དར་ལྕོག

བོད་མིས་ལ་རྩེ་དང་ཁང་བའི་ཡང་ཐོག་གྲོང་ཁྱིམ་དང་། སྒོ་མཆོར་གྱི་མདུན་དུ་དར་ལྕོག་དང་དར་ཆེན་འཛུགས་སྲོལ་ཡོད་པ་དེ་ནི་བོད་མིའི་གནས་ཡུལ་ཁོ་ན་ལས་གཞན་དུ་མཐོང་རྒྱུ་མེད་པའི་ཐུན་མོང་མ་ཡིན་པའི་ཡུལ་སྲོལ་གོམས་གཤིས་ཤིག་ཡིན་པས། དར་ལྕོག་ཡོད་ན་དེ་གར་བོད་མི་ཡོད་པ་གཏན་འཁེལ་ཡིན། དར་ལྕོག་ནི་དར་རམ་རས་ཀྱི་སྟེང་དུ་གཟུངས་སྣ་ཚོགས་དཔར་ནས་རི་རྩེ་དང་ལ་ཁ།ཡང་ན་སྒོ་ཁང་གི་ཀླད་སོགས་རླུང་བུ་རྒྱུ་ས་ཀུན་ཏུ་བསྐྱོད་པ་དེ་ལ་ཟེར།བཤད་རྒྱུན་ལ་ལར་དར་ལྕོག་ཐོག་མར་དམག་གི་རྟགས་དང༌།ཡང་འགའ་རེས་ས་རྟགས་ཡིན་པ་ཕྱིས་སུ་ཆོས་ལུགས་ཀྱི་ཕྱག་སྲོལ་དུ་གྱུར་ཚུལ་བཤད་པར་དཔྱད་རྒྱུ་ཡོད་དོ།

དར་ལྕོག་གི་ཕན་ཡོན།

དར་ལྕོག་གི་ཕན་ཡོན་ནི།ནང་ཆོས་ལས་གཟུངས་སྔགས་དཔར་བའི་དར་གྱི་སྟེང་དུ་རླུང་ཕོགས་པའི་རླུང་དེ་སེམས་ཅན་གང་གི་སྟེང་དུ་ཕོགས་ན་སེམས་ཅན་དེ་ལ་ངན་འགྲོ་མེད་པར་གསུངས་པ་དང༌།འཇིག་རྟེན་འདིའི་དབང་དུ་བཅོས་ན།རྐྱེན་ངན་བར་ཆད་སོགས་མི་མཐུན་པའི་ཕྱོགས་ངན་པ་ཐམས་ཅད་འགོག་པ་དང༌།ཚེ་བསོད་དབང་ཀླུང་སྙན་གྲགས་སོགས་མཐུན་པའི་ཕྱོགས་ཐམས་ཅད་གོང་ནས་གོང་དུ་རྒྱས་པ་སོགས་ཀྱི་དགེ་མཚན་ལྡན་ནོ།

དར་ལྕོག་གི་ཁ་དོག

དར་ལྕོག་གི་མཚོན་དོན་ནི།སྤྱི་བཏང་དར་ལྕོག་ནི་སྔོན་པོ།དཀར་པོ།དམར་པོ།ལྗང་གུ།སེར་པོ་སོགས་དར་ཚོན་སྣ་ལྔའི་སྟེང་དཔར་སྲོལ་ཡོད་ལ།དེ་དག་ནི་འབྱུང་ལྔའི་མཚོན་བྱེད་ཡིན་པ་རྩིས་གཞུང་འགའ་རེར་གསུངས།འབྱུང་བ་ལྔ་ནི་ས་ཆུ་མེ་རླུང་ནམ་མཁའ་ལྔར་བགྲང་ཡང༌།རྩིས་གཞུང་དུ་ཤིང༌དང་མེ།ལྕགས་དང་ཆུ།ས་བཅས་ལྔ་བགྲང་མོད། འོན་ཀྱང་དར་ལྕོག་གི་ཁ་དོག་དེ་དག་བསྒྲིགས་སྟངས་ལ་འདྲ་མི་འདྲ་མང་བོ་མཐོང་རྒྱུ་ཡོད་མོད། སྔ་རབས་དབུས་གཙང་ཕྱོགས་ཀྱི་ཕྱག་རྒྱུན་ལྟར་བྱེད་དེ། དེ་ནི་སྔོན་པོ་གནམ་དང༌། དཀར་པོ་སྤྲིན། དམར་པོ་མེ།ལྗང་གུ་ཆུ། སེར་པོ་སའི་མཚོན་དུ་བཤད་དོ། དར་ལྕེ་ནི། རང་རང་གི་རླུང་རྟའི་ཁམས་ཀྱི་མདོག་གོང་དུ་བྱ་ལ།དེ་ནས་རིམ་བཞིན་དགྲ་འདེད་ཀྱི་ཁ་དོག་སྣ་ལྔ་བྱའོ།

དར་ལྕོག་གི་མཚོན་དོན།

ད་ལྟ་དར་ལྕོག་གི་ངོས་སུ་ཁ་མཆུ་ནག་པོ་དང་རྒྱལ་མཚན་རྩེ་མོའི་དཔུང་རྒྱན། རླུང་རྟ་སྡེ་བཞི་སོགས་འགོད་ཀྱིན་འདུག་ལ། དེ་ནི་བྱ་ལས་འགྲུབ་པ་དང་ན་ཚ་མེད་པ། དབང་ཐང་དང་རླུང་རྒྱས་པ། ཁ་ལས་དགེ་ཞིང་ཚེ་ཐག་རིང་བ་སོགས་ཀྱི་ཆོ་ག་གལ་ཆེན་ཞིག་ཏུ་བརྩི་བཞིན་ཡོད།།

དར་ལྕོག་ཤར་དུས།

བོད་ཀྱི་ལོ་གསར་ཚེས་གསུམ་གྱི་ཉིན་གཟའ་སྐར་འཕྲོད་སྦྱོར་བཟང་བའི་བཀྲ་ཤིས་པའི་ཉིན་མོ་ཞིག་ཏུ་བརྩི་ སྲོལ་ཡོད་པ་ཞིག་ཡིན། སྐབས་དེར་བོད་མིའི་གྲོང་ཁྱིམ་ཚང་མས་རང་རང་གི་ཁང་ཐོག་ཏུ་བསྐྱོད་ནས་བསངས་གསོལ་བྱེད་པ་དང་། སྦྲགས་དར་ལྕོག་རྙིང་པ་རྣམས་ཕབ་སྟེ་གསར་པ་བརྗེ་ཡི་ཡོད། དར་ལྕོག་ནི་དར་ལྕེ་དང༌། བ་དན། དེ་གཉིས་འདོགས་སའི་ཡུལ་ལྕང་མ་གསར་པ་བཅས་ལས་གྲུབ་པ་ཞིག་ཡིན། ལྕང་གསར་གྱི་ལྕུག་ཕྲན་སྟེང་དུ་ཚོས་གཞི་སྔོན་པོ། དཀར་པོ། དམར་པོ། ལྗང་གུ། སེར་པོ་བཅས་དབྱིབས་ཅུང་ཆུང་ལ་ངོས་གཅིག་ཨ་ཡིག་གི་དབྱིབས་ཅན་ལྟར་བྲས་པ་དེ་ལ་དར་ལྕེ་ཟེར། དེའི་འོག་ལ་གོང་གི་ཚེས་གཞི་ལྔའི་གང་རུང་གི་ཚོས་གཞི་གཅིག་ཡིན་པའི་རས་གྲུ་བཞི་མཐའ་བསྒྲིལ་དང་། ལྡན་པ་ཞིག་གི་ངོས་ལ་ཟུར་བཞིར་སྟག་སེང་ཁྱུང་འབྲུག་གི་རི་མོ་བཀོད་པ། དེའི་སྟེང་རྒྱལ་བའི་བཀའ་དཔར་དུ་བཏབ་ཡོད་པའི་བ་དན་དེ་ལ་ཀླུང་སྐྱེད་དར་ལྕོག་ཟེར། དར་ལྕེ་དང་བ་དན་གྱི་ཚོན་གཞི་སོ་སོར་མཚོན་བྱ་རེ་ཡོད་པས་ཞིབ་པར་ཞུས་ན། དར་ལྕེའི་རྩེ་མོ་ཚོས་གཞི་སྔོན་པོས་ནམ་མཁའ་མཚོན་པ་དང༌། དེ་འོག་དཀར་པོས་སྤྲིན་པ་མཚོན་པ། དེ་འོག་ལྗང་ཁུས་ཆུ་མཚོན་པ། དེ་འོག་སེར་པོས་ས་མཚོན་པ་བཅས་ཡིན། དེ་དག་གི་གོ་རིམ་རྩ་བ་ནས་འཁྲུགས་མི་རུང༌། དར་ལྕེའི་འོག་ལ་བ་དན་ཡིན་ཞིང༌། བ་དན་གྱི་ཚོས་གཞི་ནི་ཁྱིམ་དེའི་བདག་པོར་གྱུར་པའི་མི་སྣའི་འབྱུང་ཁམས་གང་ཡིན་པ་དེ་ལ་བརྟེན་ནས་གཏན་འཁེལ་བ་ཡིན། དེ་ནི་བོད་ཀྱི་འབྱུང་རྩིས་དང་མཐུན་པར་བརྩིས་པ་ལ་སོགས་ཁུངས་དང་། ལྡན་པའི་སྒོ་ནས་དར་ལྕོག་བཟོས་ན་ཀླུང་རྟ་ཡར་སྐྱེད་ཀྱི་ཕན་པ་ཧ་ཅང་ཆེ་བ་ཡིན།། །།