བྱང་ཆུབ་འཇུག་པ་

བྱང་ཆུབ་འཇུག་པ་ཞེས་པ་ནི་བྱང་ཆུབ་ཏུ་འཇུག་པའི་སེམས་བསྐྱེད་ལ་ཟེར་ཏེ། བྱང་ཆུབ་ལ་འཇུག་པའི་སེམས་ཀྱི་གོ་དོན་ནོ། དེ་ལ་བྱང་ཆུབ་ཅེས་པ་ནི་སངས་རྒྱས་ཀྱི་གོ་འཕང་ལ་གོ་ལ། འཇུག་པ་ཞེས་པ་ནི་དངོས་སུ་སྤྱོད་པ་ལ་ཞུགས་པ་ལ་འདོད་དོ། །འགྲེལ་ཆེན་ལས། "སེམས་གང་སྨོན་པ་ལས་སྐྱེས་པ་སྦྱིན་སོགས་ལ་འཇུག་པ་དང་བྲལ་བ་དེ་ནི་སྨོན་པ་བྱང་ཆུབ་ཀྱི་སེམས་ཏེ་འདི་ལྟར། འགྲོ་བ་ཐམས་ཅད་སྐྱབ་པའི་ཕྱིར་སངས་རྒྱས་སུ་གྱུར་ཅིག་ཞེས་དང་པོ་ཁོ་ནར་སྨོན་པའི་སེམས་ལྟ་བུའོ། །འཇུག་པ་ཉིད་ལ་སེམས་པའམ་འཇུག་པ་ཉིད་ཀྱི་སེམས་ཏེ་སེམས་དེའི་རང་བཞིན་ཡིན་པའི་ཕྱིར་རོ། །སེམས་སྔ་མ་སྔོན་དུ་སོང་བ་ཉིད་གང་ནས་བཟུང་སྟེ་སྡོམ་པ་ལེན་པ་སྔོན་དུ་འགྲོ་བས་ཚོགས་རྣམས་ལ་རབ་ཏུ་འཇུག་པ་དེ་ནི་འཇུག་པའི་བྱང་ཆུབ་ཀྱི་སེམས་སོ། །"ཞེས་གསུངས་པ་ལྟར། འདི་ནི་སྦྱིན་པ་ལ་སོགས་པའི་བྱང་ཆུབ་སེམས་དཔའི་སྤྱོད་པ་ལ་དངོས་སུ་ཞུགས་པའི་སེམས་བསྐྱེད་ལ་ཟེར་བའོ། །

ངེས་ཚིག

བྱང་ཆུབ་འཇུག་པ་ཞེས་པའི་མཚན་ཉིད་ནི། "གཞན་གྱི་དོན་དུ་ཡང་དག་པར་རྫོགས་པའི་བྱང་ཆུབ་དོན་གཉེར་གྱི་འདུན་པ་དང་མཚུངས་ལྡན་གྱི་སེམས་སོ། །"ཞེས་གསུངས་པ་ལྟར། གཞན་གྱི་དོན་དུ་རྫོགས་བྱང་ཐོབ་པར་འདོད་པའི་འདུན་པ་དང་མཚུངས་ལྡན་གྱི་སེམས་ཀྱིས་ངེས་ཚིག་གོ །
དེ་ཡང་"སེམས་དེ་ཉིད་སངས་རྒྱས་མ་ཐོབ་བར་དུ་ནམ་ཡང་མི་གཏོང་སྙམ་དུ་དམ་བཅའི་ལྕགས་ཀྱུ་གཉིས་པས་ཟིན་པ་ནི་ཆོ་གས་ལེན་པར་ཇོ་བོ་ཨ་ཏི་ཤའི་གདམས་ངག་ལས་གསུངས་"ཞེས་གསུངས་པ་ལྟར། གཞན་དོན་དུ་སངས་རྒྱས་ཐོབ་པར་བྱ་སྟེ་དེ་མ་ཐོབ་བར་དུ་ནམ་ཡང་བཏང་མི་སྙོམ་པའི་དམ་བཅའ་དང་ལྡན་པའི་སེམས་ལ་ཟེར་རོ། །

ཕན་ཡོན།

འཇུག་སེམས་ཀྱི་ཕན་ཡོན། "ནོད་ཅིག་རེ་རེ་ལའང་ཚད་མེད་པའི་ཚོགས་འཕེལ་བའོ། །"ཞེས་གསུངས་པ་ལྟར། འཇུག་སེམས་བླངས་ནས་ནམ་ཡང་མི་གཏོང་བའི་སེམས་ཀྱིས་བཟུང་བ་དེ་ནས་བཟུང་སྟེ་གཉིད་ལོག་པ་ནས་བག་མེད་པར་གྱུར་ཀྱང་བསོད་ནམས་རྒྱུན་མི་འཆད་པར་འབྱུང་བའི་ཕན་ཡོན་ཡོད་དོ། །

སྡིག་པ་འདག་པ།

"བྱང་ཆུབ་ཀྱི་སེམས་དེས་ནི་བསྐལ་བ་འཇིག་པའི་དུས་ཀྱི་མཐའི་སྐབས་སུ་ཉི་མ་བདུན་ཤར་བའི་མེས་བསམ་གཏན་དང་པོ་མན་ཆད་ཀྱི་སྣོད་ཐམས་ཅད་ཐལ་བའི་ལྷག་མ་ཙམ་ཡང་མ་ལུས་པར་སྲེག་པར་བྱེད་པ་དེ་བཞིན་དུ་དམྱལ་སོགས་ཀྱི་སྡུག་བསྔལ་མི་བཟད་པ་སྐྱེད་ནུས་པའི་སྡིག་པ་ཆེན་པོ་རྣམས་ཀྱང་དུས་སྐད་ཅིག་གཅིག་གིས་ངེས་པར་ཏེ་གདོན་མི་ཟ་བར་སྲེག་པར་བྱེད་ཅིང་རྣམ་སྨིན་རྩ་བ་ནས་འཇོམས་པར་བྱེད་ནུས་"ཅེས་གསུངས་པ་ལྟར། བྱང་ཆུབ་ཀྱི་སེམས་ལ་དུས་མཐའི་མེ་ལྟ་བུའི་སྡིག་པ་སྲེག་པའི་ནུས་པ་ཆེན་པོ་ཡོད་པར་གསུངས་སོ། །

དགེ་བ་འཕེལ་བ།

"དགེ་བ་གཞན་བྱང་ཆུབ་ཀྱི་སེམས་ཀྱིས་མ་ཟིན་པ་ཀུན་ཆུ་ཤིང་བཞིན་དུ་འབྲས་བུ་བསྐྱེད་ནས་རང་ཟད་པར་འགྱུར་བ་ཉིད་ཡིན་ལ། བྱང་ཆུབ་ཀྱི་སེམས་ཀྱི་ལྗོན་ཤིང་ནི་རྟག་པར་ཡང་འབྲས་བུ་འབྱིན་པས་མི་ཟད་ཅིང་སླར་འཕེལ་བར་འགྱུར་"ཞེས་གསུངས་པ་ལྟར། བྱང་ཆུབ་ཀྱི་སེམས་ཀྱིས་ཟིན་པའི་དགེ་བ་ནི་འབྲས་བུ་འབྱིན་ཟིན་ཀྱང་ཟད་མི་ཞིང་གོང་ནས་གོང་དུ་འཕེལ་བའི་ཁྱད་ཆོས་ཡོད་དོ། །