ཐར་པ་གླིང

ཐར་པ་གླིང་ནི། ད་ལྟའི་ཆུ་ཤུར་རྫོང་ནས་སྤྱི་ལེ་བརྒྱད་ཙམ་སོང་ན་ཐར་པ་གླིང་གྲོང་དབུས་སུ་དགོན་དེ་མཇལ་རྒྱུ་ཡོད། ཐོག་མར་དགོན་དེ་རྙིང་དགོན་ཡིན་པ་ལ་རྒྱལ་བ་སྐལ་བཟང་དུས་དགེ་ལྡན་པར་བསྒྱུར་གནང་རྗེས་རྩེ་རྣམ་རྒྱལ་གྲྭ་ཚང་གི་གཞིས་དགོན་དུ་འགྱུར། ཐར་པ་གླིང་གི་སྡེའང་རྣམ་རྒྱལ་གྲྭ་ཚང་གི་ཡིན། སྐྱབས་རྗེ་ཁང་གསར་རིན་པོ་ཆེའང་གནས་དེར་ཡུན་རིང་བཞུགས་ཤིང་མཐར་དགོངས་པ་གཞན་དོན་དུ་ཕེབས་སའང་གནས་དེར་ཡིན། དགོན་དེ་ནས་གྲྭ་པ་ལྔ་རེ་ཟླ་རེ་བྱས་ནས་རྩེ་ལ་རྒྱུན་མཆོད་པར་ཕེབས་དགོས་ཤིང་། རྣམ་རྒྱལ་གྲྭ་ཚང་གི་གྲྭ་སྐལ་གཅིག་གི་འགྱེད་ཕོགས་གནང་སྲོལ་ཡོད། རྒྱུན་དུ་རྒྱལ་བ་རིན་པོ་ཆེའི་ཞབས་རིམ་སྒྲུབ་པ་དང་། སྐབས་རེ་ཁྲལ་སྡེ་ལས་ཁུངས་ཀྱི་དངོས་རྫས་དབོར་སྐྱེལ་སོགས་ལས་ཀ་ཙག་ཙིག་གནང་དགོས། སྔོན་འདུ་ཁང་ཀ་བ་ཉེར་གཉིས་ནང་རྟེན་གཙོ་ཐུབ་སྐུ་ཐོག་རྩེག་མ་དང་། རྒྱལ་བ་བྱམས་པ། གུ་རུ་རིན་པོ་ཆེ། རྗེ་ཙོང་ཁ་པ་བཅས་ཀྱི་སྐུ་བརྙན་དང་། རིན་ཆེན་ལས་བྲིས་པའི་བཀའ་འགྱུར་དང་། བསྟན་འགྱུར་སོགས་མཇལ་རྒྱུ་ཡོད། ད་ལྟ་གསར་བཞེངས་འདུ་ཁང་ཀ་བ་ལྔའི་ནང་རྗེ་ཡབ་སྲས་གསུམ་དང་། ཐུབ་དབང་གི་སྐུ་བརྙན་སོགས་གསར་བཞེངས་གནང་བ་མཇལ་རྒྱུ་ཡོད། དགོན་དེ་ནས་སྤྱི་ལེ་བདུན་ཙམ་སོང་ན་བ་ཏ་ཞེས་པར་བྱང་ཕྱོགས་འཕྲིན་ལས་རྒྱལ་པོའི་མགོན་ཁང་དང་། དགོན་དེ་ནས་རྐང་ཐང་མར་ཆུ་ཚོད་བཞི་ཙམ་སོང་ན་དགོན་ཤོག་སྐོར་པ་ཞེས་པར་དགོན་དེའི་དགོན་ལག་རིན་ཆེན་གླིང་ཞེས་པ་ཞིག་ཡོད་པ་དེར་མཁན་པོ་བྱང་ཆུབ་འབྱུང་གནས་དང་། མཁན་པོ་དད་པ་ཤེས་རབ་སོགས་ཀྱི་སྐུ་བརྙན་མང་པོ་ཡོད་ཀྱང་ད་ལྟ་ཉམས་གསོ་ཞུ་ཐུབ་མེད།