ཏྭེ་ནོ་པ་

ཡིག་བརྒྱའི་སྔགས་ནང་གི་"ཏྭེ་ནོ་པ་"ཞེས་པ་ནི་རྡོ་རྗེ་སེམས་དཔའ་ལ་ཐུགས་དམ་བསྐུལ་ཏེ་"ཁྱེད་ཀྱིས་ཉེ་བར་"ཞེས་པའི་དོན་ཡིན་ལ། རྗེས་ཀྱི་ཚིག་དང་སྦྱར་ན་"རྡོ་རྗེ་སེམས་དཔའ་ཁྱེད་ཀྱིས་བདག་ལ་ཉེ་བར་བཞུགས་པར་མཛོད་"ཅེས་པའི་གསོལ་འདེབས་སུ་འགྱུར་རོ།།

ཏྭེ་ནོ་པ་ཞེས་པའི་ངོ་སྤྲོད།

སྒྲའི་རྣམ་གཞག

ཏྭེ་ནོ་པ (त्वेनोप) ཞེས་པ་ནི་ལེགས་སྦྱར་སྐད་ཀྱི་ཚིག་གསུམ་འདུས་པ་ཞིག་ཡིན་ཏེ། སི་ཏུ་ཆོས་ཀྱི་འབྱུང་གནས་ཀྱིས། "ཏྭེ་ན་ཞེས་པ་ཡུཥྨ་ཏ྄་ཀྱི་ལུས་འགྱུར་ཏྭ་ཏ྄་ལ་རྣམ་དབྱེ་གསུམ་པའི་ཊཱ་བྱིན་པ་སྟེ་བོད་སྐད་ཁྱོད་ཀྱིས་ཞེས་པར་འགྱུར་བས་རྡོ་རྗེ་སེམས་དཔའ་ཁྱོད་ཀྱིས་ཞེས་བྱ་བའི་དོན་ཏོ།" ཞེས་གསུངས།

མཁན་པོ་དཔལ་ལྡན་ཤེས་རབ་ཀྱིས། "ཏ་བ་ཁྱེད་ཀྱི་སྐད་དོད་ལ་བརྩེགས་པ་ན་ཏྭ། དབྱངས་ཨེ་དང་སྦྱར་བས་ཏྭེ་ན། ཨུ་པ་ཉེ་བའི་སྐད་དོད་ལ་སྔ་མའི་ཨ་དང་ཕ་རོལ་གྱི་ཨུ་ལས་ཨ་ཨུ་ཨོའོ་ཞེས་པས་ཨོ་ལ་དྲངས་པས་ནོ་སྟེ། དེས་ན་ཏྭེ་ནོ་པ་ཁྱེད་ཀྱིས་ཉེ་བར་ཞེས་བྱའོ།" ཞེས་རྒྱས་པར་བཤད།

བོད་སྐད་དུ་བསྒྱུར་ཚུལ།

འགྲེལ་པ་རྣམས་ནས་ "ཁྱོད་ཀྱིས་ཉེ་བར" ཞེས་པར་མཐུན་པར་བསྒྱུར་ཡོད།

ཨ་ཁུ་ཤེས་རབ་རྒྱ་མཚོས། "ཏྭེ་ནོ་པ་ཏིཥྛ་ནི་ཉེ་བར་མནོས་ཤིག་གམ་གནས་པའོ།" ཞེས་གསུངས།

ཀློག་ཚུལ།

སི་ཏུས། "ཏ་ཡིག་གི་སྒྲ་ཅུང་ཟད་དང་བཅས་པའི་བ་ཕྱེད་ཝར་འབོད་པ་ལ་དབྱངས་ཨེ་སྦྱར་བའི་ལུས་ཀྱིས་མིག་འཛུམ་གཉིས་ཀྱི་ཡུན་དུ་བཀླག་དགོས་ཀྱི་ཏེ་ན་ཞེས་ཀློག་པ་ནི་མ་དག་པའོ།" ཞེས་གསུངས།

སྔགས་ཀྱི་ནང་གི་དོན།

ཡིག་བརྒྱའི་སྔགས་ཚིག་ "བཛྲ་སཏྭ་ཏྭེ་ནོ་པ་ཏིཥྛ" ཞེས་པའི་དོན་ནི།

མཁན་པོ་དཔལ་ལྡན་ཤེས་རབ་ཀྱིས། "རྡོ་རྗེ་སེམས་དཔའ་ཁྱེད་ཉེ་བར། བརྟན་པར་བདག་ལ་བཞུགས་པར་མཛོད།" ཅེས་བཤད།

པཎ་ཆེན་བློ་བཟང་ཆོས་རྒྱན་གྱིས། "རྡོ་རྗེ་སེམས་དཔའ་ཉིད་ཀྱིས་ཉེ་བར། ཏིཥྛ་ནི་གནས་པར་མཛོད།" ཞེས་གསུངས།

གསང་སྔགས་ཀྱི་ནང་དོན།

མཁན་པོ་དཔལ་ལྡན་ཤེས་རབ་ཀྱིས་བསྐྱེད་རིམ་དང་རྫོགས་རིམ་གྱི་དབྱེ་བས་རྒྱས་པར་བཤད་དེ།

བསྐྱེད་རིམ་ལྟར་ན། "རང་ཉིད་བདག་དམ་ཚིག་སེམས་དཔའ་རྡོ་རྗེ་སེམས་དཔའ་བསྒོམ། དེ་ནས་འོག་མིན་ཞིང་ནས་ལྷ་ཡེ་ཤེས་སེམས་དཔའ་རྡོར་སེམས་སྤྱན་དྲངས་ནས་རང་ལ་དམ་ཡེ་དབྱེར་མེད་ཕྱག་རྒྱས་བཅིངས་ཏེ།"

རྫོགས་རིམ་ལྟར་ན། "རྡོ་རྗེ་ཕུང་པོའི་ལུས་ཀྱི་གྲོང་ཁྱེར་ན་གནས་པ་རྩ་དང་། གཡོ་བ་རླུང་དང་། བཀོད་པ་བྱང་ཆུབ་སེམས་ཐིག་ལེ་གནད་དུ་བསྣུན་པ་ལ་བརྟེན་ནས་བདེ་སྟོང་ཕྱག་རྒྱ་ཆེན་པོའི་བདེ་གསལ་མི་རྟོག་པའི་ཡེ་ཤེས་མངོན་སུམ་ལམ་དུ་བྱེད།"

རྫོགས་ཆེན་ལྟར་ན། "ཀ་དག་ཁྲེགས་གཅོད་དང་ལྷུན་གྲུབ་ཐོད་རྒལ་གྱི་ལམ་མཆོག་རྨད་དུ་བྱུང་བ་ཐབས་ཤེས་དབྱེར་མེད་རང་གི་རིག་པ་རིག་སྟོང་དོན་གྱི་རྡོ་རྗེ་སེམས་དཔའ་དེ་ཉིད་ནི་སྔོན་ཆད་ཚེ་རབས་ཐོག་མེད་ནས་ད་ལྟའི་བར་རང་ངོ་མ་ཤེས་པས་ནོར་ལ། ད་ནི་བླ་མའི་བཀའ་དྲིན་གྱིས་རང་རིག་རྡོ་རྗེ་སེམས་དཔའ་དེ་ངོ་རང་ཐོག་ཏུ་འཕྲོད།"

མདོར་བསྡུ་ན།

ཏྭེ་ནོ་པ ཞེས་པ་ནི་"ཁྱོད་ཀྱིས་ཉེ་བར"ཞེས་པའི་དོན་ཏེ། རྡོ་རྗེ་སེམས་དཔའ་ལ་ཐུགས་དམ་བསྐུལ་ཏེ་རང་གི་རྒྱུད་ལ་ཉེ་བར་བཞུགས་པར་གསོལ་བ་འདེབས་པའི་ཚིག་ཡིན་ནོ།།

---