡང་བྲག་རྒྱབ་བླ་མ་བློ་བཟང་ཆོས་འཕེལ་ཞུ་བས་ཉམས་གསོ་གནང་ནས་དགེ་འདུན་སུམ་ཅུ་བར་འཕེལ། རི་བོ་དགེ་ལུགས་ཕྱག་བཞེད་མཛད་པར་གྱུར། སེར་སྨད་མི་ཉག་ཁང་ཚན་གྱི་ཁོངས་ཡིན། སྔོན་འདུ་ཁང་ཀ་བཞིའི་ནང་རྒྱལ་བ་བྱམས་པ་ཐོག་ཚད་མ་སོགས་རྟེན་གསུམ་དང་། དགེ་སློང་བརྒྱད་གྲྭ་གཅིག་གིས་གཞི་གསུམ་གྱི་ཕྱག་བཞེད་མཛད་དེ་བཞུགས་པ་ཡིན། ད་ལྟ་སྔོན་གྱི་གྱང་གོག་སྟེང་ཉམས་གསོ་གནང་བའི་ནང་བྲག་རྒྱབ་རིན་པོ་ཆེའི་སྐུ་བརྙན་དང་། དཔལ་ལྡན་ལྷ་མོ་སོགས་གསར་བཞེངས་གནང་བ་མཇལ་རྒྱུ་ཡོད།