བན་ཚང་དགོན།

== བན་ཚང་དགོན། ==

མཚན་རྒྱས་པར་“ཐུབ་བསྟན་ཤེས་རབ་བཤད་སྒྲུབ་འཕེལ་རྒྱས་གླིང་”ཞེས་ཞུ། རྩེ་ཚོགས་པའི་གཡས་ངོས་རི་སྣའི་སྟེང་དགོན་དེ་མཇལ་རྒྱུ་ཡོད། དགོན་དེ་ནི་ཐོག་མར་འགྲོ་མགོན་ཕག་གྲུའི་གདན་ས་ཡིན་ཅིང་རིམ་བཞིན་བླ་ཐོག་བཅུ་གསུམ་ཙམ་བྱུང་། དེ་རྗེས་སྡེ་པ་ཀུན་བཟང་རྩེའི་དགོན་སྡེར་གྱུར། དགོན་པའི་མཚན་རྒྱས་པ་འདིའང་སྡེ་སྲིད་བྱང་ཆུབ་རྒྱལ་མཚན་གྱིས་གནང་བར་གྲགས། དགེ་འདུན་ཞལ་གྲངས་བདུན་ཅུ་ཙམ་ཟིན། སྔོན་དགོན་དེར་གསེར་ཟངས་སོགས་ཀྱི་སྐུ་བརྙན་མང་པོ་ཡོད་པ་ལ། གཙོ་ཆེ་བ་ཡར་རྗེ་ཨོ་རྒྱན་གླིང་པའི་སྐུ་ཤ་སྐྱེ་བདུན་མ་ཞེས་པའི་གདུང་རྟེན་དེ་མཇལ་རྒྱུ་ཡོད། ཨོ་རྒྱན་གླིང་པ་སྡེ་སྲིད་བྱང་ཆུབ་རྒྱལ་མཚན་དང་ཐུགས་མི་མཐུན་པའི་རྐྱེན་བྱས་དྭགས་པོར་ཕེབས་ཏེ་སྐུ་གཤེགས་རྗེས་སྡེ་པ་ལས་ཅན་པ་ཞིག་གིས་སྐུ་གདུང་མྱང་གྲོལ་དུ་གྲགས་པ་ཐོས་ནས་སྐུ་ཤ་ཅུང་ཞུས་ཤིང་མྱངས་པས་ས་ལས་འཕགས་ཏེ་མི་རིག་པར་འཕུར་ཐུབ་པར་གྱུར་པས་སྐུ་གདུང་རྩ་ཆེར་གྱུར། དེ་རྗེས་སྲིད་སྐྱོང་དེ་མོ་རིན་པོ་ཆེས་སྐུ་གདུང་སྣེ་གདོང་བན་ཚང་དགོན་དུ་གདན་དྲངས་ནས་ཤིང་གི་གདུང་རྟེན་དུ་བཞུགས་སོ་གསོལ། སྐུ་ཤ་ཞུས་པའི་རིལ་བུ་ཁལ་གཅིག་ཙམ་ནོར་གླིང་ཕོ་བྲང་དུ་བཞུགས། དེ་རྗེས་རྒྱལ་མཆོག་བཅུ་གསུམ་པའི་དུས་སྐུ་གདུང་རིན་པོ་ཆེ་རྩེ་ཕོ་བྲང་དུ་བཞུགས་རྒྱུའི་ཐུགས་འདུན་གནང་བར་བསམ་ཡས་ཆོས་སྐྱོང་ཐོག་ཕེབས་ཀྱིས“སྐུ་གདུང་ཆུ་ལྷོ་རྒྱུད་འདི་ལས་གཞན་དུ་སྤོ་མི་རུང་”བའི་བཀའ་ལུང་ཕེབས་སྟབས་རང་འཇགས་སུ་གསོལ་ནས་དུས་འགྱུར་མ་བྱུང་བར་དུ་མཇལ་རྒྱུ་ཡོད།

ད་ལྟ་གསར་བཞེངས་འདུ་ཁང་ནི་སྔོན་དགོན་དེའི་གཡུལ་ཁ་ཡིན་ཅིང་དེའི་ནང་མཁན་སློབ་ཆོས་གསུམ་སོགས་ཀྱི་འདྲ་སྐུ་གསར་བཞེངས་གནང་བ་མཇལ་རྒྱུ་ཡོད།

Read more: https://web.archive.org/web/20141023095806/http://www.thlib.org/places/monasteries/publications/chosphel-book.php#!book=/lho-kha-gnas-yig/wb/b3/#ixzz32KSS6d7W

--ཁང་གསར་ལྷག་པ་ཚེ་རིང་Kangsar LhakpaTsering ༠༦:༢༨, ༢༡ ཟླ་ལྔ་བ། ༢༠༡༤ (UTC)