དཔལ་ལྡན་འབྲས་སྤུངས་ཀྱི་མཆོད་རྟེན་

སངས་རྒྱས་ཆོས་ལུགས་ཀྱི་བཤད་སྲོལ་ལ། སྟོན་པ་ཤྰཀྱ་ཐུབ་པས་བྱ་རྒོད་ཕུང་པོའི་རིར་ཤེར་ཕྱིན་གྱི་མདོ་གསུངས་པ་དང་དུས་མཉམ་དུ་དུས་འཁོར་རྩ་རྒྱུད་གསུངས་པའི་གནས་ཀྱང་འདི་ཡིན། ལེགས་སྦྱར་སྐད་ལ་ཤྲི་ཌྷ་ནྱ་ཀ་ཊ་ཀ་ཞེས་དང་བོད་སྐད་ལ་དཔལ་ལྡན་འདྲས་སྤུངས་ཞེས་མཆོད་རྟེན་འདིའི་རྩ་བའི་འཁོར་ཡུག་རྒྱང་གྲགས་བཞི་བཅུ་ཡོད་པ། རྒྱང་གྲགས་ཀྱི་ཚད་ཀྱང་རྡུལ་ཕྲ་རབ་བདུན་འགྱུར་གྱིས་རྡུལ་ཕྲན་གཅིག་། རྡུལ་ཕྲན་བདུན་འགྱུར་གྱིས་ལྕགས་རྡུལ་གཅིག་ལྕགས་་རྡུལ་བདུན་འགྱུར་གྱིས་ཆུ་རྡུལ་གཅིག ཆུ་རྡུལ་བདུན་གྱིས་རི་བོང་གི་རྡུལ་གཅིག རི་བོང་གི་རྡུལ་བདུན་གྱིས་ལུག་རྡུལ་གཅིག ལུག་རྡུལ་བདུན་གྱིས་གླང་རྡུལ་གཅིག གླང་རྡུལ་བདུན་གྱིས་ཉི་ཟེར་གྱི་རྡུལ་གཅིག ཉི་ཟེར་གྱི་རྡུལ་བདུན་གྱིས་སྲོ་མ་གཅིག སྲོ་མ་བདུན་གྱིས་ཤིག་ཤིག་བདུན་ལ་ནས་གཅིག ནས་བདུན་ལ་སོར་ཚིགས་གཅིག སོར་ཚིགས་ཉི་ཤུ་རྩ་བཞི་ལ་ཁྲུ་གང། ཁྱ་བཞི་ལ་གཞུ་གང། གཞུ་འདོམ་ལྔ་བརྒྱ་ལ་རྒྱང་གྲགས་གཅིག རྒྱང་གྲགས་བརྒྱད་ལ་དཔལ་ཚད་གཅིག་བཅས་ཡིན། མཆོད་རྟེན་འདི་རྒྱ་གར་ཤར་ཕྱོགས་བྷངྒ་ལའི་མཐའ་ནས་རྒྱ་མཚོ་ལ་གྲུ་བཏང་ནས་ཉིན་གསུམ་ཙམ་ཕྱིན་པས་སླེབས་པར་གསུང། མཆོད་རྟེན་གྱི་མདུན་གྱི་ཤར་ནས་ལྕགས་རི་ཕྱི་མའི་ཤར་སྒོ་བར་དུ་གྲོང་ཁྱེར་དཔལ་ཡོན་ཅན་མི་ཁྱིམ་འབུམ་ཕྲག་ལྔ་དང་ཚོང་འདུས་ཆེན་པོ་རྒྱ་དཀར་ནག་གི་དངོས་ཆས་སྣ་ཚོགས་ཡོད་པར་གསུངས། །
༼དུང་དཀར་ཚིག་མཛོད་ཆེན་མོ་༽ལས་བཏུས།