བདུད་འཇོམས་དག་ཡིག་

བོད་ཀྱི་བརྡ་སྤྲོད་པའི་སྔོན་འགྲོའི་ཡི་གེ་ཀློག་ཚུལ་གྱི་རྣམ་གཞག་ཤེས་བྱའི་སྒོ་འབྱེད།

༄༅། །ཨོཾ་སྭསྟི། །ཀུན་མཁྱེན་ཡེ་ཤེས་རྒྱ་མཚོའི་མཛོད། །བླ་མ་འཇམ་དཔལ་དཔའ་བོ་ལ། །གུས་པས་བཏུད་ནས་གངས་ཅན་པའི། །ཡི་གེའི་ཀློག་ཚུལ་མདོ་ཙམ་དབྱེ། །གང་འདིར་སློབ་དཔོན་སོ་སོ་ཡི། །བཞེད་ཚུལ་དབྱེ་བ་མང་མཆིས་ཀྱང༌། །དངོས་དོན་གོ་སླ་འཛིན་བདེའི་ཕྱིར། །རྣམ་གྲངས་གསུམ་དུ་དྲིལ་ཏེ་འཆད། །དང་པོ་ཡི་གེའི་སྐྱེ་གནས་ལ། །མགྲིན་པའི་གནས་ལས་སྐྱེས་པ་ཡི། །གསལ་བྱེད་ཡི་གེ་འབྲུ་བདུན་ཏེ། །ཀ་ཁ་ག་ང་འ་ཧ་ཨ། །རྐན་ལས་སྐྱེས་པའི་ཡི་གེ་ནི། །གསལ་བྱེད་འབྲུ་བཅུ་དབྱངས་ཡིག་གཉིས། །ཅ་ཆ་ཇ་ཉ་ཙ་ཚ་ཛ། །ཞ་ཡ་ཤ་དང་ཨི་ཨེའོ། །སོ་ལས་སྐྱེས་པའི་ཡིག་འབྲུ་བདུན། །ཏ་ཐ་ད་ན་ཟ་ལ་ས། །མཆུ་ལས་སྐྱེས་པའི་ཡི་གེ་ལ། །གསལ་བྱེད་འབྲུ་ལྔ་དབྱངས་ཡིག་གཉིས། །པ་ཕ་བ་མ་ཝ་ཨུ་ཨོ། །སྤྱི་བོའམ་ལྕེ་རྩེའི་སྟེང་ཕྱོགས་ནས། །སྐྱེས་པའི་ཡིག་འབྲུ་གཅིག་སྟེ་རའོ། །དེ་ལས་ང་ཉ་བ་མ་བཞི། །རང་རང་སྐྱེ་གནས་ཙམ་མ་ཟད། །སྣ་སྒྲའང་ཅུང་ཟད་ལྡན་པ་ཡིན། །གཉིས་པ་ཡི་གེའི་བྱེད་པ་ནི། །མགྲིན་དང་མཆུ་ལས་སྐྱེས་པ་རྣམས། །རང་རང་གནས་ཀྱི་བྱེད་པ་ཅན། །རྐན་བྱུང་རྣམས་ནི་ལྕེ་དབུས་དང༌། །སོ་ལས་བྱུང་རྣམས་ལྕེ་ཡི་རྩེ། །ར་ནི་ལྕེ་རྩེར་ཉེ་བའོ། །གསུམ་པ་རྩོལ་བའམ་བརྗོད་ཚུལ་ལ། །ཕྱི་ཡི་རྩོལ་བ་ཅན་ཞེས་པ། །ཕྱི་རུ་སྒྲ་འབྱིན་བྱེད་རྩོལ་ཏེ། །དེ་ལའང་ཆེ་ཆུང་དབྱེ་བ་ཡིས། །ག་ང་ཇ་ཉ་ད་ན་དང༌། །བ་མ་ཇ་ཝ་འ་ཡ་ར། །ལ་ཧ་ཨ་ཨི་ཨེ་ཨོ་རྣམས། །རྩོལ་བ་ཆེ་བས་སྒྲ་ལྡན་འབོད། །ཀ་ཁ་ཅ་ཆ་ཏ་ཐ་པ། །ཕ་ཙ་ཚ་ཞ་ཟ་ཤ་ས། །རྩོལ་བ་ཞན་ཕྱིར་སྒྲ་མེད་དོ། །གཞན་ཡང་སྒྲ་ཉིད་ཕྱིར་དབྱུང་ཚེ། །དབུགས་ནི་ཆེ་ཆུང་ཁྱད་པར་གྱིས། །ཁ་ཆ་ཐ་ཕ་ཚ་ཞ་ཤ །ས་ཧ་ཨ་ཨི་ཨུ་ཨེ་ཨོ། །འདི་རྣམས་ལ་ནི་སྲོག་ཆེན་དང༌། །ལྷག་མ་རྣམས་ནི་སྲོག་ཆུང་ངོ༌། །དེ་ལས་ཁ་བ་ཤ་ས་ཧ། །བརྗོད་ཚེ་དབུགས་རོ་དྲོ་བའང་ཡིན། །ནང་གི་རྩོལ་བའི་ཁྱད་པར་ནི། །ཨ་ཡིག་མ་གཏོགས་སྲོག་ཆེན་རྣམས། །མགྲིན་པ་གདངས་ནས་བརྗོད་དགོས་ཕྱིར། །ཕྱེ་བའི་རྩོལ་བ་ཅན་ཡིན་ཏེ། །ཨ་ཡིག་མ་ཕྱེ་བཙུམ་པར་བརྗོད། །ཝ་མ་གཏོགས་པའི་སྡེ་པ་ལྔ། །ཡི་གེའི་གནས་རྣམས་འདུ་འཕྲོད་ཀྱི། །རྩོལ་བ་ཆེ་ཕྱིར་རྩོལ་བ་ཅན། །ཡ་ར་ལ་ཝ་རྣམས་ལྷོད་ཕྱིར། །ཅུང་ཟད་ཕྲད་པའི་རྩོལ་བ་ཅན། །དེ་རྣམས་སོ་སོར་ཀློག་པའི་ཚེ། །གནས་དང་བྱེད་རྩོལ་སོ་སོ་དང༌། །མཐུན་པ་ཉིད་དུ་བཀླག་བྱ་ཞིང༌། །ཡང་ནི་གསལ་བྱེད་ཀ་ལྟ་བུ། །མགྲིན་པའི་སྐྱེ་གནས་ཅན་ལ་ཡང༌། །དབྱངས་ཡིག་ཨི་སྦྱར་གི་གུ་ཅན། །བཀླག་པའི་ཚེ་ན་རྐན་བྱུང་གི །ཀློག་ཚུལ་ལྡན་སོགས་ཤེས་པར་བྱ། །སྦྱོར་ཀློག་སྐབས་སུ་འཕུལ་རྟེན་དང༌། །མགོ་སོགས་སོ་སོའི་སྒྲ་འདོན་ཚུལ། །རྗེ་བཙུན་རྩེ་མོའི་གསུངས་ལྟར་ཏེ། །གང་དང་གང་ལ་གང་བཏགས་པ། །གོ་རིམ་བཞིན་དུ་གནས་ནས་དབྱུང༌། །ར་མགོ་ཅན་ལ་ལྕེ་རྩེ་འདར། །ལ་མགོ་ལྕེ་རྩེ་རྒྱ་ཡང་བསྐྱེད། །ས་མགོ་སོ་ཡི་བར་ནས་དབྱུང༌། །ལྷག་མ་རྣམས་ཀྱང་དེ་བཞིན་ཤེས། །གལ་ཏེ་མི་ཕྱིན་གྱུར་པ་ནི། །ཡི་གེ་ཕྲལ་ཞིང་བརྗོད་པར་བྱ། །དཔེར་ན་གྲ་ལ་ག་རའམ། །སྒྲ་ལ་སྒ་ར་ཇི་བཞིན་བཀླག །གས་འཕུལ་ཐོག་མར་རྐན་ནས་དབྱུང༌། །དས་འཕུལ་ལྕེ་རྩེ་ཀློད་པ་ལས། །བ་མས་འཕུལ་བ་ཐོག་མར་ནི། །མཆུ་བཙུམ་པ་ལ་ཁྱད་པར་སྣ། །འས་འཕུལ་གྲེ་བའི་ཕུག་ནས་དབྱུང༌། །འཕུལ་ཞིང་བརྩེགས་པའི་ཡི་གེ་ཡང༌། །གོ་རིམ་བཞིན་དབྱུང་མ་ཕྱིན་ན། །འདི་ཡང་ཕྲལ་ཞིང་བཀླག་པར་གསུངས། །གང་ཡང་ཀློག་པའི་སྐབས་ཀུན་ཏུ། །འཕུལ་རྟེན་སོགས་ཀྱི་སྒྲ་ཟུར་རྣམས། །འཕུལ་ཅན་རྣམས་ལ་འཕུལ་བྱེད་ཀྱི། །ཡི་གེ་རང་རང་སྐྱེ་གནས་དང༌། །མཐུན་པའི་སྒྲ་ཉིད་ཐོག་མར་དབྱུང༌། །མགོ་ཅན་དང་ནི་འདོགས་ཅན་རྣམས། །སོ་སོའི་གནས་དང་མཐུན་པ་ཡི། །རང་སྒྲ་ཐོན་ཙམ་མྱུར་བར་བཀླག །དེ་ལས་འ་མཐའ་ཅན་ཕལ་ཆེར། །མཐའ་བརྟེན་སྒྲ་ཉིད་ཆེར་མི་གསལ། །དེ་མ་གཏོགས་པའི་མཐའ་རྟེན་ཅན། །ཡང་འཇུག་མེད་པ་རྣམས་ལ་ནི། །སོ་སོའི་གནས་མཐུན་སྒྲ་རྗེས་དབྱུང༌། །ཡང་འཇུག་ས་ཡིག་ཅན་རྣམས་ལ། །ས་སྒྲ་དངོས་སུ་མི་གསལ་ཡང༌། །སྒྲ་དེ་འབྱུང་བར་ཉེ་ལྟར་བཀླག །ད་ཡིག་ཡང་འཇུག་ཅན་རྣམས་ནི། །རྗེས་འཇུག་སྔ་མའི་སྒྲ་དེའི་མཐར། །ད་སྒྲ་འབྱུང་ལ་ཁད་ཙམ་དུ། །སྒྲ་ཉིད་མནན་པ་ལྟ་བུར་བཀླག །ཇི་ལྟར་བཀླག་པའི་ཚུལ་ལ་ཡང༌། །དང་པོ་ང་རོ་རྣམས་དང་ནི། །དེ་ནས་སྦྱོར་ཀློག་ལ་འཇུག་བྱ། །མ་ནོར་དག་ཅིང་གསལ་བའི་ངག །རིགས་འདྲའི་སྐྲ་ཤན་མ་ཤོར་བར། །ཤིན་ཏུ་བྱང་བར་ཀློག་པ་གཅེས། །ཚུལ་བཞིན་རིག་པའི་གདོན་པ་པོའི། །བརྗོད་སྒྲ་གང་ཡང་ཕ་རོལ་པོས། །ཐོས་ཙམ་ཉིད་ནས་དེ་ཡི་དོན། །མ་འདྲེས་གོ་ཞིང་རྟོགས་པར་འགྱུར། །འདིར་བསྟན་ཡི་གེའི་བཀླག་ཚུལ་ནི། །བོད་ཡིག་ཁོ་ནའི་དབང་བྱས་ཀྱི། །ཁྱད་པར་སྔགས་ཀྱི་བཀླག་ཐབས་སོགས། །འདི་རུ་མ་སྤྲོས་གཞན་ལས་ལོངས། །ཇི་སྙེད་ཤེས་བྱར་འཇུག་པའི་སྒོ། །ཐོག་མའི་ལམ་ཆེན་འདི་ཡིན་ཕྱིར། །ཀུན་ལ་རླུང་ལྟར་གྲགས་མོད་ཀྱང༌། །ཚུལ་བཞིན་ཀློག་པ་ཤིན་ཏུ་དཀོན། །དེང་སང་སྐྱེ་བོ་ཕལ་ཆེར་ནི། །གྲགས་པ་ཁོ་ནའི་རྗེས་འགྲོ་ཞིང༌། །ཤེས་ལོ་ཙམ་གྱིས་ཡིད་མགུ་ན། །ཀློག་དོན་ཞིབ་ཏུ་སུ་ཞིག་འཚོལ། །དེས་ན་འདི་ལྟས་ཕན་དཀའ་ཡང༌། །རང་གི་སློབ་བུས་བསྐུལ་ཕྱིར་དང༌། །འགའ་ལ་དྲན་གསོར་འགྱུར་སྙམ་ནས། །འཇིགས་བྲལ་ཡེ་ཤེས་རྡོ་རྗེས་སྦྱར། །ཅུང་ཟད་འབད་པའི་བསོད་ནམས་གང༌། །འགྲོ་བ་རྣམས་ཀྱིས་ཡོངས་ཐོབ་ནས། །ཀུན་ཀྱང་ཐམས་ཅད་མཁྱེན་པའི་གཏེར། །སྨྲ་བའི་སེང་གེ་ཉིད་གྱུར་ཅིག།། །།སརྦ་དཱ་མངྒ་ལཾ།། 


དག་ཡིག་མདོར་བསྡུས་པད་དཀར་ཆུན་པོ་བྱིས་པ་དགའ་བའི་རྣ་རྒྱན།

༄༅། །ཨོཾ་སྭ་སྟི། མཁའ་མཉམ་ཡེ་ཤེས་འོད་ཟེར་གྱིས། །འགྲོ་བའི་རྨོངས་མུན་མཐར་མཛད་པ། །འཇམ་དཔལ་སྨྲ་བའི་ཉི་མ་དེས། །བདག་བློའི་པད་ཚལ་སྐྱོང་བར་མཛོད། །གང་འདིར་ཡོན་ཏན་ཀུན་གྱི་གཞི། །ཡི་གེའི་སྦྱོར་བ་ལས་བརྩམས་ཏེ། །བྱིས་པ་གསར་བུའི་འཇུག་སྒོ་རུ། །དག་ཡིག་ཉུང་གསལ་གོ་བདེར་འཆད། །དབྱངས་ནི་ཨི་ཨུ་ཨེ་ཨོ་ཞེས། །གི་གུ་ཞབས་ཀྱུ་འགྲེང་བུ་དང༌། །ན་རོ་རྣམས་ཏེ་ཇི་སྙེད་པའི། །ཡི་གེ་ཀུན་ལ་སྦྱོར་བྱ་ཡིན། །གསལ་བྱེད་ཀ་སོགས་སུམ་ཅུའོ། །དེ་ལས་ཡ་བཏགས་ཐོབ་པ་བདུན(ཀྱ་ཁྱ་གྱ་པྱ་ཕྱ་བྱ་མྱ)། །ར་བཏགས་བཅུ་གཅིག(ཀྲ་ཁྲ་གྲ་ཏྲ་དྲ་པྲ་ཕྲ་བྲ་མྲ་སྲ་ཧྲ)ལ་བཏགས་དྲུག(ཀླ་གླ་བླ་རླ་ཟླ་སླ)། །ཝ་ཟུར་བཏགས་པ་བཅུ་གཉིས་(ཀྭ་ཁྭ་གྭ་ཉྭ་ཏྭ་དྭ་ཚྭ་ཛྭ་ཞྭ་ཟྭ་རྭ་སྭ)དང༌། །ར་མགོ་བཅུ་གཉིས་(རྐ་རྒ་རྔ་རྗ་རྙ་རྟ་རྡ་རྣ་རྦ་རྨ་རྩ་རྫ)ལ་མགོ་དགུ(ལྐ་ལྒ་ལྔ་ལྕ་ལྗ་ལྟ་ལྡ་ལྤ་ལྦ)། །ས་མགོ་བཅུ་གཅིག་(སྐ་སྒ་སྔ་སྙ་སྟ་སྡ་སྣ་སྤ་སྦ་སྨ་སྩ)རྣམས་ཤེས་བྱ། །ག་ང་ད་ན་བ་མ་འ། །ར་ལ་ས་རྣམས་རྗེས་འཇུག་བཅུ། །ད་དང་ས་གཉིས་ཡང་འཇུག་སྟེ། །ད་ནི་ན་ར་ལ་གསུམ་དང༌། །ས་ནི་ག་ང་བ་མར་ཐོབ། །ག་ད་བ་མ་འ་སྔོན་འཇུག །རྗེས་འཇུག་མིང་མཐའི་ཡི་གེ་ལ། །ན་རོ་སྦྱར་བ་རྫོགས་ཚིག་སྟེ། །དཔེར་ན་མཆོག་གོ་རྒྱུ་བཟང་ངོ༌། །ཡོད་དོ་ཡིན་ནོ་དོན་གྲུབ་བོ། །འཛོམ་མོ་དགའ་འོ་ངོ་མཚར་རོ། །གཞལ་ལོ་ཤེས་སོ་ལྟ་བུ་དང༌། །དྲག་ཡོད་མཐའ་རུ་ཏོ་དང་ནི། །མཐའ་མེད་རྣམས་ལ་འོ་སྦྱོར་ཏེ། །རྗེས་སུ་དྲན་ཏོ་གཞན་ཟེརད་ཏོ། །སྩལད་ཏོ་བདེ་འོ་ལྟ་བུའོ། །དྲིས་སམ་སྡུད་ཚིག་སྐབས་སུ་ནི། །མཐའ་རྟེན་རྣམས་ལ་མ་སྦྱར་ཞིང༌། །སྐབས་འགར་ར་ལ་ཏམ་དང་ནི། །འདོགས་ཅན་རྐྱང་པར་འམ་སྟེ་དཔེར། །འདུག་གམ་བྱུང་ངམ་དེ་ཡོད་དམ། །ཡིན་ནམ་གྲུབ་བམ་ལམ་བསྒོམ་མམ། །འདའ་འམ་འགྱུར་རམ་དོན་འཚལ་ལམ། །ཤེས་སམ་ཟེར་ཏམ་གཏམ་གོ་འམ། །ཁའམ་ཞེས་པ་ལྟ་བུའོ། །ད་བ་ས་ཀྱི་ག་ང་གི །ན་མ་ར་ལའི་རྗེས་སུ་གྱི། །འ་དང་རྐྱང་པ་མཐའ་མེད་འི། །རྐང་པ་སྐོང་ཚེ་ཡི་སྟེ་དཔེར། །ཁྱོད་ཀྱི་རྒྱབ་ཀྱི་གཡས་ཀྱི་ཆ། །བདག་གི་གདོང་གི་ངོས་ན་མཆིས། །མདུན་གྱི་རུམ་གྱི་སྐོར་གྱི་ནི། །མངལ་གྱི་སྒོ་དེ་བདག་ལ་སྟོན། །རྩེ་དགའི་དགའ་བ་བདེ་བའི་མཆོག །ལྷ་ཡི་བདེ་བའི་དཔལ་ལྟར་རོ། །ག་བ་ད་དྲག་ཅན་མཐར་ཏུ། །ང་ད་ན་མ་ར་ལ་དུ། །ས་སུ་འ་དང་འདོགས་ཅན་དང༌། །རྐྱང་པ་རུ་སྟེ་དཔེ་རིམ་བཞིན། །རྟག་ཏུ་རབ་ཏུ་ཀུན་ཏུ་དགའ། །ཕ་རོལ་ཏུ་ཕྱིན་བགྲང་དུ་མེད། །བཅུད་དུ་འཁྱིལ་འདི་བསྟེན་བཞིན་དུ། །གམ་དུ་མྱུར་དུ་མཇལ་དུ་འགྲོ། །གནས་སུ་མཐའ་རུ་འདོད་འཇོ་རུ། །ཁ་རུ་ཞེས་པ་ལྟ་བུའོ། །ད་དེ་ན་ར་ལ་ས་ཏེ། །ག་ང་བ་མ་འ་རྣམས་དང༌། །འདོགས་ཅན་རྐྱང་པར་ས་སྟེ་དཔེར། །གུས་པས་བཏུད་དེ་ལག་བཀན་ཏེ། །བསྐྱར་ཏེ་གཞལ་ཏེ་ཆས་ཏེ་བྱུང༌། །སྐྲག་སྟེ་གསང་སྟེ་གོས་བཀབ་སྟེ། །འཁུམ་སྟེ་དམའ་སྟེ་ཡིབ་ནས་གདའ། །སྙིང་ཡང་རྗེ་སྟེ་ཉམ་ང་སྟེའོ། །ག་ད་བ་སའི་རྗེས་སུ་ཀྱང༌། །ང་འ་ན་མ་ར་ལ་དང༌། །འདོགས་ཅན་རྐྱང་མཐར་ཡང་སྟེ་དཔེར། །བདག་ཀྱང་འབད་ཀྱང་དེ་ཐོབ་ཀྱང༌། །དེས་ཀྱང་འོན་ཀྱང་གྲངས་མང་ཡང༌། །འགའ་ཡང་གཞན་ཡང་དུས་ནམ་ཡང༌། །སླར་ཡང་མཇལ་ཡང་ཐུགས་མགུ་ཡང༌། །ང་ཡང་ཡིད་ལའང་དེ་འདྲའོ། །ག་ད་བ་དང་ད་དྲག་མཐར། །ཅིང་ཅེས་ཅེ་ན་ཅིག་དང་ནི། །ས་མཐར་དམིགས་བསལ་ཤིང་ཐོབ་དཔེར། །གནག་ཅིང་རྒོད་ཅིང་གཏིང་ཟབ་ཅིང༌། །མཁྱེན་ཅིང་མཚར་ཅིང་བཀའ་སྩལ་ཅིང༌། །མཛེས་ཤིང་ཡིད་འོང་བག་ཕེབས་ཤིང༌། །རྟག་ཅེས་ཡོད་ཅེས་གྲུབ་ཅེས་ཐོས། །བརྒྱནད་ཅེས་ཟེརད་ཅེས་ནོར་སྩལད་ཅེས། །སུ་འདུག་ཅེ་ན་བླ་མ་སྟེ། །ཅི་མཛད་ཅེ་ན་དབང་བསྐུར་རོ། །སུས་ཐོབ་ཅེ་ན་ཕྱུག་པོ་ཚོས། །ཤོག་ཅིག་སྡོད་ཅིག་དཔལ་ཕོབ་ཅིག །སྟོནད་ཅིག་གྱུརད་ཅིག་མྱུར་སྩོལད་ཅིག་གོ །ང་འ་ན་མ་ར་ལ་དང༌། །འདོགས་ཅན་རྐྱང་པ་རྣམས་ལ་ནི། །ཞིང་ཞེས་ཞེ་ན་ཞིག་ཐོབ་དཔེར། །དྲང་ཞིང་དགའ་ཞིང་རབ་སྙན་ཞིང༌། །འཇམ་ཞིང་དར་ཞིང་ཕྱག་འཚལ་ཞིང༌། །བདེ་ཞིང་ཟ་ཞིང་བྱུང་ཞེས་ཐོས། །གདའ་ཞེས་དྲན་ཞེས་འདི་ཙམ་ཞེས། །འགྱུར་ཞེས་འཁྲུལ་ཞེས་བསྡུ་ཞེས་ཟེར། །མཁས་པ་ཞེས་བྱས་སྨྲ་ཞེས་བཤད། །སུ་བྱུང་ཞེ་ན་ཧོར་འདྲ་སྟེ། །དུ་གདའ་ཞེ་ན་མང་པོའོ། །སུས་ཡིན་ཞེ་ན་རྒྱལ་པོའི་སྟེ། །ཁྲིམས་ཀྱིས་དབེན་ནམ་ཞེ་ན་དབེན། །ཅི་བསྐོར་ཞེ་ན་རྒྱལ་ཁམས་ཏེ། །གང་འཚལ་ཞེ་ན་ནོམ་པའོ། །ཅི་བགྱི་ཞེ་ན་སྐྱེལ་བ་སྟེ། །སུ་ལ་ཞེ་ན་སྨད་འཚོང་ལའོ། །ཅུང་ཞིག་འགའ་ཞིག་གཞན་ཞིག་ཏུ། །ནམ་ཞིག་སྦྱོར་ཞིག་ངལ་ཞིག་གསོ། །རེ་ཞིག་འདུག་ནས་ཉ་ཞིག་ཉོའོ། །ས་མཐར་དམིགས་བསལ་ཞེས་མ་གཏོགས། །ཤིང་ཤིག་ཤེ་ན་ཐོབ་སྟེ་དཔེར། །མཛེས་ཞེས་ཐོས་ཤིང་ལྟོས་ཤིག་བྱས། །དེ་ཅིས་ཤེ་ན་འདོད་གདུང་གིས་སོ། །ག་ད་བ་ས་ན་མར་པ། །ང་འ་ར་ལ་འདོགས་ཅན་དང༌། །རྐྱང་མཐར་པ་བ་ཅི་རིགས་ཏེ། །ཀློག་པ་བཤད་པ་ལེགས་སློབ་པ། །ཤེས་པ་འཛིན་པ་དོན་བསམ་པ། །ཁང་པ་གང་བ་མདའ་པ་དང༌། །མཛའ་བ་གྱུར་པ་རབ་འབར་བ། །འཁྲུལ་པ་གྲོལ་བ་དོན་བསྡུ་བ། །ཞི་བ་ཚ་བ་ལྟ་བུའོ། །གཞན་ཡང་དཔྱིད་ཀ་ཐད་ཀ་དང༌། །མོན་ཁ་སེར་ཁ་རལ་ཁ་དང༌། །མཐིང་ག་སྙིང་ག་གདུང་མ་དང༌། །ལྟད་མོ་སྟོན་མོ་སྟག་མོ་སོགས། །བརྗོད་བདེ་འདྲེན་པ་ཤིན་ཏུ་མང༌། །ཅི་ཇི་སུ་གང་སྤྱི་སྒྲ་སྟེ། །ཅི་ནི་ཅི་ཞིག་ཅི་སྟེ་དང༌། །ཅི་སླད་ཅི་འདྲ་ཅི་ཕྱིར་རོ། །ཁྱོད་ཀྱི་གྲོགས་དེ་བདག་ཡིན་གྱི། །ངའི་གོས་མཁས་པའི་ཡོན་ལྟར་རོ། །ད་དྲག་ཡོད་དང་མེད་པའང༌། །འདས་དང་མ་འོངས་དབྱེ་བས་ཤེས། །ད་ཡིག་དངོས་ཉིད་ཕྱི་དུས་འདིར། །འབྲི་སྲོལ་མེད་ཀྱང་དོན་ཐོབ་ངེས། །ལྷུག་པའི་དོན་མང་མིང་མཚམས་དང༌། །དོན་འབྲིང་འབྱེད་དང་དོན་ཉུང་རྫོགས། །ཚིགས་བཅད་མཐའ་མར་ཆིག་ཤད་བྱ། །རྫོགས་ཚིག་མཐའ་ཅན་ལྷུག་པ་དང༌། །ཚིགས་བཅད་རྐང་མཐར་ཉིས་ཤད་ཐོབ། །དོན་ཚན་ཆེན་པོ་རྫོགས་པ་དང༌། །ལེའུའི་མཚམས་སུ་བཞི་ཤད་དགོས། །ང་ཡིག་མ་གཏོགས་ཤད་གོང་དུ། །ཚེག་མེད་འོན་ཀྱང་འགའ་ཞིག་གིས། །ཚིགས་བཅད་དཀྱུས་སུ་ཚེག་ཤད་དེ། །ང་མཐར་ཤད་གོང་ཚེག་གཉིས་རེ། །འབྲི་བའི་ལག་རྒྱུན་དག་ཀྱང་སྣང༌། །
དེ་ལྟར་དག་ཐོབ་སྤྱི་ཡི་ཆིངས། །གལ་ཆེ་རགས་བསྡུས་ཙམ་བཤད་ནས། །ད་ནི་འདྲའམ་སྙམ་པ་ཡི། །ཚིག་སྒྲའི་དབྱེ་བ་ཅུང་ཟད་འགྲེལ། །རྒྱལ་བའི་བཀའ་ནི་བ་བཀའ་ཡིན། །ངལ་བའི་དཀའ་བ་ད་དཀའ་ལ། །རོ་སྐ་བ་ནི་ས་སྐའོ། །རི་དྭགས་རྒོ་བ་ར་རྒོ་ཡིན། །ཁང་པའི་སྒོ་ནི་ས་སྒོ་ལ། །གོས་བགོ་བ་ནི་བ་བགོ་སྟེ། །བཀའ་བསྒོ་བ་འོག་ས་བསྒོའོ། །ན་ཚོད་རྒས་པ་ར་རྒ་ཡིན། །རྟ་ཡི་སྒ་ནི་ས་སྒ་ལ། །ཡིད་དགའ་བ་ནི་ད་དགའ་སྟེ། །སྨན་གྱི་ལྒ་ནི་ལ་ལྒའོ། །བཞོན་པའི་རྟ་ནི་ར་རྟ་ཡིན། །སྟ་ཟུར་སྟ་ནི་ས་སྟ་ལ། །ལྟ་སྟངས་ལྟ་གྲུབ་ལ་ལྟ་སྟེ། །མིག་གིས་བལྟ་བ་བ་ལ་བལྟའོ། །དུས་ཀྱི་སྔ་བ་ས་སྔ་ཡིན། །གྲངས་ཀྱི་ལྔ་ནི་ལ་ལྔ་ལ། །བརྡུང་བའི་རྔ་ནི་ར་རྔ་སྟེ། །ཞེ་སའི་མངའ་ནི་མ་མངའ་འོ། །ཉེ་དུའི་གཉེན་ནི་ག་གཉེན་ཡིན། །ས་བདག་གཉན་ལ་འགྲེང་བུ་མེད། །རེག་བྱ་མཉེན་པ་མ་མཉེན་ཏེ། །བསྙེན་བསྐུར་བ་འོག་ས་བསྙེན་ནོ། །ཐུགས་མཉེས་པ་ནི་མ་མཉེས་ལ། །དངོས་གྲུབ་བརྙེས་པ་བ་རའི་བརྙེས། །བརྙས་སྨོད་འགྲེང་བུ་མེད་པའོ། །རྣ་བར་སྙན་པ་ས་སྙན་ཡིན། །ཆོས་མཉན་པ་ནི་མ་མཉན་ལ། །གཟུགས་བརྙན་བ་འོག་ར་བརྙན་ནོ། །རོ་གཅིག་འདྲེས་པ་ད་འདྲེས་ཡིན། །རིགས་མཚུངས་འགྲེས་སྦྱོར་ག་འགྲེས་ཏེ། །ཞེ་འགྲས་ལ་ནི་འགྲེང་བུ་མེད། །ནད་ཁྲག་གཏར་ནི་ག་གཏར་ལ། །བསྟར་ལ་བརྒྱུས་པ་བ་ས་བསྟར། །ཆས་གཟབ་པའང་དེ་བཞིན་ནོ། །ཕུག་གི་གཏན་ནི་ག་གཏན་ཡིན། །གདིང་བའི་སྟན་ནི་ས་སྟན་ལ། །དམ་ཆོས་བསྟན་པ་བ་ས་བསྟན། །མི་འགྱུར་བརྟན་པ་བ་ར་བརྟན་ནོ། །ཡོད་མེད་གདའ་ནི་ག་གདའ་ཡིན། །ཞིམ་པའི་བདའ་ནི་བ་བདའ་ལ། །སྟོན་པའི་བརྡ་ནི་བ་ར་བརྡའོ། །མེད་པའི་ལྐལ་ནི་ལ་ལྐལ་ཡིན། །སྐལ་ལྡན་སྐལ་ཐོབ་ས་སྐལ་ཏེ། །དུས་ཀྱི་བསྐལ་པ་བ་སའི་བསྐལ་ལོ། །དྲི་ཡི་བདུག་པ་བ་བདུག་ཡིན། །དབུབ་པའི་གདུགས་ནི་ག་གདུགས་ལ། །མ་རུང་གདུག་ལ་ཡང་འཇུག་མེད། །ནུས་པ་རྡུགས་པ་ར་རྡུགས་ཏེ། །ཉོན་མོངས་སྡུག་བསྔལ་ས་སྡུག་གོ །ཚོགས་པའི་གྲ་ནི་ག་གྲ་ཡིན། །ཚེམ་པོའི་དྲ་གཏུབ་ད་དྲ་ལ། །སེམས་སྟོར་སེར་སྣ་བ་བྲ་སྟེ། །སྲོག་ཆགས་བྲ་བའང་དེ་དང་འདྲའོ། །མི་གཙང་གཅིན་ནི་ག་གཅིན་ཡིན། །འབྱར་བྱེད་ས་ལ་པ་བཏགས་སྤྱིན་ནོ། །བློ་ཡིས་དཔྱད་ནི་ད་དཔྱད་ཡིན། །བྱ་སྤྱད་ས་ལ་པ་བཏགས་སྤྱད། །དུམ་བུར་བཅད་པ་བ་བཅད་དོ། །ཆུ་ཡི་རྦ་རླབས་ར་རྦ་ཡིན། །མི་མངོན་སྦས་པ་ས་སྦ་ལ། །མགུལ་གྱི་ལྦ་བ་ལ་ལྦའོ། །དབང་པོའི་མིག་ནི་མིག་རྐྱང་ཡིན། །ཡིད་ཀྱི་དམིགས་པ་ད་དམིགས་པ། །དུད་འགྲོའི་རྨིག་པ་ར་རྨིག་གོ །སྡང་བའི་དགྲ་ནི་ད་དགྲ་ཡིན། །སྙན་པའི་སྒྲ་ནི་ས་སྒྲ་ལ། །འབུབ་སྦྲ་ས་ལ་བ་བཏགས་སྦྲའོ། །ནགས་ཚལ་དགའ་ཚལ་ཚལ་རྐྱང་ཡིན། །ཕྱག་འཚལ་ཞེ་ས་འ་འཚལ་ལ། །ཚོན་གྱི་མཚལ་ནི་མ་མཚལ་ལོ། །བཏུང་བའི་ཆང་ནི་ཆང་རྐྱང་ཡིན། །འཛིན་པའི་འཆང་ནི་འ་འཆང་ལ། །ཐུར་དུ་འཕྱང་བ་ཕ་འཕྱང་ངོ༌། །ཡན་ལག་མགོ་ནི་མ་མགོ་སྟེ། །ཐོག་མའམ་འཕེལ་བ་འ་འགོའོ། །རྗེ་བཙུན་རྗེ་བོ་ར་རྗེ་ལ། །སྐྱེས་པའི་ཕོ་མཚན་མ་མཇེའོ། །མགྲིན་པའི་ཞེ་ས་མ་མགུལ་ཏེ། །གཡོ་བའི་འགུལ་ནི་འ་འགུལ་ལོ། །ངག་གི་གསུང་ནི་ག་གསུང་ལ། །སྲུང་སྐྱོབ་ས་ལ་ར་བཏགས་སྲུང༌། །ཕན་པའི་དྲིན་ནི་ད་དྲིན་ཏེ། །ཉོ་ཚོང་སྐྱེན་པ་བ་བྲིན་ནོ། །སྙན་པའི་གྲགས་པ་ག་གྲགས་ལ། །རི་རྡོའི་བྲག་ནི་བ་བྲག་སྟེ། །ཚར་གཅོད་དྲག་ནི་ད་དྲག་གོ །རིན་ཆེན་དངུལ་ནི་ད་དངུལ་ཏེ། །ལུས་ཀྱི་རྔུལ་ཆུ་ར་རྔུལ་ལོ། །སྐུར་བ་འདེབས་པ་ས་སྐུར་ཏེ། །བསྟོད་བསྔགས་བཀུར་སྟི་བ་འཕུལ་བཀུར་རོ། །དང་པོའི་སྔོན་ནི་ས་སྔོན་ཡིན། །མིག་གིས་མཐོང་བ་མ་མངོན་ལ། །རི་དྭགས་གསོད་པ་ར་རྔོན་ནོ། །ཉམས་མྱོང་ཉམས་དགའ་ཉམས་གཞིག་འདྲ། །ཉམ་ཐག་ཉམ་ལ་ཡང་འཇུག་མེད། །མང་བའི་སྒྲ་ནི་ས་སྙེད་དེ། །གསར་དུ་རྙེད་པ་ར་རྙེད་དོ། །ཁ་ཡི་ལྕེ་ནི་ལ་ལྕེ་ལ། །ཨ་ཅེའི་ཅེ་ནི་ཅེ་རྐྱང་ངོ༌། །སེམས་བྱུང་བློ་གྲོས་བ་བློ་སྟེ། །ཤ་ཡི་གློ་བ་ག་གློའོ། །ནང་ཁྲོལ་མཁལ་མ་མ་མཁལ་ལ། །འགེལ་བའི་ཁལ་མ་ཁལ་རྐྱང་ངོ༌། །དོན་རྟོགས་གོ་བ་ར་རྟོགས་ཡིན། །རྣམ་པར་རྟོག་ལ་ཡང་འཇུག་མེད། །ཁོངས་སུ་གཏོགས་པ་ག་གཏོགས་ལ། །བཀྲེས་པའི་ལྟོག་ནི་ལ་ལྟོག་གོ །འོག་ཏུ་གནོན་པ་ག་གནོན་ཡིན། །མང་དུ་གཏོང་བ་ས་སྣོན་ནོ། །མཚོན་ཆ་རྣོ་བ་ར་རྣོ་སྟེ། །བསམ་མནོ་གཞིག་པ་མ་མནོའོ། །ལུས་ཀྱི་དཔྱི་ནི་ད་དཔྱི་ལ། །ཐུན་མོང་སྤྱི་ཁྱབ་ས་སྤྱིའོ། །སྟོང་ཉིད་གཉུག་མ་ག་གཉུག་སྟེ། །སྐྱེས་པའི་མདའ་སྨྱུག་ས་སྨྱུག་གོ །གཞན་སྲོག་གཅོད་པ་ག་གསོད་དེ། །དགེ་བའི་བསོད་ནམས་བ་བསོད་དོ། །གཉིད་དུ་མནལ་བ་མ་མནལ་ཡིན། །སྣམ་བུའི་སྣལ་མ་ས་སྣལ་ལ། །རྣལ་འབྱོར་རྣལ་ནི་ར་རྣལ་ལོ། །ག་བ་ད་དྲག་ཏུ་རྐྱང་སྟེ། །བུད་མེད་མོ་མཚན་ས་སྟུའོ། །ཤུགས་བདོའི་རྒོད་ནི་ར་རྒོད་ལ། །གད་མོ་བགད་པ་ད་དགོད་དེ། །ཚོམ་བུ་དགོད་པའང་དེ་དང་འདྲ། །འོད་གསལ་བ་ནི་ག་གསལ་ལ། །དམིགས་ཀྱིས་གསལ་བའང་དེ་བཞིན་ཏེ། །སྐྱོན་བསལ་བ་ནི་བ་བསལ་ལོ། །སེམས་ལ་དྲན་པ་ད་དྲན་ལ། །གཡོག་གི་བྲན་ནི་བ་བྲན་ནོ། །གཞན་ལ་རྡེག་པ་ར་རྡུང་སྟེ། །ཁང་པའི་གདུང་མ་ག་གདུང་ངོ༌། །ལོག་འདྲེན་བདུད་ནི་བ་བདུད་ལ། །དབང་དུ་སྡུད་པ་ས་སྡུད་དོ། །བཟང་ངན་མཉམ་པ་མ་མཉམ་སྟེ། །ཡིན་ནམ་སྙམ་པ་ས་སྙམ་མོ། །ཐད་ཀ་ཐད་དྲང་ཐད་རྐྱང་ལ། །བྱ་བ་འཐད་འོས་འ་འཐད་དོ། །གནོད་པས་གཙེ་བ་ག་གཙེ་ཡིན། །རྩེད་མོ་རྩེ་བ་ར་རྩེ་ལ། །སྙིང་བརྩེ་བ་འོག་ར་བརྩེའོ། །ཐོད་གཏུག་གདོང་གཏུག་ག་གཏུག་ལ། །མི་གཙང་རྟུག་པ་ར་རྟུག་གོ །གཞན་ལ་སྟེར་བ་ས་སྟེར་ལ། །མི་ཟད་གཏེར་ནི་ག་གཏེར་རོ། །མུན་པའི་སྨག་ནི་ས་སྨག་ལ། །གཡུལ་གྱི་དམག་དཔུང་ད་དམག་གོ །གཅན་གཟན་སྟག་ནི་ས་སྟག་ཡིན། །མི་འགྱུར་རྟག་པ་ར་རྟག་ལ། །ཕྱེ་མར་འཐག་པ་བ་བཏགས་ཏེ། །བརྟག་དཔྱད་བ་འོག་ར་བརྟག་གོ །དོན་ལས་མི་འདའ་འ་འདའ་ཡིན། །མྱ་ངན་འདའ་བའང་དེ་བཞིན་ལ། །ལུང་པའི་ཕུ་མདའ་མ་མདའ་སྟེ། །འཕེན་པའི་མདའ་ཡང་དེ་དང་འདྲའོ། །བྱ་བ་མངགས་པ་མ་མངགས་ཏེ། །སྒྲོག་པའི་སྙན་དངགས་ད་དངགས་སོ། །བྱ་བ་བཤོལ་བ་བ་བཤོལ་ལ། །ཐོང་པའི་གཤོལ་མདའ་ག་གཤོལ་ལོ། །དུས་ཀྱི་སྔ་ཕྱི་ག་གཟོད་དེ། །བཟོད་སྲན་ཆེ་བ་བ་བཟོད་དོ། །རླན་གྱི་འདྲུལ་བ་ད་འདྲུལ་ལ། །ལམ་གྱི་འགྲུལ་ནི་ག་འགྲུལ་ལོ། །ཟབ་པའི་གཏིང་ནི་ག་གཏིང་ཡིན། །རྗེས་མའམ་རྐང་རྟིང་ར་རྟིང་ལ། །གདན་སོགས་བཏིང་བ་བ་བཏིང་ངོ༌། །སྦྱིན་པ་གཏོང་བ་ག་གཏོང་སྟེ། །མེད་པའི་སྟོང་པ་ས་སྟོང་ངོ༌། །གྲང་བའི་བསིལ་གྲིབ་བ་བསིལ་ཡིན། །དུམ་བུར་བསིལ་བའང་དེ་བཞིན་ལ། །དྲིལ་བུ་གསིལ་བ་ག་གསིལ་ལོ། །ཤིང་གི་སྡོང་པོ་ས་སྡོང་ལ། །སྡོང་གྲོགས་སྡོང་ཡང་དེ་འདྲ་སྟེ། །བསྡོངས་ཟླར་བ་འཕུལ་ཡང་འཇུག་ཡོད། །ངོ་གདོང་གདོང་འཕྲད་ག་གདོང་ངོ༌། །ཞེ་སའི་མཛད་ནི་མ་མཛད་དེ། །ཟད་པའི་འཛད་ནི་འ་འཛད་དོ། །མངོན་སུམ་སྣང་བ་ས་སྣང་ཡིན། །ཟས་ཀྱིས་བརྣང་ནི་བ་ར་བརྣང༌། །དུས་ཀྱི་གནངས་ཉིན་ག་གནངས་ཏེ། །གཞན་ལ་སྟེར་བའང་ག་གནང་ངོ༌། །ནམ་མཁའི་མཁའ་ནི་མ་མཁའ་ལ། །ཁ་དོག་ཁ་མཆུ་ཁ་རྐྱང་སྟེ། །འདབ་ཆགས་ཁྭ་ལ་ཝ་ཟུར་ཡོད། །མང་བའི་རྣམས་ནི་ར་རྣམས་ལ། །དུས་ཀྱི་རྣམ་པར་ཡང་འཇུག་མེད། །ཕང་སེམས་ཕང་ནི་ཕང་རྐྱང་ལ། །གནམ་འཕང་འཕང་ལོ་འ་འཕང་ངོ༌། །དུག་ལྔའི་ཉོན་མོངས་མ་མོངས་ལ། །ཐུན་མོང་མོང་ལ་ཡང་འཇུག་མེད། །དྲི་མ་མནམ་པ་མ་མནམ་སྟེ། །ཕྱག་ན་བསྣམས་པ་བ་ས་བསྣམ་མོ། །ནམ་མཁའི་གནམ་ནི་ག་གནམ་ལ། །གོས་ཀྱི་སྣམ་བུ་ས་སྣམ་མོ། །ཁོངས་པའི་སྙིང་ནི་ས་སྙིང་སྟེ། །རྒས་ནས་ཟད་པ་ར་རྙིང་ངོ༌། །རྔན་པའི་གླ་ནི་ག་གླ་ཡིན། །རི་དྭགས་གླ་བའང་དེ་དང་འདྲ། །སྲོག་ཆགས་ཉ་ནི་ཉ་རྐྱང་ལ། །རྐང་པའི་ཉྭ་ལ་ཝ་ཟུར་ཡོད། །བླ་མེད་བླ་མ་བ་བླ་སྟེ། །ཚེགས་མེད་ལས་སླ་ས་སླ་ལ། །བ་འོག་ར་བརླ་རྐང་པའི་བརླའོ། །དྲོད་ཀྱི་རླངས་ནི་ར་རླངས་ཡིན། །གླང་པོ་ཆེ་ནི་ག་གླང་སྟེ། །བླང་དོར་བླང་ནི་བ་བླང་ངོ༌། །གཅོད་པའི་སྟེའུ་ས་སྟེ་ལ། །རྟ་ཡི་རྟེའུ་ར་རྟེའོ། །གྲལ་ལ་བསྒྲིག་པ་ག་གྲལ་ཡིན། །དྲལ་རྡོལ་དྲལ་བ་ད་དྲལ་ལ། །སོ་སོར་གྱེས་པ་བ་བྲལ་ལོ། །ཁོག་པའི་གྲོད་པ་ག་གྲོད་ཡིན། །ཚ་བའི་དྲོད་ནི་ད་དྲོད་ལ། །དགའ་བྲོད་བྲོད་པ་བ་བྲོད་དོ། །སོ་ཁ་སོ་པ་སོ་རྐྱང་ལ། །སོ་ནམ་སོ་ཡང་དེ་དང་འདྲའོ། །མཚོན་ཆའི་གྲི་ནི་ག་གྲི་ཡིན། །སྣ་ཡི་ཡུལ་ནི་ད་དྲི་ལ། །གཏམ་སོགས་དྲི་བའང་དེ་དང་འདྲ། །ཉུང་དུ་སོང་བ་བ་བྲི་སྟེ། །ཡི་གེ་བྲི་བའང་དེ་བཞིན་ནོ། །རྩི་བའི་གྲངས་ནི་ག་གྲངས་ཡིན། །རེག་བྱ་གྲང་ལ་ཡང་འཇུག་མེད། །སྤྱན་དྲང་དྲང་པོ་ད་དྲང་སྟེ། །ཕོ་བྲང་ལུས་བྲང་བ་བྲང་ངོ༌། །གྲོགས་དང་འགྲོགས་པ་ག་གྲོགས་ཏེ། །སྐྲག་ནས་འབྲོས་པ་ད་འདྲོག་གོ །སྟོབས་ཤུགས་རྩལ་ནི་ར་རྩལ་ལ། །བཀའ་སྩལ་སྩལ་བ་ས་སྩལ་ཏེ། །བ་འོག་ས་བསྩལ་སྩོལ་ཉེ་བའོ། །རྒྱུ་འབྲས་རྒྱུ་ནི་ར་རྒྱུ་ཡིན། །ནང་ཁྲོལ་རྒྱུ་མའང་དེ་བཞིན་ལ། །གཡོ་སྒྱུ་སྒྱུ་མ་ས་སྒྱུའོ། །མྱུར་བའི་སྐྱེན་ནི་ས་སྐྱེན་ལ། །རྒྱུ་རྐྱེན་འཕྲལ་རྐྱེན་ར་རྐྱེན་ནོ། །ལུས་ཀྱི་ཞེ་ས་ས་སྐུ་ཡིན། །མ་བྱིན་ལེན་རྐུ་ར་རྐུ་ལ། །ལུས་ཀྱི་བྱེ་བྲག་ད་དཀུའོ། །ནམ་མཁའི་སྐར་མ་ས་སྐར་ཡིན། །ཁ་དོག་དཀར་བ་ད་དཀར་ཏེ། །ལོགས་སུ་བཀར་བ་བ་བཀར་རོ། །འཚོ་བྱེད་སྨན་ནི་ས་སྨན་ལ། །ངན་པའི་དམན་པ་ད་དམན་ནོ། །ར་བ་ར་མ་ར་རྐྱང་ལ། །མགོ་ཡི་ར་ལ་ཝ་ཟུར་ཡོད། །ངག་གི་ཞེ་ས་ག་གསུང་སྟེ། །དྲི་ངད་བསུང་བ་བ་བསུང་ངོ༌། །ལུས་ཀྱི་སྨེ་བ་ས་སྨེ་ལ། །གཙང་རྨེའི་རྨེ་བ་ར་རྨེ་སྟེ། །ཁོང་ཁྲོའི་དམེ་འཁྲུག་ད་དམེའོ། །འབྲུ་ཡི་གྲོ་ནི་ག་གྲོ་ཡིན། །དྲོད་ཀྱི་དྲོ་བ་ད་དྲོ་སྟེ། །རོ་བྲོ་བ་ནི་བ་བྲོའོ། །འབིག་པའི་རྩང་ནི་ར་རྩང་ལ། །ཆུ་ཡི་གཙང་པོ་ག་གཙང་སྟེ། །གཙང་མའི་གཙང་ཡང་དེ་འདྲའོ། །ན་ཚོད་གཞོན་པ་ག་གཞོན་ཏེ། །རྟ་ཡི་བཞོན་པ་བ་བཞོན་ནོ། །མཛེས་པའི་མཚར་སྡུག་མ་མཚར་ལ། །ཚར་དུ་དངར་བ་ཚར་རྐྱང་སྟེ། །གྲངས་ཀྱི་ཚར་ཡང་དེ་དང་འདྲའོ། །གཡོ་བའི་རླུང་ནི་ར་རླུང་ལ། །འབབས་པའི་ཆུ་ཀླུང་ཀ་ཀླུང་ངོ༌། །གསུང་རབ་ཀློག་པ་ཀ་ཀློག་སྟེ། །གློག་འགྱུ་བ་ནི་ག་གློག་གོ །འཇིགས་པའི་སྐྲག་པ་ས་སྐྲག་ལ། །བཀྲག་མདངས་འོད་ནི་བ་བཀྲག་གོ །བསང་གསོལ་བསང་དུད་བ་བསང་ལ། །གསང་འོས་གསང་ཚིག་ག་གསང་ངོ༌། །གས་ཆག་ཉམས་ཆག་ཆག་རྐྱང་ལ། །འདོད་ཆགས་ཞེ་ཆགས་ཡང་འཇུག་ཡོད། །བརྟུལ་ཕོད་དཔའ་བ་ད་དཔའ་སྟེ། །མཛེས་པའི་སྤ་བ་ས་སྤའོ། །ཁྲི་མུན་བཙོན་ཁང་བ་བཙོན་ལ། །སྦྱོར་བརྩོན་བ་འོག་ར་བརྩོན་ནོ། །མཆོད་པའི་རྟེན་ནི་ར་རྟེན་ཏེ། །གྲོགས་བསྟེན་བ་འོག་ས་བསྟེན་ནོ། །རིགས་འདྲ་སྦྱོར་བ་ག་འགྲེ་སྟེ། །གནོད་བྱེད་འདྲེ་ནི་ད་འདྲེའོ། །ཟླ་གྲོགས་ནོར་གྲོགས་ག་གྲོགས་ཏེ། །སྲོག་ཆགས་གྲོག་མར་ཡང་འཇུག་མེད། །ཁུར་བའི་དྲོག་ནི་ད་དྲོག་གོ །རྐང་ལག་ཞ་བ་ཞ་རྐྱང་ལ། །གྱོན་པའི་ཞྭ་མོར་ཝ་ཟུར་ཡོད། །ཚོན་གྱི་མཐིང་ནི་མ་མཐིང་སྟེ། །རྐང་པ་འཐིང་བ་འ་འཐིང་ངོ༌། །ནད་ཀྱི་རྣག་ནི་ར་རྣག་ལ། །ཁ་དོག་གནག་པ་ག་གནག་གོ །ལུས་ཀྱི་རྔོ་ནི་ར་རྔོ་སྟེ། །དགེ་བསྔོ་བ་འོག་ས་བསྔོའོ། །ཞེ་སྡང་སྡང་སེམས་ས་སྡང་ལ། །འཕར་ལྡང་ལྷར་ལྡང་ལ་ལྡང་སྟེ། །ཁ་གདངས་ག་གདངས་ཡང་འཇུག་ཅན། །དབྱངས་ཀྱི་གདངས་ཡང་དེ་དང་འདྲའོ། །གྲངས་ཀྱི་དགུ་ནི་ད་དགུ་ལ། །སྐྱེ་རྒུ་ཡོད་རྒུ་མཁོ་རྒུ་སོགས། །མང་བའི་རྒུ་ནི་ར་རྒུའོ། །དབུགས་དབྱུང་གནས་དབྱུང་ད་བ་དབྱུང༌། །གཡུང་དྲུང་གཡུང་དྭགས་ག་གཡུང་ངོ༌། །ས་རྡོའི་རྡོ་ནི་ར་རྡོ་སྟེ། །རྡོ་རྗེའི་རྡོའང་དེ་བཞིན་ལ། །ཤུགས་བདོ་བ་ནི་བ་བདོའོ། །བྲབ་པའི་ལྕག་ནི་ལ་ལྕག་ལ། །མཚོན་ཆའི་ལྕགས་ལ་ཡང་འཇུག་ཡོད། །ཕྱི་ནང་ཟང་ཐལ་ཟང་རྐྱང་ལ། །རིན་ཆེན་ཟངས་ལ་ཡང་འཇུག་ཡོད། །ཐུན་མོང་མོང་ནི་མོང་རྐྱང་ལ། །ཉོན་མོངས་མོངས་ལ་ཡང་འཇུག་ཡོད། །ཚོན་མདོག་ནག་ནི་ནག་རྐྱང་ལ། །ཤིང་གི་ནགས་ལ་ཡང་འཇུག་ཡོད། །སྣུམ་ཞག་ཉིན་ཞག་ཞག་རྐྱང་ལ། །འཆིང་ཞགས་ཞགས་པར་ཡང་འཇུག་ཡོད། །དེང་དུས་གནས་སྐབས་དེང་རྐྱང་ལ། །ཕྱིར་དེངས་དེངས་ཤིག་ཡང་འཇུག་ཡོད། །མིང་བརྗོད་གང་ཡང་གང་རྐྱང་ལ། །གངས་རིའི་གང་ལ་ཡང་འཇུག་ཡོད། །ཤུག་སྡོང་ཤུག་པ་ཤུག་རྐྱང་ལ། །སྟོབས་རྩལ་ཤུགས་ལ་ཡང་འཇུག་ཡོད། །སེམས་ཅན་ལུག་ནི་ལུག་རྐྱང་ལ། །ལུགས་སྲོལ་རིང་ལུགས་ཡང་འཇུག་ཡོད། །རྐང་ལག་ལག་པ་ལག་རྐྱང་ལ། །ཞེ་སའི་ལགས་ལ་ཡང་འཇུག་ཡོད། །རབ་མཆོག་རབ་འབྲིང་རབ་རྐྱང་སྟེ། །ཚེ་རབས་སྐྱེས་རབས་ཡང་འཇུག་ཡོད། །ཟང་རག་རག་ལས་རག་རྐྱང་ལ། །ཕྲ་རགས་རགས་ལ་ཡང་འཇུག་ཡོད། །ཆམ་ལ་ཕབ་པ་ཆམ་རྐྱང་སྟེ། །ཁ་འཆམ་པ་ནི་འ་འཆམ་ལ། །ཟློས་གར་འཆམས་ལ་ཡང་འཇུག་ཡོད། །ལུས་ཀྱི་པང་ནི་པང་རྐྱང་ལ། །དཔང་འཛུག་དཔང་པོ་ད་འཕུལ་ཅན། །མཐོ་དམན་དཔངས་ལ་ཡང་འཇུག་ཡོད། །པར་བུ་པར་འདེབས་པར་རྐྱང་ལ། །གནས་སྤར་གོང་སྤར་ས་སྤར་རོ། །འཚོ་གཞེས་གླུ་གཞས་ག་གཞེས་ལ། །བཞེས་པ་ཞལ་བཞེས་བ་བཞེས་སོ། །ཐ་མ་ཐ་སྙད་ཐ་རྐྱང་ལ། །ཐོག་མཐའ་མཐའ་ཡས་མ་འཕུལ་ཅན་ནོ། །དཀོན་མཆོག་དཀོར་རྫས་ད་དཀོར་ཏེ། །འཁོར་བསྐོར་བ་འོག་ས་བསྐོར་རོ། །ནོར་འཇལ་བ་ནི་འ་འཇལ་ལ། །གོང་མ་མཇལ་བ་མ་མཇལ་ལོ། །ཆུ་ལས་བརྒལ་བ་ར་བརྒལ་ཏེ། །རྒྱབ་ཀྱི་སྒལ་པ་ས་སྒལ་ལོ། །རི་ཡི་སྒང་ནི་ས་སྒང་ལ། །སྣོད་དགང་དབུགས་དགང་ད་དགང་ངོ༌། །རྩ་བའི་རྩ་ནི་ར་རྩ་ཡིན། །སྡུམ་བུ་རྩྭ་ལ་ཝ་ཟུར་ཡོད། །སྤྱན་ལ་བཙའ་བ་བ་བཙའ་སྟེ། །ལྕགས་ཀྱི་བཙའ་ཡང་དེ་དང་འདྲ། །ངོ་མཚར་རྨད་བྱུང་ར་རྨད་ལ། །བསྟོད་སྨད་སྨད་ནི་ས་སྨད་དོ། །ས་བདག་ཀླུ་ནི་ཀ་ཀླུ་ཡིན། །སྙན་པའི་གླུ་དབྱངས་ག་གླུ་ལ། །རིན་གྱིས་ཉོ་བ་བ་བླུ་སྟེ། །གཞན་གྱིས་སླུ་བ་ས་སླུའོ། །ཐུགས་ལ་བཏགས་པ་བ་བཏགས་ལ། །ཕྱེ་མར་བཏགས་པའང་དེ་འདྲ་སྟེ། །རྒྱབ་ཀྱི་ལྟག་པ་ལ་ལྟག་གོ །ལག་ཆ་གདེངས་པ་འགྲེང་བུ་སྟེ། །དཔའ་བའི་གདིང་ནི་གི་གུའོ། །འབེབས་པའི་པྲ་ནི་པྲ་རྐྱང་སྟེ། །མགོ་ཡི་སྐྲ་ནི་ས་སྐྲ་ལ། །བཀྲ་ཤིས་བཀྲ་ནི་བ་བཀྲའོ། །དེ་སོགས་མིང་ཚིག་སྒྲ་ཡི་གནད། །ཞིབ་ཏུ་བརྟག་ན་མི་འདྲ་བས། །འཁྲུལ་པ་འབྱུང་བ་མི་སྲིད་ཀྱང༌། །རྨོངས་པ་ཕལ་ཆེར་གྱ་ཚོམ་དུ། །ནོར་བར་བྲིས་ཤིང་ནོར་བར་བཀླག །ལོག་པར་གོ་བས་དོན་འཆུག་སྲིད། །དེས་ན་བརྡ་དག་ལ་བརྟེན་ནས། །མ་ནོར་དོན་རྣམས་འཚོལ་བ་གཅེས། །གང་དག་ཡི་གེ་འབྲི་བ་པོར། །སྙོམས་གཙང་འགྲིག་གསུམ་ལྡན་པ་དང༌། །ལེགས་མགྱོགས་དག་གསུམ་དྲུག་ཚང་ན། །མཁས་པའི་གོ་ས་ཐོབ་པ་ཡིན། །ཡིག་གཟུགས་ལེགས་པར་མ་སྦྱངས་ཤིང༌། །བརྡ་དག་ཞིབ་ཏུ་མ་བསླབ་པར། །འབྲི་དང་རྩོམ་པའི་ཁུར་ལེན་པ། །རང་སྐྱོན་གཞན་ལ་ངོམས་པར་ཟད། །སུམ་རྟགས་ལ་སོགས་གཞུང་རྒྱ་ཆེའི། །གནམ་འཕང་མ་ཆོད་བློ་གསར་རྣམས། །རང་ཚོད་ས་རྒྱ་བསྐོར་བ་ལ། །དག་ཡིག་བཞོན་པ་འདི་འདྲ་བཟང༌། །དེ་ཕྱིར་ཐར་འདོད་རྣམས་ལྟ་ཅི། །འཇིག་རྟེན་ལུགས་ལ་འཇུག་རྣམས་ཀྱང༌། །ཚུལ་འདི་སྙིང་གི་བདུད་རྩི་རུ། །ངེས་པས་ལེགས་པར་བསྟེན་འཚལ་ལོ། །དེ་ལྟར་བརྡ་དག་བསྟན་བཅོས་གཞུང༌། །ཨུ་དུམ་ཝ་རའི་སྐྱེད་ཚལ་ལས། །ཉེར་མཁོའི་དག་ཡིག་པད་དཀར་གྱི། །ཆུན་པོ་ཅུང་ཞིག་བླངས་འདི་ནི། །དཔལ་ལྡན་མི་དབང་བཤད་སྒྲ་བའི། །བཀའ་ལུང་དོ་ཤལ་ཐོད་བཅིངས་ཏེ། །རང་ལོ་ཉེར་དགུ་ཆུ་སྤྲེལ་ལོར། །གཏེར་ཁོག་མཁན་ལྗོངས་དགའ་ཚལ་དུ། །པད་བཀོད་བློ་གསལ་མང་བསྡུས་ནས། །འབྲི་ཀློག་བསླབ་གྲྭ་གསར་འཛུག་གི། དགེ་རྒན་སྲི་ཞུ་ལྷུར་ལེན་སྐབས། །བློ་གྲོས་གསར་པའི་བྱིས་རྣམས་ཀྱི། །རྣ་བའི་རྒྱན་དུ་སྒྲུབས་ཤིག་ཅེས། །དོན་གཉེར་ཅན་འགས་བསྐུལ་བ་བཞིན། །གོ་བར་སླ་ཞིང་འཇུག་བདེ་བར། །འཇིགས་བྲལ་ཡེ་ཤེས་རྡོ་རྗེས་སྦྱར། །བསོད་ནམས་ཉིན་མོར་བྱེད་པའི་འོད། །འགྲོ་བློའི་པད་ཚལ་ལ་ཕོག་པས། །ཤེས་རབ་འདབ་རྒྱ་ཡོངས་གྲོལ་ཏེ། །རྣམ་གྲོལ་གེ་སར་འཛུམ་བྱེད་ཤོག།། །།ཤྲཱི་བི་ཛ་ཡནྟུ། སརྦ་དཱ་མངྒ་ལཾ།།