བོན་སྐུའི་སྨོན་ལམ་གཏི་མུག་གཉིད་སྐྲོག་

༅། །གདོད་མའི་མགོན་པོ་འོད་མི་འགྱུར་བ་ལ་ཕྱག་འཚལ་ལོ། །འཁོར་འདས་སྣང་སྲིད་སྣོད་བཅུད་ཀུན། །གདོད་ནས་རང་བྱུང་ཡེ་ཤེས་ལ། །འབད་རྩོལ་ཡིད་སྨོན་མི་དགོས་ཀྱང༌། །རེ་ཞིག་མ་རྟོགས་སེམས་ཅན་རྣམས། །མ་རིག་གཉིད་འཐུག་ལས་སད་ནས། །འཁྲུལ་སྣང་རྨི་ལམ་སངས་གྱུར་ཏེ། །གཞི་བདེའི་མལ་དུ་ངལ་གསོ་ཕྱིར། །བོན་སྐུ་བདེ་བ་ཆེན་པོ་ཡི། །སྨོན་ལམ་གཏི་མུག་གཉིད་སྐྲོག་བསྟན།།ཨ་ཨཱོྃ་ཧཱུཾ།ང་ནི་ང་མེད་ང་ཡི་ངང༌། །སངས་མ་རྒྱས་ཏེ་ཡེ་ནས་ཡོད། །སེམས་ཅན་མ་འཁྲུལ་ཀློང་ན་གནས། །འཁོར་འདས་མ་བྱུང་སྔོན་རོལ་ཏུ། །ཐོག་མ་རིག་པའི་རྒྱལ་པོ་སྔ། །ང་ཡི་གནས་ལུགས་འདི་ཞེས་བྲལ། །ཕྱི་ནང་བར་མེད་ཟང་ཐལ་ལེ། །འཁོར་འདས་གཉིས་ཀྱི་གཞི་མ་ཡིན། །ང་ཡི་རྩལ་སྣང་འགག་པ་མེད། །འགག་མེད་རྩལ་ལས་ཅི་ཡང་ཤར། །དེ་ཚེ་འོད་ལྔ་ཤར་བ་ལ། །ཤེས་རིག་རྣོན་པོས་སྐད་ཅིག་གིས། །རང་རྩལ་རང་སྣང་ངོ་ཤེས་ནས། །སྐད་ཅིག་གཉིས་པར་རང་གྲོལ་ཏེ། །ཁམས་གསུམ་སེམས་ཅན་ཐམས་ཅད་ཀྱིས། །ཀུན་བཟང་རྒྱལ་ས་ཟིན་པར་ཤོག །གལ་ཏེ་ཤེས་རིག་དམུན་པོ་དེས། །རང་སྣང་མ་ཤེས་གཉིས་འཛིན་གྱིས། །ལོག་པའི་ལམ་དུ་འཕྱན་པ་ན། །ཞིང་དག་གནས་སུ་ལུས་བཟང་རྙེད། །བླ་མ་དམ་པའི་ཞལ་མཇལ་ཏེ། །གསུང་གི་བདུད་རྩིའི་བཅུད་མྱོང་ཞིང༌། །དབང་བཞི་ཟབ་མོས་རྒྱུད་སྨིན་ཏེ། །རྟོགས་དང་གྲོལ་བ་དུས་མཉམ་ཤོག །འདི་ལྟར་འཁོར་དང་མྱང་འདས་བོན། །ཀུན་ཏུ་བཟང་པོ་ང་ཡིས་བྱས། །ང་ལ་གཞི་དང་རྩ་བ་མེད། །ཡེ་ནས་གཞི་མེད་ཆེན་པོར་གནས། །གཞི་མེད་རྩལ་ལས་འགག་མེད་དུ། །བོན་ཀུན་སྒྱུ་མའི་རོལ་པར་ཤར། །ཁམས་གསུམ་སེམས་ཅན་ཐམས་ཅད་ཀུན། །ཀུན་བཟང་ང་དང་འབྲལ་བ་མེད། །དང་པོའི་སངས་རྒྱས་ང་ཡིན་ནོ། །སེམས་ཅན་ཀུན་ཀྱིས་རྟོགས་པར་ཤོག ། ཀུན་བཟང་ང་ཡིས་བྱས་པའི་བོན། ། སྣང་དང་མི་སྣང་ཐམས་ཅད་ཀུན། །གདོད་ནས་རང་བཞིན་མ་གྲུབ་སྟེ། །གཉིད་དང་ཤེས་པའི་རྟེན་འབྲེལ་ལས། །འཁྲུལ་སྣང་རྨི་ལམ་ཇི་བཞིན་དུ། །མེད་བཞིན་སྣང་བ་སྲིད་པའི་བོན། །ཆུ་དང་འཁྱགས་པ་དབྱེར་མེད་བཞིན། །འདི་དང་ང་ལ་དབྱེ་བ་མེད། །ཡེ་ནས་རོ་གཅིག་མཉམ་པ་ཉིད། །ཀུན་ཏུ་བཟང་པོ་ང་ཡིས་གསུངས། །འདི་ནི་ཀུན་ཀྱིས་རྟོགས་པར་ཤོག །དེ་ཕྱིར་བོན་ཀུན་ང་ཡི་རྩལ། །འཁོར་དང་མྱང་འདས་དབྱེ་བ་མེད། །སངས་རྒྱས་སེམས་ཅན་གཉིས་སུ་མེད། །དུག་དང་ཡེ་ཤེས་སྤང་ལེན་མེད། །བདེ་དང་སྡུག་བསྔལ་སོ་སོར་མེད། །ཐམས་ཅད་ང་ཡི་ངང་ལ་མཉམ། །དགག་སྒྲུབ་བྲལ་བའི་རིག་པ་འདི། །ཀུན་ཏུ་བཟང་པོ་ང་ཡིས་བསྟན། །ང་ཡིས་བསྟན་བཞིན་རྟོགས་པར་ཤོག །འདི་ལྟར་བོན་རྣམས་ཐམས་ཅད་ཀུན། །གཞི་རྩ་མེད་པ་ངང་གིས་ཤར། །ཤར་ཚད་རང་གི་ངོ་བོས་གྲོལ། །སྣང་སྲིད་བོན་རྣམས་བཀོད་ལེགས་ཀྱང༌། །འདི་ཀུན་སྲོག་ཏུ་ནམ་མཁའ་ཞུགས། །བདེན་པར་གྲུབ་པ་ངས་མ་བཤད། །ཡེ་གྲོལ་ཆེན་པོའི་ལྟ་བ་འདིས། །སེམས་ཅན་ཐམས་ཅད་གྲོལ་བར་ཤོག །སྣང་ཞིང་སྲིད་པའི་བོན་རྣམས་ཀུན། །རྒྱ་མཚོར་གཟའ་སྐར་ཤར་བ་བཞིན། །བྱང་ཆུབ་སེམས་ཀྱི་རྩལ་ལས་བྱུང༌། །བསལ་བཞག་བྲལ་བའི་སྒོམ་པ་འདི། །ཀུན་བཟང་ང་ཡི་སྨོན་ལམ་གྱིས། །ཀུན་གྱིས་རྟོགས་ནས་གྲོལ་བར་ཤོག །འཁོར་བ་མྱང་འདས་བོན་རྣམས་ཀུན། །བཞེངས་པ་མེད་ལ་གཞིར་བཞེངས་པ། །རང་བྱུང་ཡེ་ཤེས་མཐོང་བརྡོལ་བས། །རིན་ཆེན་གསེར་གླིང་ཕྱིན་པར་འདྲ། །བོན་ཉིད་གཞིར་བཞེངས་སྤྱོད་པ་ཡིན། །སེམས་ཅན་རྣམས་ཀྱིས་རྟོགས་པར་ཤོག །བོན་སྐུ་ང་ཡི་གནས་ལུགས་ལ། །བདག་དང་གཞན་དུ་མ་གྲུབ་ཅིང༌། །ཕྱི་དང་ནང་དུ་མ་ཆད་པས། །ཉོན་མོངས་ཡེ་ཤེས་གཉིས་སུ་མེད། །དམ་ཚིག་བསྲུང་མཚམས་བྲལ་བ་འདི། །ཡེ་སྲུང་ཆེན་པོར་ང་ཡིས་བཤད། །ཁམས་གསུམ་སེམས་ཅན་ཐམས་ཅད་ནི། །སྲུང་མེད་དོན་ལ་གནས་པར་ཤོག །ད་ལྟའི་སྣང་སེམས་མ་བཅོས་པ། །ཡེ་ཤར་ཡེ་གྲོལ་ཟང་ཀ་མ། །རང་བྱུང་ཡེ་ཤེས་ངོ་བོ་ཡིན། །མ་སྤངས་མཚན་མ་རང་སར་དག །མ་བླངས་ཡེ་ཤེས་ངང་གིས་གསལ། །གཉུག་མ་འོད་གསལ་རྒྱུན་ཆད་མེད། །འབྲས་བུ་ཡེ་ཐོབ་ཆེན་པོ་ཞེས། །ཀུན་བཟང་ང་ཡིས་བཤད་པ་ཡིན། །སེམས་ཅན་ཀུན་ཀྱིས་རྟོགས་པར་ཤོག །སོ་སོའི་སྙིང་གའི་ཕོ་བྲང་གི །རང་བྱུང་འོད་ལྔའི་གུར་ཁང་ན། །ཀུན་ཏུ་བཟང་པོ་ལྷང་ངེར་བཞུགས། །ངོ་བོ་རང་བཞིན་ཐུགས་རྗེ་གསུམ། །དབྱེར་མེད་ཆེན་པོ་གཅིག་ཏུ་གནས། །ཕྱི་ནང་མེད་པར་ཀུན་ལ་ཁྱབ། །དངོས་པོ་མེད་པར་ཡེ་ནས་གནས། །སྐུ་དང་ཡེ་ཤེས་འདུ་འབྲལ་མེད། །རྫོགས་པ་ཆེན་པོའི་མན་ངག་གིས། །སོ་སོའི་སྒྲོན་མའི་སྒོ་ནས་འཆར། །དང་པོའི་སངས་རྒྱས་དངོས་མཐོང་ཡིན། །སེམས་ཅན་ཀུན་ཀྱིས་རིག་པར་ཤོག །རིག་པ་ང་ཡི་རྩལ་ལས་ནི། །འོད་དང་ཟེར་དང་ཐིག་ལེ་དང༌། །དབྱིངས་དང་དབྱིངས་ལས་སྣང་བ་ནི། །བསམ་གྱིས་མི་ཁྱབ་མངོན་སུམ་དུ། །ཉི་མ་དང་ནི་ཟེར་བཞིན་དུ། །འབད་མེད་ལྷུན་གྲུབ་ངང་གིས་ཤར། །ཁམས་གསུམ་སེམས་ཅན་མ་ལུས་ཀུན། །ཡེ་ཤེས་རྩལ་སྣང་རྒྱས་པར་ཤོག །བོན་སྐུ་དང་ནི་གཟུགས་ཀྱི་སྐུ། །སྐུ་གསུམ་དག་ཏུ་སྣང་བ་ཡང༌། །རིག་པ་ང་ཡི་རྩལ་ལས་བྱུང༌། །འཁོར་བའི་སེམས་ཅན་ཐམས་ཅད་ཀྱིས། །སྐུ་གསུམ་མཐོང་སྒོར་མཇལ་གྱུར་ནས། །ལམ་གྱི་སྣང་བར་ཆོད་གྱུར་ཅིག །ང་ཡི་སྨོན་ལམ་ཐོས་པ་ཀུན། །དངོས་ཀུན་འོད་གསལ་ངང་དུ་དེངས། །གཟུགས་ཕུང་འོད་ཀྱི་ལུས་སུ་དེངས། །སེམས་ནི་རིག་པའི་ངང་དུ་ དེངས། །དེངས་པ་གསུམ་དུ་འབྱུང་བ་ན། །བློ་ཟད་བོན་ཟད་ཆེན་པོ་ཡི། །གཡུང་དྲུང་འཕོ་བ་ཆེན་པོའི་སྐུ །ལུས་འདི་མ་སྤངས་ངང་དུ་བཞེངས། །དེ་བཞིན་སེམས་ཅན་ཐམས་ཅད་ནི། །གཡུང་དྲུང་སྐུ་རུ་གྲོལ་བར་ཤོག །དེ་ནས་འཁོར་བ་གནས་ཀྱི་བར། །སྲོག་མེད་ཡེ་ཤེས་རྫོགས་པའི་སྐུས། །སྐྱེ་དང་འཇུག་པས་སེམས་ཅན་དོན། །བསམ་གྱིས་མི་ཁྱབ་འབྱུང་གྱུར་ནས། །འགྲོ་དོན་མཐའ་རུ་ཕྱིན་གྱུར་ཏེ། །བདག་གཞན་མ་ལུས་ཐམས་ཅད་ཀུན། །གཞོན་ནུ་བུམ་པའི་སྐུ་བརྙེས་ཤོག །གལ་ཏེ་ལས་དང་བརྩོན་པ་དམན། །ཚེ་འདི་གྲོལ་བར་མ་གྱུར་ཚེ། །ལུས་དང་སེམས་སུ་བྲལ་བ་ན། །མངོན་ཤེས་རྗེས་དྲན་རྐྱེན་ལས་སུ། །བར་དོར་གྲོལ་བའི་མཐུ་རྙེད་ནས། །ཀུན་བཟང་རྒྱལ་ས་ཟིན་པར་ཤོག །དེ་ཚེ་བཞི་བཅུ་རྩ་ལྔའི་ལྷ། །ཁྲག་འཐུང་ཁྲོ་བོ་བརྒྱད་ཅུ་ཡང༌། །རིག་པའི་རྩལ་ལས་ལྷུན་གྱིས་གྲུབ། །ལྷུན་གྲུབ་ཆེན་པོའི་དཀྱིལ་འཁོར་འདི། །སེམས་ཅན་ཀུན་ཀྱིས་མཐོང་ནས་ནི། །རང་རིག་རྩལ་ཏུ་ཤེས་པར་ཤོག །དེ་དུས་ཟག་བཅས་གཟུགས་ཕུང་ལས། །ཤ་རཱི་རཾ་དང་བ་རཱི་རཾ། །ཆུ་རཱི་རཾ་དང་པཉྩ་རཾ། །ཉ་རཱི་རཾ་སོགས་ལྔར་བྱུང་ནས། །སྒྲ་དང་འོད་དང་ས་གཡོས་པས། །འགྲོ་བའི་སྣང་བ་འགྱུར་བྱས་ཏེ། །མཐོང་གྲོལ་ཐོས་གྲོལ་དྲན་གྲོལ་གྱིས། །སེམས་ཅན་དོན་ཀྱང་མཐའ་ཡས་ཤོག །དེ་ནས་ཡང་ནི་མ་གྲོལ་ཚེ། །སྲིད་པའི་བར་དོར་ངོ་ཤེས་ནས། །སྲིད་པ་ཕྱི་མར་མི་འཇུག་པར། །རིགས་དྲུག་སྐྱེ་བའི་བག་ཆགས་ཟད། །སྤྲུལ་བའི་སྐུ་རུ་དབུགས་འབྱིན་ནས། །ལོ་ནི་ལྔ་བརྒྱའི་བར་དག་དུ། །རང་གི་རིག་པ་བསྐྱེད་ནས་ནི། །ཕྱིར་མི་ལྡོག་པའི་ས་ནོན་ཤོག །གང་ཞིག་ང་ཡི་སྨོན་ལམ་ཟབ་མོ་འདི་ནི་ཐོས་ཙམ་གྱིས། །བོན་ཀུན་ཡིན་ལུགས་ཤེས་ནས་རྩོལ་མེད་རང་གྲོལ་ལྟ་བ་ནི། །སེམས་ཅན་ཀུན་ཀྱི་རྒྱུད་ལ་འབད་མེད་ལྷུན་གྲུབ་སྐྱེས་གྱུར་ནས། །འདིའམ་བར་དོ་ཡང་ནི་སྤྲུལ་བའི་ཞིང་དུ་བྷུདྡྷ་ཤོག །འདི་ནི་སྨོན་ལམ་ཀུན་གྱི་རྒྱལ་པོར་ཀུན་བཟང་ང་ཡིས་གསུངས། །ཉི་ཟླ་གཟའ་ཡིས་ཟིན་དང་སྒྲ་དང་ས་གཡོས་བོན་འཁོར་བསྐོར། །རྫོགས་ཆེན་རྣལ་འབྱོར་འདིར་སྣང་སྐུ་ཡི་བཀོད་པ་བསྡུས་པའི་ཚེ། །ཀུན་གྱིས་ངག་ཏུ་བརྗོད་པས་ཐོས་ཀུན་གྲོལ་བ་ང་ཡིས་བཤད། །བོན་ཀུན་གནས་ལུགས་ཟབ་མོའི་དོན་ནི་སྨོན་ལམ་འདི་ཡིས་བསྟན། །ཤེས་བྱ་གཅིག་ཆོད་སྨོན་ལམ་འདི་ནི་ཀུན་ཀྱིས་དབྱངས་སུ་བརྗོད། །བོན་སྒོ་མ་ལུས་དུས་གཅིག་བརྗོད་དང་ཕན་ཡོན་མཉམ་པར་འཐོབ། །འདིས་ནི་འཁོར་བ་མཐའ་ཅན་བྱས་ནས་འཇིག་རྟེན་སྟོང་བར་ཤོག། འདི་ནི་ཡང་དག་དོན་གྱི་འོག་མིན་གྱི། །མཆོང་གུར་སྨུག་པོ་ཤེལ་གྱི་ཁ་པད་ཅན། །ཅིར་ཡང་འཆར་བའི་གནས་སུ་ཀུན་བཟང་གིས། །རིག་པའི་ཁྱེའུ་ཆུང་ལ་དགོངས་པས་བརྒྱུད། །རིག་པའི་ཁྱེའུ་ཆུང་ཚད་མེད་འོད་ལྡན་གྱིས། །རིག་པ་རང་ཤར་བདག་ལ་བཤད་ནས་བརྒྱུད། །བདག་ལ་དད་ལྡན་སློབ་མས་རབ་བསྐུལ་ནས། །མ་བཅོས་རང་ལུགས་ངང་ནས་ཡི་གེར་བཀོད། །ཅེས་བོན་སྐུའི་སྨོན་ལམ་འདི་ནི་བྱ་བཏང་མཆོག་སྤྲུལ་བསྟན་པའི་ཉི་མ་དང་དགེ་བཤེས་ནོར་བུ་རྒྱལ་མཚན་ཅན་གཉིས་ཀྱིས་བསྐུལ་བའི་མོད་ལ། ཤར་རྫའི་བྱ་བྲལ་བཀྲ་ཤིས་རྒྱལ་མཚན་རིག་པ་རང་ཤར་གྱིས་དགོངས་པའི་ཀློང་ནས་ཀུན་ཏུ་བཟང་པོ་འོད་ཀྱི་སྐུ་ཚོན་གང་བ་སྤྱན་ཅེ་རེ་གཟིགས་པ་ཞིག་གིས་གསུངས་པ་བཞིན་དུ་མ་བཅོས་རང་ལུགས་སུ་ཡི་གེར་བཀོད་པས། འགྲོ་ཀུན་བོན་སྐུའི་རྒྱལ་སྲིད་ཐོབ་པའི་རྒྱུར་འགྱུར་བར་གྱུར་ཅིག མངྒ་ལཾ། ཤུ་བྷཾ།

རྒྱ་ཀོང་ཙེ་འཕྲུལ་རྒྱལ་གྱིས་ལྷ་སྲིན་ཕམ་རྒྱལ་རྩོད་དུས་གསུངས་པ་ནི། ཞི་བར་གྱུར་ཅིག་བདུད་ཀྱི་སྡེ། །སྟོང་པར་གྱུར་ཅིག་ངན་སོང་གསུམ། །དར་ཞིང་རྒྱས་གྱུར་གཡུང་དྲུང་བོན། །དེ་བཞིན་ཡོངས་ཁྱབ་སེམས་ཅན་རྣམས། །བྱང་བར་གྱུར་ཅིག་སྡིག་དང་སྒྲིབ། །འཕེལ་བར་གྱུར་ཅིག་དགེ་བའི་ཚོགས། །བཀྲ་ཤིས་ཐོབ་ཅིག་ཡོན་གྱི་བདག །ཐོས་པར་གྱུར་ཅིག་སྟོན་པའི་བཀའ། །བཙན་པར་གྱུར་ཅིག་སྨོན་ལམ་མཐའ། །ཕྱོགས་བཅུའི་དུས་གསུམ་བདེ་བར་གཤེགས། །བདག་དང་མཐའ་ཡས་སེམས་ཅན་རྣམས། །གཉིས་མེད་ངང་ལ་མཉམ་གྱུར་ཅིག །སྟོན་པའི་ཐུགས་རྗེ་ཆེ་བར་ཤོག ལྷ་ཡི་སྨོན་ལམ་བཙན་པར་ཤོག །བོན་གྱི་བསྟན་པ་དར་བར་ཤོག །སེམས་ཅན་བདེ་སྐྱིད་འཛོམས་པར་ཤོག །མུ་དགེ་སྡིག་ཚོགས་ནུབ་པར་ཤོག །སྲིན་གྱི་དམོད་པ་རྒུད་པར་ཤོག །འཁོར་བ་སེམས་ཅན་ཐམས་ཅད་ཀྱང༌། །སྡུག་བསྔལ་མྱ་ངན་རྒྱུན་ཆད་ནས། །བཀྲ་ཤིས་དམ་པ་ཐོབ་པར་ཤོག ། ཅེས་མདོ་གཟེར་མིག་ལས་བྱུང་བའོ། །བདེར་གཤེགས་སྤྱན་དྲངས་ཕྱག་འཚལ་མཆོད་པ་ཕུལ་བ་དང༌། །བཤགས་དང་སྡོམ་དང་གསོལ་བ་བཏབ་པ་དང༌། །སྨོན་ལམ་བཏབ་པའི་དགེ་བ་ཅི་བསགས་པ། །འགྲོ་བ་རྣམས་དང་ཐུན་མོང་སྤྱིར་བྱས་ཏེ། །ཀུན་ཀྱང་བླ་མེད་འབྲས་བུ་འཐོབ་བྱའི་ཕྱིར། །བདག་གཞན་དོན་དུ་བྱང་ཆུབ་ས་ལ་བསྔོ། །སྔ་རབས་འདས་པའི་གཤེན་རབ་ཐམས་ཅད་ཀྱིས། །དམིགས་པ་མེད་པར་བསྔོས་པ་ཇི་བཞིན་དུ། །བདག་གཞན་དགེ་རྩ་བསོད་ནམས་ཅི་བསགས་པ། །བདག་ཀྱང་དེ་བཞིན་དུ་དམིགས་པ་མེད་པར་ཡོངས་སུ་བསྔོ་བར་བགྱིའོ། ྋ །རྗེ་རྒྱལ་བ་འདུས་པའི་ངོ་བོ་ཉིད། །བླ་མ་རྣམས་ཀྱི་བྱིན་རླབས་ཀྱིས། །འཇིག་རྟེན་གྱི་སྣང་བ་ལ་མི་ཆགས་པར། །ཆགས་མེད་ཀྱི་རང་གྲོལ་ལ་སྤྱོད་པར་ཤོག །སྒྱུ་ལུས་ལ་ཞེན་པ་མི་ཆགས་པར། །སྒྱུ་མ་ཡི་མཚན་ཉིད་འཛིན་པར་ཤོག །འདོད་ཡོན་ལ་ཞེན་པ་མི་ཆགས་པར། །ཆོག་ཤེས་ཀྱི་གཏེར་ལ་སྤྱོད་པར་ཤོག །བར་ཆད་ཀྱི་རྐྱེན་ཁར་མི་འཆོར་བར། །རང་སེམས་ལ་ངེས་ཤེས་འཁྲུངས་པར་ཤོག །ཐ་སྙད་ཀྱི་ཚིག་ཕྱིར་མི་འབྲང་བར། །དོན་ཟབ་ཀྱི་རོ་མཆོག་མྱོང་བར་ཤོག །ཀུན་རྫོབ་ཀྱི་སྣང་བ་ལ་མི་འགག་པར། །དོན་དམ་གྱི་ཞེན་ཡུལ་གྲོལ་བར་ཤོག །ཐབས་ཀྱི་ལམ་མཆོག་རྙེད་པ་དང༌། །ཤེས་རབ་ཀྱི་ས་གནས་བགྲོད་པར་ཤོག །སྟོང་གསལ་དུ་སྣང་བ་ལྷན་ཅིག་ཏུ། །སྣང་སྟོང་དུ་རང་ངོ་འཕྲད་པར་ཤོག །རྣམ་སྨིན་གྱི་ལུས་རྒྱ་ཞིག་པའི་དུས། །འོད་གསལ་དུ་མ་བུ་འཕྲད་པར་ཤོག །མཁྱེན་པའི་ཉི་མ་ཤར་བ་དང༌། །བརྩེ་བའི་འགྲོ་ལ་ཕན་པར་ཤོག །སྒོ་གསུམ་གྱི་རྣམ་སྨིན་ཀུན་བྱང་ནས། །སྐུ་གསུམ་གྱི་འབྲས་བུ་སྨིན་པར་ཤོག །བསམ་སྦྱོར་དག་པའི་སྨོན་ལམ་འདི། །སྨོན་པ་བཞིན་དུ་འགྲུབ་པར་ཤོག ྋ །སྨོན་ལམ་འདི་བཏབ་དགེ་བའི་མཐུ་དཔལ་གྱིས། །ནད་མུག་མཚོན་གྱི་བསྐལ་པ་ཞི་བ་དང༌། །དཔལ་འབྱོར་བསོད་ནམས་ཕུན་སུམ་ཚོགས་པ་ཡིས། །སངས་རྒྱས་བསྟན་པ་དར་ཞིང་རྒྱས་པར་ཤོག །སངས་རྒྱས་བསྟན་པ་རབ་དར་ནས། །སེམས་ཅན་དཔལ་འབྱོར་ཕུན་སུམ་ཚོགས། །ཡིད་བཞིན་ནོར་བུའི་རྒྱ་མཚོ་ལྟར། །དུས་ནམ་རྟག་ཏུ་བཀྲ་ཤིས་ཤོག ། ཅེས་བདབ་བོ། །གཤེན་རབ་རྣམ་པར་རྒྱལ་བ་ཡིད་བཞིན་གྱི་ནོར་བུ་རིན་པོ་ཆེའི་སྐུ་ལ་ཕྱག་འཚལ་ལོ། ། བསྭོ་མུ་ཡེ་སྤྲོས་ཁྱུང་ཡེ་ལམ་ཀྲི་ཁྲི་ཏར་དར་གསལ་འབར་འོད་དཔག་རམ་སྭཱཧཱ། བསྭོ་དམུ་ར་ཏ་ཧན་ཝེར་ནི་བྲུཾ་ཧྲུན། མུ་ཏྲེ་མུ་ཏྲེ་མུ་ར་མུ་ཏྲེ། མུ་ཡེ་མུ་ཡེ་ཧ་ར་མུ་ཡེ། མུ་སྤྲོས་མུ་སྤྲོས་ཝེར་རོ་མུ་སྤྲོས། མུ་ནི་གྱེར་ཏོ་ཡེ་ཁྱབ་ཁར་རོ། སྤྲོས་བདལ་ཧྲི་ཧྲོ། ཝེར་ནི་ཝེར་རོ། ཤུད་ལ་ཝེར་རོ་ན་ཧུ་ཏ་ཀ ཤུད་དྷོ་ཤུད་དྷོ་དུ་ཤུད་དྷོ་ཡ། ས་ལེ་ས་ལེ་ཏྲི་ས་ལེ་ཡ། སང་ངེ་སང་ངེ་སུ་སང་ངེ་ཡ། དམུ་ར་ཏ་ཧན་ཁྲི་ཙེ་དྲུང་མུ། ཧ་ཧ་བྲུཾ་བྲུཾ། ཧོ་ཧོ་ལམ་ལམ། ཧཱུྃ་ཧཱུྃ་ཕཊཿཕཊཿ སྒོ་གསུམ་དག་པའི་དགེ་བ་གང་བགྱིས་པ། ཁམས་གསུམ་སེམས་ཅན་རྣམས་ཀྱི་དོན་དུ་བསྔོ། །དུས་གསུམ་བསགས་པའི་ལས་སྒྲིབ་ཀུན་བྱང་ནས། །སྐུ་གསུམ་རྫོགས་པའི་སངས་རྒྱས་མྱུར་ཐོབ་ཤོག། །