བདུད་ཀྱི་ལས་

བདུད་ཀྱི་ལས་ཞེས་པ་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྦྱོར་བ་ལ་བར་དུ་གཅོད་པའི་གེགས་སུ་གྱུར་པའི་སྐྱོན་ཁག་རྣམས་ལ་ཟེར། འདི་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་སྒོམ་པ་དང་འཛིན་པ་སོགས་ལ་ནང་ནས་འཚེ་བའི་སྐྱོན་དང་ཕྱི་ནས་འཚེ་བའི་བར་ཆད་གཉིས་ཆར་འདུས།

ནང་དོན།

"གནས་བརྟན་རབ་འབྱོར་གྱིས་ཞུས་པ། རབ་འབྱོར་གྱི་གསོལ་པ་བཅོམ་ལྡན་འདས་ཡོན་ཏན་གྱི་རང་བཞིན་གྱི་ཤེས་རབ་ཀྱི་ཕ་རོལ་ཏུ་ཕྱིན་པ་ལ་དགའ་བ་རྣམས་དེ་ལ་ཉམས་སུ་ལེན་པར་བྱེད་པ་ལ་སྐྱོན་བདུད་ཀྱི་ལས་ཀྱི་བར་དུ་གཅོད་པ་གང་ལགས་ཞེས་ཞུས་པའི་ལན། སྟོན་པ་བཅོམ་ལྡན་འདས་ཀྱིས་རབ་འབྱོར་ལ་ལན་བཀའ་བསྩལ་པ། སྤྱིར་བར་དུ་གཅོད་པ་འགྱུར་བ་མང་སྟེ། འོན་ཀྱང་དེ་ལས་སྐབས་འདིར་རེ་ཤིག་ཅུང་ཟད་ཙམ་ཞིག་བརྗོད་པར་བྱའོ། །""རྒྱལ་བའི་ཤེར་ཕྱིན་འདི་ཡི་གེར་འདྲི་བ་དང་སྒོམ་པའི་ཚེ་མྱུར་དུ་འདྲི་སྒོམ་འདོད་མི་འདོད་སོགས་བློའི་སྤོབས་པ་མི་འདྲ་བ་ཐ་དད་པ་རྣམ་པ་སྣ་ཚོགས་པ་དུ་མ་འབྱུང་བར་འགྱུར་ཞིང་། རང་དང་འགྲོ་བ་གཞན་གྱི་དོན་གང་འདོད་པ་དེ་མ་བྱས་པར་གློག་མྱུར་དུ་འཇིག་པ་བཞིན་དུ། བློ་མི་བརྟན་པར་མྱུར་དུ་ཡང་ཡོངས་སུ་ཉམས་པར་འགྱུར་བ་འདི་ནི་བདུད་ཀྱི་ལས་ཏེ་སྐྱོན་ནོ། །"ཞེས་གསུངས་སོ། །

དབྱེ་བ།

ནང་ནས་འཚེ་བ། "རྒྱལ་བའི་ཤེས་རབ་ཕ་རོལ་ཕྱིན་འདི་ཡིག་འབྲིའི་ཚེ་ནི་གཞུང་གི་དོན་བྲི་བ་དང་། ཡིད་ལ་བྱེད་པའོ། །སྤོབས་པ་ནི་ཡུལ་ལ་ཁྱད་པར་ཅན་གྱི་ཡེ་ཤེས་ཀྱི་རང་བཞིན་ཐ་དད་པ་རྣམ་པ་དུ་མ་འབྱུང་འགྱུར་ཞིང་འགྲོ་བའི་དོན་མ་བྱས་པར་ཏེ། སྔ་མ་དང་ཕྱི་མ་དཔྱད་པས་མི་བསྟན་པར་གྱུར་པའི་ཕྱིར་དེ་ཡང་གློག་བཞིན་དུ་མྱུར་དུ་ཉམས་པར་འགྱུར་བ་འདི་ཉིད་ནི་རེ་ཤིག་བདུད་ཀྱི་ལས་སོ། །""འདི་བཤད་ཚེ་ན་ཁ་ཅིག་སོམ་ཉི་ཟ་འགྱུར་ཏེ་ཞེས་བྱ་བ་ལ། བཤད་པ་ནི་བཤད་པར་གྱུར་པའོ། །སངས་རྒྱས་ཀྱིས་གསུངས་པ་ལ་ཐེ་ཚོམ་ཟ་བ་ནི་སོམ་ཉིར་གྱུར་པའོ། །དེས་ཡོངས་སུ་མ་ཤེས་པར་འདྲེན་པ་བཅོམ་ལྡན་འདས་ཀྱིས་འདིར་ནི་བདག་གི་མིང་ཡང་མ་བརྗོད། རིགས་དང་ས་དང་རུས་ཀྱང་ཡོངས་སུ་མ་བརྗོད་ཅེས། དེ་ནི་ཉན་པར་མི་འགྱུར་ལ། འོན་ཀྱང་འདི་ནི་སངས་རྒྱས་ཀྱི་བཀའ་མ་ཡིན་ཞེས་སྤང་འགྱུར་ཏེ་ཡང་བདུད་ཀྱི་ལས་སོ། །"ལམ་གཞན་འཚོལ་བ། "དེ་ལྟར་མི་ཤེས་པའི་རྨོངས་པ་དེ་དག་གིས་ཡང་དག་པ་སངས་རྒྱས་ཀྱི་ཆོས་ཀུན་གྱི་རྩ་བ་ལྟ་བུ་ཤེར་ཕྱིན་འདི་བོར་ནས་ནི། རྨོངས་པས་ཡལ་ག་དག་དང་འདབ་མ་ལྟ་བུའི་ཆོས་གཞན་དང་གཞན་ཚོལ་བར་འགྱུར་བ་ཡང་བདུད་ཀྱི་ལས་སོ། །""གླང་པོ་རྙེད་ནས་དཔེར་ན་འགའ་ཞིག་གི་དོན་དུ་གླང་པོའི་རྗེས་ནི་ཚོལ་བ་ལྟར། ཤེས་རབ་ཕ་རོལ་ཕྱིན་ཐོས་མདོ་གཞན་ཚོལ་བར་བྱེད་པ་དེ་ཡང་དེ་བཞིན་ནོ། །དཔེར་ན་ལ་ལས་རོ་བརྒྱ་ལྡན་པའི་ཟས་རྙེད་ལ། ཟས་མཆོག་རྙེད་ནས་ཞག་དྲུག་ཅུ་པའི་འབྲས་ཆན་ཚོལ་བར་བྱེད་པ་ལྟར། དེ་བཞིན་དུ་བྱང་ཆུབ་སེམས་དཔའ་ཤེས་རབ་ཀྱི་ཕ་རོལ་ཏུ་ཕྱིན་པ་འདི་རྙེད་ནས། དགྲ་བཅོམ་པའི་ས་ཡི་བླ་ན་མེད་པའི་བྱང་ཆུབ་ཚོལ་བར་བྱེད་དེ། ཡང་དེ་ལ་རྗེས་སུ་འབྲང་ཞིང་བློ་བསྐྱེད་པར་འགྱུར་རོ། །"བསྙེན་བཀུར་གྱི་རོ་མྱང་བ། "རང་ཉིད་སྙན་གྲགས་དང་གཞན་གྱིས་བསྟི་སྟང་བྱ་བ་འདོད་པར་འགྱུར་ཞིང་། ཡང་ཟས་ནོར་སོགས་རྙེད་པ་དག་གི་རོ་མྱང་བ་འདོད་པར་འགྱུར་བ་དང་། ཕྱི་རོལ་ཡུལ་ལ་ལྟ་བར་འདོད་པ་དང་བཅས་པའི་སེམས་ཀྱིས་གྲོང་གི་ཁྱིམ་ལ་འདྲིས་པའི་བྱེད་པ་དང་ལྡན་ཞིང་དེ་དང་དེ་ལྟ་བུ་ལ་སོགས་པ་གཡེངས་པའི་བྱ་བ་སྣ་ཚོགས་ཀྱི་སྒོ་ནས་ཆོས་ཟབ་མོ་འདི་འབྲི་བ་དང་མཉན་པ་དང་སེམས་པ་སོགས་བཏང་བར་གྱུར་ནས་ནི། ཆོས་མིན་པའི་བྱ་བ་གནས་ངན་ལེན་གྱི་གཞི་གང་ཡང་རུང་བ་ལ་སྤྱོད་པར་འགྱུར་བ་གང་ཞིག །ཡང་དག་པའི་ལམ་བོར་ནས་ལམ་མིན་དུ་གོལ་ཏེ་འགྲོ་བ་འདི་ནི་བདུད་ཀྱི་ལས་སོ། །"ཕྱི་ནས་འཚེ་བ། "ཉན་པ་པོ་གང་དག་འཆད་པ་པོ་རྙེད་བཀུར་ལ་གཡེངས་པ་སོགས་དེ་ཡི་ཚེ་ན༷་ཡུམ་ལ་འདུན་ཅིང་དད་པར་གྱུར་ནས་ཆོས་ཀྱི་དམ་པ་འདི་ནི་ཉན་དུ་སོང་བ་ལས། ཉན་པ་པོ་དེ་དག་གིས་ནི་ཆོས་སྨྲ་བ་དེ་རྙེད་བཀུར་ལ་དགའ་བ་སོགས་བྱ་བ་ངན་པ་ལ་ཞེན་པའི་ཚུལ་དང་ལྡན་པར་རིག་ནས། ཆོས་སྨྲ་བ་དེ་ལས་ཆོས་ཉན་པ་ལ་དགའ་བ་མེད་ཅིང་ད་ནི་ཆོས་ཞུ་བར་མི་བྱའོ་སྙམ་དུ་ཡིད་མི་བདེ་བར་གྱུར་ནས་ཕྱིར་འགྲོ་བ་འདི་ཡང་ཤེར་ཕྱིན་མཉན་པ་སོགས་ལ་བར་ཆད་དུ་གྱུར་པའི་བདུད་ཀྱི་ལས་སོ། །""ཆོས་ཟབ་མོ་མཉན་པ་སོགས་དེ་ཡི་ཚེ་ན་ཆོས་ལ་ཡིད་སྡང་བ་བདུད་སྡིག་ཏོ་ཅན་གང་དག་ཟུག་རྔུས་ཟུག་པ་བཞིན་དུ་གྱུར་པ་དེ་དག་གིས་ནི་མདོ་འཛིན་པའི་དགེ་སློང་མང་པོའི་རྒྱུད་དཀྲུགས་ནས། བར་དུ་གཅོད་པའི་ཐབས་རྣམ་པ་སྣ་ཚོགས་ཀྱི་སྒོ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཚུལ་བཞིན་འཛིན་པ་དང་སེམས་པ་ལ་སོགས་པར་མི་འགྱུར་བའི་བར་དུ་གཅོད་པ་ཡི་ཆོས་རྣམཔ་མང་པོ་གཞན་འདིར་མ་བཤད་པ་དུ་མ་ཡང་འབྱུང་བར་འགྱུར་ཏེ།"

དམིགས་བསལ་གྱི་རྒྱུ་མཚན།

"ཇི་ལྟར་རིན་པོ་ཆེ་རིན་ཐང་གཞལ་དུ་མེད་པར་རྙེད་པར་འགྱུར་བ་གང་དག་ཡིན་པ་དེ་དག་ནི་དུས་ནམ་ཡིན་དུ་མི་རྙེད་པས་དཀོན་ལ། རྙེད་ཅིང་འཆང་བའི་དུས་རྣམས་རྟག་ཏུ་དེ་ལ་ཕ་རོལ་བརྣབ་སེམས་ཅན་དགྲ་ལ་སོགས་པས་འཚེ་བའང་མང་བ་དེ་བཞིན་རྒྱལ་བའི་ཤེས་རབ་ཀྱི་ཕ་རོལ་ཏུ་ཕྱིན་པ་མཆོག་རིན་པོ་ཆེའི་ཆོས་འདི་དག་ཀྱང་ཤིན་ཏུ་འབྱུང་བར་དཀོན་ལ། བསོད་ནམས་ཕུན་སུམ་ཚོགས་པ་རྣམས་ཀྱིས་དེ་སྐལ་བས་ཆུན་པར་དཀའ་བའི་ཕྱིར་རྟག་ཏུ་འཚེ་བའང་མང་བ་ཡིན་ནོ། །""ཐེག་པ་ཆེན་པོ་ལ་གསར་དུ་ཞུགས་པའི་སེམས་ཅན་བློ་ཆུང་བ་གང་ཞིག་དཀོན་པའི་རིན་པོ་ཆེའི་ཡུམ་འདི་འཚོལ་ཞིང་མ་རྙེད་པ་དེ་ལ། མི་རྙེད་པའི་ཕྱིར་དུ་བར་ཆད་བྱ་བའི་ཕྱིར་བདུད་ནི་སྤྲོ་བར་འགྱུར་རོ། །"ཞེས་གསུངས་སོ། །