དཔལ་ཡུལ་

དཔལ་ཡུལ་ Palyu

དཔལ་ཡུལ་རྫོང་ནི་སི་ཁྲོན་ཞིང་ཆེན་དཀར་མཛེས་ཁུལ་གྱི་མངའ་ཁོངས་སུ་གནས་ཡོད་ཅིང་། ཤར་ཉག་རོང་རྫོང་དང་ལྷོ་འབའ་ལི་ཐང་། ནུབ་བོད་ལྗོངས་ཀྱི་གོ་འཇོ་དང་འཇོ་མདའ། བྱང་སྡེ་དགེ་དང་དཀར་མཛེས་རྫོང་སོགས་དང་འབྲེལ་ནས་ཡོད་པ་དང་། རྒྱ་ཁྱོན་ལ་སྤྱི་ལེ་གྲུ་བཞི་མ10591ཡོད་པ་དང་མངའ་ཁོངས་སུ་གྲོང་རྡལ་གཅིག་དང་གྲོང་ཁག16 སྲིད་འཛིན་གྲོང་ཚོ156 མི་འབོར་ཁྲི5.36ཡོད་ཅིང་། སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་ནུབ་བྱང་དུ་ཆགས་པའི་རྫོང་མཁར་ཞིག་ཡིན་ལ།དགོན་པའི་མིང་ཡུལ་མིང་དུ་ཐོགས་པའི་རྫོང་མཁར་ཞིག་ཡིན།

དེ་ཡང་གནའ་སྔ་མོའི་དུས་སུ། དཔལ་ཡུལ་རྫོང་མཁར་ཡོད་ས་འདི་ནི་མཚོ་ཆེན་པོ་ཞིག་ཡིན་ཞིང་མིང་ལ་ན་ཆུང་མཚོ་ཟེར། མཚོ་དེའི་ཤར་ཕྱོགས་སུ་ཁང་བུ་བྲག་ཕུག་ཡོད་པ་དང་། མདའ་ཁོ་རི་བོ་དང་ཁང་བུ་བྲག་ཕུག་གི་ཕྱོགས་སུ་ད་དུང་མཚོ་ཞིག་ཡོད་པ་དེའི་མིང་ལ་གདང་ཕེ་མཚོ་ཟེར། གདང་ཕེ་མཚོའི་ཕྱོགས་སུ་རི་བོ་ཞིག་ཡོད་ཅིང་མིང་ལ་སྨེ་ནོ་རི་བོ་ཟེར། སྨེ་ནོ་རི་བོ་ནི་དཔལ་འཛོམས་རི་བོའི་སྤུན་ཡིན་ལ། གདང་ཕེ་མཚོ་ནི་ན་ཆུང་མཚོ་ཡི་ནུ་མོ་ཡིན། མཚོ་དེའི་ལྷོ་ཕྱོགས་ནི་བྲག་ཁ་ཆུ་རི་བོ་ཡིན་པ་དང་། དེར་སློབ་དཔོན་པདྨ་འབྱུང་གནས་ཀྱི་སྒྲུབ་ཁང་ཡོད་ལ་མཚོ་དེའི་ལྷོ་ཕྱོགས་ནི་སྨེ་ནོ་རི་བོའི་སྤུན་དཔལ་འཛོམས་རི་ཡིན་པ་དང་། དེ་ནི་མོ་རི་སྒྲོལ་མ་ཡིན་ཞིང་རི་བོ་འདིར་ལྷ་མང་པོ་བཞུགས་ཡོད་པར་གྲགས། བྱང་ངོས་ནི་སྒ་པ་རི་བོ་ཡིན་ལ་སྒ་པ་རི་ནི་བོད་ཡིག་གི་ད་དང་ཧ་ཅང་འདྲ། ཁང་བུ་བྲག་ཕུག་ནི་བོད་ཡིག་གི་པ་དང་འདྲ་ལ། བྲག་ཁ་ཆུའི་མདུན་ངོས་ཀྱི་རི་བོ་ནི་བོད་ཡིག་གི་ལ་དང་འདྲ། ཡི་གེ་དེ་གསུམ་པོ་མཉམ་དུ་སྦྱར་ན་དེང་སྐབས་ང་ཚོས་བརྗོད་བཞིན་པའི་དཔལ་ཞེས་པའི་མིང་འདི་གྲུབ། ཡུལ་ནི་ང་ཚོས་ཤེས་གསལ་ལྟར་བོད་སྐད་དུ་ས་ཁོངས་སམ་ཕ་ཡུལ་ལ་འཇུག་པས་ན་དཔལ་ཡུལ་ཞེས་པའི་མིང་འདི་བཏགས་པར་གྲགས། ཡང་ལ་ལས་དཔལ་ཞེས་པ་ནི་བཀྲ་ཤིས་སམ་ཕུན་སུམ་ཚོགས་པའི་དོན་ཡིན་ཞིང་། ཡུལ་ཞེས་པ་ནི་ས་ཁོངས་སམ་ས་གནས་ལ་གོ་དགོས། ཤོད་རྒྱུན་ལ་ས་གནས་དེ་ནི་དེ་བཞིན་གཤེགས་པ་དང་འཕགས་པ་སྤྱན་རས་གཟིགས་ཀྱིས་སྔགས་བླ་མེད་གསུངས་པའི་གནས་ཡིན་ཞིང་མཐའ་བཞིའི་ས་དབྱིབས་རི་མོ་བཀྲ་ཤིས་རྟགས་བརྒྱད་ལས་གྲུབ་ཅིང་དཔལ་ཕུན་སུམ་ཚོགས་པའི་ཡུལ་མཆོག་ཡིན་པའི་ཆ་ནས་མིང་འདི་ལྟར་བཏགས་པར་བཤད། ཡང་དཔལ་ཡུལ་གྱི་བྱང་ཕྱོགས་སུ་གངས་རི་དང་མཚོ་མོ་ཡོད་ཅིང་། གངས་ལ་ཉི་མ་ཤར་བས་གཡུ་དཀར་པོ་དང་མཚུངས་པས་མིང་དེ་ལྟར་བཏགས་པ་དང་། གཞི་བདག་དཔལ་འཛོམས་གནས་པའི་ཡུལ་ཡིན་པས་དཔལ་ཡུལ་ཞེས་བཏགས་པ་སོགས་ཀྱི་བཤད་རྒྱུན་དུ་མ་ཡོད།