བདེ་བའི་འབྱུང་གནས་
བདེ་བའི་འབྱུང་གནས་ཞེས་པ་ནི་བྱང་ཆུབ་སེམས་དཔའ་ལ་བྱ་བའི་མཚན་ཞིག་ཡིན་ལ། སྤྱོད་འཇུག་གི་འགྲེལ་པ་ཁག་ནང་རྒྱ་ཆེར་བཤད་ཡོད། བྱང་ཆུབ་སེམས་དཔའ་ནི་འགྲོ་བ་ཀུན་གྱི་བདེ་བའི་འབྱུང་གནས་སུ་གྱུར་པ་ཞིག་ཡིན་ཞིང་། གང་ལ་གནོད་པ་བྱས་ཀྱང་གནོད་ལན་མི་བྱེད་པར་བདེ་བ་འབའ་ཞིག་སྐྱེད་པར་མཛད་པའི་མཚན་ཉིད་ཅན་ཡིན།
མཚན་ཉིད།
[རྩོམ་སྒྲིག]བདེ་བའི་འབྱུང་གནས་ནི་"བཟང་འབྲེལ་ཚེ་གཅིག་སངས་རྒྱས། ངན་འབྲེལ་འཁོར་བ་མཐའ་ཅན་ཞེས་པ་ལྟར་ཡིན་པས་སྙིང་རྗེ་དང་བྱང་ཆུབ་ཀྱི་སེམས་དང་ཐམས་མཁས་དང་སྨོན་ལམ་གྱི་སྟོབས་ཀྱིས་གནས་སྐབས་དང་མཐར་ཐུག་གི་བདེ་བ་དང་འབྲེལ་བ་སྟེ་ཐོབ་པར་མཛད་"[༡]པ་ཞིག་ཡིན། "བྱང་ཆུབ་སེམས་དཔའ་གང་ལ་གནོད་པ་བྱས་ཀྱང་གནོད་པའི་རྐྱེན་དེ་ཉིད་ཁོ་ན་དེས་རྗེས་སུ་འཛིན་པའི་རྒྱུར་གྱུར་ཏེ་མཐར་ཐུག་བྱང་ཆུབ་ཀྱི་བདེ་བར་འབྲེལ་པར་མཛད་པ་མདོར་ན་ཕན་གནོད་ཅིས་འབྲེལ་ནའང་དོན་ཆེན་པོ་དང་ལྡན་པས་བདེ་བའི་འབྱུང་གནས་སུ་གྱུར་"[༢]པ་ལ་ཟེར། རྒྱུ་མཚན། ཞེས་པ་ནི། "རྒྱུ་མཚན་དེ་དག་གི་ཕྱིར་ན་གང་ཟག་གང་ལ་སེམས་བསྐྱེད་ཀྱི་དམ་པ་ཕོངས་པ་མ་ལུས་པ་སེལ་ཞིང་དགོས་འདོད་ཐམས་ཅད་སྟེར་བས་ཡིད་བཞིན་གྱི་ནོར་བུ་རིན་ཐང་ཤིན་ཏུ་ཆེན་པོ་ཅན་ལྟ་བུའི་བྱང་ཆུབ་ཀྱི་སེམས་དེ་ཉིད་སྐྱེས་པའི་སྐྱེས་བུ་དམ་པ་དེ་ཡི་སྐུ་ལ་བདག་གིས་སྒོ་གསུམ་གུས་པ་ཆེན་པོས་ཕྱག་འཚལ་"[༣]ཞིང་སྐྱབས་སུ་མཆི་བ་ཡིན།
ཁྱད་ཆོས།
[རྩོམ་སྒྲིག]གནོད་པ་ལ་བདེ་བ་སྐྱེད་པ། ཞེས་པ་ནི། "བྱང་ཆུབ་སེམས་དཔའ་གང་ལ་བརྙས་ཐབས་ལ་སོགས་པའི་གནོད་པ་བྱས་ཀྱང་། བཟང་འབྲེལ་ཚེ་གཅིག་སངས་རྒྱས། ངན་འབྲེལ་འཁོར་བ་མཐའ་ཅན་ཞེས་པ་ལྟར་ཡིན་པས་སྙིང་རྗེ་དང་བྱང་ཆུབ་ཀྱི་སེམས་དང་ཐམས་མཁས་དང་སྨོན་ལམ་གྱི་སྟོབས་ཀྱིས"[༤]བདེ་བར་འབྲེལ་བར་མཛད་པ་ཡིན། "གནོད་པ་བྱས་ཀྱང་གནོད་ལན་མི་བྱེད་པར་མ་ཟད་བདེ་བ་འབའ་ཞིག་སྐྱེད་པ་དང་འབྲེལ་བའི་བདེ་བའི་འབྱུང་གནས་"[༥]ཞིག་ཡིན། གཅིག་ཏུ་བདེ་བ་སྐྱེད་པ། ནི་"བདེ་བའི་འབྱུང་གནས་ནི་གཅིག་ཏུ་བདེ་བ་ཐམས་ཅད་སྐྱེད་པར་བྱེད་པའི་ཕྱིར་"[༦]ཞེས་གསུངས།
སྐྱབས་འགྲོའི་ཡུལ།
[རྩོམ་སྒྲིག]"འགྲོ་བ་ཀུན་གྱི་བདེ་བའི་འབྱུང་གནས་སུ་གྱུར་པའི་བྱང་ཆུབ་སེམས་དཔའ་དེ་ལ་ཡང་བདེ་བ་དོན་དུ་གཉེར་བའི་སྐྱེ་བོ་ཀུན་གྱི་བསྟེན་པར་བྱ་རིགས་པས་ན་བདག་ཀྱང་སྐྱབས་སུ་མཆིའོ་"[༧] ཞེས་གསུངས་ཤིང་། "གང་ལ་གནོད་པ་བྱེད་ཀྱང་གནོད་བྱེད་བདེ་བ་དང་། འབྲེལ་བར་མཛད་པའི་ཕྱིར་ན་སེམས་ཅན་ཀུན་གྱི་བདེ་བའི་འབྱུང་གནས་སུ་གྱུར་པའི་བྱང་ཆུབ་སེམས་དཔའ་དེ་ལ་སྐྱབས་སུ་མཆིའོ། །"[༨]ཞེས་གསལ།
བསྡུས་དོན།
[རྩོམ་སྒྲིག]བདེ་བའི་འབྱུང་གནས་ནི་བྱང་ཆུབ་སེམས་དཔའ་ལ་བྱ་བའི་མཚན་ཞིག་ཡིན་ལ། དེ་ནི་འགྲོ་བ་ཀུན་གྱི་བདེ་བའི་འབྱུང་ཁུངས་སུ་གྱུར་པ་ཞིག་ཡིན། བྱང་ཆུབ་སེམས་དཔའ་ལ་གནོད་པ་བྱས་ཀྱང་གནོད་ལན་མི་བྱེད་པར་སྙིང་རྗེ་དང་སྨོན་ལམ་གྱི་སྟོབས་ཀྱིས་མཐར་ཐུག་བདེ་བ་དང་འབྲེལ་བར་མཛད་པས་ན་སྐྱབས་འགྲོའི་ཡུལ་དུ་གྱུར་པ་ཞིག་ཡིན།
ལུང་ཁུངས།
[རྩོམ་སྒྲིག]- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར།
- ↑ དཔའ་བོ་གཙུག་ལག་ཕྲེང་བ། སྤྱོད་འཇུག་གི་རྣམ་བཤད་ཐེག་ཆེན་ཆོས་ཀྱི་རྒྱ་མཚོ། ཤིང་དཔར།
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར།
- ↑ མཁན་པོ་ཀུན་དཔལ། སྤྱོད་འཇུག་གི་ཚིག་འགྲེལ་འཇམ་དབྱངས་བླ་མའི་ཞལ་ལུང་། ཤིང་དཔར།
- ↑ རྒྱལ་ཚབ་དར་མ་རིན་ཆེན་ཆེན། སྤྱོད་འཇུག་གི་རྣམ་བཤད་རྒྱལ་སྲས་འཇུག་ངོགས། ཤིང་དཔར།
- ↑ ཤེས་རབ་འབྱུང་གནས་བློ་གྲོས། སྤྱོད་འཇུག་གི་དཀའ་འགྲེལ། ཤིང་དཔར།
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར།
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར།