ཇོ་ནང་ཀུན་མཁྱེན་ཆེན་པོ་དོལ་པོ་བ་ཤེས་རབ་རྒྱལ་མཚན་

མི་གཞན་གྱིས་ཁྱེད་ཀྱི་ཤོག་ལྷེ་འདིའམ་དུམ་བུ་འདི་འབྲེལ་དགོས་པའི་བསམ་འཆར་འདུག „དོལ་པོ་པ་ཤེས་རབ་རྒྱལ་མཚན“! ཞིབ་ཅིང་ཕྲ་བའི་གླེང་མོལ་ མང་པོ་མཐོང་ཐུབ།

ཆོས་འཁོར་གསུམ་གྱི་དགོངས་པ་ཇི་བཞིན་མཁྱེན།།
     རྒྱུད་སྡེ་བཞི་ཡི་དེ་ཉིད་ཐུགས་སུ་ཆུད།།
     འགྲོ་བ་ཀུན་ལ་མ་ནོར་ལམ་སྟོན་པའི།།
     ཀུན་མཁྱེན་ཆོས་ཀྱི་རྗེ་ལ་གསོལ་བ་འདེབས།།

ཇོ་ནང་ཀུན་མཁྱེན་ཆེན་པོ་དོལ་པོ་བ་ཤེས་རབ་རྒྱལ་མཚན་མཆོག་ནི་ཡུལ་མངའ་རིའི་ཀ་ཡོ་རིའི་གྲོང་ཁྱེར་དུ་ཡབ་ཡེ་ཤེས་དབང་ཕྱུག་དང་།ཡུམ་ལྷ་མོ་ཚུལ་ཁྲིམས་རྒྱན་ཞེས་བྱ་བའི་སྲས་སུ་ཕྱི་ལོ་༡༣༩༣རབ་བྱུང་ལྔ་བའི་ཆུ་ཕོ་འབྲུག་ལ་སྐུ་བལྟམས།དེ་ཡང་གཙུག་ཏོར་རྣམ་པར་རྒྱལ་མའི་རྒྱུད་སོགས་མདོ་རྒྱུད་དུ་མར་ལུང་བསྟན་པའི་ཆོས་རྗེ་རིན་པོ་ཆེ་དགུང་ལོ་ལྔ་ནས་བཅུའི་བར།སྐུ་ཞང་བྱང་ཆུབ་སེང་གེ་སོགས་ལ་བརྟེན་ནས་གསང་སྔགས་རྙིང་མའི་ཆོས་ལ་བསླབས།དེ་ནས་སྟེང་ཤོད་དུ་བྱོན་ནས་སྐྱི་སྟོན་འཇམ་དབྱངས་གྲགས་པའི་ཞབས་ལ་གཏུགས།དགུང་ལོ་བཅུ་གཅིག་ནས་མཁན་པོ་ཚུལ་ཁྲིམས་སྙིང་པོ་སོགས་ལས་དགེ་ཚུལ་གྱི་སྡོམ་པ་བླངས།མཚན་ཤེས་རབ་རྒྱལ་མཚན་དཔལ་བཟང་པོ་ཞེས་བྱ་བར་བཏགས་ཤིང་ཀ་རི་ཀ་དང་།གཞུང་འགྲེལ་སོགས་བསླབ་བྱ་ཐམས་ཅད་གསན་ནས་སོ་ཐར་སྡོམ་ལྡན་གྱི་མཆོག་ཏུ་གྱུར།དགུང་ལོ་ཉེར་གཅིག་སྟེང་ས་སྐྱར་བྱོན་ནས་སློབ་གཉེར་མཐར་ཕྱིན་པ་གནང་།དགུང་ལོ་ཉེར་ལྔ་ནས་ས་སྐྱར་ཆོས་ཁྲི་ལ་བཞུགས་ནས།བླ་མ་དགེ་འདུན་སྟོང་ཕྲག་ཙམ་ལ་ཕར་ཚད་མངོན་འདུལ་བཞིའི་བཤད་པ་ཕུན་སུམ་ཚོགས་པ་དུས་གཅིག་ལ་མཛད་པས་གྲགས་པ་ཆེ།དགུང་ལོ་སོ་གཅིག་སྟེང་ཇོ་ནང་དུ་བྱོན་ནས་ཆོས་རྗེ་ཡོན་ཏན་རྒྱ་མཚོའི་དྲུང་ནས་སྦྱོར་དྲུག་ལ་སོགས་ཟབ་མོའི་ཆོས་སྐོར་ཐམས་ཅད་གསན་པས་ཉམས་མྱོང་ཁྱད་པར་ཅན་སྐྱེས།རྒྱད་འགྲེལ་ལ་སོགས་བཀའ་ཆོས་ཐམས་ཅད་གསན་ཏེ་རྡོ་རྗེ་ཚིག་གི་མདུད་པ་གྲོལ་ཞིང་།རྩིས་དང་ལྷ་བྲི་ལ་སོགས་ཞོར་ལ་མཛད།དགུང་ལོ་སོ་ལྔ་ནས་ཇོ་ནང་གདན་ས་མཛད།གདུལ་བྱ་ཐམས་ཅད་སྨིན་གྲོལ་ལམ་ལ་སྦྱར་ནས་དེའི་ལོ་གཉིས་ན་ཡོན་ཏན་རྒྱ་མཚོ་ཞི་བར་གཤེགས་རྫོངས་སུ་སྐུ་འབུམ་ཆེན་པོ་འཛམ་གླིང་རྒྱན་བཞེངས།དུས་འཁོར་ས་བཅད་ལ་སོགས་དུས་འཁོར་ཆ་ལག་བཅོ་བརྒྱད་དང་།ངེས་དོན་རྒྱ་མཚོ་ལ་སོགས་གྲུབ་མཐའི་ཆོས་སྐོར་བཅུ་དྲུག ཡུམ་གྱི་མཆན་བུ།གསོལ་འདེབས་ཉེར་ལ།ཐུགས་རྗེ་ཆེན་པོའི་ཆོས་སྐོར་ཉེར་གསུམ།བསྟོད་སྐོར་བཅུ་བཞི།སྐུ་འབུམ་ཆེན་པོའི་ཆོས་སྐོར་ལྔ།རྡོ་རྗེ་ཕྲེང་བའི་དབང་སྐོར་གསུམ།སྤྲིངས་ཡིག་བརྒྱད།སྨོན་ལམ་གསུམ།བཀྲ་ཤིས་བཞི་སྟེ་གསུང་ཆོས་དོན་ལྔ་གསུངས་ཤིང་།རྒྱུད་བླ་མའི་འགྲེལ་བ་དང་།བཀའ་བསྡུ་བཞི་པ།ངེས་དོན་རྒྱ་མཚོ་སོགས་མཛད་ནས་དབུ་མ་གཞན་སྟོང་གི་སྲོལ་རྒྱ་ཆེར་ཕྱེ་ནས་ཐུབ་བསྟན་གསལ་བར་མཛད། ལོ་ཙ་བ་བློ་གྲོས་དཔལ་ལ་གདན་ས་གཏད་ཅིང་།དགུང་ལོ་རེ་གསུམ་ནས་ལོ་ཙྭ་བ་ཆེན་པོ་ཞི་བར་གཤེགས་ནས།ཆོས་རྗེ་ཕྱོགས་ལས་རྣམ་རྒྱལ་ལ་གདན་ས་གཏད།རྫུ་འཕྲུལ་དང་གྲུབ་རྟགས་ཡང་མང་དུ་མཛད།དགུང་ལོ་བདུན་ཅུ་ཐམ་པར་ཐུགས་ཀྱི་དགོངས་པ་མཐའ་དག་རྫོགས་པའི་ཚེ།ཕྱི་ལོ ༡༣༦༡ ལྕགས་མོ་གླང་གི་ལོ་ལ་ཞི་བར་གཤེགས་པའི་ཚུལ་བསྟན་ནས།ས་གཡོས་པ་དང་།འཇའ་འོད་དང་མེ་ཏོག་གི་ཆར་བ་ལ་སོགས་པ་ངོ་མཚར་བའི་ལྟས་དཔག་ཏུ་མེད་པ་བྱུང་ངོ་།། མིང་གི་རྣམ་གྲངས་ལ། ཀུན་མཁྱེན་རྟོན་པ་བཞི་ལྡན། རྗེ་ཇོ་ནང་པ་ཆེན་པོ། ཀུན་མཁྱེན་དོལ་པོ་སངས་རྒྱས། ཆོས་རྗེ་ཐམས་ཅད་མཁྱེན་པ། ཆོས་རྗེ་ཀུན་མཁྱེན་ཆེན་པོ། ཀུན་མཁྱེན་ཤེས་རབ་རྒྱལ་མཚན། དོལ་པོ་པ་ཤེས་རབ་རྒྱལ་མཚན།