ཏིཥྛ་དྲྀ་ཌྷོ་མེ་བྷ་ཝ་

ཏིཥྛ་དྲྀ་ཌྷོ་མེ་བྷ་ཝ་ནི་རྡོ་རྗེ་སེམས་དཔའི་ཡིག་བརྒྱའི་ནང་གི་སྔགས་ཚིག་གལ་ཆེན་ཞིག་ཡིན། དེའི་དོན་ནི་ "བརྟན་པར་བདག་ལ་བཞུགས་པར་མཛོད།" ཅེས་པ་ཡིན། ཚིག་འདི་ནི་སྔགས་ཀྱི་རྒྱལ་པོ་རྡོ་རྗེ་སེམས་དཔའི་དགོངས་པ་འབོད་པའི་ཆེད་དུ་སྒྲུབ་པ་པོས་སྤྱོད་པའི་དམ་ཚིག་གི་ཚིག་ཡིན

ཚིག་འགྲེལ།

ཚིག་འདི་ནི་གསང་སྔགས་ཡིག་བརྒྱའི་ཆ་ཤས་ཤིག་ཡིན་ཞིང་། དེའི་ཚིག་དོན་སོ་སོར་ཕྱེ་ན། ཏིཥྛ་བཞུགས་པ། དྲྀ་ཌྷོ་བརྟན་པར། མེ་བདག (སྒྲུབ་པ་པོའི་རང་ཉིད)། བྷ་ཝ་མཛོད་ཅིག སི་ཏུ་ཆོས་ཀྱི་འབྱུང་གནས་ཀྱི་གསུང་ལྟར་ན། དེའི་ཆ་ཤས་སོ་སོའི་སྒྲ་དོན་རྒྱས་བཤད་ནི། ཏིཥྛ་ནི་བཞུགས་པ། དྲྀ་ཌྷོ་ནི་བརྟན་པར། མེ་ནི་བདག། བྷ་ཝ་ནི་མཛོད་ཅིག་ཅེས་སོ། “དེའང་ཚིག་སྔ་མ་རྣམས་དང་སྦྲེལ་ན་རྡོ་རྗེ་སེམས་དཔའ་ཁྱེད་བདག་ལ་བརྟན་པས་ཉེ་བར་བཞུགས་པར་མཛོད་ཅིག་ཅེས་འབྱུང་ངོ་།"

༡. བསྐྱེད་རིམ་གྱི་ངོས་ནས་བཤད་པ།

མཁན་པོ་དཔལ་ལྡན་ཤེས་རབ་ཀྱིས་བཤད་པ་ལྟར་ན། བསྐྱེད་རིམ་གྱི་ངོས་ནས་ཚིག་འདིའི་གོ་དོན་ནི། "སྐྱབས་འགྲོ་དང་བྱང་ཆུབ་སེམས་བསྐྱེད་སྔོན་དུ་འགྲོ་བས་ཏིང་འཛིན་རྣམ་གསུམ་ངང་ནས་རང་ཉིད་བདག་དམ་ཚིག་སེམས་དཔའ་རྡོ་རྗེ་སེམས་དཔའ་བསྒོམ། དེ་ནས་འོག་མིན་ཞིང་ནས་ལྷ་ཡེ་ཤེས་སེམས་དཔའ་རྡོར་སེམས་སྤྱན་དྲངས་ནས་རང་ལ་དམ་ཡེ་དབྱེར་མེད་ཕྱག་རྒྱས་བཅིངས་ཏེ་ཏིང་འཛིན་སེམས་དཔའི་ཐུགས་ཀར་ཟླ་སྟེང་ཧཱུྂ་ཡིག་དང་སྔགས་ཕྲེང་སྤྲོ་བསྡུ་ལས་བཞིས་རང་གཞན་སེམས་ཅན་རྣམས་ཀྱི་སྡིག་སྒྲིབ་ཉེས་ལྟུང་སྒྲིབ་གཉིས་ཀྱིས་བསྡུས་པ་རྣམས་སྦྱངས་ནས་ཁམས་གསུམ་སྣོད་བཅུད་ཐམས་ཅད་འོག་མིན་ཞིང་དང་། རྡོ་རྗེ་སེམས་དཔའི་སྐུ་གསུང་ཐུགས་ཀྱི་ངོ་བོ་ཉིད་ཡིན་པར་དམིགས་པ་གཏད་ལ་སེམས་བཟུང་བ་ནི། རྡོ་རྗེ་སེམས་དཔའ་ཁྱེད་ཉེ་བར། བརྟན་པར་བདག་ལ་བཞུགས་པར་མཛོད། ཅེས་པའི་དོན་ཏེ།"

༢. རྫོགས་རིམ་མཚན་བཅས་ཀྱི་ངོས་ནས་བཤད་པ།

རྫོགས་རིམ་མཚན་བཅས་ཀྱི་ངོས་ནས་བལྟས་ན། ཚིག་འདིའི་གོ་དོན་ནི། "རྡོ་རྗེ་ཕུང་པོའི་ལུས་ཀྱི་གྲོང་ཁྱེར་ན་གནས་པ་རྩ་དང་། གཡོ་བ་རླུང་དང་། བཀོད་པ་བྱང་ཆུབ་སེམས་ཐིག་ལེ་གནད་དུ་བསྣུན་པ་ལ་བརྟེན་ནས་བདེ་སྟོང་ཕྱག་རྒྱ་ཆེན་པོའི་བདེ་གསལ་མི་རྟོག་པའི་ཡེ་ཤེས་མངོན་སུམ་ལམ་དུ་བྱེད་ནས་བརྟན་གཡོ་སྣང་སྲིད་འཁོར་འདས་ཀྱི་ཆོས་རྣམས་བདེ་སྟོང་ཡེ་ཤེས་ཕྱག་རྒྱ་ཆེན་པོའི་ཀློང་ལས་མི་འདའ་བར་རྒྱས་འདེབས་པ་ནི། རྡོ་རྗེ་སེམས་དཔའ་ཁྱེད་ཉེ་བར། བརྟན་པར་བདག་ལ་བཞུགས་པར་མཛོད། ཅེས་པའོ།"

༣. རྫོགས་རིམ་མཚན་མེད་རྫོགས་ཆེན་གྱི་ངོས་ནས་བཤད་པ།

རྫོགས་རིམ་མཚན་མེད་རྫོགས་ཆེན་གྱི་ངོས་ནས་ཀྱང་གོ་དོན་ཟབ་མོ་འདི་ལྟར་བཤད་ཡོད། "རིག་པ་མི་འགྱུར་རྡོ་རྗེའི་ངང་། སེམས་ཅན་སྒྲོལ་ལ་ཆེས་དཔའ་བ། ཐམས་ཅད་མཉམ་པ་ཉིད་རྟོགས་པས། རྡོ་རྗེ་སེམས་དཔའ་མངོན་དུ་འགྱུར། ཞེས་པ་ལྟར་ཀ་དག་ཁྲེགས་གཅོད་དང་ལྷུན་གྲུབ་ཐོད་རྒལ་གྱི་ལམ་མཆོག་རྨད་དུ་བྱུང་བ་ཐབས་ཤེས་དབྱེར་མེད་རང་གི་རིག་པ་རིག་སྟོང་དོན་གྱི་རྡོ་རྗེ་སེམས་དཔའ་དེ་ཉིད་ནི་སྔོན་ཆད་ཚེ་རབས་ཐོག་མེད་ནས་ད་ལྟའི་བར་རང་ངོ་མ་ཤེས་པས་ནོར་ལ། ད་ནི་བླ་མའི་བཀའ་དྲིན་གྱིས་རང་རིག་རྡོ་རྗེ་སེམས་དཔའ་དེ་ངོ་རང་ཐོག་ཏུ་འཕྲོད། ཐག་གཅིག་ཐོག་ཏུ་བཅད། གདིང་གྲོལ་ཐོག་ཏུ་ བཅའ་བའི་རང་རིག་བཞི་ཆ་སུམ་བྲལ་ཟང་ཐལ་འདུས་མ་བྱས་པའི་ངང་དུ་འཇོག་པ། སེམས་ཀྱི་རང་བཞིན་ཆོས་དབྱིངས་ནམ་མཁའ་ཆེ། ཞེས་གསུངས་པ་ལྟ་བུའི་ཚུལ་གྱིས་མངོན་སུམ་དུ་གྱུར་པ་ལ། རྡོ་རྗེ་སེམས་དཔའ་ཁྱེད་ཉེ་བར། བརྟན་པར་བདག་ལ་བཞུགས་པར་མཛོད། ཅེས་ཉེ་བར་བརྟན་པར་དེ་ལས་མི་གཡོ་བར་གནས་དགོས་པའི་དོན་ཏོ།"

འབྲེལ་ཡོད་ཡིག་ཆ།

རྡོ་རྗེ་སེམས་དཔའི་ཡིག་བརྒྱ། རྡོ་རྗེ་སེམས་དཔའ། བསྐྱེད་རིམ། རྫོགས་རིམ།