བོད་ཀྱི་རོལ་རྩེད།
ཤོ་རྩེད་
[རྩོམ་སྒྲིག]ཤོ་རྩེད་ནི་བོད་ཀྱི་དམངས་ཁྲོད་རོལ་རྩེད་ནང་གི་ཆ་ཤས་ཞིག་ཡིན། ཤོ་རྩེད་ནི་བོད་མིའི་ནང་དར་ཁྱབ་ཆེ་ཤོས་ཀྱི་རིག་རྩེད་ཅིག་ཡིན་ལ་དེར་བོད་མིས་ཧ་ཅང་དགའ་པོ་བྱེད་ཀྱི་ཡོད། དེ་ནི་སྤྱིར་ཤོ་ཆས་ཆ་ཚང་ཞིག་ལ་ཤོ་ཆ་གཅིག་དང་ཤོ་གདན། ཤོ་ཕོར། ལག་ཁྱི་མི་འདྲ་བ་གཉིས་སམ་གསུམ། རྡེའུ་དྲུག་བཅུ་རེ་བཞི་བཅས་ཡོད། ཤོ་རྩེད་དེར་ཐུན་མོང་མ་ཡིན་པའི་མི་རིགས་ཀྱི་ཁྱད་ཆོས་ཞིག་ཡོད་པ་ནི་ཤོ་རྩེད་ལ་རོལ་སྐབས་ལྐུག་ཤོ་མིན་པར་བརྗོད་བྱ་ལོ་རྒྱུས་དང་། བཞད་གད། ཟུར་ཟ་སོགས་ཀྱི་ནང་དོན་ཕུན་སུམ་ཚོགས་པའི་ཤོ་བཤད་རྒྱག་རྒྱུ་ཡོད་པ་ནི་རིག་རྩེད་གཞན་གང་ཞིག་ལའང་མེད་པ་ཞིག་ཡིན། སྤྱིར་བཏང་ཤོ་ཡི་རྩེད་སྟངས་ལ་གཉིས་འཛིང་དང་གསུམ་འཛིང་གཉིས་སུ་འདོད། དེ་མིན་ད་དུང་མི་གཉིས་གཉིས་ཆ་བྱེད་པའི་ཆ་འཛིང་ཡང་ཡོད། ཤོ་འཛིང་རྒྱག་མཁན་ཕྱོགས་རེར་ལག་ཁྱི་དགུ་རེ་ཡོད་པ་དང་། ཤོ་མིག་གཞིར་བཟུང་རྡེའུ་གྲངས་རྩིས་ནས་ལག་ཁྱི་བཙུགས་པའམ་གཏོང་སྟངས་བྱེད་ཀྱི་ཡོད།།
ཤོ་སྐོར་རེའི་ཤོ་ཐེངས་དང་པོ་རྒྱག་དུས་ལག་ཁྱི་གཉིས་རེ་བཙུགས་ནས་ཤོ་མོ་ཟེར་རུང་། ཤོ་པ་རྗེས་མའི་ཤོ་མིག་ཤོ་པ་སྔོན་མ་དང་གཅིག་མཚུངས་ཡིན་ཚེ། ཤོ་མོ་བསད་པ་ཞེས་ཤོ་པ་སྔོན་མའི་ལག་ཁྱི་གཉིས་བཙུགས་ཤུལ་དུ་ལག་ཁྱི་གསུམ་སྟེ་གཅིག་གིས་མང་བ་བཙུགས་ཆོག་གི་ཡོད་པ་དང་། དེ་རྗེས་སླར་ཡང་ཁ་གཏད་ཀྱིས་ཤོ་རྒྱབ་སྟེ་ཤོ་མོ་སྐྱར་དུ་འཛུགས་པ་ཞེས་རེས་མོས་སུ་རྒྱག་དགོས་ཀྱི་ཡོད། གལ་ཏེ་ཤོ་དང་པོ་དེ་ཤོ་མིག་གཉིས་སམ་པ་ར་ལངས་ན་གཉིས་འཛིང་དང་གསུམ་འཛིང་གང་ཡིན་མ་ལྟོས་པར་ཐད་ཀར་ལག་ཁྱི་གསུམ་འཛུགས་ཀྱི་ཡོད་པ་དང་། གསུམ་འཛིང་སྐབས་ཤོ་མིག་གསུམ་ལངས་ཚེ་དེ་དང་འདྲ་བར་ལག་ཁྱི་གསུམ་འཛུགས་སྲོལ་ཡོད། དེ་ལྟར་སོ་སོའི་ཤོ་མོ་གཏན་འཁེལ་བྱུང་རྗེས་ཀྱི་ཤོ་རྒྱབ་ཚད་ལ་ལག་ཁྱི་གཅིག་རེ་ལས་འཛུགས་སྲོལ་མེད། རྒྱུད་རིམ་དེའི་ནང་ཤོ་མིག་ཐེབས་ན་རང་གི་ལག་ཁྱི་ཕན་ཚུན་རྩེག་ཆོག་པ་དང་ཁ་གཏད་ཀྱི་ལག་ཁྱི་བསད་ཆོག དེ་ལྟར་རང་གི་ལག་ཁྱི་རྩེག་པའམ་ཁ་གཏད་ཀྱི་ ལག་ཁྱི་བསད་ཚེ་རང་ལ་མུ་མཐུད་ཤོ་བརྡབ་དབང་རག་པ་ཡིན། ལག་ཁྱི་བསོད་སྐབས་གཅིག་ཁྱིས་གཅིག་ཁྱི་བསོད་པ་དང་། ཉིས་ཁྱི་ཉིས་ཁྱི་དང་གཅིག་ཁྱི་བསོད་པ་ལྟར་མང་ཁྱིས་ཉུང་ཁྱི་བསོད་པ་ལས་ཉུང་ཁྱིས་མང་ཁྱི་བསོད་ཐབས་མེད་པར་ཁ་བརྡབ་ཞེས་བརྗོད་ཀྱི་ཡོད། རང་གི་ལག་པའི་ནང་ལག་ཁྱི་ཡོད་རུང་འཛུགས་ས་མེད་པར་ཁ་བརྡབ་ན་བཙུགས་ཟིན་པའི་ལག་ཁྱི་གང་རུང་གཏོང་དགོས་པ་དང་། ལག་ཁྱི་དེ་དག་ཡང་སོ་སོར་ཁ་བརྡབ་ཀྱི་ཡོད་ཚེ་རང་སོར་བཞག་སྟེ་ཤོ་མུ་མཐུད་ཁ་གཏད་ཀྱིས་རྒྱག་པ་ཡིན། །ལག་ཁྱི་དགུ་ཚང་མ་མཉམ་དུ་རྩེག་ཐུབ་ན་དགུ་མོ་ཞེས་ཡག་ཤོས་སུ་བརྩི་བ་དང་། སུའི་ལག་ཁྱི་དགུ་ཚང་མ་ཤོ་མིག་གཞིར་བཟུང་སྔོན་ལ་རྡེའུ་གང་ཡོད་འགྲོལ་ཚར་ན་དེར་རྒྱལ་ཁ་ཐོབ་པར་བརྩི་ཡི་ཡོད།
ཤོ་རྩེད་ལ་རོལ་སྐབས་ཤོ་མིག་གང་རྒྱག་དགོས་པ་ཚང་མར་ཤོ་བཤད་ནང་དོན་ཕུན་སུམ་ཚོགས་པ་ཁག་མང་པོ་རྒྱག་རྒྱུ་ཡོད། དཔེར་ན། ཤོ་མིག་གཉིས་རྒྱག་དགོས་དུས། པ་ར་སྤེན་པ་བཀྲ་ཤིས་ཞུགས། རྒྱག་མཁན་འཕྲིན་ལས་རྣམ་རྒྱལ་རེད་ཅེས་དང་། ཤོ་མིག་བདུན་རྒྱག་དགོས་དུས། རི་སྡིངས་སྡིངས་གླ་བ་ཉལ་ས་རེད། ཉལ་དྲག་ན་གླ་བ་འཆི་ས་རེད་ཅེས་ལྟ་བུ་ཤོ་མིག་གཅིག་ཁོ་ན་སྨྲོས་པ་དང་། ཡང་ཤོ་མིག་དགུ་དང་བཅུ་གང་རུང་རྒྱག་དགོས་དུས། དགུན་ཆུ་རྟ་ལ་མ་སྟེར། རྟ་ཕོ་གྲང་ངད་ཀྱི་ཤི་ཡོང་ཞེས་དང་། ཤོ་མིག་ལྔ་དང་དགུ་གང་རུང་རྒྱག་དགོས་དུས། ཁ་སྒུག་གི་ཆང་ལས། ལུང་ཁུག་གི་དར་བ་ཞིམ་ཞེས་པ། ཤོ་མིག་བཅུ་དང་བཅུ་གཉིས་གང་རུང་རྒྱག་དགོས་དུས། ཆུ་འཇམ་པར་སྐྲ་ཞིག་བཀྲུས། དེ་ལ་ཆུ་འཇམ་སྐྲ་བཀྲུས་ཟེར་ཞེས་པ་ལྟ་བུ་ཤོ་མིག་ཁག་གཉིས་སྨྲོས་པ། དེ་བཞིན་བརྒྱད་རི་དྲུག་གསུམ་རྒྱག་རྒྱུ་ཡོད། དེ་འདྲའི་ཤོ་པའི་ཉམས་བཟང་ལ་ཞེས་པ་ལྟ་བུ་ཤོ་མིག་གསུམ་དང་གསུམ་ཡན་སྨྲོས་པ་སོགས་ཤོ་བཤད་འདྲ་མིན་གྲངས་ལས་འདས་པ་ཡོད་པ་རེ་རེ་བཞིན་ངོ་སྤྲོད་ཞུ་ཐབས་བྲལ། ཤོ་རྩེད་ལ་རོལ་སྐབས་ཤོ་ཆ་གཅིག་ལ་ཤོ་མིག་གཉིས་ནས་བཅུ་གཉིས་བར་ལངས་རྒྱུ་ཡོད་པ་དང་། ཤོ་མིག་དེ་རྣམས་ཚང་མར་ཡོངས་ཁྱབ་ཏུ་གཉིས་ལ་པ་ར་དང་། གསུམ་ལ་སུ་གེ བཞི་ལ་ཙིག་གི ལྔ་ལ་ཁ། དྲུག་ལ་ལུག བདུན་ལ་རི། བརྒྱད་ལ་ཤ། དགུ་ལ་གུག བཅུ་ལ་ཆུ། བཅུ་གཅིག་ལ་ཐོག བཅུ་གཉིས་ལ་ལྗང་སོགས་འབོད་ཀྱི་ཡོད་པའི་ཁར་ཤོ་མིག་རེ་རེར་ཡང་མིང་གི་རྣམ་གྲངས་མང་པོ་འབོད་རྒྱུ་ཡོད། དཔེར་ན། ཤོ་མིག་བདུན་ལ་རི་དང་སྡིག དེ་བཞིན་ཚིལ་དང་དིང་ཞེས་པ་ལྟ་བུའི་འབོད་སྲོལ་ཁག་མང་པོ་ཡོད་པ་ལྟ་བུའོ།།
འུར་རྡོ།
[རྩོམ་སྒྲིག]འུར་རྡོ་ནི་བོད་ཀྱི་རོལ་རྩེད་ནང་གི་ཆ་ཤས་ཤིག་ཡིན། འུར་རྡོ་ནི་བོད་མི་རིགས་ཀྱི་ཐུན་མོང་མ་ཡིན་པའི་རྒྱང་འཕེན་སྤྱོད་ཆས་ ཡོངས་ཁྱབ་ཆེ་ཤོས་ཤིག་ཡིན། བོད་ཀྱི་ཞིང་འབྲོག་ཁུལ་དུ་ད་ཆའི་བར་དར་ ནས་ཁྱབ་པའི་འུར་རྡོའི་སྤྱོད་སྟངས་རྣམས་དང་། བོད་ལྗོངས་ཀྱི་ཁ་རོབ་ དང་ཆུ་གོང་སོགས་ནས་ཐོན་པའི་འབོར་ཆེ་བའི་རྡོ་རིལ་གྱི་གནའ་རྫས་ རྣམས་དང་ཟུང་འབྲེལ་གྱིས་བརྟག་སྐབས། རྡོ་ཆས་གསར་པའི་དུས་ནས་ བོད་རིགས་ཀྱི་མེས་པོ་རྣམས་ཀྱིས་རྡོ་འཕེན་བྱེད་ཀྱི་འུར་རྡོ་དག་བེད་སྤྱོད་ བྱེད་ཀྱི་ཡོད་པར་ངོས་འཛིན་བྱས་ཆོག་པ་དང་། གཞན་ཡང་ལོ་རྒྱུས་ཆེན་ མོ་ཡི་ནང་གདོད་མའི་སྤྱི་ཚོགས་ཀྱི་འཕེལ་རིམ་ནང་ཐོན་སྐྱེད་ངལ་རྩོལ་ དང་འབྲེལ་ཡོད་ཀྱི་ལག་ཆ་ཐོན་ཁུངས་ཀྱི་ལོ་རྒྱུས་ལམ་ཙམ་གསལ་བར་ གྲགས་པའི་ནང་།། ལྔ་པར་སྨུ་རྒྱལ་ཁོ་རྗེ་ཞེས་བྱས་བཟུང་།། ད་ཕྲང་ཅང་ ཕྲང་ལག་ཆར་ཞགས་པ་འཕེན།། དྲུག་པར་ཀྲོག་ཀྲོག་འདྲེ་ཡིས་དབང་བྱས་ཏེ།། ལང་ཏང་ལིང་དང་བར་ཁ་འུར་རྡོ་འཕེན།། ཞེས་གསལ་བ་ལྟར་འུར་རྡོའི་འཕེན་ རྩལ་དེ་ཉིད་བོད་ཀྱི་གདོད་མའི་སྤྱི་ཚོགས་ཀྱི་དུས་ནས་བྱུང་བར་ཐེ་ཚོམ་མེད། དེ་ནི་གནའ་བོའི་མི་རབས་རྣམས་ཀྱིས་ལག་རྡོ་འཕེན་པ་དང་། དབྱུག་པ་བེད་ སྤྱོད་བྱེད་པ་བཅས་ལས་རིམ་གྱིས་འཕེལ་རྒྱས་བྱུང་བའི་གསར་གཏོད་ཀྱི་ལག་ཆ་ ཞིག་ཡིན་གཤིས། ཐོག་མར་རི་དྭགས་རྔོན་བྱེད་དང་། གཡུལ་འགྱེད་བྱེད་སྐབས་ ཀྱི་རྒྱང་འཕེན་དྲག་ཆས་སྟབས་བདེ་ལ་གོ་ཆོད་པ་ཞིག་ཡིན་པ་གོར་མ་ཆགས། ཐོན་སྐྱེད་དང་གཡུལ་འགྱེད་ནང་བེད་སྤྱོད་བྱས་པའི་རྒྱུན་རིང་གི་ཉམས་མྱོང་ལས་ འུར་རྡོ་འཕེན་རྒྱུ་དེ་ལའང་ལུས་ཀྱི་རྩལ་སྦྱོང་བྱེད་དགོས་པའི་བསླབ་བྱ་བྱུང་སྟེ་ ལས་བྲེལ་ཆུང་བའི་སྐབས་འུར་རྡོའི་འཕེན་རྩལ་སྦྱོང་བ་དང་འགྲན་སྡུར་བྱེད་ པའི་བྱེད་སྒོ་དར་བ་ཡིན།
འུར་རྡོའི་འཕེན་རྩལ་འགྲན་པ་ལ་རྒྱང་རིང་ཐུང་འགྲན་པ་དང་ཚ་ཁ་འགྲན་པའི་ དབྱེ་བ་གཉིས་ཙམ་ཡོད། འུར་རྡོ་འཕང་སྟེ་རྒྱང་ཚད་རིང་ཐུང་གི་རྩལ་ལག་འགྲན་ པ་ལ་རྒྱང་འགྲན་པ་ཞེས་ཟེར་བ་དང་། དམིགས་འབེན་བཙུགས་ཏེ་འུར་རྡོའི་གཟེ་ ཁ་འགྲན་པ་ལ་ཚ་ཁ་འགྲན་པ་ཟེར། འུར་རྡོ་ཞེས་པ་ནི་འུར་སྟོད་དང་། འུར་མཐིལ། འུར་སྨད་བཅས་ཡན་ལག་ཁག་གསུམ་ལས་གྲུབ་པའི་འདུས་གཟུགས་ཆ་ཚང་ཞིག་ཡིན། འུར་སྟོད་（ཡ་མཆོག་ཀྱང་ཟེར་）དེ་ཉིད་ཀྱང་མཛུབ་ཁུང་（མཛུབ་རྒྱུད་དང་། དཔའ་ལུང་། འུར་འགུགས་ཀྱང་ཟེར་）དང་། ཆུ་ལུག་མགོ་ཐར་ཙམ་ཞེས་འུར་ འགུགས་ཀྱི་གཤམ་དུ་ལུག་གི་མགོ་བོ་ཐར་ཙམ་གྱི་ཁུང་ཞིག་འཇོག་དགོས་པ་ནི་ ལུག་གཅིག་འདེད་གཏོང་སྐབས་སྐེ་ལ་བརྒྱུས་ཏེ་ཁྲིད་ཆེད་དུ་ཡིན། འུར་སྟོད་དངོས་ གཞི་བཅས་ལས་གྲུབ་པ་དང་། འུར་སྨད（མ་མཆོག་ཀྱང་ཟེར་）དེ་ནི་རྡོ་ལེན་དང་། ལྗགས་སྟེགས། ལྗགས་རྩེ། （ལྗགས་དང་ཙག་སྐད་ཀྱང་ཟེར་）ལས་གྲུབ་པ་ཡིན། འུར་མཐིལ་ནི་རི་དང་འུར་མཐིལ་དངོས་གཞི་ལས་གྲུབ་ཅིང་ཡུལ་འགའ་ཤས་སུ་དེར་ སྐྱོང་དང་རྡོ་སྐྱོང་ཞེས་ཀྱང་འབོད་སྲོལ་ཡོད།
འུར་རྡོ་འཕེན་སྐབས་འུར་རྡོའི་མཛུབ་ཁུང་ལ་ལག་གཡས་པའི་གོང་མཛུབ་ བརྒྱུས་དེ་མཐེ་བོང་གིས་མནན། དེ་རྗེས་འུར་མཐིལ་གྱི་ནང་དུ་རྡོ་རིལ་བྱ་ཡི་སྒོ་ང་ཙམ་ བླུགས་ཏེ་ལག་གཡོན་པས་བཟུང་། འུར་རྡོའི་ལྗགས་རྩེ་དེ་ལག་གཡས་པའི་གོང་མཛུབ་ དང་དཀྱིལ་མཛུབ་ཀྱི་བར་དུ་བཟུང་ནས་འཐེན་ཙམ་བྱས་ཏེ་འུར་སྟོད་དང་། འུར་སྨད་ གཉིས་རིང་ཐུང་ཐང་ལྷོད་མཉམ་པ་བཟོས། ལག་གཡོན་པས་འུར་མཐིལ་གློད་པ་དང་ དུས་མཚུངས་ལག་གཡས་པས་འུར་རྡོ་མགོ་བོའི་ཐོག་ནས་ཕྱི་སྐོར་ཐེངས་བཞི་ལྔའམ་ དྲུག་བདུན་ཙམ་དང་། ཡང་ན་བཅུ་གྲངས་འགའ་ཞིག་བསྐོར་མཐར་ལྗགས་རྩེ་དེ་ མཛུབ་མོ་གཉིས་ཀྱི་དབར་ནས་གློད་ན་འུར་མཐིལ་གྱི་རྡོ་དེ་ཙག་ཅེས་པའི་སྒྲ་དང་ བཅས་རྡོ་དེ་རྒྱང་རིང་དུ་འགྲོ་ཡི་ཡོད། དེར་འུར་རྡོ་འཕེན་པ་ཟེར། གལ་སྲིད་ཚ་ཁ་ འགྲན་སྡུར་བྱས་ན་འུར་རྡོ་མགོ་བོའི་ཐོག་ནས་དལ་པོར་ཐེངས་མང་ཙམ་བསྐོར་བ་ དང་ཆབས་ཅིག་དམིགས་འབེན་ལ་ལྡིར་ཁུང་སྤྲོད་པ་དང་། དམིགས་སོ་འཕྲོད་ མཚམས་གཞི་ནས་འུར་རྡོ་འཕེན། དམིགས་འབེན་དུ་རྡོ་ཡི་ཐོ་ཐོ་དང་འཁྱགས་ བག་སོགས་བཙུགས་པའམ། ཡང་ན་ཕ་བོང་ལ་ནག་ཐིག་བྲིས་ནས་འབེན་བྱེད་པ་ སོགས་རྣམ་པ་མང་ལ། ད་དུང་“འུར་རྡོ་རྦད་གཅོད་”ཅེས་མི་གཉིས་འུར་རྡོ་ ཚ་ཁ་འགྲན་ན་འབེན་དུ་འགྲན་ཡའི་འུར་རྡོ་བཙུགས་པའི་སྲོལ་ཡང་ཡོད། ཚ་ཁ་འགྲན་སྐབས་འབེན་དང་མིའི་དབར་གྱི་རྒྱང་ཚད་རིང་ཐུང་ངེས་པ་མེད་རུང་ སྟག་ཤར་རྣམས་ཚ་ཁ་འགྲན་ན་རྒྱང་ཚད་རྨིད་ལྔ་བཅུའི་ཡས་མས་འཇོག་པ་དང་། བྱིས་པ་རྣམས་ཚ་ཁ་འགྲན་ན་རྒྱང་ཚད་རྨིད་ཉི་ཤུའི་གཡས་གཡོན་འཇོག་མཁན་ མང་བར་སྣང་ཡང་འབེན་གྱི་ཆེ་ཆུང་དང་། འགྲན་སྡུར་མཁན་གྱི་རྩལ་ཆེ་ཆུང་སོགས་ལ་ གཞིགས་ཏེ་རྒྱང་ཁྱད་རིང་ཐུང་གཏན་འབེབས་བྱེད་ཅིང་། གལ་ཏེ་རྒྱང་འཕེན་འགྲན་ན་འུར་རྡོ་མགོ་བོའི་ཐོད་དུ་ཤུགས་ཀྱིས་སྐོར་བ་ཐེངས་འགའ་ བསྐོར་རྗེས་འཕེན་པར་བྱེད་པ་དང་། དེ་དུས་དཔུང་ལག་གཉིས་ཀྱིས་ཤུགས་རྒྱག་དགོས་ པ་མ་ཟད། རྐང་པ་སོགས་ལུས་བྱིངས་ཀྱིས་ཀྱང་ཤུགས་མཉམ་དུ་འདོན་དགོས་ཀྱི་ཡོད། དེ་ལྟར་འུར་རྡོའི་འགྲན་སྡུར་ཁོ་ནའི་ངོས་ནས་བརྗོད་ན་རྣམ་པ་གཉིས་ཙམ་ལས་མེད་རུང་། འུར་རྡོའི་སྤྱོད་ཡུལ་ནི་བོད་མི་རིགས་ཀྱི་འཚོ་བའི་ཁྲོད་དུ་དར་ཁྱབ་ཧ་ཅང་ཆེ་ལ་སྤྱོད་ ཚུལ་རྣམ་པ་མང་བ་ཞིག་ཡིན། དེ་ཡང་འུར་རྡོ་ནི་རྔོན་ལས་དང་གཡུལ་འགྱེད་བྱེད་པའི་ གནའ་དུས་ཀྱི་མཚོན་ཆ་ཞིག་ཡིན་པ་དང་། རྫི་བོས་ཕྱུགས་རིགས་འདེད་བྱེད་དང་། ཕྱུགས་རིགས་འཛིན་པའམ་བསྡམས་བཀྱིག་བྱེད་ཆེད་ཀྱི་ཡོ་ཆས་ཤིག་ཀྱང་ཡིན་ལ། ཕྱུགས་རིགས་ཀྱི་དགྲ་བོ་སྤྱང་ཀི་དང་བྱ་གླག་སོགས་གནོད་འཚེ་ཅན་རྣམས་དང་རྐུན་ ཇག་འགོག་སྲུང་བྱེད་པའི་མཚོན་ཆའང་ཡིན། ཞིང་ཁུལ་དུ་ད་དུང་ཞིང་པས་སྟོན་ཐོག་ལ་ གནོད་འཚེ་གཏོང་མཁན་གྱི་བྱ་བྱེའུ་སོགས་དཀྲོག་བྱེད་དུ་འུར་རྡོ་སྤྱོད་ཀྱི་ཡོད། གཞན་ཡང་ འུར་རྡོ་དེས་ཁ་སྒྲོག་དང་། ཁུར་ཐག བུད་མེད་ཀྱི་ལུས་རྒྱན། བྱིས་པའི་རྩེད་ཆས། སྲུང་བའང་ བྱེད་ཆོག་གི་ཡོད་པས་འུར་རྡོ་ནི་རྩ་ཆེ་ལ་མ་གནས་ཆུང་བ། བེད་སྤྱོད་མང་ལ་འགྲོ་སོང་ཉུང་བ། མཁོ་ཆེ་ལ་སྟབས་བདེ་བའི་བོད་མི་རིགས་ཀྱི་མཁོ་ཆས་དམིགས་བསལ་ཅན་ཞིག་ཡིན་ཞེས་ བརྗོད་པ་དོན་དང་ལྡན། འུར་རྡོའི་དབྱེ་བ་མདོར་བསྡུས་བཤད་ན། གཞི་རྐང་འུར་རྡོ་ཟེར་བ་ ཡན་ལག་ཁག་གསུམ་ལས་གྲུབ་པ་ཤ་སྟག་ཡིན་རུང་། འུར་རྡོའི་དབྱེ་བ་ལ་རྒྱུ་ཆའི་སྒོ་ ནས་དབྱེ་བ་དང་བཟོ་ཁྱད་ཀྱི་སྒོ་ནས་དབྱེ་བ་སྟེ་ནང་གསེས་གཙོ་ཆེ་བ་གཉིས་ཙམ་དབྱེ་རྒྱུ་ཡོད། རྒྱུ་ཆའི་སྒོ་ནས་དབྱེ་བ་ལའང་རྣམ་ན་ལྔ་སྟེ། རྩིད་འུར་ནག་པོ་དང་། བལ་འུར་དཀར་པོ། མཛེས་འུར་ཁྲ་བོ། ར་རྩིད་འུར་རྡོ། ཨ་ཀྲད་འུར་རྡོ་དང་ལྔའོ།། དེ་ལས་རྩིད་འུར་ནི་འབྲི་གཡག་ གི་གྲ་ཁུ་དང་།། རྔ་རྩིད་བཅས་ལས་བཟོས་པ་ལ་ཟེར་ཞིང་དེ་ནི་རྒྱུ་མཁྲེགས་ལ་སྤྱོད་ཤེད་ཆེ། བལ་འུར་ནི་ལུག་གི་བལ་དང་གྲ་ལས་གྲུབ་པ་ལ་ཟེར་ཞིང་དེ་ནི་ཡང་ཞིང་མཉེན་ལ་སྐད་སྒྲ་བཟང་། མཛེས་འུར་ནི་བལ་ཁུ་དཀར་ནག་གམ། ཡང་ན་སྣལ་སྐུད་ཚོས་མདོག་སྣ་ཚོགས་ལས་བཟོས་པ་ལ་ཟེར་ཞིང་། དེ་ནི་གཅེས་ཕྲུག་གི་རྩེད་ཆས་དང་། གཞོན་ནུ་ཕོ་མོ་ཚོའི་གློ་དང་སྐེད་པར་བཏགས་ནས་མཛེས་རྒྱན་དུ་བྱེད་ པ་མང་ལ། ད་དུང་ཁྱིམ་ཀྱི་ཀ་བ་དང་སྒོའི་ཐོད། རྟ་སྒའི་སྔ་ཤ་ལ་བཏགས་ནས་སྲུང་བ་བྱེད་པའི་སྲོལ་ཡང་ཡོད། ར་རྩིད་འུར་རྡོ་ནི་མིང་དང་མཚུངས་པར་ར་རྩིད་ལས་བཟོས་པ་ལ་ཟེར་ཞིང་། དེའང་འུར་རྡོ་གཞན་དང་འདྲ་བར་བེད་སྤྱོད་བཏང་ཆོག་ནའང་ཡུལ་ལ་ལར་ར་འུར་བེད་སྤྱོད་བཏང་ན་རྣམ་རྟོག་ བྱེད་སྲོལ་ཡོད་པ། དཔེར་ན། རང་གི་ར་རྩིད་འུར་རྡོ་དེ། རང་གི་འགྲམ་པ་གཅོག་བྱེད་རེད་ཅེས་པ་དང་། ར་ཡི་འུར་རྡོ་ར་ཡི་མཇིང་པར་འཁོར་ཞེས་པའི་གཏམ་དཔེ་ལྟར་ལགས་སོ།། ཨ་ཀྲད་འུར་རྡོ་ནི་འབྲི་གཡག་ གི་ཀོ་བ་མཉེད་མའི་རྒྱུན་བུ་དང་། ཤྭ་བ་དང་གཉན་སོགས་ཀྱི་ཧེལ་གེའི་རྒྱུན་བུ་དྲས་ནས་བསླས་པ་ལ་ཟེར་ ཞིང་ཨ་ཀྲད་འུར་རྡོ་རྡོ་ཤུགས་ཆེ་ལ་རྒྱུ་མཁྲེགས་ཞེས་པའི་ཤོད་ཚུལ་འདུག་རུང་དུས་ཕྱིས་འུར་རྡོ་དེ་སྤྱོད་ པའི་དར་སྲོལ་དེ་ཙམ་མེད་དོ།། ཡང་བཟོ་ཁྱད་ཀྱི་སྒོ་ནས་དབྱེ་བ་དེ་ལ་རྣམ་པ་གཉིས་ཡོད་དེ་སྐུད་པ་ ཚོན་མདོག་རྐྱང་པས་བསླས་པ་དང་། ཚོན་མདོག་འདྲེས་མས་བསླས་པ་གཉིས་སོ།། རྐྱང་པར་བསླས་པ་ ལའང་ཟིལ་མ་སྒང་ལྷས་དང་། གའུ་ཁ་སྦྱོར་གཉིས་ཡོད། ཚོན་མདོག་འདྲེས་མར་བསླས་པ་ལའང་སྤྱིར་བཏང་ པ་དང་། སྤུས་ལེགས་གཉིས་ཡོད། གཞན་ཡང་སྤུས་ལེགས་འུར་རྡོའང་མཛེས་འུར་དེ་ཉིད་ཁོ་ནར་ཡང་བཅུ་ ཕྲག་དགུ་སྒྲིག་དང་། གཟི་རིལ། གཟི་རིལ་མིག་མ། མིག་མ་ཁ་སྦྱོར་སོགས་རིགས་ཀྱི་དབྱེ་བ་མང་བར་མཆིས་ ཞེས་རྒྱུས་ཅན་མཁས་པའི་གསུང་ལས་ཐོས་པའོ།།
ཨ་ལྕུག
[རྩོམ་སྒྲིག]སློང་མོང་འམ་ཨབ་ལྕུག་ནི་བོད་ཀྱི་དམངས་ཁྲོད་རོལ་རྩེད་ནང་གི་ཆ་ཤས་ཤིག་ཡིན།
སློང་མོང་ངམ་ཨ་ལྕུག་རྒྱག་སྲོལ་ནི་བྱིས་པའི་རྩེད་མོ་ཞིག་ཡིན་རུང་གྲོང་གསེབ་ཁག་ གཅིག་ཏུ་ལོ་གསར་སྐབས་མི་རྒན་པས་ཀྱང་ཨ་ལྕུག་ལ་མཚོན་བྱུགས་ཏེ་རྒྱག་སྲོལ་ཡོད། ཨ་ལྕུག་ལའང་ར་དང་ལུག རྟ་དང་བོང་བུ་ཅེས་རྩེད་སྟངས་འགའ་ཤས་ཡོད་ཅིང་། སོ་སོས་གང་བདམས་པ་དེ་ལངས་མིན་ལ་ལྟས་ནས་རྒྱལ་ཕམ་དབྱེ་མཚམས་གཅོད་པ་དང་། ཡང་དབང་ཤེས་ཆེ་ཆུང་ལ་གཞིགས་ནས་ཕན་ཚུན་ཞུ་རེས་བྱེད་པའང་ཡོད། དེ་མིན་དུ་ ཨ་ལྕུག་གྱང་གི་ཐོག་ཏུ་བཞག་ནས་ཨ་ལྕུག་གཞན་ཞིག་གཞུས་ཏེ་ཕོག་མིན་ཚ་ཁ་ ལྟ་བ་སོགས་རྩེད་སྟངས་ཤིན་ཏུ་མང་པོ་ཡོད།།