བརྡ་རྙིང་གནད་བསྡུས་
གཉིས་པ་གསར་རྙིང་བརྡ་ཁྱད་ནི། །བླ་ནི་སྟོད་དང་མཐང་ནི་སྨད། །གམ་ཡོ་ཉེ་འཁོར་སྨྱང་བ་བརྐྱང༌། །ག་ཞ་བཞད་གད་ཡ་ལད་ཁྲབ། །གྱུར་ཅིག་གུ་ནི་སྨོན་པ་དང༌། །ཐ་ཚིག་ཚིག་དོན་ནོད་པ་ཐོབ། །བསྟི་བ་ངལ་གསོ་བརྣག་པ་བསམ། །འོན་ཏང་འོན་ཀྱང་བཀྲི་བ་འཁྲིད། །ཕྱམ་ཕྱད་མཉམ་ཉིད་བགྲོ་བ་གྲོས། །བསྟར་བ་བྱི་དོར་ཐ་རམ་ངན། །གཏིང་ཕྱིན་དཔྱིས་ཕྱིན་བསྙིལ་བ་དོར། །འཆབ་པ་གསང་བ་འཁུ་བ་སྡང༌། །གྱ་ཙོམ་མ་བརྟགས་བཅབས་པ་སྦས། །རྣ་བླགས་རྣ་གཏོད་ཐ་ཆད་ངན། །སྨྲེ་བ་ངན་སྨྲས་སྨྲེང་བ་སྨྲ། །དྲལ་བ་ཞིག་པ་མི་འཇེབས་རྩུབ། །བྱེར་བ་སོང་བ་བརྟས་པ་རྒྱས། །ད་ཀོ་ད་ནི་འདི་ཀོ་འདི། །ཁྱོ་ཤུག་བཟའ་ཚོ་མནོས་པ་བསམས། །གྱ་ནོམ་ཕུན་ཚོགས་སྣྲེལ་ཞི་འཕྲེད། །བྲུ་ཚ་བཀྲེས་པ་བརྣན་ངོས་གཟུང༌། །གཡེར་བོ་མཁས་པ་བསྐྱུད་པ་བརྗེད། །ནེམ་ནུར་ཡིད་གཉིས་ཁད་དལ་བུ། །ཡོལ་གོ་སྣོད་དང་ལ་གོར་མགྱོགས། །ཅོ་འདྲི་མཐོ་འཚམ་གཞེར་བ་བསྟེན། །གཞུར་བརྟག་ཟུར་ཟ་མོལ་བ་གྲོས། །ཉེར་བསྡོགས་སྟ་གོན་གནམ་རུ་གཞུ། །ཉག་ཕྲན་མདའ་ལ་བཀར་བཏགས་ཁྲིམས། །གོར་མ་ཆག་པ་ཐེ་ཚོམ་མེད། །ཕྱར་གཡེང་རྣམ་གཡེང་སྒམ་པ་ཟབ། །པུས་འཁྱུད་སྒོམ་ཐག་ཐོར་ཏོ་རྩེ། །ཆབས་ཅིག་ལྷན་ཅིག་ཐ་གྲུ་རྒྱ། །ཚར་ཕྱིན་མཐར་ཕྱིན་གཞར་བ་ཟེར། །གནམ་པོ་དྲང་པོ་འགེམས་པ་འཇོམས། །རླིབས་པ་རྒྱ་ཆེ་སྙུགས་སུ་ཡུན། །མཆིལ་པ་ལྕགས་ཀྱུ་སྤྱོས་པ་ཁྲོས། །ལ་བཟླས་ཐག་བཅད་གསོང་སྨྲ་དྲང༌། །འབེལ་གཏམ་བཀའ་མཆིད་ཟང་ཟིང་ཟས། །རྟོན་པ་རྗེས་འབྲང་འཕྱོ་བ་ལྡིང༌། །དཔེ་མཁྱུད་ཆོས་སྦས་དམུན་པ་བླུན། །ལ་ཟློ་ཐག་གཅོད་བརྟུན་པ་བརྩོན། །ཕྲུ་མ་དམག་སྒར་བསླན་པ་བསྡུས། །བྱ་མ་རྟ་ནི་བང་ཆེན་པ། །རྨེད་པ་གསོལ་བ་བརྔན་པ་མཆོད། །བྲོ་འཚལ་ནད་པ་སྤྱོན་ཚུར་ཤོག །གཙུག་ལག་སྡེ་སྣོད་དོང་སྟེ་སོང༌། །མཁྱུད་སྤྱད་མན་ངག་ཕྲན་བུ་དང༌། །འཛན་ཕོ་སྐྱེས་པ་བསྙད་པ་བཤད། །འཛན་མོ་བུད་མེད་བརླང་པོ་རྩུབ། །ཆང་ཐུབ་གང་ཟག་དམ་རྒྱ་ཁྲིམས། །ཡ་མ་བརླ་ནི་སྙིང་པོ་མེད། །སྟེས་དབང་སྟོབས་ཤུགས་གནའ་བོ་སྔོན། །དབུ་རྨོག་དབུ་འཕང་བརྐམ་པ་འདོད། །ཀློང་གྱུར་དབང་གྱུར་བསྙུངས་པ་ཉུང༌། །དཀོས་ཐག་ཉམ་ཐག་འདོང་བ་འགྲོ། །གྱིམ་ཤིང་རོལ་མོ་བྱོས་ཤིག་གྱིས། །ལྡེམ་པོ་དྲང་པོ་མ་ཡིན་པ། །མཆིས་བྲང་ཆུང་མ་བུས་པ་བུ། །རྟུལ་ཕོད་པ་ནི་སྙིང་སྟོབས་ཆེ། །སྤྱན་པ་བྱ་ར་བཤུལ་ནི་ལམ། །ལྕེས་རྟེན་སྙད་འདོགས་མད་པ་བདེན། །དབང་ཐང་སྐལ་བཟང་བརླམས་པ་བསྐྱོད། །ཚིག་གུ་འབྲས་བུའི་སྙིང་པོ་དང༌། །སྐྱོ་སྔོགས་འཁྲུག་པ་གོ་ར་བཙོན། །སྒྲེ་བོ་རྗེན་དང་ར་ནི་གྲལ། །འཁུམས་པ་ཤེས་པ་ཉེ་རེག་ཁྲུས། །སྨན་བཏགས་ཕན་བཏགས་དབྱིག་ནི་ནོར། །འགྲོང་ནི་མཚན་མ་ཆུ་ལོན་རགས། །ཏ་ལ་ལ་ནི་སྒྲོན་མེ་དང༌། །ཟིལ་དངར་བདུད་རྩི་བཅོམ་བསྐྱུང་འཇགས། །འཇུངས་པ་ཞེན་ཆགས་ཕྱག་བརྙན་འཁོར། །དཀྱེལ་ཆེ་ཁོངས་ཡངས་ཀ་ཅ་ནོར། །རེག་ཟིག་ཟིན་བྲིས་བསྐྲུན་པ་བསྐྱེད། །ཀྱལ་ཀ་ཀུ་རེ་ཁོ་ལག་ཞེང༌། །སྒྲ་བརྙན་བྲག་ཅ་གདུགས་ཉིན་པར། །དོན་མཐུན་ཚོང་པ་འཁྲུན་ནི་འཕང༌། །ཉེ་ཞོ་མེད་པ་སྐྱོན་མེད་དོ། །གཉའ་བོ་དཔང་པོ་རྩ་ལག་གཉེན། །ཚམ་ངམ་འཇིགས་སྟངས་ཉོད་པ་ཟས། །ཡོང་ཡེ་ངེས་པར་བས་པ་ཟད། །བསྙེམས་པ་ང་རྒྱལ་ཕྱད་པར་རྒྱུན། །ཡུག་པ་རྐང་པ་སུག་པ་ལག །རྒྱ་ཅང་སྐ་རགས་འུབས་པ་འདུས། །ཕུང་ཀྲོལ་དོན་མེད་ཕྱིས་བུ་སྣོད། །ཀླུབས་པ་གྱོན་པ་ཆུབ་པ་རྟོགས། །ནོངས་པ་ཉེས་པ་ཤོ་བ་རྫུན། །སློང་ཕོར་ལྷུང་བཟེད་གཡམ་ནི་ཞར། །གཞོགས་སྟེགས་སྒེག་ཆོས་རྨས་པ་ཉམས། །གེལ་བ་ཡལ་ག་དོག་མ་མདུན། །ཐན་ཀོར་ཉེ་འཁོར་ཉེན་ནི་རྨང༌། །ཚ་སྒོ་བ་ཚྭ་འདྲིད་པ་སླུ། །གཟོད་མ་དང་པོ་གཞའ་ཚོན་འཇའ། །གཅམ་བུ་བཅོས་མ་གཞིབ་པ་འཇིབ། །བསྙེན་སྲིང་ཉེ་རིང་འབོག་པ་བརྒྱལ། །བློ་བློང་ཡི་མུག་ཡིབས་སུ་དབྱིབས། །ཆོ་ལོ་རྒྱན་པོ་གཞོངས་ནི་ལྗོངས། །འཇེབས་པ་སྙན་པ་ནན་ཐུར་ནན། །ལྡོངས་པ་ལོང་བ་ཡུར་ནི་གཉིད། །དམིགས་བུ་ལོང་ཁྲིད་འཛེར་ནི་ཟེར། །འདྲུབ་པ་འཚེམ་པ་དྲུབས་པ་བཙེམས། །སྐྱེས་ཕྲན་དར་བབ་ཆེམས་པ་འཕྲིན། །ཉུལ་བ་འགོར་བ་བཀུམ་པ་བསད། །བརྣོགས་པ་སྦས་པ་རྫི་ནི་རླུང༌། །དྲལ་པོ་མིང་པོ་ཆེ་ཞེ་སྲིང༌། །ལོང་བུ་ཤིང་ཏོག་རྩེན་པ་རོལ། །ལྟག་འོག་གོང་འོག་མཉེལ་བ་ངལ། །སྐྱིན་གོར་གངས་སྦལ་ལམ་རྩངས་པ། །མི་འགོང་སྐྲག་པ་གཏམས་པ་ཁེངས། །བདའ་བ་ཞིམ་པ་བྱུག་རིས་གྲལ། །གཞེས་པ་བཞུགས་པ་ནང་བྱན་གཡོག། །གཤུང་བ་སྐྱོན་བརྗོད་འཚལ་ཤེས་པ། །སྐྱུ་རུམ་ཚོད་མ་དངགས་ནི་ངག །བཙུན་པར་བྱ་བ་བཀུར་སྟི་མཆོད། །སྤུ་བསྙལ་ཞེ་སྡང་ཞི་བའོ། །ཁ་ཕྱིན་པ་ནི་གྲོས་མཐུན་པ། །ཐོབ་ཀྱིས་འཇལ་བ་གཞན་ནོར་འགུགས། །གཡར་ཁམས་སྐུ་ཁམས་སིམ་པ་བདེ། །གཡར་ཁྲལ་ཞེས་པ་ཁ་ཁྲལ་ལོ། ། སྨྲས་པ། བཀའ་དང་བསྟན་བཅོས་ལ་སོགས་པའི། །གསུང་རབ་ཀུན་གྱི་ཚིག་དག་ན། །དགོངས་པ་ཇི་བཞིན་དོན་གསལ་ཕྱིར། །དག་ཡིག་འདི་ཙམ་བློར་བླངས་ཏེ། །རིམ་གྱིས་རྒྱས་པ་ཡོངས་བསླབས་ན། །མཁས་པའི་སྟན་ལ་ངང་གིས་དབང༌། ཡི་གེའི་དོན་ལ་མཁས་གྱུར་ན། །གཞུང་དོན་ཡི་གེ་སོ་སོས་བསྟན། །སློབ་དཔོན་དཔེ་ཆ་ཁོ་ནས་ཆོག །ཚུལ་བཞིའི་ཡ་གྱལ་ཡི་གེའི་དོན། །འདི་ལ་རྟག་ཏུ་ནན་ཏན་བསྐྱེད། །མྱུར་དུ་ཤེས་རབ་རྒྱ་ཆེར་འཕེལ། །ཞེས་པ་འདི་ནི་ཀློང་ཆེན་ཆོས་དབྱིངས་སྟོབས་ལྡན་རྡོ་རྗེས་སྦྱར་བའོ། །དགེའོ།།