ཉམ་ཐག་པའི་བུ་ཆུང་སོ་པ་ཀ་

སྔ་མོའི་དུས་ཤིག་ལ། ཆེས་དབུལ་ཞིང་ཕོངས་པའི་ཁྱིམ་ཚང་ཞིག་ཏུ་སོ་པ་ཀ(SOPAKA)ཞེས་པའི་བྱིས་པ་ཞིག་ཡོད། ཁོང་ལོ་བདུན་ལ་སོན་མ་ཐག་རང་གི་ཕ་ཚེ་ལས་འདས་སྟབས། ཨ་མས་སེམས་གནག་ཅིང་སྤྱོད་པ་རྩུབ་པའི་མི་སྡུག་ཅག་ཅིག་དང་ལྷན་ཡང་བསྐྱར་གཉེན་སྒྲིག་བྱས།

ཕ་ཚབ་དེས་དུས་རྒྱུན་དུ་ཉེས་པ་མེད་ཅིང་གཅེས་པར་འོས་པའི་བུ་ཆུང་སོ་པ་ཀ་ལ་ཚིག་རྩུབ་མོས་ངར་སྐད་སྒྲོག་ཅིང་། ཉེས་རྡུང་དང་གཤེ་གཤེ་སོགས་མནར་གཅོད་ཚད་མེད་གཏོང་གི་ཡོད། མ་ཟད་ཕ་ཚབ་དེའི་སེམས་ལ་དུས་རྒྱུན་དུ། བྱིས་པ་འདི་ནི་ཅི་འདྲའི་ཕན་མི་ཐོགས་ཤིང་སུན་སྣང་སྟེར་མཁན་ཞིག་རེད། འོན་ཀྱང་ཁོང་གི་ཨ་མ་བྱིས་པ་འདི་ལ་ཧ་ཅང་གི་བྱམས་པོ་དང་བརྩེ་བ་ཡོད་སྟབས། ངས་ཁོང་ལ་ཅི་ཡང་བྱེད་ཐུབ་ཀྱི་མི་འདུག དེས་ན་ངས་ཁོང་ལ་བྱ་ངན་ཅི་ཞིག་བྱས་ན་དགའ་སྙམ་བཞིན་ཡོད།

དགོང་མོ་ཞིག་ལ། ཕ་ཚབ་དེས་བུ་ཆུང་སོ་པ་ཀ་ལ། གཅེས་ཕྲུག འདིར་ཤོག་དང་། ངེད་གཉིས་འཆམ་འཆམ་ལ་འགྲོ། ཞེས་བཤད་པ་ན། སོ་པ་ཀ་ནི་རང་གི་ཕ་ཚབ་ཀྱིས་དེ་ལྟ་བུའི་གཅེས་སྐད་ཀྱི་སྒོ་ནས་སྐད་བཏང་བ་ལ་ཧང་སང་བར་གྱུར་ཏེ་བསམ་པར། ངའི་ཕ་ཚབ་ཀྱིས་དུས་ནམ་ཡང་ང་ལ་དེ་འདྲའི་གཅེས་སྐད་ཀྱི་སྒོ་ནས་འབོད་མ་མྱོང་། འོན་ཀྱང་ད་ལྟ་ཁོང་གིས་ཧ་ཅང་ཡག་མདོག་ཁ་པོ་བྱེད་ཀྱི་འདུག གཅིག་བྱས་ན་ངའི་ཨ་མས་ང་ལ་འཆམ་པོ་བྱེད་རོགས་གྱིས་ཞེས་ཕ་ཚབ་ལ་བཤད་པ་ཡིན་རྒྱུ་རེད་སྙམ་ནས། བུ་ཆུང་སོ་པ་ཀ་ཕ་ཚབ་དང་ལྷན་དུ་འཆམ་འཆམ་ལ་ཕྱིན།

ཕ་ཚབ་དེས་བུ་ཆུང་སོ་པ་ཀ་ཁྲིད་དེ་གཡས་གཡོན་ཀུན་ཏུ་དྲི་ངན་འཐིབ་ཅིང་། མི་རོས་གང་སར་ཁེངས་པའི་དུར་ཁྲོད་ཅིག་ཏུ་བཞག་སྟེ་མི་རོ་ཞིག་ལ་བཏགས་ནས་ཕྱིར་ལོག་པ་ན། བུ་ཆུང་སོ་པ་ཀ་འཇིགས་ཤིང་སྐྲག་སྟེ་ངུ་བཞིན་དུ། པ་ལགས། ཐུགས་རྗེས་གཟིགས། ཁྱོད་ཀྱིས་ང་དྲི་ངན་གྱིས་ཁེངས་པའི་མི་རོ་འདི་ལ་བཏགས་ནས་གཅིག་པུར་མ་གཡུག་རོགས། ང་ནི་ཧ་ཅང་གི་འཇིགས་ཤིང་སྐྲག ཐུགས་རྗེས་གཟིགས། ཞེས་བུ་ཆུང་སོ་པ་ཀས་ཞུ་བ་འཐེན་བཞིན་སྐད་ཤུགས་ཡོད་ཚད་ཀྱིས་ངུས་ན་ཡང་། ཕ་ཚབ་དེ་ལ་ནི་ཡ་ང་སྙིང་རྗེ་དང་ཕངས་སེམས་སྤུ་ཙམ་ཡང་མེད་པར་སོ་པ་ཀ་དུར་ཁྲོད་དེར་གཡུགས་ནས་ཕྱིན།

དེ་ནས་ས་རུབ་སྟེ་མུན་པ་ཡང་ཇེ་ནག་ནས་ཇེ་ནག་ཏུ་ཕྱིན་པ་ན། བུ་ཆུང་སོ་པ་ཀ་ནི་སྔར་བས་ཀྱང་འཇིགས་ཤིང་སྐྲག་པར་གྱུར། གང་ལྟར་དུར་ཁྲོད་དེར་མི་གཅིག་ཀྱང་མེད་པས་ཁོ་རང་སྐྲག་ཐག་ཆོད་དེ་ལུས་ཀྱི་སྤུ་གཟེངས་ཤིང་། གཟུགས་པོའི་ཐོག་ནས་རྔུལ་ནག་གི་ཆུ་རྒྱུན་བཞུར་ཏེ་ལུས་པོ་ཡོངས་རྫོགས་རློན་རྐྱང་དུ་ཆགས། ད་དུང་ཁོས་ཁྱི་སྤྱང་དང་། སྟག་དང་། གཟིགས་དང་། དེ་མིན་གྱི་འཇིགས་སུ་རུང་བའི་གཅན་གཟན་རྣམས་ཀྱིས་ངར་སྐད་སྒྲོག་པ་ཐོས་པས་དེ་ལས་ཀྱང་སྐད་ཤུགས་ཆེན་པོས་ངུས།

ད་གཟོད་ཁོ་རང་གིས་འཇིགས་སུ་རུང་བའི་དུར་ཁྲོད་འདིར་རང་ཉིད་ཁེར་རྐྱང་ཡིན་པ་ལས་མགོན་སྐྱབས་བྱེད་པའི་མི་གཅིག་ཀྱང་མེད་པ་ཤེས། དེ་ཙ་ན་བུ་ཆུང་སོ་པ་ཀས་རང་གི་མདུན་ཐད་ནས་འོད་ཀྱི་གོང་བུ་ཞིག་མཇལ་ཞིང་། དེའི་དཀྱིལ་དུ་ཆེས་ལྟ་ན་སྡུག་ཅིང་བཞིན་རས་ལེགས་པའི་སྐྱེས་བུ་ཞིག་འོད་ཆེམས་ཆེམས་ངང་རང་ཉིད་ཀྱི་ཕྱོགས་སུ་བྱོན་ཏེ། སྙན་ཞིང་འཇེབས་པའི་གསུང་ངག་ཅིག་གི་སྒོ་ནས་སྨྲས་པ། བུ་ཆུང་སོ་པ་ཀ ད་མ་ངུ་དང་། ཁྱེད་ཉིད་སྲུང་ཞིང་བསྐྱབ་པའི་སླད་ཁོ་བོ་ཁྱེད་ཀྱི་འཁྲིས་སུ་བསླེབ་ཡོད། དེས་ན་ཁྱེད་སྐྲག་མི་དགོས། ཞེས་པའི་གསུང་སྒྲ་ཞིག་ཐོས། དེ་འདྲ་ཞིག་གི་ངང་། བུ་ཆུང་སོ་པ་ཀ་ནི་རང་ཉིད་འདོགས་བྱེད་ཀྱི་ཐག་པ་ལས་ཡོངས་སུ་གྲོལ་ཏེ། རྒྱལ་བྱེད་ཚལ་གྱི་ཀུན་དགའ་ར་བ(JETA-WANA TEMPLE)ན་སངས་རྒྱས་བཅོམ་ལྡན་འདས་ཀྱི་སྐུ་མདུན་དུ་ལངས་འདུག་པས། ཁོ་རང་རང་ཉིད་ཀྱི་མིག་རྣ་སོགས་ལ་ཡང་ཡིད་མི་ཆེས་པ་ཞིག་བྱུང་།

སྤྱིར་ན་སངས་རྒྱས་བཅོམ་ལྡན་འདས་ནི་དུར་ཁྲོད་དེ་ལས་ཧ་ཅང་ཐག་རིང་བའི་སར་བཞུགས་ཡོད་ནའང་། ཁོང་གི་བུ་ཆུང་སོ་པ་ཀའི་སྨྲེ་སྔགས་ཀྱི་ངུ་སྐད་ཐོས་པས་ཚོན་མདོག་རྣམ་པར་བཀྲ་བའི་འོད་ཀྱི་ཕུང་པོ་ཞིག་བུ་ཆུང་དེའི་རྩར་བསྲིངས་ཏེ། ཁོང་གི་མཐུ་ནུས་ཀྱིས་བུ་ཆུང་སོ་པ་ཀའི་འདོགས་ཐག་བཀྲོལ་ནས། རྒྱལ་བྱེད་ཚལ་གྱི་ཀུན་དགའ་ར་བ་འདིར་ཁྲིད་ཅིང་། གཟུགས་པོ་ལ་གཙང་ཁྲུས་གནང་རྗེས་ཟ་རྒྱུའི་ཟས་དང་གྱོན་རྒྱུའི་གོས་སོགས་གནང་སྟེ་སེམས་གསོའི་ཚིག་གིས་དབུགས་དབྱུང་བར་མཛད་དོ། །

གནག་སེམས་ཆེ་བའི་ཕ་ཚབ་དེ་ཕྱིར་རང་ཁྱིམ་དུ་སླེབས་སྐབས། བུ་ཆུང་སོ་པ་ཀའི་མ་རྒན་གྱིས། ངའི་བུ་གང་དུ་ཡོད། ཅེས་དྲིས་པ་ན། གནག་སེམས་ཅན་གྱི་མི་དེས། ངས་ཤེས་མ་སོང་། ཁོ་ངའི་སྔོན་ལ་ཁྱིམ་དུ་ལོག་སོང་། ངས་བལྟས་ན་ཁོ་ཕལ་ཆེར་གཉིད་ཁུག་བསྡད་ཡོད་རྒྱུ་རེད། ཅེས་བཤད། འོན་ཀྱང་སོ་པ་ཀའི་མ་རྒན་ནི་རང་གི་བུ་ཆུང་ལ་སེམས་ཁུར་གྱིས་མཚན་གང་པོར་གཉིད་ཀྱང་མ་ཁུག

ཕྱི་ཉིན་ཞོགས་པ་སྔ་པོ་དེར་མོ་རང་གི་བསམ་པར། སངས་རྒྱས་བཅོམ་ལྡན་འདས་ཀྱིས་འདས་མ་འོངས་ད་ལྟ་དུས་གསུམ་གྱི་ཆོས་ཐམས་ཅད་མཁྱེན་གྱི་ཡོད་པས་ན། ཁོ་མོ་ངེས་པར་ཁོང་གི་སྐུ་མདུན་དུ་བཅར་ནས་བུ་ཆུང་སོ་པ་ཀ་གང་དུ་ཡོད་མེད་སྐོར་ལ་བཀའ་འདྲི་ཞུ་དགོས་སྙམ་ནས། ངུ་འབོད་བྱེད་བཞིན་རྒྱལ་བྱེད་ཚལ་གྱི་ཀུན་དགའ་ར་བར་ཕྱིན།

དེ་ནས་སངས་རྒྱས་བཅོམ་ལྡན་འདས་ཀྱིས་སོ་པ་ཀའི་ཨ་མ་ལ་སྨྲས་པ། ཨ་ཅག་ལགས། ཁྱེད་ཅིའི་ཕྱིར་ངུ་བཞིན་པ་ཡིན། ཞེས་བཀའ་འདྲི་གནང་བར། ཨ་མ་རྒན་མོ་དེས། སྐྱབས་མགོན་ལགས། ང་ལ་བུ་གཅིག་ལས་མེད། ཁོ་རང་མདང་དགོང་ངའི་ཁྱོ་གས་འཆམ་འཆམ་དུ་ཁྲིད་སྐབས་བོར་བརླག་ཏུ་སོང་འདུག ཁྱོ་ག་ཚུར་རང་ཁྱིམ་དུ་འབྱོར་དུས་ངའི་བུ་ལ་གནས་ཚུལ་ཅི་ཞིག་ལྷག་སོང་ཞེས་དྲིས་ན་ཡང་ཁོང་གིས་ཤེས་ཀྱི་མེད་ཟེར། ཞེས་ཞུས་པ་ན། སངས་རྒྱས་བཅོམ་ལྡན་འདས་ཀྱིས་སླར་ཡང་སྨྲས་པ། ཨ་ཅག་ལགས། ཁྱོད་རང་སེམས་ཁྲལ་མ་བྱེད་དང་། བུ་ཆུང་སོ་པ་ཀ་ནི་བདེ་མོ་འཚམས་པོའི་ངང་ངའི་རྩར་བསྡད་ཡོད། ཅེས་གསུངས་ནས། མོ་རང་ལ་སྔོན་མའི་བུ་ཆུང་གི་ཚུལ་དུ་མེད་ཅིང་རབ་བྱུང་བསྒྲུབས་ཟིན་པའི་བུ་ཆུང་སོ་པ་ཀ་མིག་སྟོན་གནང་བས། ཨ་མ་རྒན་མོ་དེས་སླར་ཡང་རང་ཉིད་ཀྱི་བུ་ཆུང་མཐོང་བར་དགའ་སྤྲོ་ཚད་མེད་སྐྱེས་ཤིང་། སངས་རྒྱས་བཅོམ་ལྡན་འདས་ཀྱི་སྐུ་མདུན་ནས་གསུང་ཆོས་ཀྱི་གདམས་པར་ཉན་ཏེ། ཐུགས་རྗེ་བླ་མེད་དུ་ཆེ། ཞེས་ཞུས་ནས་ཕྱིར་རང་ཁྱིམ་དུ་ལོག་གོ །