ནང་ཆེན་བྲོ་རྒན་མ་

ནང་ཆེན་ས་ཆའི་བྲོ་ཞིག་ཡིན་ཞིང་། བཤད་རྒྱུན་ལྟར་ན་ཀརྨ་ཆགས་མེད་མཆོག་གིས་བྲོ་གང་མང་ཞིག་བརྩམས་པར་མཛད་པ་དང་། ནང་ཆེན་རྫོང་གི་མགར་ཆེན་བྱང་ཆུབ་ཆོས་གླིང་གི་སྐུ་ཕྲེང་བདུན་པ་མགར་བསྟན་འཛིན་ཕུན་ཚོགས་ཀྱིས་བྲོ་གཞས་སོ་བརྒྱད་ལྷག་གཅེས་བསྡུས་ཉར་ཚགས་བྱས་ཞེས་གསུང་མོད། ད་ལྟ་མིག་གི་སྤྱོད་ཡུལ་དུ་གྱུར་ཡོད་པ་ནི་ཉེར་གཉིས་ཙམ་ལས་མེད།

ནང་ཆེན་བྲོ་རྒན་མ་ནི་ད་ལྟ་ནང་ཆེན་ས་ཁུལ་གྱི་ལྕི་ཆུ་ཞང་དབལ་ཡུལ་ཤིང་རོང་དང་། སྤྲེལ་ཚྭ་ཞང་ཚྭ་ཁ་མ། ན་བུན་གྲོང་ངམ་ནུན་གྲོང་སོགས་སུ་དར་ཁྱབ་ཆེ་ཞིང་། བྲོ་འདི་ནི་འཁྲབ་སྟོན་དང་རྩེད་མོའི་ཁྱད་ཆོས་ཡོད་པའི་བྲོའི་རིགས་ཤིག་ཀྱང་ཡིན་པས། སྐྱེས་ཕོ་མོ་གཉིས་ཀ་ཞུགས་ཆོག་ལ། བྲོ་རྡུང་དུས། སྐྱེས་པ་ཚོས་ནང་དུ་ཕུ་ཐུང་རིང་བའི་བྲོ་ལྭ་དཀར་པོ་གྱོན་པ་དང་། ཕྱི་རུ་ཕྲུག་ལྭ་དམར་སྨུག་གྱོན་ཡོད་ལ། སྨད་ལ་འབུ་རས་ཀྱི་རྐང་སྣམ་ཁ་སྦོམ་ཞིག་གྱོན་ཡོད། བུད་མེད་ཚོས་མགོ་ལ་སྤོས་ཤེལ་ལྔ་མགོ་དང་། རྐེད་ལ་ཆ་ཁྲ་དང་གློ་ལུང་སོགས་བཏགས་ནས་གར་ཆས་ཀྱི་ཁྱད་ཆོས་མངོན་གསལ་ལྡན་ཡོད།

ནང་ཆེན་བྲོ་རྒན་མའི་འཁྲབ་སྟོན་གྱི་སྟངས་སྟབས་ཟོར་ཡང་ཞིང་བྲོ་བ་ཕོ་མོ་ཀུན་གྱི་ལུས་ལ་ས་གནས་ཀྱི་ཁྱད་ཆོས་མངོན་པར་དོད་པའི་ཉམས་འགྱུར་ལྡན་ལ། དབྱངས་ཀྱི་འགྱུར་སྙན་ཞིང་འཇེབས་པ་དང་། རྔ་དང་གླིང་བུ། རྭ་གཟར་སོགས་རོལ་ཆས་ཀྱི་རམ་འདེགས་ཡོད་པས་ཡུལ་ཤུལ་གྱི་བྲོ་གཞན་པ་དང་བསྡུར་ན་ཁྱད་ཆོས་མངོན་གསལ་གྲུབ་ཡོད།