དམག་རྐང་།

དམངས་གཙོའི་བཅོས་བསྒྱུར་སྐབས་བརྟག་དཔྱད་བྱས་པའི་དཔྱད་གཞིའི་ཡིག་རིགས་ལྟར་ན། གཞུང་རྒྱུགས་མི་སེར་དམག་རྐང་རེ་ནས་དམག་མི་རེ་གཏོང་དགོས་པ་དང་། དེ་ཡང་དབུས་ཁུལ་དུ་གཉིས་སྣའི་དམག་རེ། གཙང་ཁུལ་བཞི་སྣའི་དམག་རེ་འཁྲི། རྗེས་སུ་བརྒྱད་སྣ་ཟེར་བ་ཡང་བསྐུལ་ཡོད། རྐང་གཉིས་ནས་དམག་མི་རེ་འཁྲི་བ་ལ་བཞི་སྣའི་དམག་ཟེར་ཞིང་། རྐང་བརྒྱད་ནས་དམག་མི་རེ་འཁྲི་བ་ལ་བརྒྱད་སྣའི་དམག་ཟེར། སྒེར་པ་ཁག་དང་དགོན་པ་ཁག་གི་མི་སེར་ནས་སྲིད་གཞུང་ལ་འདོན་བཞི་ནས་དམག་མི་རེ་གཏོང་དགོས། དམག་ཕོགས་ལ་ཟླ་བ་རེ་ལ་འབྲུ་ཁལ་གཉིས། ཇ། མར། ཚྭ། བུལ། ཤིང་བཅས་ཀྱི་དོད་དུ་དངུལ་སྲང་རེ། དམག་མི་ལ། ལོ་རེ་དབྱར་དགུན་གྱི་གྱོན་ཆས་ཆ་ཚང་རེ་སྤྲོད་དགོས་པའི་དབྱར་གོས་ལ། ཕྱིང་ཞྭ། རས་ཀྱི་སྟོད་ཐུང་གོས་ཐུང་། སྣམ་བུ་སྤུ་ཕྲུག་གི་ཕྱུ་པ། ལྷམ་འཇུར་རྟ་བཅས་དང་། དགུན་གོས་ལ། ཞྭ་མོ་ལྤགས་ཞྭ། སྣམ་བུའི་སྟོད་ཐུང་དང་གོས་ཐུང་ཆ་ཚང་། ལྷམ་ཤོལ་རྩེ། དམག་ཕོགས་ཆེ་བར་མི་རེར་འབྲུ་ཁལ་ ༣༦ འབྲིང་ལ་ཁལ་༢༤ ཆུང་བར་ཁལ་ ༡༨ ལག་དངུལ་ཆེ་བར་བོད་དངུལ་རྡོ་ཚད་བཅོ་ལྔ་ སྲང་(༧༥༠) འབྲིང་བར་རྡོ་ཚད་བཅུ་ སྲང་(༥༠༠ )ཆུང་བར་རྡོ་ཚད་བརྒྱད། སྲང་(༤༠༠) ཕོགས་སྣོད་སྒྱེ་ཕད་རེ། ཉལ་ཆས་བཙུགས་ཕྲུག་རེ། སླེལ་བུ་རེ། གལ་ཏེ་མི་གཞན་ལག་གླས་པ་ཡིན་ཚེ། དམག་གླ་ཆེ་བར་ལོ་གཅིག་ལ་བོད་དངུལ་རྡོ་ཚད་བརྒྱ་ཐམ་པ་སྲང་(༥༠༠༠) འབྲིང་བར་རྡོ་ཚད་དགུ་བཅུ་སྲང་(༤༥༠༠) ཆུང་བར་རྡོ་ཚད་བརྒྱད་ཅུ་སྲང་ (༤༠༠༠) ད་དུང་དམག་སྤྱི་ལས་ཁུངས་ཀྱི་གཞུང་ཁྲ་ནང་གསལ་བ་ལྟར་ལོ་གཉིས་གསུམ་རེའི་མཚམས་སུ་དམག་རྐང་རེ་ནས་དམག་ཆས་སྣམ་བུ་སྤུས་ལེགས་འདོམ་ཚད་༡༦ ལོང་པ་རེ་སྤྲོད་དགོས་པ་དང་། རུ་སྤྱིའི་ལས་དོད་ཟེར་བར་དམག་རྐང་རེ་ནས་ཕོ་ལོའི་སྐབས་སུ་བོད་དངུལ་སྲང་༣༠སྐོར་དང་། མོ་ལོའི་སྐབས་སུ་དངུལ་སྲང་༤༠སྐོར་སྤྲོད་དགོས། དམག་མི་ཡུལ་བྱོལ་དུ་སོང་ཚེ། དོ་བདག་ལ་ཉེས་པ་གསེར་སྲང་༡༠དངུལ་སྲང་(༩༦)དམག་མིའི་ཚབ་གསར་པ་མ་བཙུགས་བར་དུ་ཉིན་གྲངས་ཇི་སོང་གི་འགྱང་ཆད་ཉིན་རེ་ལ་དངུལ་ཞོ་གསུམ་རེའི་འབབ་སྤྲོད་དགོས། དམག་མི་གསར་པ་སླེབས་ཉིན་དམག་སྤྱི་དང་། མདའ་དཔོན། རུ་དཔོན། བརྒྱ་དཔོན། བཅུ་དཔོན་བཅས་ལ་གོ་གནས་མཐོ་དམའ་དང་བསྟུན་པའི་འཇལ་རྟེན་འབུལ་དགོས་པ་བཅས་ཡིན། །