དྲི་ཟ་

དྲི་ཟ་ནི་འདོད་པའི་བར་སྲིད་དེ་སྐལ་བ་བཟང་ངན་ཀུན་གྱིས་དྲི་ཞིམ་པ་དང་མི་ཞིམ་པ་ཐམས་ཅད་ཟ་བའི་རིགས་ཤིག་ཡིན་པས་མིང་དེ་ལྟར་ཐོགས་ཤིང༌། ལྷའི་གླུ་མཁན་ཡང་ཡིན་ཏེ་དྲི་ཟའི་གླུ་ཞེས་སྙན་པའི་ཚད་དུ་བྱེད། ཡོངས་གྲགས་སུ་དྲི་ཟའི་རྒྱལ་པོ་ཏཁྲི་ར་དང༌། དྲི་ཟའི་རྒྱལ་བོ་ལྗོན་པ་རྟ་མགོ་ཅན་སོགས་ཀྱང་དྲི་ཟའི་རིགས་ཡིན་ནོ།། གདོན་ཞེས་པ་ནི། མི་མིན་གྱི་རིགས་ཏེ་མིའི་ཁོག་པར་ཞུགས་པའམ། ཡང་ན་ནད་དང་རྐྱེན་ངན་སྣ་ཚོགས་གཏོང་བའི་རིགས་ཤིག་སྟེ། བྱིས་པའི་གདོན་ཆེན་བཅོ་ལྔ་སོགས་ཀྱིས་མཚོན་སྟེང་གདོན་དང༌། བར་གདོན། འོག་གདོན། ཕོ་གདོན་དང་མོ་གདོན་སོགས་གདོན་གྱི་རིགས་མང་པོ་ཡོད་པར་གསུངས། འདྲེ་ཞེས་པ་ནི། མི་མ་ཡིན་གྱི་བྱེ་བྲག་ཅིག་སྟེ། མི་ལ་གནོད་འཚེ་གཏོང་བ་དང༌། མིའི་ཁོག་པར་ཞུགས་ཏེ་སྣང་བ་གཞན་དབང་དུ་བསྒྱུར་ནས། གང་ཞུགས་པའི་འདྲེའི་བསམ་བློ་དང་བྱ་སྤྱོད་ཐམས་ཅད་བཤད་པ་ཞིག་ཡིན། སྲི་ཞེས་པ་ནི། གནོད་བྱེད་ཀྱི་གདོན་འདྲེའི་རིགས་ཤིག་ཏེ། ཀཱི་ལ་ཡའི་སྲི་ཆུང་གི་ལོ་རྒྱུས་སུ། རྒྱལ་བོའི་ཕུང་སྲི་དང༌། བློན་པོའི་ཕུང་སྲི། རྣལ་འབྱོར་བའི་དམ་སྲི། དགྲ་སྲི། གོད་སྲི། སྒོ་སྲི། ཆུང་སྲི། དུར་སྲི། གཡལ་མོའི་གོད་སྲི། སྡང་བོའི་སྲི། ལྟས་ངན་ཆོ་འཕྲུལ་གྱི་སྲི། དེ་རྣམས་ཕ་ཕ་བདུད་དང༌། མ་མ་བདུད་དེ་སྲི་བཅུ་གསུམ་དུ་གསུངས་སོ། །