བསྐལ་པ་
བསྐལ་པ་ཞེས་པ་ནི་སངས་རྒྱས་པའི་ཆོས་ལུགས་ཀྱི་དུས་ཚོད་ཀྱི་ཚད་གཞི་རིང་ཤོས་ཤིག་ཡིན་ཞིང་། འཇིག་རྟེན་གྱི་ཁམས་ཆགས་གནས་འཇིག་སྟོང་གི་རིམ་པ་དང་འབྲེལ་བ་ཆེན་པོ་ཡོད། "བར་གྱི་བསྐལ་པ་གཅིག་ཀྱང་བསྐལ་པ་ཡིན་ལ། བར་གྱི་བསྐལ་པ་ཉི་ཤུ་ཡང་བསྐལ་པ་ཡིན་ཞིང་། བར་གྱི་བསྐལ་པ་བརྒྱད་ཅུ་ཡང་བསྐལ་པ་ཡིན་ཏེ། དེ་ལ་ཡང་བསྐལ་པ་ཆེན་པོ་ཞེས་བརྗོད་"[༡]ཅེས་གསུངས་པ་ལྟར་རོ། །
མཚན་ཉིད།
[རྩོམ་སྒྲིག]འཇིག་རྟེན་གྱི་ཁམས་ཀྱི་འགྱུར་བ་དང་འབྲེལ་བའི་དུས་ཀྱི་ཚད་གཞི་ཆེན་པོ་ཞིག་ཡིན། "འཇིག་རྟེན་གྱི་ཁམས་ཆགས་གནས་འཇིག་སྟོང་བཞི་པོ་རེ་རེ་ལ་བར་གྱི་བསྐལ་པ་ཉི་ཤུ་རེའི་ཡུན་ཚད་དུ་བྱས་པའི་བར་བསྐལ་བརྒྱད་ཅུ་ལ་བསྐལ་པ་ཆེན་པོ་ཞེས་བྱ་"[༢]ཞེས་གསུངས།
སྒྲ་བཤད།
[རྩོམ་སྒྲིག]བསྐལ་པ་ཞེས་པའི་སྒྲ་འདི་ནི་ལེགས་སྦྱར་གྱི་སྐད་དུ་"ཀལྤ" (kalpa) ཞེས་པ་ལས་བྱུང་བ་ཡིན་ཞིང་། དེའི་ངོ་བོ་ནི་དུས་ཀྱི་ཚད་གཞི་རིང་པོ་ཞིག་མཚོན་པར་བྱེད།
དབྱེ་བ།
[རྩོམ་སྒྲིག]བསྐལ་པ་ལ་དབྱེ་ན་གཙོ་བོ་གསུམ་ཡོད་དེ།
བར་གྱི་བསྐལ་པ།
མི་རྣམས་ཀྱི་ཚེ་ལོ་བཅུ་ནས་དཔག་ཚད་བར་གྱི་བསྐལ་པ་ཞེས་བྱ། "མནར་མེད་པ་བར་གྱི་བསྐལ་པར་བརྗོད་དོ་ཞེས་བསྟན་པའི་ཕྱིར་རོ། །"[༣]ཞེས་གསུངས།
བསྐལ་པ་ཆེན་པོ།
"ཆགས་གནས་འཇིག་སྟོང་བཞི་རེ་རེ་ལ་བར་བསྐལ་ཉི་ཤུ་རེ་སྟེ་བརྒྱད་ཅུ་ལ་བསྐལ་ཆེན་ཞེས་བྱ་"[༤]ཞེས་གསུངས།
བསྐལ་པ་གྲངས་མེད།
"བསྐལ་པ་མང་པོར་ཏེ་བསྐལ་པ་གྲངས་མེད་པ་དང་པོའི་ཁོངས་སུ་གཏོགས་པ་རྣམས་སོ། །"[༥]ཞེས་དང་། "བསྐལ་པ་གྲངས་མེད་གསུམ་དུ་ཚོགས་བསགས་ནས།"[༦] ཞེས་དང་དེ་བཞིན་དུ།
"བསྐལ་པ་དུ་མར་ཏེ་གྲངས་མེད་གསུམ་དུ་སེམས་ཅན་ལ་ཕན་པའི་ཐབས་ལ་རབ་ཏུ་དགོངས་ཤིང་དཔྱད་པར་མཛད་པའི་ཐུབ་དབང་རྣམས་ཀྱིས་བྱང་ཆུབ་ཀྱི་སེམས་འདི་ཉིད་སེམས་ཅན་ལ་ཕན་པར་གཟིགས་"[༧]ཞེས་དང་། "ཚོགས་དམ་པ་བསོད་ནམས་དང་ཡེ་ཤེས་ཀྱི་ཚོགས་བསྐལ་པ་གྲངས་མེད་གཅིག་ཏུ་བསགས་པ་ལས་"[༨]ཞེས་གསུངས་པ་དེ་བཞིན་ནོ། །
ཁྱད་པར་གྱི་བསྐལ་པ།
[རྩོམ་སྒྲིག]མཚོན་གྱི་བསྐལ་པ་བར་མ། "མི་རྣམས་ཚེ་ལོ་བཅུ་པའི་དུས་དེར་ཐོག་མར་མཚོན་གྱི་བསྐལ་པ་ཞག་བདུན་གྱིས་དམྱལ་ཐག་པར་བྱེད་དོ། །"[༩]ཞེས་གསུངས། ནད་ཀྱི་བསྐལ་པ་བར་མ། "དེའི་ལྷག་མ་རྣམས་ནད་ཀྱི་བསྐལ་པ་ཞག་བདུན་དང་ཟླ་བ་བདུན་གྱིས་དམྱལ་ཐག་གཅོད་དོ། །"[༡༠]ཞེས་གསུངས། མུ་གེའི་བསྐལ་པ་བར་མ། "མུ་གེའི་བསྐལ་པ་བར་མའི་ཚེ་བདག་ནི་ཟས་དང་སྐོམ་དུ་གྱུར་ནས་བཀྲེས་སྐོམ་སེལ་ནུས་པར་གྱུར་ཅིག"[༡༡] ཅེས་དང་། "མུ་གེའི་བསྐལ་པ་བར་མའི་ཚེ་བདག་ནི་ཟས་དང་སྐོམ་དུ་གྱུར།"[༡༢] ཞེས་གསུངས། ཁོང་ཁྲོས་དགེ་བ་འཇོམས་པའི་ཚད། "འཇམ་དཔལ་ཁོང་ཁྲོ་བ་ཞེས་བྱ་བ་ནི་བསྐལ་པ་བརྒྱར་བསགས་པའི་དགེ་བའི་རྩ་བ་་འཇོམས་པར་བྱེད་པ་སྟེ།"[༡༣] ཞེས་དང་། "བསྐལ་པ་ཆེན་པོ་སྟོང་ཕྲག་གི་བར་དུ་བྱས་ཤིང་བསགས་པ་ཡི་སྦྱིན་པ་གསུམ་བྱས་པ་ལས་བྱུང་བའི་དགེ་རྩ་"[༡༤]སོགས་ཁོང་ཁྲོ་གཅིག་གིས་འཇོམས་པར་གསུངས་སོ། །སྡུག་བསྔལ་ཉམས་མྱོང་གི་དུས་ཡུན། "ཡུངས་ཀར་ལྟར་འཚིར་བ་དང༌། ཀར་ཥ་པ་ཎ་ཙམ་དུ་གཏུབ་པ་སོགས་གྲངས་མེད་པ་བསྐལ་པ་ཐམས་ཅད་གཏུགས་པར་མྱོང་དགོས་"[༡༥]ཞེས་གསུངས་པ་ལྟར་དམྱལ་བའི་སྡུག་བསྔལ་མྱོང་བའི་དུས་ཡུན་བརྗོད་པ་ལའང་བསྐལ་པའི་ཐ་སྙད་འདི་བེད་སྤྱོད་མཛད་དོ། །
བསྐལ་པའི་ཡུན་ཚད།
[རྩོམ་སྒྲིག]"བསྐལ་པ་འཇིག་པའི་དུས་མཐའི་མེས་བསམ་གཏན་དང་པོ་མན་ཆད་ཀྱི་སྣོད་སྲེག་པར་བཞིན་དུ་"[༡༦]ཞེས་གསུངས་པ་ལྟར་བསྐལ་པ་འཇིག་པའི་དུས་སུ་འཇིག་རྟེན་གྱི་ཁམས་མེས་ཚིག་པའི་ཡུན་ཚད་ཀྱང་ཡོད།
བསྐལ་པ་དང་འབྲེལ་བའི་དགེ་རྩའི་ཚོགས།
[རྩོམ་སྒྲིག]"བསྐལ་པ་སྟོང་དུ་བསགས་པ་ཡི་སྦྱིན་པ་དང་བདེ་གཤེགས་ལ་སོགས་དཀོན་མཆོག་གསུམ་མཆོད་པ་དང་ལེགས་སྤྱད་དེ་ཚུལ་ཁྲིམས་གང་ཡིན་པ་དེ་དག་ཀུན་ཀྱང་ཁོང་ཁྲོ་གཅིག་གིས་འཇོམས་པར་བྱེད་"[༡༧]ཅེས་དང་། "འཇམ་དཔལ་ཁོང་ཁྲོ་བ་ཞེས་བྱ་བ་ནི་བསྐལ་པ་བརྒྱར་བསགས་པའི་དགེ་བའི་རྩ་བ་འཇོམས་པར་བྱེད་པ་སྟེ།"[༡༨] ཞེས་གསུངས། གཞན་ཡང་།
"རྒྱལ་བ་མྱ་ངན་ལས་འདའ་བར་བཞེད་པ་ལ་ཐལ་མོ་སྦྱར་ཏེ་གསོལ་བ་ནི་འགྲོ་བ་འདི་རྣམས་མ་རིག་པས་བློ་གྲོས་ཀྱི་མིག་ལྡོངས་པར་མི་དགོད་ཅིང་སྟེ་མ་རིག་པའི་མུན་པ་བསལ་བའི་ཆེད་དུ་བསྐལ་པ་གྲངས་མེད་པར་བཞུགས་པར་གསོལ་ལོ། །"[༡༩]ཞེས་གསུངས།
"བསྐལ་པ་གངྒཱའི་བྱེ་སྙེད་དུ་ལུས་དེ་སྙེད་ཀྱིས་ཞིང་ཁམས་དེ་སྙེད་རིན་པོ་ཆེ་སྣ་བདུན་གྱིས་བཀང་བ་བྱིན་པ་དང་།"[༢༠] ཞེས་གསུངས་པ་ལྟར་བསྐལ་པ་ནི་དཔེ་བརྗོད་ཀྱི་ཚུལ་དུའང་བེད་སྤྱོད་བྱེད་དོ། །
ལུང་ཁུངས།
[རྩོམ་སྒྲིག]- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས་ 11
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་ 499
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས་ 80
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས་ 298-299
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར། ཤོག་ངོས་ 11
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས་ 110
- ↑ ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ 10-11
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར། ཤོག་ངོས་ 54
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ 162
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ 162-163
- ↑ ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ 44-45
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ 162
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ 88
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་ 499
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ 497
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ 17
- ↑ ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ 88
- ↑ ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་ 88
- ↑ རྒྱལ་ཚབ་དར་མ་རིན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར། ཤོག་ངོས་ 52
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར། ཤོག་ངོས་ 184