བདུད་

བདུད་ཅེས་པ་ནི་བྱང་ཆུབ་སེམས་དཔའ་རྣམས་ཀྱི་ཐེག་པ་ཆེན་པོའི་ལམ་ལ་བར་དུ་གཅོད་པར་བྱེད་པའི་གནོད་བྱེད་ཀྱི་ཆོས་དང་གང་ཟག་ལ་བྱའོ། །"བདུད་སྡིག་ཏོ་ཅན་གང་དག་ཟུག་རྔུས་ཟུག་པ་བཞིན་དུ་གྱུར་པ་དེ་དག་གིས་ནི་མདོ་འཛིན་པའི་དགེ་སློང་མང་པོའི་རྒྱུད་དཀྲུགས་ནས། བར་དུ་གཅོད་པའི་ཐབས་རྣམ་པ་སྣ་ཚོགས་ཀྱི་སྒོ་ནས་ཤེས་རབ་ཀྱི་ཕ་རོལ་ཏུ་ཕྱིན་པ་ཟབ་མོ་འདི་ཚུལ་བཞིན་འཛིན་པ་དང་སེམས་པ་ལ་སོགས་པར་མི་འགྱུར་བའི་བར་དུ་གཅོད་པ་ཡི་ཆོས་རྣམ་པ་མང་པོ་གཞན་འདིར་མ་བཤད་པ་དུ་མ་ཡང་འབྱུང་བར་འགྱུར་ཏེ།" ཞེས་གསུངས་པ་ལྟར་རོ། །

མཚན་ཉིད།

"མདོར་ན་ཆོས་ཟབ་མོ་འདི་འཛིན་པ་སོགས་ཀྱི་སྐབས་ན་དེ་ལ་གནོད་པའི་ཕྱོགས་སུ་གྱུར་ན་གང་ཅི་ཡང་རུང་སྟེ་དེ་ཐམས་ཅད་བདུད་ཀྱི་ལས་སུ་རིགས་པར་བྱ་སྟེ། བར་དུ་གཅོད་པ་དེ་ཉིད་ལ་བདུད་ཀྱི་ལས་ཞེས་མིང་དུ་བཏགས་པ་ཡིན་པའི་ཕྱིར་རོ། །"ཞེས་གསུངས་སོ། །

སྒྲ་བཤད།

བདུད་ཅེས་པའི་སྒྲ་ནི་བར་དུ་གཅོད་པ་ལ་བྱ་སྟེ། "བར་དུ་གཅོད་པ་དེ་ཉིད་ལ་བདུད་ཀྱི་ལས་ཞེས་མིང་དུ་བཏགས་པ་ཡིན་པའི་ཕྱིར་རོ། །"ཞེས་དང་། ཡང་ "དེ་སྐད་དུ་ཡང་ནམ་མཁའ་མཛོད་ཀྱིས་ཞུས་པའི་མདོ་ལས། རིགས་ཀྱི་བུ་ཅི་ཙམ་དུ་མི་དགེ་བའི་ཆོས་ལ་འཇུག་པ་དང་། དགེ་བའི་ཆོས་འདོར་བ་དེ་ཐམས་ཅད་ནི་བདུད་ཀྱི་ལས་སོ་ཞེས་གསུངས་སོ། །"ཞེས་གསུངས་སོ། །

དབྱེ་བ།

བདུད་ལ་དབྱེ་ན་བཞིར་ཡོད་དེ། "བཅོམ་པ་ནི་བདུད་རྣམ་པ་བཞི་དང༌། ཉོན་མོངས་པ་མཐའ་དག་གོ །དེ་ཡང་ལྷའི་བུའི་བདུད་དང༌། ཉོན་མོངས་པའི་བདུད། འཆི་བདག་གི་བདུད། ཕུང་པོའི་བདུད་ལ་སོགས་པ་བཅོམ་ཞིང༌།" ཞེས་གསུངས་པ་ལྟར་རོ། ། བདུད་བཞི་པོ་སོ་སོའི་ངོ་བོ། "ཐེག་པ་ཆེན་པོའི་ལམ་གྱི་བར་ཆད་དུ་གྱུར་པ་ལྷའི་བུའི་བདུད་ལ་སོགས་པ་བདུད་བཞི་དག་དང་ཉན་རང་གི་ས་གཉིས་ལས་ཀྱང་རབ་ཏུ་འདས་ནས་"ཞེས་གསུངས་སོ། ། བདུད་ཀྱི་ལས། བདུད་ཀྱི་ལས་ནི་རྣམ་པ་མང་པོ་ཡོད་དེ། "བདུད་ཀྱི་ལས་ཇི་སྙེད་པ་རྣམ་པ་ཐམས་ཅད་མཐའ་ཡས་པས་བརྗོད་པར་མི་ནུས་པའི་ཕྱིར་ཉེ་བར་བསྡུས་པའི་དོན་དུ་དེའི་ཚེ་ན་ཞེས་བྱ་བ་ལ་སོགས་པ་གསུངས་ཏེ།" ཞེས་གསུངས་སོ། ། བདུད་ལས་རྒྱལ་བའི་ཐབས། "གང་བསྟེན་ན་དགེ་བའི་བཤེས་གཉེན་ཏེ་དགེ་བ་ནི་སྐབས་འདིར་ཐེག་པ་ཆེན་པོའི་ཆོས་ཡིན་ལ། དེ་ལེགས་པར་སྟོན་པ་ནི་དགེ་བའི་བཤེས་གཉེན་ཡིན་ཏེ། ལམ་ཡང་དག་པར་སྟོན་པ་དང་ལམ་གྱི་བར་ཆད་བདུད་ཀྱི་ལས་ངོས་ཟིན་པར་བྱེད་ཅིང་དེ་ལས་འདའ་བའི་ཐབས་སྟོན་པའི་སྒོ་ནས་ལམ་ལས་མི་ཉམས་པ་འདིས་ཡོངས་སུ་འཛིན་ནུས་པའི་ཕྱིར་རོ། །དེས་ན་དེ་ལྟ་བུ་ཡོངས་སུ་བསྟེན་པར་བྱའོ། །"ཞེས་གསུངས་སོ། །"ལྷའི་བུའི་བདུད་ཀྱི་སྡེ་མ་རུངས་པའི་བསམ་པ་ཉིད་ཀྱི་རྒྱུ་ཅན་འདུལ་བའི་ཕྱིར་རོ། །"ཞེས་པ་དང་། ཡང་ "རྒྱུ་བཞི་གང་ཞེ་ན། རང་གི་བློ་གནས་ལུགས་སྟོང་པར་གནས་པས་དོན་དམ་པར་བར་དུ་གཅོད་པ་བྱེད་པ་མེད་པ་དེ། ཀུན་རྫོབ་ཏུ་དོན་དམ་མ་རྟོགས་པའི་སེམས་ཅན་སྙིང་རྗེ་ཆེན་པོས་ཡོངས་སུ་མི་གཏོང་བ་དང་། ཇི་སྐད་སྨྲས་ཤིང་དམ་བཅས་པ་བཞིན་མ་ཉམས་པར་བྱེད་པ་དང༌། དེ་ལྟ་བུ་དེ་ལ་བདེ་བར་གཤེགས་པ་བྱིན་བརླབས་ཅན་རྣམས་ཀྱིས་བྱིན་གྱི་བརློབ་པས་སོ། །"ཞེས་གསུངས་སོ། །

རྩོད་སྤོང་།

"ཅིའི་ཕྱིར་འདི་དག་ཐམས་ཅད་ཀྱི་བདུད་ཀྱི་ལས་ཡིན་ནམ་ཞེ་ན། ཐེག་པ་གསར་ཞེས་བྱ་བ་ལ་སོགས་པ་གསུངས་ཏེ། མངོན་པར་ཞུགས་པའི་ཕྱིར་ཐེག་པ་ལ་གསར་དུ་ཞུགས་པ་སྟེ། བྱང་ཆུབ་སེམས་དཔའ་བསོད་ནམས་ཆུང་བའི་ཕྱིར་བློ་ཆུང་བར་གྱུར་པ་གང་གི་ཡུམ་དཀོན་པའི་རིན་ཆེན་ཆོས་འདི་བདུད་ཀྱི་བྱིན་གྱིས་བརླབ་པས་མ་རྙེད་པའོ། །"ཞེས་དང་། ཡང་ "གང་གི་ཚེ་བདུད་རྣམས་རྒྱལ་བ་སྐྱེད་མ་ལ་ཇི་ལྟར་བགེགས་བྱ་ཞེས་བརྩོན་པ་དང་ལྡན་པས་སྤྲོ་བར་འགྱུར་ཏེ་བར་ཆད་ལ་ཞུགས་ནས་གཅོད་པར་ཞུགས་སོ། །"ཞེས་གསུངས་པ་ལྟར་རོ། །