བར་དོའི་དྲུག་ཁྲིད་ཀྱི་ཟིན་བྲིས་ཀུན་གསལ་མེ་ལོང་

༄༅། །ཀར་གླིང་ཞི་ཁྲོའི་བར་དོའི་དྲུག་ཁྲིད་ཀྱི་ཟིན་བྲིས་ཀུན་གསལ་མེ་ལོང་བཞུགས་སོ། ། ན་མཿཤྲཱི་མཱཾ་གུ་ར་ཝེ། འགྲོ་ཁམས་དུག་ལྔའི་བགས་ཆགས་སྲ་མཁྲེགས་ལྕགས། །སྨིན་གྲོལ་དངུལ་ཆུའི་སྦྱོར་བས་ཡེ་ཤེས་ཀྱི། །གསེར་ཁམས་བཟང་པོར་མ་བཅོས་ལྷུན་གྲུབ་ཏུ། ། སྟོན་མཛད་ཁྱབ་བདག་བླ་མས་ཤིས་པ་སྩོལ། །གསང་སྔགས་མྱུར་ལམ་ཚེ་གཅིག་འདིར་གསལ་བྱ། །དཀའ་བ་མེད་བསྒྲོད་དགོངས་པ་རང་གྲོལ་གྱི། །བར་དོ་དྲུག་ཁྲིད་ཉམས་སུ་ལེན་པའི་ཐབས། །བླ་མའི་ཞལ་གྱི་བདུད་རྩི་འདིར་གསལ་བྱ། ། ཞེས་ཤིས་པར་བརྗོད་དེ་བསྟན་པར་བྱ་བ་ལ། ཐོག་མར་ས་བཅད་ལྡེ་མིག་རང་གྲོལ་རྩ་བར་བྱས་པར་གོང་འོག་འཁྲུག་སྡེབ་བྱེད་རྒྱུར། སྔོན་འགྲོ། དངོས་གཞི། རྗེས་དང་གསུམ། དང་པོ་སྔོན་འགྲོ་རང་རྒྱུད་འདུལ་བར་ལྷན་ཐབས་སྦྱར་དགོས་པས་ཆོས་ཐུན་གསུམ་སྟེ། ཆོས་ཐུན་དང་པོ་ཐོག་མར་འཁོར་བའི་སྡུག་བསྔལ་བསམ་པར་བྱ་སྟེ། དེ་ཡང་འཁོར་བའི་སྡུག་བསྔལ་མ་བསམས་ན༴ སོགས་ནས། ཆོས་ཐུན་གཉིས་པ་དལ་འབྱོར་རྙེད་དཀའ།ཆོས་ཐུན་གསུམ་པ་འཆི་བ་མི་རྟག་པ་རྣམས་ཞག་གྲངས་མང་ཉུང་གང་ལྟར་ནར་འདེད་ཀྱི། འཆི་བ་མི་རྟག་པ་བསྒོམ་པ་སྟེ། ཆོས་ཐུན་གསུམ་པའོ། །བར་ས་བཅད་ནས་སྔོན་འགྲོ་རང་རྒྱུད་སྦྱོང་བ་ལ་ཆོས་ཐུན་ལྔ་ཡོད་རྒྱུར་སྔོན་འགྲོ་རང་རྒྱུད་སྦྱོང་བའི་ཁྲིད་རིམ་གྱི་འདོན་ཆ་རྒྱ་ར་བས་མཛད་པ་ལྟར།གཏི་མུག་གཉིད་དཀྲོགས་ནས་སྐྱབས་འགྲོ། སེམས་བསྐྱེད། རྡོར་སེམས། མཎྜལ།བླ་མའི་རྣལ་འབྱོར་སོགས་ནས་ཞག་གྲངས་ཀྱིས་སྦྱང་བྱ་བཅས་ཁྲིད་རིམ་སྤྱི་ལྟར་རྒྱས་སྤྲོས་མཛད་དེ། སྣང་སྲིད་བླ་མའི་རོལ་པར་བལྟ་བར་བྱའོ༔ བར་བཏང་། གཉིས་པ་དངོས་གཞིའི་སྤྱི་དོན་ལ། སྐྱེ་གནས་བར་དོ། རྨི་ལམ་བར་དོ། བསམ་གཏན་བར་དོ༑ འཆི་ཁ་བར་དོ། ཆོས་ཉིད་བར་དོ། སྲིད་པ་བར་དོ་དང་དྲུག་ཡོད་པའི། སྐྱེ་གནས་བར་དོའི་ཁྲིད་ཡིག་ཀུན་གཞི་རང་གྲོལ་གྱིས། ཕྱི་ནང་གི་སྒྲོ་འདོགས་ཆོད་པ་ཐེའུ་བྱ་ཚང་དུ་འཇུག་པ་ལྟ་བུའི་གདམས་ངག་ནི། དེ་ལས་དང་པོ་སྐྱེ་གནས་བར་དོ་ཉམས་སུ་ལེན་པ་ལ༔ ཀུན་གཞིའི་གནས་ལུགས་གཏན་ལ་དབབ་པ་ལ་གསུམ་སོགས་ནས། ལྷག་མཐོང་རིག་པའི་ཡེ་ཤེས་ངོ་སྤྲད་པའི་ཆོས་ཐུན་དང་པོའོ༔ བར་ནར་འདེད་ཞག་གྲངས་སོ་སོར་སྦྱར་ཞིང་ནང་གསེས་རྣམས་ས་བཅད་ལྡེ་མིག་རང་གྲོལ་ལ་དཔྱོད་དགོས།༈ སྤྱི་དོན་གཉིས་པ་རྨི་ལམ་བར་དོའི་ཁྲིད་ཡིག་འཁྲུལ་བ་རང་གྲོལ་གྱིས། བག་ཆགས་ཀྱིས་མཚམས་སྦྱར་ཞིང་འོག་གསལ་ལམ་དུ་ཁྱེར་བ་མུན་ཁང་དུ་སྒྲོན་མེ་བཏེགས་པ་ལྟ་བུའི་གདམས་ངག་ནི། རྨི་ལམ་བར་དོའི་ཁྲིད་ཡིག་ལའང་གསུམ་སྟེ༔ཉིན་པར་སྒྱུ་ལུས་ཀྱི་ཁྲིད་༴ སོགས་ནས། གྱུར་ཏེ་བར་དོར་གྲོལ་བར་ངེས་སོ༔ བར་ནར་འདེད་བྱ། ནང་གསེས་ཞག་གྲངས་སོགས་ལྡེ་མིག་རང་གྲོལ་ལྟར་དཔྱད། །སྤྱི་དོན་གསུམ་པ་བསམ་གཏན་བར་དོའི་ཁྲིད་ཡིག་རིག་པ་རང་གྲོལ་གྱིས་དྭ་ཕྲུག་མ་དང་འཕྲད་པ་ལྟ་བུ་འམ། སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག་ནི། དེ་ཡང་གོང་དུ་རིག་པ་ངོ་སྤྲད་ཅིང་འདི་ཁོ་ནའོ་ཞེས་བསྟན་པས༔ སོགས་ནས། སངས་རྒྱས་པར་བྱེད་པ་བསམ་གཏན་བར་དོའི་ཁྲིད་ཀྱི་རིམ་པའོ༔ ཞེས་ཚིག་མཐའ་བསྒྱུར།ནང་གསེས་ཞག་གྲངས་སོགས་ལྡེ་མིག་རང་གྲོལ་ལྟར་དཔྱོད། ། སྤྱི་དོན་བཞི་པ་འཆི་ཁ་བར་དོའི་ཁྲིད་ཡིག་འཕོ་བ་རང་གྲོལ་གྱི་གདམས་ངག །མི་གསལ་བ་ལ་གསལ་གདབ་པ་རྒྱལ་པོས་བཀའ་ཐེམ་བསྐུར་བ་ལྟ་བུའི་གདམས་ངག་ནི། དེ་ཡང་གོང་གི་ཁྲེགས་ཆོད་ཀྱི་སྐོར་དང༔ སོགས་ནས། ཤི་བ་ལ་མཁས་པ་གཅིག་གལ་ཆེའོ༔ བར་ནར་འདེད་ལས་ས་བཅད་དམིགས་རྐང་སོགས་ལྡེ་མིག་རང་གྲོལ་ལྟར་བྱའོ། ། སྤྱི་དོན་ལྔ་པ་ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ་གྱིས༑ རང་སྣང་ལ་ཡིད་ཆེས་པ་མ་པང་དུ་བུ་འཇུག་པ་ལྟ་བུའི་གདམས་ངག་ནི། སྐྱེ་གནས་བར་དོའི་ཁྲིད་ཡིག་ཀུན་གཞི་༴ སོགས་ནས། རྒྱས་པར་གཞན་ནས་འབྱུང་ངོ་། ། སྤྱི་དོན་དྲུག་པ་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ་གྱིས་ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག་ནི། སྣང་བ་བཞི་མ་མཐོང་བ་དང༔ ཆོས་ཉིད་༴ སོགས་ནས། འཕྲོ་མཐུད་ནས་གྲོལ་བར་ཐེ་ཚོམ་མེད་དོ༔ བར་ནར་འདེད།ས་བཅད་དང་ཞག་གྲངས་སོགས་ལྡེ་མིག་རང་གྲོལ་ལྟར་བྱ༔ གསུམ་པ་མཇུག་གི་དོན་ལ། ལྡེ་མིག་ནས། སྤྱི་དོན་གསུམ་པ་མཇུག་གི་དོན་ལ། སོགས་ནས། རྒྱས་བཏབ་པ་དང་གསུམ་མོ༔ བར་བརྗོད། སྐབས་འདི་ངག་ཏུ་ཉིན་བསྟར་བར་དོའི་དབྱིངས་སྒྲོལ་གསོལ་འདེབས་མ་ཆག་པར་བྱའོ། །ཕྱག་ལེན་སྤྲོས་བཅས་གནང་ན་ངོ་སྤྲོད་མཐོང་བ་རང་གྲོལ་གྱི་ལག་ལེན་ཟིན་བྲིས་རྒྱ་ར་བས་མཛད་པ་ལྟར་སྤེལ་བར། སྔར་དབང་མ་ཐོབ་པ་ཡིན་ན་དབང་བསྐུར་དགོས་ཞིང་ཐོབ་ན་མ་བྱས་ཀྱང་རུང་། སྔོན་འགྲོ་རང་རྒྱུད་འདུལ་བ་ལྟར་སྡུག་བསྔལ་ལ་བསམ་པ་དང་། དལ་འབྱོར་རྙེད་དཀའ། འཆི་བ་མི་རྟག་པ་རྣམས་རྫོགས་ནས་ཟིན་བྲིས་ལྟར་ན། ལས་དང་པོ་ལ་སྐྱོ་ཤས་བསྐྱེད་པ་ལ། དུར་ཁྲོད་ཀྱི་མི་རོ་བསྐྱལ་བ་ལ་བརྟེན་ནས་མི་རྟག་པར་བསྐུལ་མ་ངོ་སྤྲད་པ་བཏགས། དེ་རྗེས་སྔོན་འགྲོ་རང་རྒྱུད་སྦྱོང་བ། གཏི་མུག་གཉིད་དཀྲོག་ནས། སྐྱབས་འགྲོ། སེམས་བསྐྱེད། ཡིག་བརྒྱ། མཎྜལ། བླ་མའི་རྣམ་འབྱོར།སྐྱེ་གནས། རྨི་ལམ། བསམ་གཏན་བར་དོ་རྣམས་བཏང་རྗེས། འཆི་ཁ་བར་དོའི་ཁྲིད་ཡིག་འཕོ་བ་རང་གྲོལ་ལྟར་སྒོས་ཆོས་མཉམ་པ་ཚར་ནས་སྐབས་འདིར་རང་གཞུང་གི་འཕོ་ཚུལ་གྱི་གདམས་ཁྲིད་དང་། ཆོས་རྒྱུན་གཏེར་གནས་སོགས་བྱིན་རླབས་དོན་བརྒྱུད་མཚུངས་ཕྱིར། ཉི་ཟླ་སངས་རྒྱས་ཀྱི་འཕོ་བ་འཇའ་ཟུག་མ་ཁྲིད་རྒྱུན་ལྟར་རྒྱུད་སྨིན་རྟགས་ཐོན་པར་གནང་ན་ལགས། སྐབས་འདིར་ཟིན་བྲིས་ལྟར་ཁམས་སའི་མི་མོར་བརྟེན་ནས་རྣམ་ཤེས་འབྱུང་འཇུག་གནས་གདམས་དང་མཉམ་གཞག་བསྒོམ་པའི་དཔེ་ལ་ངོ་སྤྲོད་བྱ། དཔོན་མོ་འདོ་ལི་མའི་གཏམ་རྒྱུད་གསུངས།སྐབས་འདིར་ཟབ་དབང་གསུམ་བསྐུར་ཞིང་ཤིན་ཏུ་སྤྲོས་མེད་ཤེལ་རྡོ་ངོ་སྤྲོད་ཉི་ཟེར་མ།སྐུ་གསུམ་ངོ་སྤྲོད་དུག་གསུམ་རང་གྲོལ། སྒྲོན་མ་དྲུག་གི་ངོ་སྤྲོད་སོགས་ཀྱང་གནང་ཆོག་ཡང་ཟིན་བྲིས་ལྟར་སྐྱེ་གནས་བར་དོའི་ཁྲིད་ཉམས་སུ་མྱོང་བར་བརྟེན་ནས། གཞིའི་འོད་གསལ་ངོ་སྤྲོད་པ་གཉིས་ཏེ་སྔོན་ནས་དེ་དག་གི་བར་དོའི་གཞི་སྣང་གི་ངོ་སྤྲོད་དོ། །བར་ཕྱག་ལེན་གནང་། དེ་ནས་ཆོས་ཉིད་བར་དོའི་གཞུང་མཐོང་བ་རང་གྲོལ་སོར་བཞག་མཛད་གསུངས། དེ་རྗེས་ཟིན་བྲིས་ནས་ཆོས་ཉིད་ཡིད་ལ་མི་དྲན་ཞིང་དགེ་སྡིག་འཆོལ་ཉོག་ཏུ་སྤྱོད་པ་རྣམས་སྲིད་པ་བར་དོའི་ངོ་སྤྲོད་པ་ནི། སྲིད་པ་བར་དོའི་ངོ་སྤྲོད་དགེ་སྡིག་རང་གཟུགས་བསྟན་པའི་གདམས་ལྟར་བྱ། ལྷན་ཐབས་དབྱངས་སྙན་ལྷའི་གཎྜེ་ཡང་སྦྱར་ནས། ཡིག་དྲུག་བསྐུལ་བ་དང་། རྩི་དཀར་དྲུང་པའི་རྨི་ལམ་བཤད་པ་སོགས་བྱ། དེ་རྗེས་སྲིད་པ་བར་དོའི་ཁྲིད་གཞུང་རྫོགས་པར་བྱས་ལ།བར་དོའི་སྨོན་ལམ་ཐམས་ཅད་འདོན་པ་ཡང་གནད། དེ་ལྟར་གནང་ན་དམིགས་ཆས་གཞན་རྣམས་ཀྱང་འདིའི་ཁོངས་སུ་ཚང་བར་འདུག་གོ །སྤྱིར་གོང་སྨོས་བཞིན།བར་དོ་དྲུག་གི་ཁྲིད་དེར་སྦྱངས་པ་ཚད་ལྡན་སོང་ན་དོན་ཐམས་ཅད་ཚང་བ་ཡིན་ལ།ཕྱག་ལེན་རྒྱས་པ་འདི་སེམས་རྒྱུད་དང་འདྲེས་ངེས་བྱུང་ན་བྱིན་རླབས་ཆེས་ཆེ་བ་སྨོས་མ་དགོས་རུང་། བྱིས་པའི་རྩེད་མོ་ལྟར་ལས་དུས་ཀྱི་དབང་གིས་དྲན་པ་དཀའ་བར་སྣང་ཞེས། ཀཿཐོག་པཎ་ཆེན་གྱིས་གསུངས་སོ། ། སྐྱེ་འདིར་སྨིན་གྲོལ་ལམ་སྦྱང་བར་དོ་དྲུག །གོམས་འདྲིས་གདེངས་ལྡན་ཆོས་ཉིད་མ་བུ་འདྲེ། །དོན་གཉིས་ལྷུན་གྲུབ་འགྲོ་ཀུན་ཐབས་བདེའི་བར། །བདེ་བླག་བྱེད་དེ་ལམ་འདིའི་ཁྱད་ཆོས་ཡིན། །ཞེས་པའང་རྒྱལ་དབང་པདྨའི་གདུང་འཚོབ་ཁྱབ་བདག་རྡོ་རྗེ་འཆང་གཏེར་ཆེན་གར་དབང་ཆོས་ཀྱི་རྒྱལ་མཚན་གྱི་བཀའ་ཡི་གནང་བ་ཐོབ་ཅིང་། མཁྱེན་བརྩེ་ནུས་པའི་མངའ་བདག་གྲུབ་དབང་བླ་མ་བསོད་ནམས་དཔལ་ལྡན་ནས་ཀྱང་བསྐུལ་མ་མཛད་དོན་བཞིན་རྫོགས་ཆེན་རབ་འབྱམས་པའི་བཀའ་འབངས་ཐ་ཤལ་ཤཱཀྱའི་དགེ་སློང་མཐུ་སྟོབས་རྣམ་རྒྱལ་པས་གང་སྨོས་དམ་པ་མཆོག་གཉིས་ལ་ཡང་། བཀའ་འདྲི་ཞུ་བསྟུན་ཟིན་ཐོར་བགྱིས་པ་ཡོངས་ལ་ཕན་པར་གྱུར་ཅིག །ཅེས་དབེན་རི་བདེ་ཆེན་པདྨ་འོད་གླིང་དུ་བཀའ་འདུས་ཆོས་ཀྱི་རྒྱ་མཚོའི་ད་ལ་ཞལ་ཕྱེ་སྐབས་སུའོ། །ཤྲཱི་མཱཾ་གུ་ར་ཝེ་མ་ཧཱ་ནི་ངྷི་པཱ་དཽ་ཏིཥྛནྟུ། དགེའོ། །

སྤྱི་དོན་གསུམ་པ་བསམ་གཏན་བར་དོའི་ཁྲིད་ལ་གཉིས༔ མཉམ་གཞག་ནམ་མཁའ་སུམ་སྤྲུགས་དང༔ རྗེས་ཐོབ་ཅིར་སྣང་རང་གྲོལ་གྱི་ཁྲིད་དང་གཉིས་སོ༔གཉིས་པ་ལ་བཞི་སྟེ༔ ཡེ་གྲོལ༔ རང་གྲོལ༔ ཅེར་གྲོལ༔ ཡོངས་གྲོལ་དང་བཞིའོ༔དེ་ཡན་ཆད་བསམ་གཏན་བར་དོའི་ཁྲིད་ཡིག་རིག་པ་རང་གྲོལ༔ སྒེག་མོས་མེ་ལོང་ལ་བལྟ་བ་ལྟ་བུའི་གདམས་ངག་གསུམ་པ་ཐལ་ལོ༔ ས་མ་ཡ༔ སྤྱི་དོན་བཞི་པ་འཕོ་བ་དྲན་པ་རང་གྲོལ་གྱི་ཉམས་ཁྲིད་ལ་གཉིས་ཏེ༔ སྦྱང་བ་དང་༔ ལས་ལ་སྦྱར་བ་གཉིས་སོ༔ དང་པོ་ལ་གསུམ་སྟེ༔ འཆི་བ་བརྟག་པ༔ བསླུ་བ༔ འཕོ་བ་སྦྱང་བ་དང་གསུམ་མོ༔ གཉིས་པོ་གཞན་དུ་ཤེས༔ གསུམ་པ་སྦྱང་བ་ལ་གསུམ་སྟེ༔ ལུས་ཀྱི་འཁྲུལ་འཁོར༔ ངག་གི་རླུང་༔ སེམས་ཀྱི་དམིགས་པ་དང་གསུམ་མོ༔ གཉིས་པ་ལ་ལྔ་སྟེ༔ ཆོས་སྐུའི་འཕོ་བ༔ ལོངས་སྐུའི་འཕོ་བ༔ སྤྲུལ་སྐུའི་འཕོ་བ༔ བཙན་ཐབས་ཀྱི་འཕོ་བ༔ ཐ་མལ་པའི་འཕོ་བ་དང་ལྔའོ༔ དེ་ཡན་ཆད་འཆི་ཁ་བར་དོའི་ཁྲིད་ཡིག་འཕོ་བ་དྲན་པ་རང་གྲོལ༔ རྒྱལ་པོའི་བཀའ་ཐེམ་བསྐུར་བ་ལྟ་བུའི་གདམས་ངག་བཞི་པ་ཐལ་ལོ༔ ས་མ་ཡ༔ སྤྱི་དོན་ལྔ་པ་ཆོས་ཉིད་བར་དོའི་ཁྲིད་ལ་བཞི་སྟེ༔ སྔོན་དུ་ལུས་ངག་ཡིད་གསུམ་གྱི་གནད་གཟིར་བ་དང་གཅིག༔ གནད་གསུམ་ལ་བརྟེན་ནས་མངོན་སུམ་རང་ཐོག་ཏུ་དབབ་པ་དང་གཉིས༔ ཉམས་སུ་བླངས་བས་སྣང་བ་བཞིའི་འཆར་ཚུལ་བསྟན་པ་དང་གསུམ༔ མཐའ་རྟེན་རྗེས་ཀྱི་མན་ངག་དང་བཞིའོ༔དང་པོ་ལ་གསུམ་སྟེ༔ ལུས་ཀྱི་གནད་དང་༔ ངག་གི་གནད་དང་༔ ཡིད་ཀྱི་གནད་དང་གསུམ་མོ༔ དང་པོ་ལུས་ཀྱི་གནད་གཟིར་བ་ལ་གསུམ་སྟེ༔ སྤྲུལ་སྐུའི་བཞུགས་སྟངས ་དང་༔ ལོངས་སྐུའི་བཞུགས་སྟངས་དང་༔ ཆོས་སྐུའི་བཞུགས་སྟངས་དང་གསུམ་མོ༔ གཉིས་པ་ངག་ལ་གསུམ་སྟེ༔ བསླབ་པར་བྱ་བ་དང་༔ གནས་པར་བྱ་བ་དང་༔ བརྟན་པར་བྱ་བ་དང་གསུམ་མོ༔ གསུམ་པ་སེམས་ཀྱི་གནད་ལ་གསུམ་སྟེ༔སེམས་ཀྱི་གནད་ལ་གསུམ་སྟེ༔ སེམས་བཞག་ཐབས་དང་༔ འབེན་དང་༔ གནད་གཟིར་བ་དང་གསུམ་མོ༔གཉིས་པ་རང་ཐོག་ཏུ་དབབ་པ་ལ་གསུམ་སྟེ༔ སྒོའི་གནད་དང་༔ ཡུལ་གྱི་གནད་དང་༔ རླུང་གི་གནད་དང་གསུམ་མོ༔ དང་པོ་ལ་གསུམ་སྟེ༔ བཟློག༔ ཕབ༔ ཟུར་གྱིས་བལྟ་བ་དང་གསུམ་མོ༔ གཉིས་པ་ལ་གཉིས་ཏེ༔ ཕྱིའི་དབྱིངས་དང་༔ ནང་གི་དབྱིངས་གཉིས་སོ༔ གསུམ་པ་ལ་གསུམ་སྟེ༔ བཟུང་པ་དང་༔ འཕང་བ་དང་༔ དལ་བར་བརྟན་པ་དང་གསུམ་མོ༔ གསུམ་པ་འཆར་ཚུལ་བསྟན་པ་ལ་བཞི་སྟེ༔ ཆོས་ཉིད་མངོན་སུམ༔ ཉམས་སྣང་གོང་འཕེལ༔ རིག་པ་ཚད་ཕེབས༔ ཆོས་ཉིད་ཟད་པའི་སྣང་བ་དང་བཞིའོ༔ བཞི་པ་རྗེས་ཀྱི་མན་ངག་ལ་བཞི་སྟེ༔ མི་འགུལ་བ་གསུམ་གྱིས་གཞི་བཅའ༔ སྡོད་པ་གསུམ་གྱིས་ཚད་བཟུང་༔ ཐོབ་པ་གསུམ་གྱིས་གཟེར་གདབ༔ གདེང་བཞི་མཐར་ཕྱིན་པ་དང་བཞིའོ༔ དེ་ཡན་ཆད་ཆོས་ཉིད་བར་དོའི་ཁྲིད་ཡིག་མཐོང་བ་རང་གྲོལ༔ མ་པང་དུ་བུ་འཇུག་པ་ལྟ་བུའི་གདམས་ངག་ལྔ་པ་ཐལ་ལོ༔ ས་མ་ཡ༔ སྤྱི་དོན་དྲུག་པ་སྲིད་པ་བར་དོའི་ཁྲིད་ལ་དྲུག༔ གདམས་ངག་དྲུག་གིས་མངལ་སྒོ་བཀག་སྟེ༔ ཡི་དམ་གྱི་ལྷས་མངལ་སྒོ་བཀག་པ༔ བླ་མ་ཡབ་ཡུམ་ཀྱིས་མངལ་སྒོ་བཀག་པ༔ དགའ་བ་བཞིས་མངལ་སྒོ་བཀག་པ༔ སྤོང་སེམས་ཀྱིས་མངལ་སྒོ་བཀག་པ༔ འོད་གསལ་ཀྱིས་མངལ་སྒོ་བཀག་པ༔ སྒྱུ་ལུས་ཀྱིས་མངལ་སྒོ་བཀག་པ་དང་དྲུག་གོ༔དེའང་གཉིས་སུ་འདུས་ཏེ༔ འཇུག་བྱའི་མངལ་སྒོ་བཀག་པ་དང་༔ འཇུག་བྱེད་ཀྱི་གང་ཟག་དགག་པ་དང་གཉིས་སོ༔ དེ་ཡན་ཆད་སྲིད་པ་བར་དོའི་ཁྲིད་ཡིག་སྲིད་པ་རང་གྲོལ༔ ཡུར་བ་རྐང་ཆད་པ་ལ་ཝ་འཛུགས་པ་ལྟ་བུའི་གདམས་ངག་དྲུག་པ་ཐལ་ལོ༔ ས་མ་ཡ༔ སྤྱི་དོན་གསུམ་པ་མཇུག་གི་དོན་ལ་གསུམ་སྟེ༔ ཆོས་ཐམས་ཅད་ཀྱི་དགོངས་དོན་འདུས་པར་བསྟན་པ་དང་༔ ཟབ་པས་རྩིས་ཆེ་བར་གདམས་པ་དང་༔རྗེས་སྨོན་ལམ་གྱིས་རྒྱས་བཏབ་པ་དང་གསུམ་མོ༔ ཟབ་ཆོས་ཉམས་ཁྲིད་དགོངས་པ་རང་གྲོལ་གྱི་ས་བཅད༔ ལྡེའུ་མིག་རང་གྲོལ་ཞེས་བྱ་བ༔ འཁོར་བ་མ་སྟོངས་བར་དུ་མ་རྫོགས་སོ༔ སྤྲེལ་ལོ་ཟླ་བ་བརྒྱད་པའི་ཚེས་བཅུ་གསུམ་ལ༔ ཀང་ཡུལ་ཐང་འབྲོག་དགོན་པའི་གཟིམས་ཁང་དུ༔ བླ་མ་ནམ་མཁའི་མིང་ཅན་གྱིས་བསྐུལ་ནས༔བན་ཆུང་ཉི་ཟླའི་མིང་ཅན་ཁོ་བོས་སྦྱར་རོ༔ ཕྱོགས་དུས་གནས་སྐབས་ཐམས་ཅད་དུ་དར་ཞིང་རྒྱས་པར་གྱུར་ཅིག༔ དགེའོ། དགེའོ། དགེའོ། །