བརྡ་ཡི་བྱེ་བྲག་གསལ་བྱེད་

ཡོང་ཁུངས་Wikipedia

བརྡ་ཡི་བྱེ་བྲག་གསལ་བྱེད། ༄༅། །ན་མོ་ཝཱ་གཱི་ཤྭ་རཱ་ཡ། །བརྩེ་བས་འགྲོ་ལ་ཕན་འབའ་ཞིག །དེས་དགོངས་རྨོངས་པའི་མུན་ཆེན་པོ། །དྲུངས་ཕྱུང་རྟག་ཏུ་དམ་པའི་ཆོས། །གསུང་མཛད་ཁྱོད་ལ་ཕྱག་འཚལ་ལོ། །འཕགས་པ་སྤྱན་རས་གཟིགས་དབང་གིས། །བྱིན་བརླབས་འཇིག་རྟེན་མིག་གྱུར་པས། །གངས་ཅན་ལྗོངས་སུ་ཆོས་བསྒྱུར་བའི། །བརྡའ་ཡི་བྱེ་བྲག་འགའ་ངེས་བྱ། །དཀོན་མཆོག་ཅེས་པ་སྐྱབས་གནས་དང༌། །རིན་ཆེན་གཉིས་ཀྱི་ཐུན་མོང་མིང༌། །དཀོར་ཞེས་བྱ་བ་ནོར་གྱི་ནི། །ཞེ་ས་ཉིད་ཡིན་གྲིབ་མ་ཡིན། །དཀུ་ཞེས་བྱ་བ་ལུས་ཀྱི་ནི། །སྟ་ཟུར་ཉིད་ཡིན་སྐུ་མ་ཡིན། །མི་ཞིམ་པ་ཡི་དྲི་ལ་ཡང༌། །དཀུ་ཞེས་འཆད་པ་སྐབས་ཀྱིས་དབྱེ། །དཀྱོར་འབྱིན་ཞེས་པ་གཡོ་སྒྱུ་ཡིས། །ཀུན་ནས་བསླང་བའི་ལས་ཀྱི་མིང༌། །རྐྱང་ནུལ་ཞལ་ཞལ་མིང་ཡིན་ནོ། །བཀའ་མཆིད་ཅེས་པ་གླེང་མོ་ཡི། །མིང་ཡིན་བཀའ་བློ་ཞེས་བྱ་བ། །སྒོ་གསུམ་ལས་ཀྱི་ཀུན་སློང་མིང༌། །བཀོལ་བ་ཞེས་བྱ་བཀར་བ་ཡི། །མིང་ཡིན་ལས་བཀོལ་སོགས་དང་ནི། །འབྱེད་པ་གྲོགས་དང་སྐབས་ཀྱི་ཤེས། །བཀད་ས་ཞེས་པ་ཟས་ཀྱི་ནི། །གཡོས་ཁང་མིང་ཡིན་བཀོན་པ་ནི། །ཞེ་སྡང་བ་ཡི་མིང་ཡིན་ནོ། །བརྒྱད་བཀག་ཅེས་པ་སྒོ་གསུམ་གྱིས། །སྤྱོ་བར་བྱེད་པའི་མིང་ཡིན་ཏེ། །བཀྲབས་པ་ཞེས་པ་མང་པོ་ཡི། །ནང་ནས་འདོམས་པར་བྱས་པའི་མིང༌། །སྤ་བཀོང་ཞེས་པ་རྐུན་པོ་སོགས། །ཞུམ་ཞིང་དངངས་པར་བྱེད་པའི་མིང༌། །ལག་པ་བཀན་དང་ལུས་བཀན་སོགས། །བརྡའ་རྙིང་ཡིན་ནོ་རྟོགས་པར་སླ། །ཤ་ཀ་ར་ནི་ལེགས་སྦྱར་གྱི། །སྐད་ཡིན་བོད་སྐད་ལི་ཁ་ར། །དཔེ་མཁྱུད་ཅེས་པ་ཆོས་ཀྱི་ནི། །སྣོད་ལའང་སེར་སྣ་བྱེད་པའི་མིང༌། །སྔ་མཁོ་ཞེས་པ་སྔོན་བཞིན་གྱི། །མིང་ཡིན་སྔ་མའི་མིང་མ་ཡིན། །མཁུ་བ་ཞེས་པ་ལྡོག་པའི་མིང༌། །མཁོབ་ཅེས་བྱ་བ་མཐའ་ཡི་ནི། །མིང་ཡིན་མཐའ་མཁོབ་ཅེས་བྱ་དང༌། །མཁོབ་བལ་སོགས་ཀྱང་རྟོགས་པར་བྱ། །འཁམས་པ་ཞེས་པ་བརྒྱལ་བ་དང༌། །དོན་མཚུངས་སྔོན་འཇུག་འ་ཡིན་ནོ། །མུཥྚི་ཞེས་པ་ཁུ་ཚུར་གྱི། །ལེགས་སྦྱར་སྐད་ཡིན་ཟུར་བཅག་ནས། །ཨུ་ཛྚི་ཞེས་ཀྱང་ཟེར་བ་ཡོད། །ཀུ་རུ་བིནྡ་རྡོ་ཡི་མིང༌། །ཡིན་ཞེས་འགའ་ཞིག་ཟེར་མོད་ཀྱང༌། །ཞ་ཉེའི་ལེགས་སྦྱར་སྐད་དུ་བཤད། །ཚོན་མོ་སྟེང་དང་རོ་ཉེ་ཡང༌། །ཞ་ཉེ་དཀར་ནག་དག་གི་མིང༌། །རིམ་གྲོ་ཞེས་པ་བྱ་ཡུལ་གྱི། །བསྙེན་བཀུར་མིང་ཡིན་བྱེད་པ་པོའི། །རྐྱེན་བཟློག་མིང་དུ་གྲགས་ལྟར་མིན། །ཡོད་དགུ་དང་ནི་སྐྱེ་དགུ་དང༌། །ཡིད་ཀྱི་དགུ་དང་དགུ་ཚིགས་སོགས། །འདོད་རྒྱལ་ཡིན་གྱི་གྲངས་མ་ཡིན། །དགོན་དུང་ཅན་ནི་སྡོང་དུམ་ཅན། །ཚྭ་སྒོ་ཅན་དང་བ་ཚྭ་ཅན། །མིང་གི་རྣམ་གྲངས་ཡིན་ཞེས་གྲགས། །ནམ་མཁའི་དབྱིངས་ལ་དགུང་ཞེས་གྲགས། །བགྲོ་གླེང་ཞེས་པ་འབེལ་གཏམ་གྱི། །མིང་ཡིན་སུན་འབྱིན་རྐྱང་པའི་མིན། །བགོམ་པ་ཞེས་པ་གོམ་སྟབས་ཀྱི། །མིང་ཡིན་བགྲུངས་པ་དྭངས་པའི་མིང༌། །བགམ་སད་དོན་གཅིག་བརྟག་པའི་མིང༌། །མི་འགོང་ཞེས་བྱ་མི་སྐྲག་པའི། །མིང་དུ་ཀུན་ལ་གྲགས་དེའོ། །འགྲན་དུ་མེད་པའི་རྣམ་གྲངས་ལ། །བསྐྲུན་དུ་མེད་ཅེས་འཆད་ན་ཡང༌། །བསྐྲུན་དུ་མེད་པ་མཁས་པའི་བརྡའ། །སྒམ་པོ་ཞེས་པ་གཏིང་ཟབ་པའི། །མིང་ཡིན་བགམ་དང་འཁྲུལ་མི་བྱ། །ག་ག་ཚིལ་ནི་སྐྱི་གཡའ་བ། །ག་གོན་ཞེས་པ་ཉུང་མའི་མིང༌། །གོབ་ལོབ་ཅེས་པ་བྱ་སླའི་མིང༌། །གལ་བཟུང་ཞེས་པ་སུན་འབྱིན་ཏེ། །ག་ཞ་ཞེས་པ་གད་མོའི་མིང༌། །གོར་མ་ཞེས་པ་རྡོ་ཡི་མིང༌། །གར་བུ་ཞེས་པ་ལྕགས་ཀྱི་མིང༌། །མཚར་དུ་དངར་བ་བསྒྲིགས་པའི་མིང༌། །མངག་གཞུག་ཅེས་པ་ཕོ་ཉའི་མིང༌། །དངན་འཐེན་ཞེས་པ་གཞན་གྱི་ནོར། །ཁྱེར་བ་ཕྱིར་མི་གཏོད་པའི་མིང༌། །མངན་བགྲང་ཞེས་པ་སྐྱོན་བརྗོད་ནས། །བགྲང་བའི་མིང་དུ་གྲགས་པའོ། །དྲེའུ་རྔོག་ཅེས་པ་བྲམ་ཟེའི་མིང༌། །བརྔོད་པ་ཞེས་པ་འདྲིད་པའི་མིང༌། །རྔོད་འཐག་སོགས་དང་ཁྱད་པར་ཕྱེ། །སྐྱོ་སྔོགས་ཞེས་པ་རྩོད་པ་ཡི། །ཞི་བྱེད་ཅན་དུ་མི་འཇུག་པའོ། །སྔངས་དང་དངང་པ་ཞེས་པའི་ཁྱད། །འདས་དང་ད་ལྟ་བ་ཡི་དབྱེ། །ཅོ་ཏོ་ཞེས་པ་མགོ་སྤུ་ཡི། །མིང་ཡིན་མགོ་ལ་ཅོ་ཞེས་པ། །མདོ་སྡེའི་རྒྱན་ལས་གསལ་བར་གསུང༌། །ཅོ་འདྲི་ཞེས་པ་མགོ་འཁོར་དུ། །འཇུག་པའི་མིང་ཡིན་ཅོ་ཞེས་པ། །ཅི་ཞེས་འདྲི་བའི་ཚིག་ལའང་འབྱུང༌། །ཅི་ཀ་ཞེས་པ་དེ་སྐད་ཅེས། །ཟེར་བའི་མིང་དུ་གྲགས་པ་ཡོད། །འབད་རྩོལ་མེད་པའི་མིང་ལ་ནི། །ཅི་ཞིག་ལྟར་ཞེས་གྲགས་པ་ཡིན། །མུ་ཅོར་ཞེས་པ་བརྫུན་གྱི་མིང༌། །ཁེངས་དྲེགས་མིང་ལ་གཅོམ་ཞེས་ཟེར། །བརྫུན་གྱི་ངོ་བསྟོད་གཅམ་བུར་གྲགས། །ལ་གཅན་ཞེས་པ་ཤོ་གམ་པའི། །མིང་ཡིན་ཤོ་གམ་ཞེས་པ་ཡང༌། །གྲོང་པ་རྣམས་ལ་བཙས་དང་ནི། །ཚུགས་དང་སྒ་བྲེ་ཞེས་བྱར་གྲགས། །རྒྱལ་པོའི་ལུགས་ཀྱི་བསྟན་བཅོས་ལས། །སྐྱེ་དགུ་ཉོན་མོངས་བསྲུང་བའི་ཕྱིར། །རྒྱལ་པོ་ལ་ནི་ཤོ་གམ་བཅལ། །ཞེས་གསུངས་དེ་ཕྱིར་རྒྱལ་པོ་ཡིས། །སྐྱེ་དགུ་བསྲུང་བའི་གླ་རྔན་ཡིན། །གཅོམ་ཞེས་བྱ་བ་ཁེངས་པའི་མིང༌། །གཅེའུ་ཞེས་པ་མས་ཡར་ནས། །གཏོང་བའི་སྨན་སྦྱོར་ཞིག་གི་མིང༌། །བཅིལ་བ་ཞེས་པ་འཕྲོ་བཅད་པའི། །མིང་ཡིན་སྤྱིལ་དང་འཁྲུལ་མི་བྱ། །ལྕག་པོད་ཅེས་པ་སྐ་རགས་ཀྱི། །བྱེ་བྲག་ཞིག་གི་མིང་ཡིན་ལ། །ལྕེ་ཞེས་བྱ་བའང་གནམ་ལྕགས་ཀྱི། །མིང་དུ་གྲགས་པའང་སྐབས་ཀྱིས་དབྱེ། །ལྕམ་ཞེས་བྱ་བ་སྲིང་མོའི་མིང༌། །ཆེ་གེ་ཞེས་པ་མིང་གི་སྤྱི། །ཆབས་ཅིག་ཅེས་པ་ལྷན་ཅིག་པའི། །མིང་ཡིན་ཆེ་ཞེ་ཞེས་བྱ་བ། །ཁྱོ་ཡི་མིང་ཡིན་མཆིས་བྲང་ནི། །ཆུང་མའི་མིང་དུ་རྣམ་པར་གྲགས། །མཆིང་ཞེས་བྱ་བ་གཏིང་ཟབ་པའི། །མིང་ཡིན་མཆི་ཞེས་བྱ་བ་ནི། །སོང་དང་འགྲོ་འོང་སྐབས་ཀྱིས་ཕྱེ། །མཆོར་ཞེས་བྱ་བ་མཛེས་པའི་མིང༌། །མཆོག་མ་ཞེས་པ་རྩེ་མོ་ཡི། །མིང་སྟེ་རྩྭ་མཆོག་ཇི་བཞིན་ནོ། །མཆིལ་པ་ཞེས་པ་ཉ་འཛིན་པའི། །ལྕགས་ཀྱུའི་མིང་དུ་ཤེས་པར་བྱ། །མཆིག་དང་མཆིག་གུ་གཏུན་དང་ནི། །གཏུན་བུའི་མིང་དུ་ངེས་པར་བྱ། །འཆར་གཡེང་ཞེས་པ་ཆགས་པ་ཡིས། །བསླངས་ནས་ཀུན་ཏུ་རྩེ་བའི་མིང༌། །འཆུམས་པ་ཞེས་བྱ་དུངས་པའི་མིང༌། །དཔེར་ན་འདོད་ལ་འཆུམས་པ་བཞིན། །འཆེལ་བ་ཞེས་བྱ་འབྱམས་པའི་མིང༌། །ཇོ་བོ་ཞེས་པ་རྗེ་བོ་སྟེ། །ཇེ་ཞེས་བྱ་བ་རེ་ཞིག་གི །མིང་ཡིན་ཇུ་བོ་རྡོ་བའོ། །མི་མཇེད་ཅེས་པ་བཟོད་པ་ཡི། །མིང་སྟེ་དཔེར་ན་ཉོན་མོངས་པ། །བཟོད་ཅིང་དང་དུ་ལེན་པ་ཡི། །ཞིང་ལ་མི་མཇེད་འཇིག་རྟེན་བཞིན། །འཇོ་སྒེག་ཅེས་པ་འདོད་པ་ཡིས། །ཀུན་བསླངས་ལུས་ངག་རྩེད་མོའི་མིང༌། །འཇའ་དང་འཇུམས་པ་ཞེས་པ་ནི། །ཁེངས་པ་བཏང་བའི་མིང་ཡིན་ལ། །འཇུངས་པ་སེར་སྣ་ཅན་གྱི་མིང༌། །འཇོར་བུ་ཞེས་པ་ཏོག་ཙེ་དང༌། །འཇུག་ཐུག་གཉིས་ལ་སྐབས་ཀྱིས་དབྱེ། །འཇང་བ་ཞེས་པ་ཟ་བ་དང༌། །འཐུང་བའི་མིང་ལ་གྲགས་པ་ཡིན། །ཐོབ་ཀྱིས་འཇལ་བ་རྙེད་པའི་ཕྱིར། །མངོན་སུམ་གཞན་ལ་སྨོད་པའོ། །རྗེད་པ་ཞེས་པ་ཞེ་ས་དང༌། །རྗེ་སའི་མིང་དུ་རིགས་པར་གྲགས། །ཉན་རྣ་ཞེས་པ་ཕག་ཉན་མིང༌། །ཉུག་རུམ་ཞེས་པ་བཙུན་མོའི་འཁོར། །བསྲུང་བའི་མ་ནིང་ཞིག་གི་མིང༌། །ལག་ཉ་ཞེས་པ་སྟོབ་པ་པོ། །མེད་པར་རང་གིས་ལེན་པའོ། །ཉེ་རེག་ཅེས་པ་ལུས་ཀྱི་ནི། །བུག་པའི་སྒོ་ལ་ཁྲུས་བྱེད་པའོ། །ཉིང་ཞེས་བྱ་བ་ཉེ་དུའི་མིང༌། །ཉིང་ཤ་ཞེས་པ་ཉེ་དུའི་ཤ། །ཉ་མ་ཞེས་པ་གོ་བར་སླ། །ཉོད་པ་ཞེས་པ་བཟའ་བའི་མིང༌། །གཉའ་བོ་ཞེས་པ་དཔང་པོ་དང༌། །གཉུག་མ་ཞེས་པ་གདོད་མའི་མིང༌། །ཕྱག་བརྙན་ཞེས་པ་འཁོར་གཡོག་གི །མིང་དང་བརྙན་པ་གཡར་པོའི་མིང༌། །སྣང་བརྙན་ཞེས་པ་སྣང་ལ་ནི། །རང་བཞིན་མེད་པའི་མིང་ཡིན་ནོ། །ཉོན་མོངས་ཞེས་པ་ཆགས་སོགས་དང༌། །སྙོན་སྨོངས་ཞེས་པ་སྡུག་བསྔལ་བའི། །མིང་དུ་བཏགས་པར་ཤེས་པར་བྱ། །བསྙེན་པ་ཞེས་པ་ཉེ་བའི་མིང༌། །ཡིན་ཕྱིར་བསྙེན་བསྲིངས་ཞེས་བྱ་བ། །ཉེ་རིང་མིང་དུ་གོ་བར་བྱ། །ཡོ་བྱད་བསྙུངས་པ་ཞེས་བྱ་བ། །བཏང་ནས་ཉུང་ངུར་བྱས་པའི་མིང༌། །ལག་པ་བསྙལ་བ་བཀྲུས་པ་སྟེ། །བསྙིལ་བ་ཞེས་པ་སྐྲོད་པའི་མིང༌། །བསྙུན་གསོལ་ཞེས་པ་ཁམས་བདེའམ། །འདྲི་བའི་མིང་དུ་ཤེས་པར་བྱ། །པོ་ཏ་ལ་ནི་ལེགས་སྦྱར་གྱི། །སྐད་ཡིན་བོད་སྐད་གྲུ་འཛིན་ནོ། །དཀོན་ཅོག་ཏ་ལ་ལ་ཞེས་པ། །བོད་སྐད་ཡིན་ཡང་འགྱུར་ཉེས་པས། །དཀོན་མཆོག་སྒྲོན་མེའི་མིང་ཡིན་ནོ། །ཏར་ཀ་ཞེས་པ་ཏོག་གེ་ཡི། །ལེགས་སྦྱར་སྐད་ཡིན་ཟུར་ཆག་པ། །དེ་ཡི་མིང་དུ་རྣམ་པར་བཏགས། །པོ་སྟ་ཞེས་པ་ལེགས་སྦྱར་གྱི། །གསུང་ཡིན་དེ་འི་སྐད་དོད་དུ། །པོ་ཏི་ཞེས་པ་ཟུར་ཆག་པའོ། །ཏིག་ཏ་ཞེས་པ་ལེགས་སྦྱར་སྐད། །སོར་བཞག་ཡིན་པ་ཁ་བའི་མིང༌། །སྤྱི་མིང་བྱེ་བྲག་དག་ལ་བཏགས། །ཅང་ཏེ་འུ་ཞེས་ཌཱ་མ་རུའི། །བོད་སྐད་ཡིན་ཡང་གྲགས་ཆུང་བས། །ལ་ལས་ལེགས་སྦྱར་སྐད་དུ་འཁྲུལ། །ཏམ་བུ་ར་དང་ཏ་ར་ཎ། །རོལ་མོ་དང་ནི་ཁང་པ་ཡི། །རྒྱན་གྱི་བྱེ་བྲག་ལ་རིམ་བཞིན། །གཽའུ་ཏ་མ་བླ་མ་ཡི། །རིགས་ཞེས་བྱ་བའི་ལེགས་སྦྱར་སྐད། །ཏེ་སེ་ཞེས་པ་བོད་ཀྱི་སྐད། །ཡིན་ཡང་རྒྱ་ཡི་སྐད་དུ་འཁྲུལ། །ཏེ་པོར་ཞེས་པ་ཤིན་ཏུའམ། །ལེགས་པར་ཞེས་པའི་སྐད་རྙིངས་པ། གཏམས་ཞེས་བྱ་བ་ཁེངས་པ་དང༌། །གྲངས་ཀྱི་གནས་གཞན་དག་གི་ནི། །མིང་དུ་སྐབས་ཀྱིས་སོ་སོར་ཕྱེ། །གཏོལ་མེད་ཅེས་པ་ཆ་མེད་པའི། །མིང་ཡིན་གཏོས་ཞེས་བྱ་བ་ནི། །ཆུ་ཞེང་སོགས་ཀྱི་ཚད་ཀྱི་མིང༌། །གཏུར་བུ་ཞེས་པ་ཆོས་གོས་ཀྱི། །སྣོད་ཀྱི་མིང་དུ་ཤེས་པར་བྱ། །གཏམས་པ་ཞེས་པ་བཅོལ་བའི་མིང༌། །བརྟས་པ་ཞེས་པ་རྒྱས་པའི་མིང༌། །བརྟོལ་དང་བརྟེལ་ཞེས་བྱ་བ་ནི། །ཕྱིན་པའི་མིང་ཡིན་རྟོན་ཞེས་པ། །ཡིད་བརྟན་རུང་བའི་མིང་དུ་ཤེས། །བྱ་མ་རྟ་ཞེས་བྱ་བ་ནི། །ཕོ་ཉ་བ་ཡི་མིང་དུ་བཤད། །རྟུལ་ཕོད་ཅེས་པ་སྲན་ཐུབ་དང༌། །སྙིང་སྟོབས་ཆེ་བའི་མིང་དུ་བཤད། །བརྟད་པ་ཞེས་པ་གློ་བུར་དུ། །བྱ་བ་རྩོམ་པའི་མིང་ལ་ཟེར། །བརྟུན་པ་ཞེས་པ་མྱུར་དུ་ནི། །བརྩོན་འགྲུས་རྩོམ་པའི་མིང་ལ་བྱ། །སྟབས་དང་སྟངས་དང་བྱད་སྟེམས་དང༌། །ཡ་སྟགས་ཞེས་པ་སྐད་རྙིངས་པ། །ཡིན་ཡང་གྲགས་པས་གོ་བར་སླ། །བསྟི་སྟང་ཞེས་པ་བཀུར་སྟི་ཡི། །མིང་ཡིན་གཞོགས་སྟེགས་ཞེས་བྱ་བ། །ཆགས་པས་བསླངས་པའི་སྒེག་ཆོས་ཀྱི། །བྱེ་བྲག་ཞིག་ལ་གྲགས་པ་ཡིན། །སྟ་གོན་ཞེས་པ་སྔོན་འགྲོའི་མིང༌། །སྟོངས་གྲོགས་ཞེས་པ་བྱ་ཡུལ་གྱི། །བསམ་པ་ཤེས་ནས་གྲོགས་བྱེད་པའི། །མིང་ཡིན་སྡོངས་གྲོགས་ཞེས་པ་འཁྲུལ། །བསྟར་བ་ཞེས་པ་རྡུལ་ཕྱིས་པའི། །མིང་ཡིན་བསྟི་གནས་ངལ་བསོའི་གནས། །བསྟིང་ཚིག་ཅེས་པ་དངོས་བསྟན་དང༌། །ཤུགས་བསྟན་མི་མཐུན་པ་ཡི་ཚིག །སྨྲས་ནས་གཞན་ལ་རྒོལ་བའོ། །བསྟོངས་པ་ཞེས་པ་གཞན་དང་ནི། །མཐུན་པར་རྗེས་སུ་འཇུག་པའི་མིང༌། །ལྟག་ཆོད་ཅེས་པ་སུན་འབྱིན་ནི། །ལྟར་སྣང་དག་གི་མིང་དུ་བཤད། །ཐ་ཆད་ཐ་ཤལ་ཞེས་བྱ་བ། །སྐད་རྙིངས་ཡིན་ཕྱིར་ཐོག་མཐའ་ཡི། །མཐའ་དང་གཅིག་ཏུ་འཁྲུལ་མི་བྱ། །མ་ཐན་ཞེས་པ་མ་ཞུམ་པའི། །མིང་ཡིན་དམིགས་བསལ་ཚིག་མ་ཡིན། །མཐང་ཞེས་བྱ་བ་ཤ་དང་ནི། །ནང་གི་མིང་ཡིན་མཐང་གོས་ལ། །སྔོན་འཇུག་མི་འདོད་འཁྲུལ་པར་ཤེས། །འདོན་པ་ཞེས་བྱ་བཟའ་བ་དང༌། །བཏུང་བ་གཉིས་ཀའི་སྤྱི་མིང་ཡིན། །དོག་ལེ་ཞེས་པ་ཆུ་སྲོ་བའི། །སྣོད་ཀྱི་མིང་ཡིན་དབྱིབས་ལེའང་ཟེར། །གདོད་མ་ཞེས་པ་ཐོག་མ་ཡི། །མིང་དང་དང་པོའི་མིང་ཡིན་ཡང༌། །སྔོན་བྱུང་ཐོག་མཐའ་བྲལ་བའི་གཏམ། །གདུང་བྱེད་ཅེས་པ་ཉི་མ་ཡི། །ཚ་ཟེར་འབར་བའི་མིང་དུ་བཤད། །གདུ་བ་ཞེས་པ་ཟས་སོགས་ལ། །དུངས་ཤིང་དོན་གཉེར་ཆེ་བའི་མིང༌། །གདོས་པ་ཞེས་པ་གྲུ་ཡི་ནི། །རྟེན་སྐྱོད་བྱེད་པའི་འཁར་བ་ཞིག །དགུང་དང་གདུགས་ཞེས་བྱ་བ་ནི། །མཚན་དང་ཉིན་མོའི་མིང་དུ་གྲགས། །གནོས་བུ་ཞེས་པ་སྣོད་ཆུང་ངུ༌། །ཆུ་ཡིས་བཀངས་པ་ཞིག་གི་མིང༌། །བདའ་བ་ཞེས་པ་ཞིམ་པའི་མིང༌། །བདར་བ་ཞེས་པ་བྱི་དོར་གྱི། །ལས་དང་ཕྱེ་མར་བྱས་པ་ཡི། །མིང་དུ་འཇུག་པ་སྐབས་ཀྱིས་དབྱེ། །བདོ་བ་ཞེས་པ་དར་བའི་མིང༌། །བདེན་པ་བདར་དང་མདུན་དུ་བདར། །ཞེ་ས་དག་ཏུ་བྱས་པའི་མིང༌། །གོ་འཐུན་ཞེས་བྱ་སྣ་ཚོགས་པའི། །མིང་ཡིན་འདོ་བ་ཞེས་བྱ་བ། །རྟ་ཡི་མིང་དུ་བཤད་པ་ཡོད། །ཕེག་རྡོབ་ཅེས་པ་ལག་པ་ཡིས། །རོལ་མོར་བྱེད་པའི་བྱེ་བྲག་ཅིག །བླ་བརྡོལ་ཞེས་པ་གཉིད་ལོག་པའི། །ངང་ནས་གཏམ་དུ་བྱེད་པའོ། །བསྡོགས་ཞེས་བྱ་བ་གྲབས་བྱེད་པའི། །མིང་ཡིན་ཉེར་བསྡོགས་འོག་བསྡོགས་སོགས། །སྐད་རྙིངས་ཡིན་ཡང་གོ་བར་སླ། །ལྡོངས་པ་ཞེས་བྱ་ལོང་བའི་མིང༌། །ལྡོམ་བུ་ཞེས་བྱ་མྱུལ་བའི་མིང༌། །དེ་ཡང་འཕྲལ་དུ་སློང་བ་སྟེ། །རབ་བྱུང་རྣམས་ལ་བསོད་སྙོམས་ཞེས། །མིང་གི་ཁྱད་པར་དམིགས་ཀྱིས་བསལ། །ལན་ལྡོན་ཞེས་པ་ལན་འདེབས་པའི། །མིང་སྟེ་འདོན་པའི་སྒྲས་མི་འཆད། །ལྡིར་བ་ཞེས་པ་སྐད་ཆེན་པོའི། །མིང་ཡིན་འོན་ཀྱང་གྲོགས་ཀྱིས་དབྱེ། །གནམ་ཞེས་བྱ་བ་ནམ་མཁའི་མིང༌། །གནའ་ཞེས་བྱ་བ་སྔོན་དང་ནི། །གནག་ཅེས་བྱ་བ་ཕྱུགས་ཀྱི་མིང༌། །གནམ་རུ་ཞེས་པ་གཞུ་ཡི་མིང༌། །བརྣག་པ་ཞེས་པ་བསྲན་པ་སྟེ། །མནོག་པ་ཞེས་པ་མང་པོའི་མིང༌། །མནོ་བ་ཞེས་པ་སེམས་པ་ཡི། །མིང་སྟེ་མནོ་དང་བརྣག་པ་ཡི། །ཁྱད་པར་ལེགས་པར་བསམ་པ་དང༌། །ཇི་ལྟར་བསམ་བཞིན་བསྲན་ཚུགས་པའོ། །མནའ་ཞེས་བྱ་བ་བདེན་པའི་གཏམ། །དྲང་པོར་སྨྲ་བའི་མིང་ཡིན་ཏེ། །བྲོ་དང་ཁྱད་པར་དབྱེ་བར་བྱ། །བྲོ་ཞེས་བྱ་བ་གལ་གྱི་མིང༌། །མནབས་པ་ཞེས་པ་གྱོན་པའི་མིང༌། །མནལ་བ་ཞེས་པ་གཉིད་ཀྱི་སྐད། །བསྒོ་བ་རྣ་ལ་གཟོན་ཞེས་པ། །བསྐུལ་ཚིག་དང་དུ་མི་ལེན་པའོ། །རྣོགས་པ་ཞེས་པ་རྐུ་བ་ཡི། །བྱེ་བྲག་ཅིག་གི་མིང་དུ་བཤད། །བརྣན་པ་ཞེས་པ་ངེས་བཟུང་གི །བྱེ་བྲག་ཅིག་སྟེ་དགར་བ་ཡང༌། །དེ་ཡི་དོན་དུ་འཆད་པ་ཡོད། །བརྣག་པ་ཞེས་པའང་བསམ་པ་སྟེ། །མནོ་དང་ཁྱད་པར་སྐབས་ཀྱིས་དབྱེ། །བརྣང་མ་ཞེས་པ་ཞིང་ལས་ཀྱི། །བྱེ་བྲག་ཅིག་སྟེ་བརྣངས་པ་ནི། །མི་ཁ་གྱེན་དུ་འཕྱུར་བའོ། །སྣམ་ཕྲན་ཞེས་པ་ཆོས་གོས་ཀྱི། །སྣམ་པའི་མིང་ཡིན་འཚལ་བུའི་མིན། །སྣྲེལ་ཞི་ཞེས་པ་རིམ་འཆོལ་དང༌། །ཐོད་རྒལ་ཞེས་པའི་རྣམ་གྲངས་སོ། །པོ་(སྤོ་)ཞེས་བྱ་བ་མཐོན་པོའི་མིང༌། །པོག་ཅེས་བྱ་བ་སྤོས་ཀྱི་མིང༌། །པར་ཏང་ཞེས་པ་སྟན་ཁྲ་བོ། །རིང་པོ་ཞིག་གི་མིང་དུ་འདོད། །པོ་ཟོས་ཞེས་པ་རེ་ལྟར་དང༌། །དོན་གཅིག་ཇི་ལྟར་ཐོགས་གྱུར་ཀྱང༌། །ཞེས་པའི་དོན་དུ་འཆད་པ་ཡིན། །འོག་པག་ཅེས་པ་སྐ་རགས་ལ། །བཏགས་པའི་ཚར་ཚར་རྒྱན་གྱི་མིང༌། །པ་ན་ཞེས་པ་རིན་པོ་ཆེའི། །རིན་ཐང་ཚད་དུ་བྱས་པའི་མིང༌། །དཔྱ་ཞེས་བྱ་བ་རྒྱལ་པོ་ཡིས། །སྐྱེ་དགུའི་ཉོན་མོངས་བསྲུང་བའི་རིན། །སྟོན་ཐོག་དྲུག་ཆ་སྟོབ་པའི་མིང༌། །དཔེན་པ་ཞེས་བྱ་འཕངས་པ་དང༌། །ཡིད་དུ་འོང་བའི་མིང་དུ་འདོད། །དཔོང་ས་ཞེས་པ་དགེ་སློང་གི །དགེ་འདུན་ལས་རྒྱ་བྱ་བའི་ས། །སྤྱོན་ཞེས་བྱ་བ་སྤྱན་འདྲེན་པའི། །ཚིག་ཡིན་བྱོན་དང་ཁྱད་པར་ནི། །འདས་དང་མ་འོངས་སྐབས་ཀྱིས་ཕྱེ། །སྤ་ཞེས་བྱ་བ་བྱིན་ཆགས་པའི། །མིང་ཡིན་སྤྱོ་ཞེས་བྱ་བ་ནི། །བཀྱོན་ཞལ་དག་གི་རྣམ་གྲངས་སོ། །སྤགས་ཞེས་བྱ་བ་འཕགས་པ་ཡི། །མིང་ཡིན་སྤྱིན་ཞེས་བྱ་བ་ནི། །འབྱར་བྱེད་དག་གི་མིང་དུ་འདོད། །སྤྱོམས་པ་ཞེས་པ་དོན་གང་གང༌། །གཞན་ལ་ངོམ་པའི་མིང་དུ་འདོད། །འཕྲལ་བ་ཞེས་པ་དཔྲལ་བ་ཡི། །མིང་སྟེ་ཕྱལ་ནི་གྲོད་པའོ། །འཕྱན་པ་ཞེས་པ་ཡན་པའོ། །ཕྱད་པར་ཞེས་པ་རྟག་ཏུའི་མིང༌། །སུན་ཅི་ཕྱིན་ཞེས་བྱ་བ་ནི། །གཞན་ཕྱོགས་འགོག་པ་ལྷུར་ལེན་གྱི། །རང་ཕྱོགས་གཞན་དུ་མེད་པའོ། །འཕྱེ་བོ་ཞེས་པ་རྐང་པ་གཉིས། །འཁུམས་ནས་བགྲོད་པ་མེད་པའི་མིང༌། །ཕྱ་ཞེས་བྱ་བ་འཇིག་རྟེན་གྱི། །བདེ་སྡུག་བྱེད་པོའི་མིང་དུ་འདོད། །སྒོ་འཕར་ཞེས་པ་སྒོ་གླེགས་མིང་། །བྲུ་བ་ཚ་བ་ལྟོགས་པའི་མིང༌། །བྲིད་པ་ཞེས་བྱ་སྒྱུ་ཐབས་ཀྱིས། །རེ་ཞིག་སླུ་བར་བྱེད་པའི་མིང༌། །ནང་བྱན་ཞེས་པ་ཁྱིམ་ནང་གི །ཕྱག་ཚང་བྱེད་པའི་མིང་དུ་འདོད། །བྱུག་རིས་ཞེས་པ་གྲལ་གྱི་མིང༌། །ད་བྱིད་ཅེས་པ་རྩངས་པ་སྟེ། །འབྱངས་པ་ཞེས་པ་ཕྱིར་འབྱམས་པའོ། །དབུང་ཞེས་བྱ་བ་དབུས་ཀྱི་མིང༌། །དབལ་ཞེས་བྱ་བ་རྩེ་མོ་སྟེ། །དབྲེ་ཞེས་བྱ་བ་རྩོག་པའི་མིང༌། །དབྱིབ་མོ་ཞེས་བྱ་སྐབས་ཀྱི་ཡུལ། །ཐམས་ཅད་ཁེགས་པའི་མིང་དུ་འདོད། །དབྱིག་ཅེས་བྱ་བ་ནོར་གྱི་སྟེ། །དབྱེས་ཞེས་བྱ་བ་ཞེང་གི་མིང༌། །མེལ་ཙེ་(ཚེ་)ཞེས་པ་ཚོར་གསང་མིང༌། །མོལ་བ་ཞེས་པ་གཏམ་གྱི་མིང༌། །དམིགས་བུ་ཞེས་པ་ལོང་ཁྲིད་ཀྱི། །མིང་ཡིན་དམུས་ལོང་ཞེས་བྱ་བ། །མ་ཡི་ཁོང་ནས་ལོང་བའི་མིང༌། །དམུས་པ་ཞེས་པ་ཡང་ཡང་དུ། །ཉམ་ཉེས་གྱུར་པའི་མིང་དུ་འདོད། །དམུ་ཞེས་བྱ་བ་འབྱུང་པོ་ཡི། །བྱེ་བྲག་ཅིག་ལ་གྲགས་པ་ཡོད། །དམོད་པ་ཞེས་པ་དྲག་པོའི་ཚིག །རྨེ་བ་ཞེས་པ་ཟད་དཀའ་བའི། །མིང་སྟེ་རྨེལ་བ་ཞེས་བྱ་བ། །འཁལ་བའི་མིང་དུ་འདོད་པ་ཡིན། །རྨྱ་བ་ཞེས་བྱ་ཁམས་ཉོགས་པའི། །མིང་ཡིན་རྨུགས་པ་ཞེས་བྱ་བ། །བྱིང་བའི་མིང་ཡིན་ཁྱི་སོགས་ཀྱིས། །རྨུགས་པ་སོགས་དང་སྐབས་ཀྱིས་དབྱེ། །རྨེ་ཞེས་བྱ་བ་བཙོག་པའི་མིང༌། །རྨེག་ཅེས་བྱ་བ་ཉམས་དང་ནི། །འཁོས་ཀྱི་མིང་དུ་བཏགས་པ་སྟེ། །རྨེག་མེད་པ་ནི་དེ་མེད་པའོ། །སྨྱན་ཞེས་བྱ་བ་ཁྱེའུ་དང༌། །བུ་མོའི་ཁ་ལོ་བྱེད་པའི་མིང༌། །སྨག་ཅེས་བྱ་བ་མུན་པའི་མིང༌། །སྨྱུང་བ་ཞེས་པ་ལྟོགས་པ་དང༌། །སྐོམ་པར་བྱེད་པའི་མིང་དུ་འདོད། །སྨེད་པ་ཞེས་པ་གཏམ་འདྲི་བའི། །ཁྱད་པར་ཞིག་གི་མིང་ལ་འདོད། །སྨོན་འདྲིན་ཞེས་པ་གྲོགས་པོ་ཡི། །ཁྱད་པར་ཞིག་གི་མིང་དུ་བཤད། །ཙབ་ཧྲལ་ཞེས་པ་ཆགས་པ་ཡིས། །ཀུན་བསླངས་ཅ་ཅོ་འདོན་པའི་མིང༌། །ཙ་ཀོ་ར་དང་ཙུ་ཏ་དང༌། །ཙམ་པ་ཀ་དང་ཙན་དན་སོགས། །ལེགས་སྦྱར་སྐད་ཡིན་ཙ་ན་ཀ །སྲན་མའི་བྱེ་བྲག་ཅིག་ཏུ་བཤད། །གཙུག་ལག་ཅེས་པ་གསུང་རབ་ཀྱི། །མིང་ཡིན་གཙུག་ནི་རྩེ་མོའི་མིང༌། །གཙུབ་ཤིང་གཙུབ་སྟན་མེ་འབྱིན་པའི། །ཤིང་གི་སྦྱོར་བ་དག་ལ་འདོད། །ཙུམ་པ་ཞེས་བྱ་ལེགས་སྦྱར་གྱི། །སྐད་ཡིན་བོད་སྐད་ཁ་སྦྱོར་བ། །ཙ་ར་ཀ་ནི་སྨན་སྤྱད་པའོ། །སུམ་རྩེན་ཞེས་བྱ་ལྷ་ཡི་མིང༌། །རྩབ་མོ་ཞེས་པ་རབ་བྱུང་གི། བཏུང་བའི་ཁྱད་པར་ཞིག་ལ་འདོད། །རྩེ་རྒོད་ཅེས་པ་འཁོར་གཡོག་གི །མིང་ཡིན་རྩབས་ནི་རུ་མའི་མིང༌། །བརྩས་ཞེས་བྱ་བ་རྔན་པའི་མིང༌། །འཚག་ཅེས་བྱ་བ་མདངས་ཀྱི་མིང༌། །འཚའ་ཞེས་བྱ་བ་གཅན་གཟན་གྱི། །བྱེ་བྲག་ཅིག་ལ་འདོད་པ་སྟེ། །འཚལ་ལུ་ཞེས་པ་དམར་པོ་ལ། །དཀར་པོའི་ཐིག་ལེས་མཚན་པའོ། །འཚུན་ཞེས་བྱ་བ་ཕ་མེས་ཀྱི། །ལྷན་སྐྱེས་ལྷ་དང་འདྲེ་ཡི་མིང༌། །འཚལ་བ་ཞེས་པ་བྱེད་པ་དང༌། །ཤེས་པའི་མིང་དུ་སྐབས་ཀྱིས་ཕྱེ། །འཚིམ་ཞུ་ཞེས་པ་རྨོག་གི་མིང༌། །འཚལ་མ་ཞེས་པ་ཟ་མ་ཡི། །མིང་ཡིན་འཚལ་བ་ཟ་བ་དང༌། །ཚིམ་པའི་དོད་དུའང་བཤད་པ་ཡོད། །ཟག་པའི་མིང་ལ་འཛག་པ་དང༌། །ཟད་པའི་མིང་ལ་འཛད་པ་དང༌། །ནོར་བའི་མིང་ལ་འཛོལ་བ་དང༌། །འཇུག་པའི་མིང་ལ་འཛུད་པ་དང༌། །ཟེད་པའི་མིང་ལ་འཛེད་པ་སོགས། །གྲོང་པའི་སྐད་བཞིན་བསྟན་བཅོས་སུ། །ཐད་སོར་བཞག་པ་འགའ་ཞིག་ཡོད། །འཛབ་ཅེས་བྱ་བ་སྒྲུབ་པ་པོའི། །སྔགས་ཀྱི་བསྙེན་པ་བགྲང་བ་ཡི། །གྲོགས་བྱེད་པ་ལ་འདོད་ཅེས་ཟེར། །རྫི་ཞེས་བྱ་བ་རླུང་གི་མིང༌། །ཀྭ་ཞེས་བྱ་བ་འབོད་པའི་ཚིག །ཁྭ་ཞེས་བྱ་བ་ཁྭ་ཏའི་མིང༌། །གྲྭ་ཞེས་བྱ་བ་གྲྭ་ཟུར་གྱི། །མིང་ཡིན་ཉྭ་ཞེས་བྱ་བ་ནི། །རྐང་དང་ལག་པའི་ཉྭ་ལ་འཆད། །དྭ་བ་ཞེས་པ་སྔོ་ཞིག་དང༌། །ཕ་མ་ཤི་བའི་བུ་ཕྲུག་ལ། །འདོད་པ་གཉིས་པོ་སྐབས་ཀྱིས་དབྱེ། །ཙྭ་ཚྭ་ཞྭ་ཟྭ་རྭ་རྣམས་ལ། །ཝ་བཏགས་ཡོད་ཚེ་རང་རང་གི །སྐབས་ཀྱི་དོན་རྣམས་འཁྲུལ་མེད་གོ །ལྭ་ཞེས་བྱ་བ་དར་ཟབ་ཀྱི། །ཁྱད་པར་ཞིག་གི་མིང་དུ་འདོད། །ཧྭགས་ཞེས་བྱ་བ་བུ་རམ་གྱི། །ཁ་བུན་བཟང་ཤོས་འདྲིལ་བའི་མིང༌། །ཧྭ་ཞེས་བྱ་བ་ཁང་པ་དང༌། །གོས་ལ་སོགས་པའི་ཧར་མིག་གི །མིང་དུ་བཏགས་པ་དེ་དག་གོ །གཞོལ་བ་དོན་གཉེར་ཆེ་བའི་མིང༌། །གཞབས་ལ་ལེགས་པར་བརྟགས་པའི་མིང༌། །གཞུང་པ་རབ་ཏུ་འགྲུས་པའི་མིང༌། །གཞིལ་བ་ཞེས་པ་བཅིལ་བའི་མིང༌། །གཞར་བ་ཞེས་པ་ཉེ་བའི་མིང༌། །གཞར་ཡང་ཞེས་པ་ནམ་ཡང་སྟེ། །གཞི་མཉམ་གཤང་བ་སྨིན་པའི་མིང༌། །བཞམས་བསྒོ་ཞེས་པ་དྲན་བསྐུལ་གྱི། །མིང་ཡིན་བཞིབ་པ་འཇིབ་པའི་མིང༌། །ཆེ་བཞི་དཔང་པོའི་མིང་དུ་བཤད། །ཞོ་ཤས་འཚོ་བ་གླ་རྔན་གྱིས། །འཚོ་བའི་མིང་དུ་བཤད་པ་ཡིན། །གཟས་དང་གཟོན་ཞེས་བྱ་བ་ནི། །ལུས་དང་ངག་གི་ཁྱད་པར་ཏེ། །རྡེག་པའི་སྟངས་ཀ་བྱེད་པ་ལ། །རྡེག་པར་གཟས་ཞེས་ཟེར་བ་དང༌། །རིགས་པར་བསྐུལ་བ་མི་ཉན་པར། །ལན་བཟློག་པ་ཡི་མིང་ལ་ནི། །བསྒོ་བ་རྣ་ལ་གཟོན་ཞེས་བཤད། །གཟུ་བོ་ཕྱོགས་ལྷུང་སྤངས་པ་སྟེ། །གཟེགས་མ་ཞེས་པ་ཆ་ཤས་ཀྱི། །མིང་ཡིན་གཟུ་ལུམ་ཅན་ཞེས་པ། །སྤྱི་བརྡོལ་ཅན་གྱི་མིང་དུ་འདོད། །ཟོལ་པ་གཡོ་སྒྱུ་ཅན་གྱི་མིང༌། །གཟོད་མ་ཞེས་པ་གདོད་མའི་མིང༌། །གཡེམ་པ་ཞེས་པ་ལོག་ཡེམ་གྱི། །མིང་ཡིན་གཡིགས་པ་བསྐྱིགས་བུའི་མིང༌། །གཡར་ཚ་ཞེས་པ་ངོ་ཚ་ཡི། །ཞེ་ས་ཡིན་ཏེ་གཡར་དམ་དང༌། །གཡར་ཁྲལ་གཡར་ངོ་ལ་སོགས་བཞིན། །ཡ་མ་བརླ་ཞེས་བྱ་བ་ནི། །སྙིང་པོ་མེད་པའི་མིང་ཡིན་ལ། །ཡ་གད་ཅེས་པ་འཛེག་སྟེགས་ཀྱི། །མིང་ཡིན་ཡ་ལད་ཅེས་བྱ་བ། །གོ་ཆའི་མིང་ཡིན་ཡོལ་གོ་ནི། །གཞོང་པའི་མིང་དུ་འདོད་པ་ཡིན། །ཡས་དང་སྟགས་ཞེས་བྱ་བ་ནི། །དོན་གཅིག་མིང་གི་རྣམ་གྲངས་སོ། །ལ་གོར་ཞེས་བྱ་མྱུར་པོའི་མིང༌། །ལོངས་པ་ཞེས་དང་ལོངས་འཆོས་པ། །ཆགས་པས་ཀུན་བསླངས་སྒེག་བཅོས་མིང༌། །ལ་བ་ཆགས་སུ་མ་བཅགས་ཤིང༌། །སྤུ་མ་ཕྱུང་བའི་སྣམ་བུའི་མིང༌། །རླམ་ཞེས་བྱ་བ་ཧམ་སྐྱའི་མིང༌། །རླུགས་པ་ཞེས་པ་མ་ཞུམ་པའི། །གྱེན་དུ་རླུགས་པའི་མིང་ཡིན་ཏེ། །བརླམས་ཞེས་བྱ་བ་མྱ་ངན་དང༌། །གདོན་ལ་སོགས་པས་དཀྲུགས་པའི་མིང༌། །རླང་པོ་ཞེས་བྱ་མི་སྙན་ཚིག །རློང་དུ་གྱུར་པ་ཞེས་བྱ་བ། །བརྟན་པ་ཐོབ་པའི་མིང་དུ་འདོད། །བླ་ཞེས་བྱ་བ་སྟེང་གི་མིང༌། །བློན་གདབ་ཅེས་པ་ཟུར་ནས་ནི། །གྲོས་འདེབས་བྱེད་པའི་མིང་དུ་འདོད། །བློ་བློང་ཞེས་པ་ཡི་ཆད་པའི། །རྫས་ཀྱི་བླ་དང་ལག་གི་བླ། །ནོར་དང་ཁང་ལས་གསར་པ་ཡི། །ཞལ་ཏ་པ་ཡི་མིང་དུ་འདོད། །བཟླུགས་པ་ཞེས་པ་ཕ་རོལ་པོའི། །སེམས་བཟུང་བ་ཡི་མིང་ཡིན་ནོ། །གཤོར་ཞེས་བྱ་བ་ཐོད་པ་ཡི། །མིང་དུ་མན་ངག་སྙེ་མར་བཤད། །བཤུལ་ཞེས་བྱ་བ་ལམ་གྱི་མིང༌། །གཤུང་ན་ཞེས་པ་རང་གཞན་གྱི། །སྐྱོན་ནས་དངོས་སུ་བརྗོད་པའི་མིང༌། །ཤིན་ཏེ་མ་ཞེས་བྱ་བ་ནི། །མཐུ་ཆུང་བ་ཡི་མིང་དུ་བཤད། །སྲ་བརྐྱང་ཞེས་པ་དགེ་འདུན་གྱི། །ཆོས་གོས་སུམ་ཕྲུགས་གཅིག་ཙམ་ལ། །མཚམས་ནང་དེ་ན་ཡོད་པ་ཡི། །དགེ་འདུན་ཀུན་གྱི་ཆོས་གོས་ཀྱི། །བྱིན་རླབས་ཆགས་པ་གཅིག་ལ་ཟེར། །སྲི་ཞུ་ཞེས་པ་དྲིན་བསམས་ནས། །བཀུར་སྟི་བྱེད་པའི་མིང་ལ་འདོད། །གསོག་དང་གསོབ་ཅེས་བྱ་བ་ནི། །སླུ་བའི་མིང་གི་རྣམ་གྲངས་ཡིན། །སྲོ་ཁང་ཞེས་པ་ཁྲུས་ལ་སོགས། །རེག་བྱ་རྣམ་པ་ལྔ་བསྟེན་པས། །བ་སྤུའི་བུ་ག་སྣུམ་གྱིས་ནི། །གང་བར་བྱེད་པའི་མིང་དུ་འདོད། །གསུད་པ་ཞེས་པ་སྦྲེགས་པའི་མིང༌། །ཁ་གསག་ཅེས་པ་རྙེད་པའི་ཕྱིར། །གཞན་ནོར་བསྔགས་པར་བྱེད་པའོ། །གསེག་ཤང་ཞེས་པ་མཁར་སིལ་གྱི། །མིང་ཡིན་གསོང་པོ་ཞེས་བྱ་བ། །དྲང་ཞིང་གསལ་བའི་མིང་དུ་འདོད། །བསོད་པ་ཞེས་པ་ཞིམ་པའི་མིང༌། །བསོད་ཉམས་ཞེས་བྱ་འདོད་པ་ལ། །ལྷག་པར་སྤྱོད་པའི་མིང་ཡིན་ཏེ། །བསེལ་བ་ཞེས་བྱ་འཇིགས་པ་ལས། །སྐྱོབ་པའི་སྐྱབས་ཀྱི་མིང་དུ་བཤད། །སྲི་ཞེས་བྱ་བ་མཐར་བྱེད་ཀྱི། །ཟ་བའི་ལམ་སྲོལ་བྱང་བའི་མིང༌། །སྲེལ་བ་འཛིན་ཞིང་སྐྱོང་བའི་མིང༌། །གསྭ་(བསོྭ་)ཞེས་བྱ་བ་ལྷ་ཀླུ་སོགས། །འབྱུང་པོ་འབའ་ཞིག་འབོད་པའི་མིང༌། །དྲི་ཞིམ་མིང་ལའང་བསུང་ཞེས་ཟེར། །སྲུལ་པོ་ཞེས་པ་རུལ་བའི་མིང༌། །དེ་ལས་ལུས་སྲུལ་པོ་ཡང་གཏོགས། །དེ་ནས་ལེགས་པར་སྦྱར་བའི་སྐད། །བོད་ཀྱི་སྐད་ལའང་སོར་བཞག་དང༌། །ཟུར་ཆག་འགའ་ཞིག་བཤད་བྱ་བ། །པོ་ཏ་ལ་དང་ཤམྦྷ་ལ། །ཨོ་རེནྟྲ་དང་ན་ལེནྡྲ། །ཏིལ་དང་པདྨ་རཱ་ཀ་དང༌། །མཽ་གལ་དང་ཤཱ་རི་དང༌། །ཀེང་ཤུ་ཀ་དང་ཀ་དམྤ། །མནྡ་ར་དང་མུ་ཏིག་དང༌། །ཏ་མ་ལ་དང་ཙན་དན་དང༌། །ག་པུར་གུ་གུལ་གུར་ཀུམ་དང༌། །དུ་རུ་ཀ་དང་ཨརྒ་དང༌། །ཀུ་མུ་ཏ་དང་ཙམྤ་ཀ །བ་རུ་ཤ་ཀ་མ་ལི་ཀ །མཉྫུ་ཛི་ཧྭ་པྲི་ཡངྐུ༌། །སུག་སྨེལ་དང་ནི་མ་ཤ་ཀ །བཻཌཱུརྱ་དང་མརྒད་དང༌། །ཀེ་ཀེ་རུ་རྣམས་ལེགས་སྦྱར་སྐད། །ཐད་སོར་བཞག་པ་ཡིན་ཞེས་བྱ། །ཨཎྡ་རྙིལ་ཞེས་བྱ་བ་ནི། །ཨིནྡྲ་ནཱི་ལའི་བོད་སྐད་དེ། །ལ་དུ་ཧྭགས་ཀྱི་ལེགས་སྦྱར་སྐད། །སཾསྐྲྀཏ་ནི་ལེགས་སྦྱར་རོ། །གེའུ་ཧང་ཞེས་བྱ་བ་ཡང༌། །གོ་རོ་ཙ་ནའི་བོད་སྐད་ཡིན། །ལི་ཁྲི་ཞེས་པ་སིནྡྷུ་རའི། །བོད་སྐད་དག་ཏུ་བཤད་པ་ཡིན། །པི་པི་ལིང་ནི་ལེགས་སྦྱར་སྐད། །ཡིན་ཡང་ན་ལེ་ཤམ་ཞེས་དང༌། །ཨ་བར་སྐྱུར་གསུམ་ཞེས་བྱ་བ། །ཞང་ཞུང་སྐད་ཡིན་ལེགས་སྦྱར་གྱི། །སྐད་དུ་ངེས་པར་འཁྲུལ་མི་བྱ། །ཤུ་དག་ལི་ཤི་ཤིང་ཀུན་ཡང༌། །རྒྱ་མིན་བོད་མིན་སྐད་ཞིག་སྟེ། །ལེགས་སྦྱར་སྐད་དུ་འཁྲུལ་མི་བྱ། །ནེརཉྫཱན་ལེགས་སྦྱར་སྐད། །བོད་ཀྱི་སྐད་དོད་གང་ཡིན་བསམ། །ཝཱ་ར་ཎ་སི་ཞེས་བྱ་བ། །རལ་གྲི་ཕུབ་ཀྱི་གནས་དང་ནི། །བ་ལང་མགོ་ཡི་རི་སོགས་སུ། །འཆད་པ་ཡོད་ཀྱང་འདོད་རྒྱལ་སྐད། །ཡི་གེ་བསྣན་པའི་ངེས་ཚིག་གིས། །བཤད་ན་འཁྲུལ་པར་འགྱུར་སྙམ་བྱེད། །ཨོ་ཌི་ཡ་ནི་ལེགས་སྦྱར་གྱི། །སྐད་ཡིན་དེ་ཡི་ཟུར་བཅག་པ། །ཨུ་རྒྱན་ཞེས་པ་བོད་ཀྱི་སྐད། །ས་ལི་ཞེས་པ་ལེགས་སྦྱར་གྱི། །སྐད་ཡིན་དེ་ཡི་ཟུར་བཅག་ནས། །ས་ལུ་ཞེས་པ་བོད་ཀྱི་སྐད། །ཤོ་ལོ་ཀ་ནི་ཚིགས་བཅད་ཀྱི། །ལེགས་སྦྱར་སྐད་ཡིན་བོད་སྐད་དུའང༌། །ཤྭ་ལོ་ཀ་ཞེས་བྱ་བ་ཡིན། །ལོ་ཙ་ཞེས་པ་མིག་གི་ནི། །སྐད་དོད་སོར་བཞག་ཡིན་མོད་ཀྱི། །ཡི་གེ་བསྣན་པའི་ངེས་ཚིག་གི །འཇིག་རྟེན་མིག་ཅེས་འདོད་པའང་ཡོད། །ཨ་ཏི་ཤ་ནི་ཕུལ་བྱུང་གི །སྐད་དོད་སོར་བཞག་ཡིན་མོད་ཀྱི། །དེ་ལ་ཡི་གེ་བསྣན་པ་ཡིས། །ཀུན་སྤངས་དགེ་སྦྱོང་སྣང་མཛད་ཅེས། །བྱ་བར་ཀློག་པའི་ལུགས་ཀྱང་སྣང༌། །བྷྲིང་གི་རི་ཊི་ཞེས་བྱ་བ། །ལེགས་སྦྱར་སྐད་ཡིན་ཟུར་བཅག་པ། །བོད་ཀྱི་སྐད་དུ་རྣམ་པར་བརྟག །གངྒཱ་སིནྡྷུ་པཀྵུ་དང༌། །སཱི་ཏཱ་ཞེས་པ་ལེགས་སྦྱར་སྐད། །ཐད་སོར་བཞག་པ་ཡིན་ཞེས་བྱ། །ཛམྦྷ་ལ་ནི་རྨུགས་འཛིན་གྱི། །ལེགས་སྦྱར་སྐད་ཡིན་ལྷ་ཞེས་འཁྲུལ། །ཉན་ཐོས་སེནྟ་བ་ཞེས་པ། །ཉན་ཐོས་སྡེ་པའི་ལེགས་སྦྱར་གྱི། །སྐད་ཡིན་ཉན་ཐོས་ཁྱད་པར་མིང༌། །མ་ག་དྷཱ་དང་ཀ་ལིང་ཀ། །ལངྐ་ཨཥྨ་པ་རནྟ། །ལེགས་སྦྱར་ཐད་སོར་བཞག་པའི་སྐད། །ནྱགྲོ་ཏ་དང་ཀུ་ཤ་ཡང༌། །ལེགས་སྦྱར་ཐད་སོར་བཞག་པ་སྟེ། །བིཥྚི་ཞེས་པ་འཇུག་ཕོད་ཀྱི། །ལེགས་སྦྱར་སྐད་དུ་ངེས་པར་བཤད། །ཀརྐ་ཊ་ནི་སྦལ་བའི་མིང༌། །ཡིན་ཡང་ལེགས་སྦྱར་སྐད་མ་ཡིན། །ཨེ་ཀ་ཛྭ་ཊི་རལ་གཅིག་མ། །ལེགས་སྦྱར་སྐད་ཡིན་རེ་མ་ཏི། །རི་ཡི་བུད་མེད་ཡིན་ནམ་བརྟག །ཤ་ན་ཀོ་ཏམ་དུ་ཀུ་ལ། །ཀ་ཤི་ཀ་རྣམས་ལེགས་སྦྱར་སྐད། །ཐད་སོར་བཞག་པ་ཡིན་ཞེས་བྱ། །གནྡྷོ་ལ་ནི་དྲི་འཛིན་གྱི། །སྐད་ཡིན་བི་ཧཱ་ར་ཞེས་པ། །གཙུག་ལག་ཁང་གི་ལེགས་སྦྱར་སྐད། །འདི་ཙམ་ཁོ་ན་ཤེས་པ་ཡིན། །ལེགས་སྦྱར་སོར་བཞག་ཡིན་མིན་དང༌། །བརྡའ་རྙིངས་པ་དང་བརྡའ་གསར་པའི། །བྱེ་བྲག་མང་ཞིག་ཤེས་གྱུར་ནས། །རྒྱལ་བའི་བཀའ་དང་རིག་པ་ཡི། །གནས་ལྔ་སྟོན་པའི་བསྟན་བཅོས་ཀྱི། །ཚིག་དོན་ངེས་པར་གོ་བཀའ་བ། །མང་ཞིག་ངང་གིས་གྲོལ་བར་འགྱུར། །མང་པོའི་དབུས་སུ་མཁས་པ་ཡི། །གྲགས་པའི་གདུགས་དཀར་གཡོ་འདོད་འགའ། །གཞུང་འདི་བཟུང་ལ་གཡོ་མེད་པར། །མཛངས་ཤིང་གསོང་པོ་དག་ཏུ་སྨྲོས།། །།ཞེས་བརྡའི་གནས་བྱེ་བྲག་ཏུ་རྟོགས་བྱེད་བྱ་བའི་ཚིག་ལེའུར་བྱས་པ་འདི་ནི། དཔལ་ཤཱཀྱ་མཆོག་ལྡན་དྲི་མེད་ལེགས་པར་བློས། །གཡས་རུ་གཙང་གི་སའི་ཐིག་ལེ། །གསེར་མདོག་ཅན་ཞེས་བྱ་བའི་དབེན་གནས་སུ་ཉེ་བར་སྦྱར་བའི་ཡི་གེ་པ་ནི་ཆོས་ཀྱི་རྒྱལ་མཚན་ནོ། །