བསླབ་གཞི་ལྔ་

དགེ་བསྙེན་གྱི་སྡོམ་པའི་བསླབ་གཞི་ལྔ་ལ་ཟེར།

དགེ་བསྙེན་གྱི་སྡོམ་པའི་བསླབ་གཞི་ལྔ་སྟེ། 《འདུལ་བ་རྒྱ་མཚོའི་སྙིང་བོ་ལས》ལས། གསོད་རྐུ་སྨྲ་དང་ལོག་པར་གཡེམ། ། མྱོས་འགྱུར་འཐུང་བ་ལྔ་སྤོང་བ། ། དགེ་བསྙེན་གྱི་ནི་སྡོམ་པའོ། ། ཞེས་པ་ལྟར། མིའམ་མིར་ཆགས་པ་གསོད་པ་དང་། ཀར་ཤ་པ་ཎའི་བཞི་ཆའི་ཚད་ཀྱི་རིན་ཐང་ཚད་པ་རྐུ་བ་དང་། མི་ཆོས་བླ་མའི་རྫུན་སྨྲ་བ་དང་། རང་གི་བུད་མེད་མ་ཡིན་པ་ལ་ལོག་པར་གཡེམ་པ་དང་། མྱོས་འགྱུར་གྱི་ཁུ་བ་ཆང་འཐུང་བ་སྟེ་བསླབ་པའི་གཞི་ལྔ་དང་སྐྱབས་འགྲོའི་བསླབ་བྱའི་མི་མཐུན་ཕྱོགས་རྣམས་ཇི་སྲིད་འཚོ་བའི་བར་དུ་སྤོང་བར་ཁས་བླངས་པ་དེ་དགེ་བསྙེན་གྱི་སྡོམ་པའོ། །