དག་པ་དགོན

མཚན་རྒྱས་པར་སེར་སྨད་དག་པ་རྣམ་སྤྲུལ་གླིང་ཞེས་ཞུ། མལ་གྲོ་གོང་དཀར་རྫོང་ནས་སྣུམ་ནག་འཁོར་ལམ་བརྒྱུད་སྤྱི་ལེ་བཞི་ཙམ་སོང་ན་དག་པ་གྲོང་དབུས་སུ་དགོན་དེ་མཇལ་རྒྱུ་ཡོད། དགོན་དེ་ནི་ཐོག་མར་སྐྱེས་བུ་ཡེ་ཤེས་རྡོ་རྗེས་ཕྱག་བཏབ་གནང་མཛད་པའི་བཀའ་བརྒྱུད་ཀྱི་དགོན་ཡིན་པ་དང་། སྔོན་ཙ་རིར་གནས་སྐོར་དུ་འགྲོ་ཁར་དགོན་དེ་མཇལ་དགོས། གལ་ཏེ་དགོན་དེ་མ་མཇལ་ན་གོས་ལ་གོང་བ་མེད་པ་དང་ཁྱད་མེད་ཅེས་ཟེར། ཇུན་གར་དམག་མ་ལངས་ཙམ་དུ་དགེ་ལྡན་ལུགས་སུ་གྱུར། སེར་སྨད་གྲྭ་ཚང་གི་དགོན་ལག་ཡིན། དག་པ་ཁྲི་སྤྲུལ་སྐུ་ཕྲེང་བདུན་པ་བར་གྱིས་དགོན་དེའི་དགོན་བདག་གནང་། འདུ་ཁང་ཀ་བ་བཅུ་དྲུག་ནང་རྟེན་གཙོ་སྨན་འདམ་གྱི་རྗེ་ཡབ་སྲས་གསུམ་དང་རྟེན་སྐུ་ཇི་སྙེད་བཞུགས། དགེ་འདུན་བརྒྱད་བཅུ་སྐོར་གྱིས་རི་བོ་དགེ་ལྡན་གྱི་སྔགས་ཆོག་ཕྱག་བཞེད་མཛད་པ་ཡིན། ལོ་ལྟར་བོད་ཟླ་༤ཚེས་༡༥མགོན་ཆོས་ལྷ་གསུམ་གྱི་སྒོ་ནས་གར་འཆམ་གནང་སྲོལ་ཡོད། ད་ལྟ་སྔོན་གྱི་འདུ་ཁང་ལ་ཉམས་གསོ་གནང་བའི་ནང་སྔོན་གྱི་སྐུ་བརྙན་དེ་དག་གི་སྐུ་ཚབ་གསར་བཞེངས་གནང་བ་དང་ལྡེབས་རིས་རྙིང་མ་སོགས་མཇལ་རྒྱུ་ཡོད།