བདུད་རྩི་
བདུད་རྩི་ཞེས་པ་ནི་ཐོག་མར་ལྷའི་བཏུང་བ་འཆི་མེད་ཀྱི་བདུད་རྩི་ལ་གོ་ཡང་། ནང་པའི་གཞུང་ལུགས་སུ་དམ་པའི་ཆོས་ཟབ་མོ་རྣམས་ལ་དཔེ་རུ་མཚོན་པའི་ཐ་སྙད་དུ་གྱུར་ཏེ། ཇི་ལྟར་བདུད་རྩིས་ལྷ་རྣམས་འཆི་བ་ལས་སྐྱོབ་པ་ལྟར། དམ་པའི་ཆོས་ཀྱིས་ཀྱང་སེམས་ཅན་རྣམས་སྡུག་བསྔལ་དང་འཁོར་བ་ལས་གྲོལ་བར་བྱེད་པའི་ཕྱིར་རོ། །
མཚན་ཉིད།
[རྩོམ་སྒྲིག]འཆི་བ་དང་སྡུག་བསྔལ་སེལ་བར་བྱེད་པའི་ཆོས་ཟབ་མོའི་རྣམ་གྲངས་ཏེ། "ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཞིག་བདག་གིས་རྙེད།"[༡] ཅེས་གསུངས་པ་ལྟར་རོ། །
སྒྲ་བཤད།
[རྩོམ་སྒྲིག]སངས་རྒྱས་པའི་སྐད་དུ་ཨ་མྲྀ་ཏ་ཞེས་པ་སྟེ། ཨ་ནི་མེད་པ་དང་། མྲྀ་ཏ་ནི་འཆི་བ་ལ་གོ་བས། འཆི་བ་མེད་པའི་དོན་ཏོ། །བོད་སྐད་དུ་བདུད་རྩི་ཞེས་པ་ནི་བདུད་བཞི་ལས་རྒྱལ་བའི་རྩི་ཞེས་པའི་དོན་ཏེ། འཆི་བདག་གི་བདུད་སོགས་བདུད་བཞི་པོ་རྣམས་ལས་རྒྱལ་བར་བྱེད་པའི་སྨན་གྱི་རྩི་ལྟ་བུའི་ཆོས་ཞེས་པའོ། །
དཔེ་དོན་སྦྱར་བའི་ཚུལ།
[རྩོམ་སྒྲིག]ཆོས་ཀྱི་བདུད་རྩི།
"བདུད་རྩི་ལྟ་བུའི་སྦྱིན་པ་སྦྱིན་པར་བྱེད་ཅིང་"[༢]ཞེས་དང་། "བྱང་སེམས་ཡང་གཞན་ལ་ཆོས་ཀྱི་བདུད་རྩི་སྦྱིན་པར་བྱེད་ཅིང་"[༣]ཞེས་གསུངས།
མཐོང་ལམ་གྱི་བདུད་རྩི།
"མཐོང་བའི་ལམ་ལ་སོགས་པའི་བདུད་རྩི་སྦྱིན་པར་བྱེད་པས་ལྷ་དང་མི་རྣམས་དགའ་བར་བྱེད་པར་འགྱུར་རོ། །"[༤]ཞེས་གསུངས་པ་ལྟར། མཐོང་བའི་ལམ་སོགས་ལམ་གྱི་ཡོན་ཏན་རྣམས་ཀྱང་བདུད་རྩིར་མཚོན་ཏེ། དེ་དག་གིས་ཉོན་མོངས་པའི་ས་བོན་རྩ་བ་ནས་འཇོམས་པར་བྱེད་པའི་ཕྱིར་རོ། །
ལུང་ཁུངས།
[རྩོམ་སྒྲིག]- ↑ འཇུ་མི་ཕམ། མདོ་སྡུད་པའི་འགྲེལ་པ་ཡུམ་གྱི་དགོངས་དོན་ལ་ཕྱིན་ཅི་མ་ལོག་པར་འཇུག་པའི་ལེགས་བཤད། ལག་བྲིས། ཤོག་ངོས་ 56b
- ↑ ཀརྨ་པ་རང་བྱུང་རྡོ་རྗེ། མདོ་སྡུད་པའི་འགྲེལ་པ་ཡིད་བཞིན་གྱི་ནོར་བུ། ལྕགས་པར། ཤོག་ངོས་ 106
- ↑ ཅོ་ནེ་གྲགས་པ་བཤད་སྒྲུབ། སྡུད་པའི་འགྲེལ་པ་རྒྱལ་བའི་དགོངས་གསལ། ཤིང་དཔར། ཤོག་ངོས་ 43a
- ↑ སློབ་དཔོན་སེངྒེ་བཟང་པོ། སྡུད་པའི་དཀའ་འགྲེལ། ཤིང་དཔར། ཤོག་ངོས་ 118