བསླབ་པ་གསུམ།

བསླབ་པ་གསུམ་

ཚུལ་ཁྲིམས་བསླབ་པ་ནི། མི་དགེ་བའི་སྤྱོད་ལམ་ལ་འཛེམ་ཐུབ་པའི་ནུས་པ་ཞིག་ལ་ཟེར། དེ་ཡར་རྒྱས་གཏོང་བའི་ལམ་ནི། དགེ་བའི་སྤྱོད་ལམ་ལ་འཇུག་པར་བྱ་རྒྱུ་དེ་ཡིན། བསླབ་པ་དང་པོ་འདི་ཁྲིམས་རང་སྲུང་དང་སྡོམ་པ་རངའཁུར་ཡིན་པ་ལས། མི་གཞན་བཅུན་ཐབས་དང་ཁྲིམས་འོག་ཏུ་འཇུག་ཐབས་བྱེད་ཀྱི་མེད།

ཏིང་ངེ་འཛིན་བསླབ་པ་ནི། ཕྱི་རོལ་གྱི་བསམ་བློ་སྣ་ཚོགས་པ་ལ་སེམས་རྣམ་པར་གཡེང་བ་དེ་མྱོང་མི་དགོས་པར་དམིགས་པ་རྩེ་གཅིག་ཏུ་གཏད་པའི་ནུས་པ་ཞིག་ལ་ཟེར། ང་ཚོས་སོ་སོའི་སེམས་གསལ་ཞིང་རྣོ་ལ་རྩེ་གཅིག་པའི་དམིགས་པ་དང་ལྡན་པ་ཞིག་བཟོ་གི་ཡོད་མ་གཏོགས་སེམས་དེ་ཉ་པེ་ཉོ་པེ་དང་ཐིབ་བསྡད་པ་ཞིག་བཟོ་གི་མེད། ང་ཚོའི་སེམས་དེ་ཁོང་ཁྲོ་དང་། འདོད་ཆགས། ཕྲག་དོག་སོགས་ཀྱི་དབང་དུ་མ་ཤོར་བའི་ཆེད་སེམས་ཀྱི་བརྟན་ཆ་ཙམ་དུ་མ་ཟད། སེམས་ཚོར་གྱི་བརྟན་ཆ་དེ་ཡང་ཡར་རྒྱས་གཏོང་དགོས་པ་གལ་ཆེན་པོ་ཡིན།

ཤེས་རབ་བསླབ་པ་ནི། བླང་འདོར་གྱི་གནས་གང་ཡིན་པ་ལ་ཤན་འབྱེད་པའམ་ཁྱད་པར་འབྱེད་པའི་ནུས་པ་ལྡན་པ་ཞིག་ལ་ཟེར། སྐབས་འདིར་ང་རང་ཚོའི་སྤྱོད་ལམ་གྱི་ཐོག་ནས་ཁྱད་པར་འབྱེད་རྒྱུ་དེ་ཡིན། དེ་ཡང་གནས་སྟངས་དང་བསྟུན་ཏེ། མི་སུ་འདྲ་ཞིག་དང་མཉམ་དུ་ཡོད་རུང་རང་ཉིད་ཀྱི་སྤྱོད་ལམ་འོས་ཤིང་འཚམས་པ་དང་འོས་ཤིང་འཚམས་པ་མ་ཡིན་པ་དབྱེ་བ་འབྱེད་པ་དེ་ཡིན། གཏིང་ཟབ་ས་ནས་བཤད་ན། ང་ཚོས་དངོས་པའི་གནས་ལུགས་གང་ཡིན་པ་དང་། རྟོག་པའི་འཆར་སྒོ་དེ་གང་ཡིན་པ་ལ་དབྱེ་བ་འབྱེད་ཀྱི་ཡོད།