ཕོ་བྲང་ཞི་བ་འོད་
ཕོ་བྲང་ཞི་བ་འོད་ཀྱི་བཀའ་ཤོག
ཨོཾ་སྭ་སྟི་སི་དདྷཾ། པུ་ཧྲངས་ཀྱི་ཕོ་བྲང་ཞི་བ་འོད། གསང་སྔགས་ཀྱི་ནང་གི་རྒྱུད་དང་། འགྲེལ་པ་དང་། སྒྲུབ་ཐབས་དང་། དཀྱིལ་འཁོར་ཆོ་ག་མཐའ་དག་ལ་མཁས་པའི་ཞལ་སྔ་ནས་མཛད་དེ། བོད་ཀྱི་རྒྱལ་ཁམས་ཀྱི་བསྟན་པ་ལ་གནས་ཤིང་། རྡོ་རྗེ་ཐེག་པ་ལ་ཞུགས་པ་རྣམས་ལ་བརྩེ་བར་དགོངས་ནས། ཆུ་ཕོ་སྤྲེའུ་ལོ་ལ་བཀའ་ཤོག་བརྫངས་པ།
སངས་རྒྱས་ཀྱི་བཀའ་ལྟར་བཅོས་པའི་རྒྱུད་དང་། འགྲེལ་པ་དང་། སྒྲུབ་དག་སྟེ།
སྔར་གྱི་དུས་ཀྱི་ཕྱི་རྒྱུད་ཀྱི་ངན་སོང་སྦྱོང་རྒྱུད་ཀྱི་འགྲེལ་བ་ཆེ་ཆུང་ངམ་རྒྱན་དམ་པ་ལ་སོགས་པ་ཆོ་ག་ཆེ་ཕྲན་མང་དུ་ཡོད་པ་རྣམས་དང་། ཁམས་ནས་བྱུང་བ་རྣམས་ལ་མ་ནོར་བ་ཆེར་མེད། དེའང་འདི་དང་མཐུན་པར་དཔྱད་ན། ཀྲི་ཡའི་ཆ་ག་རྣམས་དང་། འགྲེལ་བ་ལྟར་བཅོས་པའི་བསྙེལ་རྣམས་དང་།
ནང་པ་ལ། སྒྱུ་འཕྲུལ་གྱི་རྒྱུད་ལ་བཅུ་གསུམ་པ་དང་། བཅུ་དགུ་པ་དང་བཞི་བཅུ་པ་དང་། བརྒྱད་བཅུ་པ་དང་། ལེའུ་ལག་ལ་སོགས་པ་རྣམས་ནི་འདྲེས་མར་སྣང་། ཟུར་ཤཱཀྱ་འབྱུང་གནས་ལ་སོགས་པས་བྱས་པའི་གསང་བ་སྙིང་པོའི་འགྲེལ་བ་སྤར་བཀབ་དང་། སྒྱུ་འཕྲུལ་བརྒྱད་ཅུ་པའི་འགྲེལ་བ་རྣམས་དང་། མི་བཅུ་དྲུག་པ་ལ་སོགས་པའི་འགྲེལ་བ་རྣམས་དང་། རྡོ་རྗེ་ལས་རིམ་ལ་སོགས་པའི་སྒྲུབ་ཐབས་དང་། ཆོ་ག་ཆེ་ཕྲན་རྣམས་དང་། དར་རྡོ་རྗེ་དཔལ་གྱི་གྲགས་པས་བྱས་ཟེར་མདོ་ལྔ་མ་ལ་ཟུར་ཆེ་ཆུང་གིས་(གྱིས་)པའི་འགྲེལ་བ་རྣམས་དང་། ཁྲོལ་ལོ་གཏིང་(སྟིང་)རྫོགས་དང་། ཐེག་ཆེན་སྒྲོལ་མ་དང་། རྣལ་འབྱོར་ལམ་རིམ་དང་། རྣལ་འབྱོར་མིག་གི་སྒྲོན་མ་ལ་སོགས་པའི་སྒྲུབ་ཐབས་རྩ་འགྲེལ་རྣམས་དང་། མྱ་ངན་ལས་འདས་པ་ཆེ་ཆུང་ལ་སོགས་པ་དང་། ཕུར་བའི་རྒྱུད་ལ་ཁུ་བྱུག་རོལ་པ་དང་། དེའི་བཤད་རྒྱུད་ཀི་ལ་ཡའི་སྔགས་དང་། དགོངས་པ་ལུང་སྟོན་དང་། གསང་པ་གཏེར་སྦས་དང་། རྡོ་རྗེ་གསལ་བཀོད་དང་། ཀི་ལ་སྔགས་ཆུང་ངུ་དང་། བྱི་ཏོའི་རྒྱུད་དུ་གསོལ་བ་དང་། སྟག་མོ་ཁ་གདངས་(བསྡངས་)དང་། ཕག་མོ་ཁ་གདངས་(བསྡངས་)དང་། གསང་ཕུར་ཁ་གདངས་(བསྡངས་)དང་། འཚུབས(ཚུབ་)ནག་རོལ་པ་དང་། ཞེ་སྡང་སེམས་སུ་དག་པའི་རྒྱུད་དང་། གསང་སྔགས་དྲུག་གི་རྒྱུད་དང་། འགྲེལ་སྡང་བ་དང་། ཆོ་གར་བཅས་པ་དང་། འཕྲོས་པ་(པས་)མན་ངག་གི་རྒྱུད་ལྔ་ཟེར་ཏེ། ཆགས་རྒྱུད་དང་། གཤིན་རྗེའི་བསྙེལ་རྣམས་དང་།
གཞན་ཡང་གནུབས་(སྣུབས་)སངས་རྒྱས་ཡེ་ཤེས་རིན་པོ་ཆེས་བྱས་པའི་དཔལ་འབར་ཁྲོ་བོའི་རྒྱུད་ལ་སོགས་པ་རྒྱུད་ཀྱི་རྒྱལ་པོ་དྲུག་དང་། བདུད་རྩི་བམ་པོ་བརྒྱད་པ་ལ་སོགས་པ་སྒྲུབ་ཐབས་ཀྱི་རྒྱུད་དང་། སྒྲུབ་ཐབས་དང་བཅས་པ་རྣམས་དང་། ཡང་གནུབས་(སྣུབས་)སངས་རྒྱས་ཡེ་ཤེས་རིན་པོ་ཆེ་བྱས་པའི་རྫོགས་པ་ཆེན་པོ་ནམ་མཁའ་ཆེའི་འགྲེལ་བ་རིག་པའི་ཉི་མ་ལ་སོགས་པ་མན་ངག་ཏུ་གསོལ་བ་དང་། གནོད་སྦྱིན་གྱི་རྒྱུད་རོག་ཏི་དང་། ལྕགས་ཕྱིེ་འབར་བ་དང་། ནག་པོའི་རྒྱུད་དགུ་དང་། ཨ་ཙ་རྱ་མ་དང་། འདྲ་མིན་(མན་)བོང་ལྟོ་མ་ལ་སོགས་པ་ཆོ་ག་དཔག་ཏུ་མེད་པ་དང་། བི་མ་མི་ཏྲས་བསྒྱུར་བའི་སེམས་ཕྱོགས་ཀྱི་ཕྱི་(ཕྱིས་)འགྱུར་བཅུ་གསུམ་ལ་། རྨད་དུ་བྱུང་བའི་ལེའུ་བཞི་བཅུ་ཞེ་གསུམ་དང་། བྱང་ཆུབ་སེམས་བདེ་འབྱམས་རིན་པོ་ཆེ་དང་། ལྟ་བ་བལ་ནག་ལ་སོགས་པའི་འགྲེལ་བ་དང་། ས་བཅད་དང་། ཡིག་ཆུང་དང་བཅས་པ་དང་།
ཉང་སྟོད་ཁྲོ་གངས་སུ་དྲང་ང་ཤག་ཚུལ་གྱིས་བྱས་པའི་སེམས་སྡེ་(བདེ་)བཅོ་བརྒྱད་ཀྱི་རྒྱུད་རྣམས་དང་། ཀུན་བྱེད་རྒྱལ་པོ་དང་། མདོ་བཅུ་གསང་བ་དང་། ཡེ་ཤེས་གསང་བ་དང་། འགྲེལ་བ་དང་ས་བཅད་དང་། དབང་བསྐུར་གྱི་མན་ངག་དང་། སྒོམ་པའི་མན་ངག་དང་། སེམས་ཉམས་ཀྱི་མན་ངག་དང་། སྲིད་པ་རྒྱུད་ལུང་ལ་སོགས་པ་དང་། མ་མོའི་རྒྱུད་ལུང་ལ་སོགས་པ་མ་མོའི་ཆོས་ཐམས་ཅད་དང་།
གཞན་ཡང་རྒྱལ་པོའི་ཆོས་ལྔ་ལ་སོགས་ཏེ། རྒྱུད་དང་། འགྲེལ་བ་དང་། མན་ངག་དང་། ཆོ་གར་མིང་བཏགས་(བཏབས་)པ་དཔག་ཏུ་མེད་དོ།
ཕྱིས་གསར་དུ་བྱུང་བའི་རྒྱུད་དང་། འགྲེལ་བ་དང་། མན་ངག་དང་། སྒྲུབ་ཐབས་ལ། ཨ་ཙརྱ་དམར་པོས་བྱས་པའི་ཕྱག་རྒྱ་ཆེན་པ་ཐིག་ལེ་དང་། གསང་ཆེན་ཐིག་ལེ་དང་ཡེ་ཤེས་སྙིང་པོའི་རྒྱུད་དང་། དེ་དག་གི་འགྲེལ་བ་དང་། ཆར་ཡང་རྣམ་གསུམ་དང་རིན་ཆེན་སྙེ་མ་དང་། རིན་ཆེན་ཐིག་པ་དང་། དབང་གི་མན་ངག་ལ་སོགས་པ་དང་། སྒྲུབ་ཐབས་མང་པོ་དང་།
དབང་རིན་ཆེན་འཁོར་ལོ་ལ་སོགས་པའི་མན་ངག་རྒྱལ་པོ་ཨིནྡྲ་བྷུ་ཏིས་མཛད་ཟེར་བ་དང་། སྒྲོན་གསལ་གྱི་ཏིཀྐ་བྷ་བཱ་མ་དང་། རིམ་ལྔའི་འགྲེལ་བ་ཀླུའི་བྱང་ཆུབ་ཀྱིས་མཛད་ཟེར་བ་དང་། ཀུན་རིག་རྩ་བའི་དཀྱིལ་འཁོར་གྱི་ཆོ་ག་གསར་མ་ལེའུ་ཉི་ཤུ་རྩ་བཞི་པའི་འགྲེལ་བ་དང་། མན་ངག་དང་། དེའི་སྒྲུབ་ཐབས་དང་བཅས་པ་དང་། ཨོ་རྒྱན་གྱི་ཡུལ་ནས་སེམས་ཕྱོགས་ཀྱི་ཆོས་འབྱུང་ཟེར་ཏེ། བྱས་པ་སྲོག་འབྱུང་ནམ་མཁའི་རྒྱུད་འགྲེལ་བ་དང་བཅས་པ་དང་། དེའི་བཤད་རྒྱུད་དང་། གླང་དཔལ་གྱི་(ཆད་)ཡེ་ཤེས་ཀྱིས་(ཀྱི་)བསྒྱུར་བའི་ཕྱིག་ན་རྡོ་རྗེ་གོས་སྔོན་ཅན་གྱི་རྒྱུད་དང་། འགྲེལ་བ་དང་། སྒྲུབ་ཐབས་དང་། སྦྱིན་སྲེག་(སྲེགས་)གི་ཆོ་ག་དང་། སྒྲུབ་ཐབས་བྷ་བཱ་མ་ཆེ་ཆུང་ལ་སོགས་པ་དཔག་ཏུ་མེད་པ་དང་།
པཎྜི་ཏ་མེེ་ཏྲི་པའི་ཆོས་ལ། རིན་པོ་ཆེའི་ཕྲེང་བ་དང་། ན་ག་ཛུ་ནས་མཛད་ཟེར་བའི་ཕྱག་རྒྱ་བཞིོ་པ་དང་། ཕྱག་རྒྱ་ལྔ་པ་དང་། དབང་རྣམ་པར་ངེས་པ་རྩ་འགྲེལ་དང་བཅས་པ་དང་། ཕྱག་རྒྱ་བཞི་པའི་མན་ངག་དང་། སེམས་འཛིན་རྣམས་དང་། རྣལ་འབྱོར་མའི་བྱིན་རླབས་དང་། རྡོ་རྗེ་ཕག་མོའི་བྱིན་རླབས་དང་སྒྲུབ་ཐབས་མུ་རྟེགས་པ་དང་བསྲེས་ནས་སྣང་བས་བྱར་མི་རུང་ངོ་།
གཞན་ཡང་མན་ངག་གསེར་ཕྲེང་ལ་སོགས་པ་དོ་ཀོ་ཥའི་གླུ་ལ་བསླད་པ་དང་། བལ་པོ་ཤྲཱི་སིང་ཧའི་གླུ་ལ་བསླད་པ་ལ་སོགས་པ་དང་། རྡོ་རྗེ་མདའ་ཀ་མ་དང་།
འདི་རྣམས་གང་ཡང་། ཡང་དག་པའི་ལམ་མ་ཡིན་ཞིང་། བླ་ན་མེད་པའི་བྱང་ཆུབ་ཐོབ་པར་མི་འགྱུར་བས། སྐྱབས་གནས་དང་ལམ་དུ་སུས་ཀྱང་བྱར་མི་རུང་ངོ་།
རབ་ཏུ་བྱུང་བ་རྣམས་ཀྱིས་ཀྱང་འདུལ་བ་ལྟར་བསྲུང་ཞིང་། བཀའི་གསང་སྔགས་ལ་ཞུགས་པ་རྣམས་ཀྱིས་ཀྱང་འདུལ་བ་ལ་བརྟེན་པ་དང་མི་འགལ་བར། ཀྲི་པ་ཡ་ (ཨུ་པ་)དང་། ཡོ་ག་དང་། གསང་བ་འདུས་པ་ལ་སོགས་པའི་བར་ལ། དམ་ཚིག་མ་ཉམས་པར་བྱས་ལ་འབད་དོ།
ཤེས་རབ་ཀྱི་རྒྱུད་ནི་མཆོག་ཏུ་གྱུར་པ་ཡིན་ཡང་། དགོངས་པ་ཅན་གྱི་ཚིག་དོན་མ་ཤེས་ནས། རབ་ཏུ་བྱུང་བ་བསླབ་པ་དང་ཕྲལ་བ་མང་བས་མ་བྱས་ཀྱང་འགལ་བ་མེད་པ་ཙམ།
ཁྱད་པར་དུ་རྫོགས་པ་ཆེན་པོའི་ལྟ་བ་མུ་སྟེགས་ཀྱི་རིམ་པ་དང་བསྲེས་པས། འདི་བྱས་ན་ངན་སོང་གི་ལམ་དུ་འགྲོ་བར་འགྱུར་ཞིང་། བླ་ན་མེད་པའི་བྱང་ཆུབ་ལ་གེགས་བྱེད་པས་རྣམ་པ་ཐམས་ཅད་དུ་བྱར་མི་རུང་ངོ་། །
བོད་ཀྱིས་བྱས་པའི་སྔགས་དང་ཡི་གེ་ལ། མི་གཡོ་བའི་སྔགས་ལ་བརྟེན་ནས་ཕྱག་ན་རྡོ་རྗེ་སྒྲུབ་ཐབས་ཡིན་ཟེར་བ་དང་། གནོད་སྦྱིན་ལག་ན་རྡོ་རྗེའི་(རེ་)སྔགས་ལ་བརྟེན་ནས། བཅོམ་ལྡན་འདས་ཕྱག་ན་རྡོ་རྗེའི་སྒྲུབ་ཐབས་དང་མན་ངག་ཡིན་ཟེར་བ་དང་། གཉན་ཨ་ཙརྱ་དཔལ་དབྱངས་ཀྱིས་བྱས་པའི་སྒྲོན་མ་རྣམ་དྲུག་དང་། གཏོར་མ་དང་། འཕྲིན་ལས་དང་། མན་ངག་ཏུ་བྱས་པ་དང་། གཞན་ཡང་བོད་ཀྱིས་བྱས་པའི་སྒྲུབ་ཐབས་མང་དུ་ཡོད་པས་བློ་གཏད་དུ་མི་གཏུབ། འཁོར་བ་ངན་སོང་གི་ལམ་ཡིན་ནོ། བཀའ་གདམས་ཀྱི་ཆོས་རྒྱུད་དུ་གྲགས་པ་འདི་རྣམས་ཀྱིས་(ཀྱི་)ཆོས་ལོག་འདི་རྣམས་ཉམས་སུ་མི་བླང་ངོ་། །
ཕོ་བྲང་ཞོ་བ་འོད་ཀྱིས་བོད་ཀྱི་ཆོས་པ་རྣམས་ལ་བརྫངས་པའོ། །