ཐོང་གཤོལ་འཁོར་ལོ་

ཡོང་ཁུངས་Wikipedia

བོད་ཀྱི་ལོ་ཐོའི་སྟེང་སོ་ནམ་འཁོར་ལོ་དང་ཐོང་གཤོལ་འཁོར་ལོ་ཞེས་རི་མོ་གཉིས་བཀོད་ཡོད་ཅིང་། ཐོང་གཤོལ་འཁོར་ལོའི་སྟེང་གི་ཨང་ཀི་རྣམས་རྒྱུ་སྐར་ཉེར་བདུན་མཚོན་བྱེད་ཡིན་ཅིང་ཉི་མས་འཁྱུ ད་པའི་སྐར་མ་ནས་གཤོལ་ལྕགས་ཀྱི་རྩེ་ལ་གཉིས་བཀོད་དེ། ས་མཐོང་ལ་གསུམ། མི་མཐོང་ལ་གསུམ། འཆར་བཟུང་ལ་གཉིས། གཤོལ་མདའ་ལ་བཅུ། གཉའ་ཤིང་ལ་བརྒྱད་བཀོད་དེ། ཟླ་བ་རྒྱུ་སྐར་ཉེར་བདུན་གྱི་གཞི་ཁྱོན་གང་དུ་གནས་པའི་སྐར་མ་དེ་གཤོལ་ལྕགས་རྩེ་གཉིས་ལ་སོང་ན་བཙའ་ཡིས་འཁྱེར་བ་ཐེ་ཚོམ་མེད་པ་དང་། ས་མཐོང་གསུམ་ལ་སོང་ན་ལེགས་ཀྱང་སྲོག་ཆགས་ལ་སྡང་བ། མི་མཐོང་གསུམ་ལ་སོང་ན་འབྲུ་རིགས་འཕེལ་ཞིང་ལེགས་པ། འཆང་བཟུང་ལ་སོང་ན་ལོ་ནད་བྱུང་བ། གཉའ་ཤིང་ལ་སོང་ན་དགྲ་ཡིས་འཇོམ་པའི་དོགས་པ། གཤོལ་མདའ་བཅུ་ལ་སོང་ན་བཏང་སྙོམས་བྱེད་པ་སོགས་ངོ་སྤྲོད་རགས་ཙམ་ཞུས་པ་ལས་ཞིབ་པའི་འབྲས་བུ་འདོན་སྟངས་ནི་གནམ་རིག་སྐར་རྩིས་པས་མ་གཏོགས་ལོ་ཐོ་ལྟ་ཐུབ་ཙམ་གྱིས་འབྲས་བུ་འདོན་ཐུབ་པ་མ་ཡིན་ནོ། ། གཞན་ཡང་ཞིང་འབྲོག་ཁུལ་ཏུ་ཤིན་ཏུ་སྨན་པའི་བྱ་གཞག་གནམ་དཔྱད་དང་། ས་ཞིང་འདེབས་བཀོལ་གྱི་དུས་ཚིགས་ནི་ལོ་ཐོའི་ནང་ཧ་ཅང་གསལ་ཞིང་སོ་ནམ་འགོ་འཛུགས་ཀྱི་སྔ་བསྣུར་དུ་ཐོང་གཤོལ་འཁོར་ལོ་དང་། སོ་ནམ་འཁོར་ལོའི་དགེ་འབྲས་དང་བསྟུན་པའི་གཉའ་སྤྲོ་བྱ་ཚེས་བཀོད་ཡོད་ལ་ལོ་འདིར་སོས་ཐན་ཡོད་མེད། སོས་འཕར་སྔ་ཕྱི། དགུན་ཐན་ཡོད་མེད་སོགས་ཚན་རིག་དང་མཐུན་པའི་ངང་མ་འོངས་སྔོན་དཔག་བྱས་ཤིང་། རྒྱུན་དུ་སད་སེར་ཉེན་ཁ་ཆེ་བའི་ས་ཁུལ་གྱི་ལྗང་པར་སྔོན་ཚུད་ནས་སྲུང་སྐྱོབ་བྱ་རྒྱུའི་གྲ་སྒྲིག་བྱ་དགོས་པའི་མངོན་བརྡ་བཏང་ཡོད། ས་ཞིང་འདེབས་བཀོལ་གྱི་དུས་ཚིགས་ཞེས་པ་ལས་ཡུལ་ལུང་སོ་སོར་སོ་ནམ་གྱི་བྱེད་སྒོ་ཁག་དུས་ཚིགས་སྔ་ཕྱི་ཇི་ལྟར་དགོས་པའི་ཚུལ་རྣམས་གསལ་པོར་བཏོན་ཡོད་པ་དེ་ཡང་སྤྱིར་ན་ལོ་དེར་སོ་ནམ་སྔ་འདེབས། བར་འདེབས། ཕྱི་འདེབས་བཟང་འབྲིང་ཞན་གསུམ་གང་འདྲ་ཡོད་མེད་དང་འདེབས་པའི་དུས་ཚིགས་ཟླ་ཚེས་གང་དུ་ཡིན་མིན། སྤྱིར་ན་ལོ་འདིར་ལོ་བཟང་ཕོ་མོ་ཁྱད་མེད་ལོ་རྟགས་གང་དང་ལོ་གང་དུ་སོན་པ། ཕ་མ་གཉིས་ཀ་འཛོམས་པ། དབང་པོར་སྐྱོན་མེད་པ། མིང་བྲ་ལེགས་པ་ག་གེ་མོ་ཞིག་གིས་ས་བོན་འདེབས་པ་དང་། སྐྱེ་ཤིང་འཛུགས་པ། ཨར་རྒྱག་ལ་སོགས་པའི་མཁར་ལས་སྣེ་འཛིན་སོགས་ལོ་འདིར་བྱ་བ་ཆེ་ཕྲའི་ལས་སྣེ་གཏོད་པའི་གནམ་ལོའི་ཕྱོགས་གཙང་གང་དུ་གཟིགས་དགོས་མིན། ཟླ་བ་གང་ནས་གང་བར་བུམ་སྟོང་གང་དུ་གནས་ཡོད་མེད། ས་ལུས་ཁ་དབྱེ་དང་གཉའ་སྤྲོ་བྱ་ཚེས་སོགས་བོད་ཀྱི་གནའ་སྲོལ་ལྡན་པའི་རྟེན་འབྲེལ་བྱ་ཚེས་ཀྱི་དུས་ཚོད་དང་། འདེབས་ཆུ་གཏོང་བའི་དུས་ཚིགས། གཞན་ཡང་ལོ་འབྲས་ལ་ཆུ་གནོད་དང་ཆུ་ལོག་སྔོན་འགོག་བྱ་རྒྱུར་སྔོན་ཚུད་ནས་ཟླ་བ་གང་གི་ཚེས་གང་ནས་ཆར་དུས་ཟིན་མིན་སོགས་ཁ་གསལ་དུ་གསུངས་པ་ནི་རྒྱ་ཆེའི་ཞིང་འབྲོག་མང་ཚོགས་ལ་ཤིན་ཏུ་ཕན་པ་ཞིག་ཡིན་ནོ། འདིར་སོ་ནམ་འགོ་འཛུགས་སོགས་བྱ་བ་ཆེ་ཕྲའི་ལས་སྣེ་གཏོད་པའི་དངོས་གཞི་ནམ་ལངས་སྔ་ཆ་ཕྱི་ཆ། ཉི་ཤར་སྔ་ཆ་ཕྱི་ཆ། ཉི་དྲོས་སྔ་ཆ་ཕྱི་ཆ་སོགས་ཀྱི་དུས་ཚོད་འཁོར་ལོའི་ཆུ་ཚོད་གང་དུ་འཁེལ་མིན་ཤེས་འདོད་ན། ཉིན་དྲུག་མཚན་དྲུག་གི་རྣམ་གཞག་དང་། འཁོར་ལོའི་ཆུ་ཚོད་ཀྱི་འབྲེལ་བ་ཞེས་པའི་ནང་གསལ་ལོ། །