ནགས་ཤོད་ཀྱི་རྡོ་ཕུར་བཅུ་གསུམ་

གནའ་བོའི་རྒན་རབས་དག་གི་ངག་རྒྱུན་གྱི་ཆུ་བོ་རིང་མོ་ལས་ནགས་ཀྱི་རྡོ་ཕུར་བཅུ་གསུམ། ཤག་གི་རོང་ཆེན་བཅུ་གསུམ། སྦྲུལ་ནང་སྨན་མོ་བཅུ་གསུམ། རྐང་གི་ལུང་ངུ་བཅུ་གསུམ། མདོ་ཆེན་དཔའ་བོ་བཅུ་གསུམ། མྱང་གི་ཐང་ཆེན་བཅུ་གསུམ་ཞེས་འབོད་ཚུལ་བྱུང་བ་ལས། དེ་དག་གི་རྒྱབ་ལྗོངས་དང་བྱུང་ཚུར་བཅས་རེ་ཞིག་བཞག་ནས། ནགས་ཀྱི་རྡོ་ཕུར་བཅུ་གསུམ་མིང་ཙམ་བཀོད་ན། ནགས་ཀྱི་རྡོ་ཕུར་བཅུ་གསུམ་ནི་ནགས་ཤོད་རོང་སྐོར་ཆེན་མོ་འགྲོ་སྐབས་སྐོར་བ་བྱ་སྲོལ་ཡོད་པའི་གྲལ་ཞིག་ཡིན་ཡང་ལོ་རྒྱུས་སྨྲ་མཁན་རྣམས་ཀྱིས་ཐུགས་བརྗེད་དུ་ཤོར་ནས་རྡོ་ཕུར་བཅུ་གསུམ་ཕལ་མོ་ཆེ་ཡིག་ཐོག་ཏུ་འཁོད་མེད། དེ་རིང་ཕྲན་གྱི་ལོ་རྒྱུས་ལ་དོ་སྣང་མཛད་མཁན་ན་གཞོན་རྣམས་ཀྱི་སྤྱན་ལམ་དུ་ནགས་ཀྱི་རྡོ་ཕུར་བཅུ་གསུམ་གྱི་པར་རིས་དང་བཅས་པ་འབུལ་རྒྱུ་ཡིན། ནགས་ཀྱི་རྡོ་ཕུར་བཅུ་གསུམ་ནི་ནག་ཆུ་ཁོ་ན་འགྲིམ་ཡུལ་དུ་བྱུང་བ་ཞིག་མིན་ཞིང་། ནགས་ཤོད་ཀྱི་ཡུལ་དུ་སྤང་གི་དཀྱིལ་དང་། ན་བའི་དཀྱིལ། བྱེ་ཐང་གི་དཀྱིལ། ཆུ་བོ་ཆེན་པོའི་དཀྱིལ་བཅས་བྲག་རྒྱུད་ལས་བྱུང་བ་མིན་པ་དམིགས་གསལ་རང་བྱུང་གི་བྲག་ཕུར་པ་འདྲ་བ་ཡོད་པ་ལ་རྟེན་ནས་རྡོ་ཕུར་བཅུ་གསུམ་གྲགས་པའོ། །

༡༽ཕུར་པའི་གསེབ་ཀྱི་རྡོ་ཕུར། ༢༽འོམ་སྤྲེལ་རྒན་གྱི་རྡོ་ཕུར། ༣༽གཟར་རིའི་སྒང་ལམ་གྱི་རྡོ་ཕུར། ༤༽ཤག་རོང་རྐྱང་རྒན་གྱི་རྡོ་ཕུར། འདི་ནི་འཛམ་གླིང་གེ་གསར་རྒྱལ་པོའི་ལྷ་རྟ་རྐྱང་རྒོད་ཀྱི་རྟོད་ཕུར་ཡིན་པར་གྲགས་ལ། གནས་དེར་གླིང་འབུམ་པའི་རྒྱ་ཚའི་སྒྲུབ་ཕུག་ཀྱང་ཡོད། ༥༽ནག་ཤག་སུམ་མདོའི་རྡོ་ཕུར། ༦༽བྲག་མཆོག་རྡོ་ཕུར། ༧༽སྦྲ་ཆེན་རྡོ་ཕུར། ༨༽བེ་ཐང་རྡོ་ཕུར། ༩༽དཀར་ནག་མདོའི་རྡོ་ཕུར། ༡༠༽ར་རུའི་མདོ་རྡོ་ཕུར། ༡༡༽ཚག་གདམ་རྡོ་ཕུར། ༡༢༽སྙི་མདོའི་རྡོ་ཕུར། ༡༣༽དཀར་རོང་ཁྲ་ཁུ་ལྷས་སུ་ཡོད་པ། སྒར་སྡེའི་རྟ་ཡི་རྟོད་ཕུར་བཅས་ཡིན་པར་སེམས་ཏེ་དཔྱད་གཞིའི་ཚུལ་དུ་འབྲིས་པ་དགེ་འོ། འགའ་ཞིག་གིས་ཆུ་མ་མཁར་དང་། རི་མ་མཁར། བྲག་དེའུ་རྔ་རྡུང་སོགས་ནགས་ཀྱི་རྡོ་ཕུར་གྲལ་དུ་རེད་ཟེར་སྲོལ་བྱུང་ཡོད་ཀྱང་དེ་དག་དཔྱད་པའི་གནས་སུ་མཆིས། 2022/9/13

ཕུར་པའི་གསེབ་ཀྱི་རྡོ་ཕུར།

འོམ་སྤྲེལ་རྒན་གྱི་རྡོ་ཕུར།

གཟར་རིའི་སྒང་ལམ་གྱི་རྡོ་ཕུར།

ཤག་རོང་རྐྱང་རྒན་གྱི་རྡོ་ཕུར།

ནག་ཤག་སུམ་མདོའི་རྡོ་ཕུར།

སྦྲ་ཆེན་རྡོ་ཕུར།

བེ་ཐང་རྡོ་ཕུར།

དཀར་ནག་མདོའི་རྡོ་ཕུར།

ར་རུའི་མདོ་རྡོ་ཕུར།

ཚག་གདམ་རྡོ་ཕུར།

སྙི་མདོའི་རྡོ་ཕུར།

དཀར་རོང་ཁྲ་ཁུ་ལྷས་སུ་ཡོད་པ། སྒར་སྡེའི་རྟ་ཡི་རྟོད་ཕུར།