པཎ་ཆེན་ཤཱཀྱ་ཤྲི་
(ཁ་ཆེ་པན་ཆེན)རབ་བྱུང་གཉིས་པའི་མེ་ལུག(༡༡༢༧)ལོ་ནས་རབ་བྱུང་བཞི་པའི་ཤིང་བྱ་(༡༢༢༥)ལོ་བར་དགུང་ལོ་དགུ་བཅུ་གོ་དགུ་བཞུགས། འཁྲུངས་ཡུལ་ནི་རྒྱ་གར་ནུབ་ཕྱོགས་ཁ་ཆེའི་ཡུལ(དེང་སང་གི་ཀསྨིར)དུ་གྲོང་ཁྱེར་ཁྲ་ཝ་སུ་རར་ཡད་ཚོང་དཔོན་ཆེན་པོ་ས་མ་ཛ་ཡའི་སྲས་སུ་འཁྲུངས། དགུང་ལོ་བཅུ་ནས་བཟུང་རིག་པའི་གནས་ལྔ་ལ་སྦྱངས་པ་མཐར་ཕྱིན། དགུང་ལོ་ཉེར་གསུམ་ལ་རབ་ཏུ་བྱུང་། དེ་ནས་རྒྱ་གར་ཤར་ཕྱོགས་སུ་ཕེབས་ཏེ་དགུལ་ལོ་སུམ་ཅུ་བར་སངས་རྒྱས་ཆོས་ལུགས་ཀྱི་མཚན་ཉིད་རིག་པ་ལ་སློབ་གཉེར་གནང་། དེ་ནས་དགེ་སློང་གི་སྡོམ་པ་བཞེས་ནས་གསང་སྔགས་ཀྱི་ཆོས་ལ་སློབ་གཉེར་གནང་སྟེ་འཛམ་གྱིང་ཡོངས་སུ་གྲགས་པའི་པཎྜི་ཏ་ཆེན་པོར་གྱུར། རབ་བྱུང་དང་པོའི་མཇུག། དུས་རབས་བཅུ་གསུམ་པའི་ལོ་འགོར་ནུབ་ཕྱོགས་དུ་རུ་ཀའི་དམག་དྲངས་ནས་རྒྱ་ལར་ལྷོ་ཕྱོགས་དང་ཤར་ཕྱོགས་མ་གཏོགས་ནུབ་དང་བྱང་དབུས་བཅས་ཡོངས་རྫོགས་དུ་རུ་ཀའི་མངའ་འོག་ཏུ་ཚུད་དེ། པཎྜི་ཏ་དང་། མཁས་པ། རབ་བྱུང་མང་ཆེ་བ་རྒྱ་གར་ཤར་ཕྱོགས་འབར་མ་དང་། ཐའི་གོ། ཅན་ཕུ་ཀྲེ་སོགས་སུ་བྲོས་ཕེབས་ཤིང་། ཁ་ཆེ་པཎ་ཆེན་ཉུང་ཤས་ཤིག་རྒྱ་གར་བྱང་ཕྱོགས་བོད་ཀྱི་མཐའ་མཚམས་གྲོ་མོའི་ས་ཁུལ་དང་ཉེ་བའི་བེེཌཱུརྱའི་ཚོང་འདུས་སུ་བྲོས་ཕེབས། དེར་ལོ་ངོ་གཅིག་ཙམ་བཞུགས་མཚམས། རབ་བྱུང་གསུམ་པའི་ཤིང་བྱི(༡༢༠༤)ལོར། བོད་ཀྱི་ཁྲོ་ཕུ་ལོ་ཙཱ་བ་བྱམས་པའི་དཔལ་གྱིས་གྲོ་མོ་བརྒྱུད་ནས་བོད་དུ་གདན་དྲངས། སྐབས་དེར་ཁ་ཆེ་པཎ་ཆེན་དགུང་ལོ་བདུན་ཅུ་དོན་བརྒྱད་ལ་ཕེབས་ཤིང་། ཁྲོ་ཕུ་ལོ་ཙཱ་བ་དགུང་ལོ་སུམ་ཅུ་ལས་སླེབས་མེད་པའི་སྐུ་གཞོན་ནུ་ཞིག་ཡིན་སྟབས་ཁོང་ལ་ཆོས་དགའ་ཤས་གསུངས་ནས་རང་ཉིད་རྒྱ་གར་དུ་ཕྱིར་ཕེབས་དགོངས་པ་བྱུང་། རྗེས་སུ་ཁོར་གི་སློབ་མ་པཎྜི་ཏ་འགའ་ཞིག་ཡོད་པ་རྣམས་དང་། ཆོས་ཀྱི་གསུང་གླེང་གནང་བ་དེ་པཎ་ཆེན་གྱིས་ཞོར་ལ་གསན་པས་ཧ་ཅང་གྱི་ཐུགས་མཉེས་ཏེ། བོད་ལ་ལོ་ཙཱ་མཁས་པ་ཆེན་པོ་གཞུན་ནུ་འདོ་འདྲ་ཡོད་པ་ངོ་མཚར་ཆེ་གསུངས་ནས་ཁོང་གིས་ཆོས་ནམ་གསུངས་ཀྱང་ལོ་ཙཱ་བ་ལ་སྐད་འགྱུར་གནང་དུ་བཅུག་ཕྱག་ཏུ་འབལ་བའི་དངོས་པོ་གང་ཡོད་ལོ་ཙཱ་བ་ལ་གནང་། ལོ་བཅུའི་རིང་བོད་དུ་གཞུགས་ཏེ་སངས་རྒྱས་ཆོས་ལུགས་དར་སྤེལ་གནང་། དགུང་ལོ་བརྒྱད་ཅུ་བརྒྱད་པ་རབ་བྱུང་བཞི་པའི་ཤིང་ཁྱི(༡༢༡༤)ལོར་བོད་ནས་ཁ་ཆེའི་ཡུལ་དུ་ཕྱིར་ཕེབས་གནང་། བོད་དུ་བཞུགས་རིང་མང་ཚོགས་དང་། དད་ལྡན་ཕྱུག་པོ་རྣམས་ཀྱིས་དངོས་པོ་འཕུལ་བ་རྣམས་སོ་སོའི་དགོན་པ་དང་། རྟེན་བཞེངས་སོགས་ལ་གནང་བ་ལས། རང་ཉིད་ཀྱི་སྣེ་གཅིག་ཀྱང་སྒེར་འཛིན་མ་མཛད། ཁ་ཆེར་ཡང་ལོ་བཅུ་གཉིས་རིང་སངས་རྒྱས་ཆོས་ལུགས་དར་སྤེལ་མཛད་དེ་དགུང་ལོ་གོ་དགུ་ལ་སྐུ་གཤེགས། པཎ་ཆེན་འདིའི་ལོ་རྒྱུས་རྒྱས་པ《དེབ་དེར་སྔོན་པོ》ལེ་ཚན[བ]པའི་མགོ་ནས་ཤོག་གྲངས་༥ནས་༦བར་དང་། 《ཆོས་འབྱུང་མཁའ་པའི་དགའ་སྟོན》ལེ་ཚན[ཉ]པའི་ཤོག་གྲངས་༡༣ནས་༢༠བར་གསལ།