ཕྱག་འོས་
ཕྱག་འོས་ཞེས་པ་ནི་ཡོན་ཏན་དང་ལྡན་ཞིང་ཕན་འདོགས་ཆེ་བའི་སྒོ་ནས་ཕྱག་འཚལ་བར་འོས་པར་གྱུར་པ་ལ་ཟེར།
སྒྲ་བཤད།
[རྩོམ་སྒྲིག]ཕྱག་ཅེས་པ་ནི་གུས་པའི་སེམས་ཀྱིས་ལུས་ངག་ཡིད་གསུམ་གྱི་སྒོ་ནས་གུས་པར་ཕྱག་འཚལ་བ་ལ་ཟེར་ལ། འོས་པ་ཞེས་པ་ནི་དེ་ལྟར་ཕྱག་འཚལ་བར་རུང་བ་ཡིན་པའི་དོན་ནོ། །
ཕྱག་འོས་ཀྱི་སྐོར།
[རྩོམ་སྒྲིག]ཕྱག་འོས་ཙམ་གྱི་ཕྱག་འོས། ཕྱག་འོས་ཙམ་གྱི་ཕྱག་འོས་ནི། "ཐེག་ཆེན་ཐུན་མོང་མ་ཡིན་པའི་སྐྱབས་གནས་སུ་འོས་པ་མ་ཡིན་ཡང་ཡོན་ཏན་དང་ལྡན་ཞིང་ཕན་འདོགས་ཆེ་བའི་སྒོ་ནས་ཕྱག་འོས་སུ་གྱུར་པ་བྱང་སེམས་སོ་སྐྱེ། ཉན་རང་སློབ་མི་སློབ་ཐམས་ཅད། སོ་སྐྱེའི་མཁན་སློབ། སྐུ་གཟུགས་དང་གླེགས་བམ། མཆོད་རྟེན་སོགས་ཀུན་"[༡]ཞེས་གསུངས་སོ། །
ཕྱག་འཚལ་བའི་ཚུལ། ཕྱག་འཚལ་བའི་ཚུལ་ནི། "གུས་པར་ཏེ་ལུས་གུས་པས་མང་པོར་སྤྲུལ་ནས་འདུད་པ། ངག་གུས་པས་བསྟོད་བསྔགས་བརྗོད་པ། ཡིད་གུས་པས་ཡོན་ཏན་རྗེས་སུ་དྲན་པ་སྟེ་སྒོ་གསུམ་གུས་པའི་སྒོ་ནས་ཕྱག་འཚལ་བའོ། །"[༢]ཞེས་གསུངས་སོ། །
ཕྱག་འོས་ཀྱི་ཡོན་ཏན། ཕྱག་འོས་ཀྱི་ཡོན་ཏན་ལ། "སེམས་ཅན་ལ་ཕན་པར་བསམ་པ་ཙམ་གྱིས་ཀྱང་སངས་རྒྱས་མཆོད་པ་ལས་ཁྱད་པར་དུ་འཕགས་པར་"[༣]གསུངས། "སེམས་ཅན་ལ་ཕན་པར་བསམ་པ་ཙམ་གྱིས་ཀྱང་སངས་རྒྱས་མཆོད་པ་ལས་ཁྱད་པར་དུ་འཕགས་པར་ཏིང་ངེ་འཛིན་གྱི་རྒྱལ་པོ་ལས། བྱེ་བ་ཁྲག་ཁྲིག་གཏམས་པའི་ཞིང་དག་ན། །མཆོད་པ་རྣམ་མང་དཔག་མེད་ཅི་ཡོད་པ། །སྐྱེས་མཆོག་རྣམས་ལ་ཉིན་རེར་རྟག་མཆོད་པས། །བྱམས་པའི་སེམས་ལ་གྲངས་དང་ཆར་མི་ཕོད། །"[༤]ཅེས་གསུངས་པ་ལྟར་རོ། །
དབྱེ་བ།
[རྩོམ་སྒྲིག]ཕྱག་འོས་ཀྱི་དབྱེ་བ་ལ་གཙོ་བོ་དཀོན་མཆོག་གསུམ་དང་། ཡན་ལག་ཏུ་དགེ་བའི་བཤེས་གཉེན་ལ་སོགས་པ་ཡིན་ནོ། །
ལུང་ཁུངས།
[རྩོམ་སྒྲིག]- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་༡༦
- ↑ ཐུབ་བསྟན་ཆོས་གྲགས། སྤྱོད་འཇུག་གི་འགྲེལ་བཤད་རྒྱལ་སྲས་ཡོན་ཏན་བུམ་བཟང་། ཤིང་དཔར། ཤོག་ངོས་༡༦
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་༡༩
- ↑ རྒྱལ་སྲས་ཐོགས་མེད་བཟང་པོ། སྤྱོད་འཇུག་གི་འགྲེལ་པ་ལེགས་བཤད་རྒྱ་མཚོ། ཤིང་དཔར། ཤོག་ངོས་༡༩